སློབ་མ་བེད་སྤྱོད་གཏོང་བའི་རིག་གསར་གྱི་ལོ་རྒྱུས་ནག་ཉེས་བསྐྱར་དུ་བཟོ་ཉེན་འདུག

རྒྱ་ནག་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ས་ཁུལ་ཁག་དང་དབུལ་ཕོངས་གྲོང་གསེབ་ཁག་ལ་དྭང་བླངས་སློབ་མ་མང་ཤོས་གཏོང་རྒྱུ་ཡིན་ཟེར།

ཟླ་འདིའི་ཕྱི་ཚེས་ ༡༡ ཉིན། ཨ་རིའི་གོ་ལའི་ཆ་འཕྲིན་གསར་ཁང་གཙོས་རྒྱལ་སྤྱིའི་གསར་ཁང་ཁག་གིས་གནས་ཚུལ་སྤེལ་བ་ལྟར་ན། རྒྱ་ནག་དམར་ཤོག་ཚོགས་པས་ཕྱི་ལོ་ ༢༠༢༢ བར་དྭང་བླངས་སློབ་མ་ས་ཡ་ ༡༠ ལྷག་དཔལ་འབྱོར་དང་ཚན་རིག་ལག་རྩལ་ཡར་རྒྱས་གཏོང་ཆེད་གྲོང་གསེབ་ཁུལ་དུ་གཏོང་ཚར་བ་བྱ་རྒྱུ་ཡིན་སྐོར་བསྒྲགས་ཡོད་པ་དང་། བོད་རྒྱའི་གནད་དོན་ཉམས་ཞིབ་པ་སངས་རྒྱས་སྐྱབས་ལགས་ཀྱིས་ལས་འགུལ་འདིའི་རིགས་ཕྱིའི་རྣམ་པ་དང་ཚིག་བེད་སྤྱོད་བྱེད་སྟངས་ལ་ཧ་ཅང་ཛ་དྲག་དང་ཉེན་ཁ་མི་མངོན་ཡང་། དོན་གྱིས་རིག་གསར་ལས་འགུལ་དང་གཅིག་མཚུངས་ཀྱི་ནུས་པ་དང་འབྲས་བུ་ཐོན་གྱི་ཡོད་སྐོར་བརྗོད་བྱུང་།

ཉི་ཧོང་དུས་བབ་ཀྱིས་སྤེལ་བའི་གནས་ཚུལ་ནང་། རྒྱ་ནག་དམར་ཤོག་ཚོགས་པའི་གཞུང་འབྲེལ་ཡིག་ཆ་ལྟར་ན། རྒྱ་ནག་གི་ན་གཞོན་ཚོགས་པས་དྭང་བླངས་སློབ་མ་ས་ཡ་ ༡༠ ལྷག་གྲོང་གསེབ་ཁུལ་དུ་གཏོང་རྒྱུའི་ཁས་ལེན་དམ་བཅའ་བྱས་ཡོད་པ་དང་། དྭང་བླངས་སློབ་མ་མང་པོ་གྲོང་ཁྱེར་དང་གྲོང་གསེབ་ཁུལ་དུ་གཏང་སྟེ། དཔལ་འབྱོར་དང་ཚན་རྩལ་དོ་མཉམ་པའི་གནད་དོན་ཁག་ཐག་གཅོད་དང་། ཚན་རིག་དང་འཕྲུལ་ལས་ཤེས་བྱ་ཁྱབ་སྤེལ་གཏོང་ཆེད་དུ་ཡིན་སྐོར་བརྗོད་འདུག

