དེ་རིང་སྔ་དྲོར་བཀའ་དྲུང་གསར་པ་ཆུ་སྐྱ་སྦྲ་གཉིས་ཚེ་རྒྱལ་ལགས་དང་བཀའ་དྲུང་ཟུར་པ་རྫོང་ཁ་སྟོབས་རྒྱལ་ཚེ་རིང་ལགས་གཉིས་བར་བཀའ་ཐམ་སྲིད་ཞིའི་བདེ་སྐྱིད་དང་། རྟགས་ཐམ། སེལ་ཐམ་སོགས་རྩིས་སྤྲོད་རྩིས་ལེན་གནང་། དེ་རིང་སྔ་དྲོའི་ཆུ་ཚོད་ ༩།༣༠ ཙམ་ལ་བོད་མིའི་སྒྲིག་འཛིགས་བཀའ་དྲུང་ཡིག་ཚང་དུ། བཀའ་དྲུང་གསར་པ་ཆུ་སྐྱ་སྦྲ་གཉིས་ཚེ་རྒྱལ་ལགས་དང་། བཀའ་དྲུང་ཟུར་པ་རྫོང་ཁ་སྟོབས་རྒྱལ་ཚེ་རིང་ལགས། སྤྲོད་དཔང་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་བཅས་ལྷན་འཛོམས་ཐོག བཀའ་དྲུང་གསར་རྙིང་གཉིས་བར་བཀའ་ཐམ་སྲིད་ཞིའི་བདེ་སྐྱིད་དང་། རྟགས་ཐམ། སེལ་ཐམ་བཅས་གཙོ་བོར་གྱུར་བའི་ཡིག་སྣོད་དང་འཛིན་ཆས། གལ་ཆེའི་ཅ་དངོས་སོགས་རྩིས་སྤྲོད་རྩིས་ལེན་གྱི་མཛད་སྒོ་སྟབས་བདེ་ཞིག་ཚོགས་ཡོད་འདུག

འདི་གའི་གསར་འགོད་པས་བཀའ་དྲུང་གསར་པ་ཆུ་སྐྱ་སྦྲ་གཉིས་ཚེ་རྒྱལ་ལགས་སུ་རྩིས་སྤྲོད་རྩིས་ལེན་ག་འདྲ་བྱུང་དྲིས་པར་ཁོང་གིས། རྩིས་སྤྲོད་རྩིས་ལེན་གྱི་ལས་གཞི་དེ་ཕྱི་ཚེས་ ༨ ནས་མགོ་འཛུགས་ཀྱིས་ལས་བྱེད་ངོ་སྤྲོད་དང་ཚན་པ་ཁག་ངོ་སྤྲོད། ཅ་དངོས་ཁག་རྩིས་སྤྲོད་རྩིས་ལེན་དང་ཡིག་ཆ་ཁག་ལ་མཚན་རྟགས་བསྐྱོན་པ་སོགས་གནང་ཡོད་པ་དང་། དེ་རིང་ཞོགས་པ་ནས་དངུལ་ཁང་ལ་མཚན་རྟགས་ཞུ་རྒྱུ་དང་རྟེན་འབྲེལ་མཛད་སྒོ་ཚོགས་པ་སོགས་གནང་ཡོད་པ་རེད། མདོར་བསྡུས་ན་རྩིས་སྤྲོད་རྩིས་ལེན་དེ་དཔེ་ཡག་པོ་བྱུང་སོང་བ་དང་། ལས་བྱེད་སྐུ་བགྲེས་པ་དང་ཉམས་མྱོང་ཡོད་མཁན་མི་ལོ་ ༤༤ ལྷག་རིང་ཞབས་ཞུ་ཞུས་པའི་མྱོང་བ་ཅན་གྱི་མི་ཞིག་གི་ལག་ནས་རྩིས་ལེན་ཐུབ་པ་དེ་སྐལ་བ་བཟང་བོ་བྱུང་སོང་བསམ་ཡོད། ཅེས་བརྗོད་བྱུང་།

མ་འོངས་པར་ལས་དོན་གནང་ཕྱོགས་ཐད་དམིགས་ཡུལ་དང་རེ་བ་ག་འདྲ་ཡོད་དྲིས་པར་ཁོང་གིས། བཀའ་ཤག་གིས་ཐུགས་རེ་ཞིག་གནང་ནས་བཀའ་དྲུང་ལ་ཡར་བསྐོས་གནང་པ་དང་། ང་རང་གི་དམིགས་ཡུལ་དང་རེ་བ་ཟེར་ན་རེད་གང་ལྟར་ཧུར་ཐག་འབད་ཐག་གནང་རྒྱུའི་དམ་བཅའ་བརྟན་པོ་ཡོད་ལ། ང་རང་ལ་ཆ་བཞག་ན། མི་ལོ་ ༢༥ ལྷག་ལ་གཞུང་ཞབས་ནང་ལས་ཀ་བྱས་ཏེ་བསྡད་པ་དང་། སྤྱིར་བཀའ་དྲུང་གཅིག་པུས་འགུལ་སྐྱོད་གཏང་རྒྱུ་གང་ཡང་མེད་པར་ཞབས་འོག་ལས་བྱེད་ཚང་མའི་མཐུན་སྦྱོར་དང་གོང་རིམ་ནས་ལམ་སྟོན་སོགས་ཕེབས་དགོས་པ་དང་། དེ་དག་ཡོད་ཚད་གཞི་ལ་བཞག་པའི་ཐོག་ནས་ལས་དོན་ཐད་ཧུར་ཐག་བྱེད་པའི་བསམ་བློ་ཡོད། ཅེས་བརྗོད་བྱུང་།