གནད་དོན་དེའི་ཐད་རྒྱ་ནག་ཧེ་ནན་ཞིང་ཆེན་གྱི་གྲོང་གསེབ་ཅིག་གི་མགོ་འཁྲིད་གཞོན་པ་ཀྲང་ལིན་པིན་(Zhang Linbin)ཟེར་བ་ཞིག་གིས། ང་ཚོས་ན་གཞོན་ཚོ་བེད་སྤྱོད་ཀྱིས་གྲོང་གསེབ་ཁུལ་དུ་ཚན་རིག་དང་འཕྲུལ་ལས་ལག་རྩལ་ཐད་རོགས་སྐྱོར་དང་སྲོལ་རྒྱུན་ཡར་རྒྱས་ལམ་ལུགས་སྐོར་ལ་ལམ་སྟོན་བྱེད་དུ་གཏོང་གི་ཡོད་པ་རེད། སློབ་མ་ཚོ་དབྱར་ནང་གི་གུང་གསེང་དང་བསྟུན་ནས་གྲོང་གསེབ་ཁག་ནང་འགྲོ་རྒྱུ་ཡིན་པ་དང་། མི་འབོར་བརྒྱ་ཆ་ ༩༠ ཟིན་པའི་རྒྱ་ནག་ཧན་མི་རིགས་དང་བོད་དང་ཡུ་གུར་ལྟ་བུའི་གྲངས་ཉུང་མི་རིགས་བར་གྱི་འབྲེལ་ལམ་དེ་རྒྱུན་དུ་དཀའ་རྙོག་ཅན་ཞིག་ཡིན་པ་དང་། དྭང་བླངས་སློབ་མ་ཚོ་ཆེད་དམིགས་གྲངས་ཉུང་མི་རིགས་ཁག་དང་རྒྱ་ནག་གི་དབུལ་ཕོངས་གྲོང་གསེབ་ཁག་ལ་མང་ཤོས་གཏོང་རྒྱུ་ཡིན་པ་རེད། ཅེས་བརྗོད་འདུག

འདི་གའི་གསར་འགོད་པས་བོད་རྒྱའི་གནད་དོན་ཉམས་ཞིབ་པ་དང་རྒྱ་ཡིག་རྩོམ་པ་པོ་སངས་རྒྱས་སྐྱབས་ལགས་སུ། ཐེངས་འདིར་དྭང་བླངས་སློབ་མ་མང་པོ་གྲོང་གསེབ་ཁུལ་དུ་གཏོང་གི་ཡོད་པ་དེའི་རྒྱབ་ལྗོངས་དམིགས་ཡུལ་ཅི་ཡིན་དྲིས་པར་ཁོང་གིས། ད་ལྟ་རྩོད་གཞི་རུ་གྱུར་པའི་ན་གཞོན་གཞི་རིམ་ལ་གཏོང་རྒྱུ་ཟེར་བ་དེར་དམིགས་ཡུལ་མང་པོ་ཡོད་སྲིད་ན་ཡང་། གཅིག་ནི་ད་ལྟའི་ཆར་རྒྱ་ནག་གི་གྲོང་ཁྱེར་ཁག་ཏུ་ན་གཞོན་མང་པོར་ལས་ཀ་མེད་པའི་དཀའ་ངལ་ཆེན་པོ་འཕྲད་བཞིན་ཡོད་པ་དང་། དེ་ཚོ་གྲོང་ཁྱེར་ནང་ལས་ཀ་མེད་པར་ཡུན་རིང་སོང་ན་རྒྱ་ནག་གིས་བཤད་བཞིན་པའི་སྤྱི་ཚོགས་བདེ་འཇགས་ལ་ཉེན་ཁ་ཡོད་སྟབས། མར་གཞི་རིམ་དུ་བཏང་ནས་དཀའ་ངལ་དེ་དག་ཡུད་ཙམ་རིང་སེལ་ཐབས་དང་། ཕྱོགས་གཅིག་ནས་ན་གཞོན་དེ་དག་བོད་སོགས་གྲངས་ཉུང་མི་རིགས་ས་ཁུལ་ཁག་ལ་གཏང་པ་ཡིན་ན། སོ་ཉུལ་ལས་ཀ་དང་བདེ་འཇགས་ཆེད་བེད་སྤྱོད་གཏོང་ཐུབ་བཞིན་ཡོད་ཀྱང་། རྒྱ་ནག་གི་མི་རབས་བརྗེ་བོ་རྒྱག་གི་ཡོད་པ་དང་། ད་ལྟ་དེ་སྔོན་བཞིན་ན་གཞོན་ཚོ་བེད་སྤྱོད་གཏོང་ཆོག་ཆོག་མེད་པ་དང་། སྔོན་ཆད་རྒྱ་ནག་གི་མཐོ་རིམ་དཔོན་རིགས་ཚོའི་བུ་དང་བུ་མོ་ཚོའང་བཏང་ཡོད་ན་ཡང་། ད་ལྟའི་ཆར་རྒྱ་ནག་གི་མཐོ་རིམ་དཔོན་རིགས་ཚོའི་བུ་ཕྲུག་ཚང་མ་ཕྱི་རྒྱལ་ལ་བཏང་། དེ་བཞིན་ཕྱུག་བདག་ཚོས་ཀྱང་རང་གི་བུ་ཕྲུག་ཚོ་ཕྱི་རྒྱལ་ལ་བཏང་ཚར་པ་རེད། ཤུལ་དུ་ཡོད་པ་ཚོ་དབང་མེད་རྒྱུ་མེད་ཀྱི་ན་གཞོན་མདུན་ལམ་མེད་མཁན་དེ་ཚོ་ཡིན་པ་དང་། ཁོ་ཚོའི་ཁྲོད་གཞི་རིམ་ནས་ཡོང་མཁན་མང་པོ་ཡོད་པ་རེད། དེར་བརྟེན་ཁོ་ཚོ་གྲོང་ཁྱེར་ནས་སྡོད་མི་འཇུག་པར་ཕྱིར་ཕ་ཡུལ་ལ་བཏང་བ་འདྲ་པོ་རེད་ལ། ཁོ་ཚོ་ཡང་ཡུན་རིང་འདུག་རྒྱུ་ཁག་པོ་རེད། ཕྱི་རྒྱལ་ལ་མི་ཐར་རུང་གྲོང་ཁྱེར་གང་རུང་ཞིག་ལ་འགྲོ་ཐབས་བྱེད་རྒྱུ་རེད། ཅེས་བརྗོད་བྱུང་།ཡང་ཁོང་ལ་དེ་སྔོན་རིག་གནས་གསར་བརྗེ་སྐབས་བོད་ཁུལ་སོགས་སུ་བཏང་བའི་ན་གཞོན་ཤེས་ཡོན་དྭང་བླངས་བ་ཟེར་བ་ཚོ་དམིགས་ཡུལ་ག་འདྲ་ཞིག་གི་འོག་ནས་བཏང་ཡོད་པ་དང་། ཁོ་ཚོས་མི་མང་ལ་ཕན་ཐོགས་བྱུང་ཡོད་མེད་སོགས་དྲིས་པར། རིག་གནས་གསར་བརྗེ་སྐབས་བོད་ལ་ཡོང་བའི་དམར་སྲུང་དམག་ཟེར་བ་ཚོའི་དམིགས་ཡུལ་གཙོ་བོ་བོད་ཀྱི་ན་གཞོན་ཚོ་དམར་སྲུང་དམག་གི་ནང་ལེན་རྒྱུ་དང་། ཁོ་ཚོར་རྙིང་བཞི་རྩ་གཏོར་ལས་འགུལ་དང་མི་མང་ལ་འཐབ་རྩོད། ས་གནས་དཔོན་རིགས་ཀྱི་དབང་ཆ་འཕྲོག་པ་སོགས་བཀོད་སྒྲིག་བྱེད་དུ་ཡོང་བ་རེད། དེ་དག་གིས་བོད་ལ་དགེ་ཕན་སྤུ་ཙམ་ཡང་བསྒྲུབས་མེད་པ་རེད། རྗེས་སུ་རྒྱ་ནག་གཞུང་གིས་བསྐྱར་དུ་ན་གཞོན་མང་པོ་ཞིག་བོད་དང་རྒྱ་ནག་གི་གཞི་རིམ་ལ་བཏང་པ་རེད། དེ་ཚོས་རིག་གསར་ནང་བཞིན་ལས་འགུལ་སྤེལ་མེད་ན་ཡང་ཕན་ཐོགས་གང་ཡང་བྱུང་མེད་པ་དང་། སྐབས་དེའི་རྒྱ་རིགས་ན་གཞོན་དེ་ཚོ་བོད་དུ་ཡོང་ནས་བོད་དང་བོད་མི་ཚོར་རྒྱུས་ལོན་ལོ་མང་རིང་བྱེད་ཐུབ་ཡོད་པ་དང་། མི་རབས་དེ་ད་ལྟ་རྒྱ་ནག་གི་དབང་འཛིན་པ་ཆགས་ཡོད་པ་དང་། ཁོ་ཚོས་བོད་ལ་དབང་བསྒྱུར་ག་འདྲ་དགོས་མིན་རྒྱ་ནག་གཞུང་ལ་ཕན་ཐོགས་ཏན་ཏན་བྱུང་ཡོད་པ་རེད། ཅེས་བརྗོད་བྱུང་།