བོད་མིའི་སྒྲིག་འཛུགས་ཀྱི་དྲ་བའི་ཐོག་པར་དང་གནས་ཚུལ་སྤེལ་བ་ལྟར་ན། ཆུ་སྐྱ་སྦྲ་གཉིས་ཚེ་རྒྱལ་ལགས་ཕྱི་ལོ་ ༡༩༩༣ ཟླ་ ༡༠ ཚེས་ ༡ ནས་དྲུང་ལས་གནས་རིམ་ཐོག་གསར་བསྐོ་གནང་སྟེ། ཕྱི་ལོ་ ༡༩༩༣ ཟླ་ ༡༠ ཚེས་ ༢༠ ནས་ཚོད་བལྟའི་ཐོག་འཕྲོད་བསྟེན་ལས་ཁུངས་སུ་དྲུང་ལས་གནས་རིམ་ཐོག་ལས་འཁུར་ཞུས་ཡོད་པ་དང་།  ཕྱི་ལོ་ ༡༩༩༤ ཟླ་ ༦ ཚེས་ ༢༩ ནས་འཕྲོད་བསྟེན་དྲུང་ལས་ངོ་མ་དང་ཕྱི་ལོ་ ༡༩༩༧ ཟླ་ ༥ ཚེས་ ༩ ནས་འཕྲོད་བསྟེན་དྲུང་གཞོན། ཕྱི་ལོ་ ༢༠༠༠ ཟླ་ ༩ ཚེས་ ༡ ནས་ཌལ་ཧོར་དུ་གནས་སྤོས་གནང་སྟེ་བཟོ་མགོ་དང་ས་གནས་མགོ་འཛིན་གནང་། ཕྱི་ལོ་ ༢༠༠༢ ཟླ་ ༧ ཚེས་ ༨ ནས་ཟུང་དྲུང་གནས་རིམ་དུ་སྤར་ཏེ་ནང་སྲིད་ལས་ཁུངས་ཀྱི་ཟུང་དྲུང་། ཕྱི་ལོ་ ༢༠༠༤ ཟླ་ ༦ ཚེས་ ༡༠ ནས་འཕྲོད་བསྟེན་ལས་ཁུངས་ཀྱི་ཟུང་དྲུང་། ཕྱི་ལོ་ ༢༠༠༦ ཟླ་ ༣ ཚེས་ ༦ ནས་ཕྱི་ལོ་ ༢༠༠༨ ཟླ་ ༣ ཚེས་ ༥ བར་མངོན་དགའ་སློབ་གྲྭའི་འགན་འཛིན་དུ་ཞབས་གཡར་དང་ཕྱི་ལོ་ ༢༠༠༨ ཟླ་ ༣ ཚེས་ ༦ ནས་ལོ་གཉིས་རིང་ཞབས་གཡར་འཕར་འགྱངས་གནང་སྟེ་ལས་འཁུར་ཞུས།

ཕྱི་ལོ་༢༠༡༠ ཟླ་ ༡ ཚེས་ ༢༠ ནས་ཞབས་ལོའི་ཆ་ནས་དྲུང་ཆེ་ལས་འཕར་གྱི་གནས་རིམ་དུ་སྤར་བ་དང་འབྲེལ་ཕྱི་ལོ་ ༢༠༡༠ ཟླ་ ༣ ཚེས་ ༥ ནས་བཀའ་ཤག་ངེས་མེད་དུ་གནས་སྤོས་གནང་ཡོད་པ་དང་། ཕྱི་ལོ་ ༢༠༡༠ ཟླ་ ༡༡ ཚེས་ ༡ ནས་འཕྲོད་བསྟེན་ལས་ཁུངས་སུ་གནས་སྤོས། ཕྱི་ལོ་ ༢༠༡༤ ཟླ་ ༡༠ ཚེས་ ༧ ནས་འཕྲོད་བསྟེན་ལས་ཁུངས་ཀྱི་དྲུང་ཆེ་ལས་ཚབ་ཏུ་བསྐོ་བཞག་གནང་། ཕྱི་ལོ་ ༢༠༡༤ ཟླ་ ༡༠ ཚེས་ ༡༣ ནས་དྲུང་ཡིག་ཆེན་མོའི་གནས་རིམ་དུ་སྤར། ཕྱི་ལོ་ ༢༠༡༤ ཟླ་ ༡༠ ཚེས་ ༡༥ ནས་འཕྲོད་བསྟེན་ལས་ཁུངས་ཀྱི་དྲུང་ཡིག་ཆེན་མོར་བསྐོ་བཞག་གནང་བ་བཅས་ད་བར་ཁྱོན་ལོ་ངོ་ ༢༥ ལྷག་རིང་བོད་མིའི་སྒྲིག་འཛུགས་ལ་ཞབས་ཞུ་ཞུས་ཡོད་འདུག

གསར་འགོད་པ། སངས་རྒྱས་དཀོན་མཆོག