མཇུག་ཏུ་ད་ལྟའི་ཆར་རིག་གནས་གསར་བརྗེ་བསྐྱར་དུ་ལངས་ཐུབ་མིན་དྲིས་པར་ཁོང་གིས། ད་ལྟ་རྒྱ་ནག་ནང་སྔོན་མའི་རིག་གནས་གསར་བརྗེ་རྣམ་པ་དང་ལས་སྟངས་གཅིག་པ་བྱུང་རྒྱུ་ཁག་པོ་རེད། ཡིན་ན་ཡང་། རྣམ་པ་མི་འདྲ་བ་ཙམ་མ་གཏོགས་ངོ་བོ་གཅིག་པའི་ལས་འགུལ་མང་པོ་ཞིག་སྤེལ་བཞིན་ཡོད་པ་རེད། དཔེར་ན། བོད་ཀྱི་རིག་གནས་དང་སྐད་ཡིག་སྲོལ་རྒྱུན་སོགས་རྒྱལ་ཁབ་ཀྱི་སྟོབས་ཤུགས་དང་མིང་སྣ་ཚོགས་ཀྱི་འོག་ནས་རྩ་མེད་བཟོ་གང་ཐུབ་བྱེད་ཀྱི་ཡོད་པ་དང་། དགོན་སྡེ་ཁག་ལ་ཚོད་འཛིན་དམ་དྲག་དང་བོད་བརྒྱུད་ནང་བསྟན་གྱི་དགོངས་དོན་ལ་འགྲེལ་བཤད་གསར་པ་རྒྱག་པ་དང་། ལམ་གཅིག་རྒྱུད་གཅིག་ལ་ནང་བསྟན་གྱིས་ཞབས་འདེགས་ཞུ་བ་ཟེར་བ། ནང་བསྟན་སྤྱི་ཚོགས་རིང་ལུགས་དང་མཐུན་དགོས་པ། བོད་ཀྱི་ནང་བསྟན་རྒྱ་ནག་ཅན་དུ་བསྒྱུར་པ་སོགས་ལས་འགུལ་འདིའི་རིགས་ཕྱིའི་རྣམ་པ་དང་ཚིག་བེད་སྤྱོད་བྱེད་སྟངས་ལ་ཧ་ཅང་ཛ་དྲག་དང་ཉེན་ཁ་མི་མངོན་ཡང་། དོན་གྱིས་རིག་གསར་ལས་འགུལ་དང་གཅིག་མཚུངས་ཀྱི་ནུས་པ་དང་འབྲས་བུ་འབྱུང་གི་ཡོད་པ་རེད། ཅེས་བརྗོད་བྱུང་།

ཕྱི་ལོ་ ༡༩༦༦ ནས་ ༡༩༧༦ བར་གྱི་རྒྱ་ནག་གི་ལོ་རྒྱུས་ཐོག་གི་སྡུག་ཉེས་ཆེ་བའི་རིག་གནས་གསར་བརྗེ་སྐབས། གཙོ་འཛིན་མའོ་ཙེ་ཏུང་གིས་རྒྱ་ནག་གི་སློབ་ཆེན་སློབ་མ་ས་ཡ་མང་པོར་ན་གཞོན་ཤེས་ཡོན་པ་ཞེས་གྲོང་གསེབ་ཁུལ་དུ་རོགས་སྐྱོར་གྱི་མིང་ཐོག་ནས་བཏང་སྟེ། རྒྱ་ནག་གི་སློབ་ཆེན་མང་པོ་ཞིག་ལོ་ངོ་ ༡༠ ཙམ་རིང་སྒོ་བརྒྱབ་དགོས་བྱུང་ཡོད་སྟབས། ད་ལན་གྱི་གནས་ཚུལ་དེ་བརྒྱུད་ལམ་དུ་ཐོན་རྗེས་སྤྱི་ཚོགས་དྲ་ལམ་ཁག་ཏུ་གླེང་སློང་མང་པོ་ཡོང་གི་ཡོད་འདུག

དྲ་མིང་ལ་མི་རེ་རོང་(Miruirong)ཟེར་བ་ཞིག་གིས། ང་ཚོས་ལོ་ངོ་ ༤༠ སྔོན་ལ་ལས་ཀ་དེ་བྱས་མྱོང་ཡོད་པ་རེད་ཅེས་བརྗོད་ཡོད་པ་དང་། ཡང་གཞན་ཞིག་གིས་རིག་གསར་བསྐྱར་དུ་ལངས་བ་རེད་དམ་ཟེར་བ་སོགས་ཀྱི་དོགས་གཞི་དང་འཇིགས་སྣང་ཡོང་གི་ཡོད་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༩/༠༤/༡༢

Leave a Reply