རྒྱ་ནག་ནང་གི་གསར་འགོད་རང་དབང་གི་གནས་སྟངས་ན་ནིང་ལས་སྡུག་ཏུ་ཕྱིན་ཏེ་རྒྱ་ནག་ཚུད་པའི་རྒྱལ་ཁབ་ ༡༡ འཛམ་གླིང་གི་གསར་འགོད་རང་དབང་ཛ་དྲག་ཆེ་ཤོས་ཀྱི་ཐོ་གཞུང་ནང་བཅུག་འདུག
ཁ་སང་ཕྱི་ཚེས་ ༡༨ ཉིན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ཕྱི་ལོ་ ༢༠༡༨ ལོའི་འཛམ་གླིང་གི་རྒྱལ་ཁབ་ ༡༨༠ ཡི་གསར་འགོད་རང་དབང་ཐད་ཞིབ་འཇུག་བྱས་པའི་སྙན་ཐོ་ཞིག་བཏོན་པའི་ནང་། རྒྱ་ནག་ནང་གི་གསར་འགོད་རང་དབང་ནི་སི་རི་ཡ་ལས་ཀྱང་སྡུག་ཏུ་ཕྱིན་ཏེ་སྡུག་ཤོས་ཨང་བཞི་པ་དེ་ཆགས་ཡོད་པ་དང་། འདས་ལོ་ལས་ཀྱང་གསར་འགོད་རང་དབང་སྡུག་ཏུ་ཕྱིན་ཡོད་པ་བསྒྲགས་འདུག
སྙན་ཐོ་དེའི་ནང་ཕྱི་ལོ་ ༢༠༡༨ ལོར་གསར་འགོད་རང་དབང་ཆེ་ཤོས་ཀྱི་རྒྱལ་ཁབ་ནི་ནོར་ཝེ་ཡིན་པ་དང་། དེའི་རྗེས་ཧྥིན་ལན་ཌི་ (Finland) དང་སི་ཝེ་ཌན་ (Sweden) ། དེ་བཞིན་ནེ་ཐར་ལན་ཌི་ (Netherlands) དང་ཌེན་མག་ (Denmark) བཅས་ཡིན་འདུག་ལ། འཛམ་གླིང་གི་གསར་འགོད་རང་དབང་སྡུག་ཤོས་དང་པོ་ཏུར་མེན་སི་ཐན་ (Turkmenistan) ཡིན་པ་དང་། གཉིས་པ་བྱང་ཀོ་རི་ཡ། གསུམ་པ་ཨེ་རི་ཏི་ཡ་ (Eritrea) ། བཞི་པ་རྒྱ་ནག ལྔ་པ་ཝེ་ཐི་ནམ་ (Vietnam)། དྲུག་པ་སུའུ་ཌན་ (Sudan) དང་བདུན་པ་སི་རི་ཡ་ (Syria) བཅས་ཡིན་པ་དང་། རྒྱ་ནག་ཚུད་པའི་རྒྱལ་ཁབ་ ༡༡ འཛམ་གླིང་གི་གསར་འགོད་རང་དབང་ཛ་དྲག་ཆེ་ཤོས་ཀྱི་ཐོ་གཞུང་ནང་བཞག་འདུག
མཐུན་ཚོགས་དེའི་སྙན་ཐོའི་དཔྱད་བརྗོད་ནང་། ནོར་ཝེ་ནི་བསྟུད་མར་ལོ་ ༣ རིང་འཛམ་གླིང་གི་གསར་འགོད་རང་དབང་ཆེ་ཤོས་ཆགས་ཡོད་པ་དང་། ཧྥིན་ལན་ཌི་འདས་ལོ་ལས་རིམ་པ་གཉིས་ཡར་འཕར་ཏེ་རང་དབང་ཆེ་ཤོས་ཨང་ ༢ པ་ཆགས་ཡོད་པ། དེ་བཞིན་ཨ་ཧྥེ་རི་ཀའི་ནང་ཨི་ཐོ་པི་ཡ་ (Ethiopia) ཡི་གསར་འགོད་རང་དབང་གི་ཚད་རིམ་ ༤༠ འཕར་ཏེ་ཨང་ ༡༡༠ ཡིན་པ་དང་། གྷམ་བྷི་ཡ་ (Gambia ) ཚད་རིམ་ ༣༠ འཕར་ཏེ་ཨང་ ༩༢ པ་དེ་ཆགས་ཡོད་ནའང་། གཅིག་སྡུད་རིང་ལུགས་ཀྱི་གཞུང་སྟེ་ཝེ་ནེ་ཛུ་ལ་ (Venezuela) དང་ཨུ་རུ་སུ་སོགས་ཀྱི་གསར་འགོད་རང་དབང་གི་གནས་སྟངས་འདས་ལོ་ལས་སྡུག་དུ་ཕྱིན་པ་མ་ཟད། རྒྱ་ནག་གི་གནས་སྟངས་སྡུག་དུ་ཕྱིན་ཏེ་ཚད་རིམ་གཅིག་མར་ལྷུང་ཡོད་པ་བརྗོད་འདུག
འདི་ལོའི་ཕྱི་ཟླ་ ༣ ཚེས་ ༢༦ ཉིན། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་རྒྱ་ནག་གི་དྲིལ་བསྒྲགས་རྫུན་མས་འཛམ་གླིང་གི་གསར་འགོད་རང་དབང་ལ་གནོན་ཤུགས་སྤྲོད་ཀྱི་ཡོད་པའི་སྐོར་ལ་སྙན་ཐོ་ཞིག་བཏོན་ཡོད་པའི་ནང་། འདས་ལོར་རྒྱ་ནག་གཞུང་འབྲེལ་ཤིན་ཧྭ་གསར་ཁང་གིས་འཕྲུལ་མི་གསར་འགྱུར་སྙན་སྒྲོན་པ་བཞག་སྟེ། དམར་ཤོག་ཚོགས་པའི་དྲིལ་བསྒྲགས་ཁག་དབྱིན་ཡིག་ནང་ཁྱབ་བརྡལ་གཏོང་གི་ཡོད་པ་དང་། དབྱིན་ཡུལ་གྱི་རྒྱལ་ས་ལོན་ཊོན་དུ་རྒྱ་ནག་གིས་མི་ ༩༠ ལྷག་གླས་ཏེ། རྒྱ་ནག་དབུས་བརྙན་འཕྲིན་ཁང་གི་ཡན་ལག་གསར་ཁང་ (CGTN) ཟེར་བ་ཞིག་འཛུགས་རྩིས་བྱས་ཡོད་པར་བརྟེན། པི་ཊར་ཧམ་ཧྥི་རེ་ (Peter Humphrey) ཟེར་བའི་དབྱིན་ཡུལ་གསར་འཕྲིན་སྒྲིག་ལམ་ཉམས་ཞིབ་པ་ཞིག་གིས། རྒྱ་ནག་དབུས་བརྙན་འཕྲིན་ཁང་གིས་ཡུལ་ཁྲིམས་ལས་བརྒལ་བའི་དྲིལ་བསྒྲགས་ཀྱི་ལས་རིགས་སྤེལ་གྱི་ཡོད་པའི་སྐྱོན་བརྗོད་བྱས་རྐྱེན། རྒྱ་ནག་གཞུང་ནས་ཁོང་ལ་དངོས་ཤུགས་བརྒྱུད་གསུམ་ནས་གནོན་ཤུགས་སྤྲད་དེ་ཁྲིམས་གཏུག་བྱས་པ་དང་། རིམ་བཞིན་བཙན་གྱིས་ནོར་འཁྲུལ་ཡིན་པར་ངོས་ལེན་བྱེད་དུ་བཅུག་ཡོད། ཅེས་བཀོད་ཡོད་པ་མ་ཟད། ཡང་སྙན་ཐོ་དེའི་ནང་རྒྱ་ནག་གི་སྲིད་འཛིན་ཞི་ཅིན་ཕིན་ནི་དམངས་གཙོ་དང་འགྲོ་བ་མིའི་ཐོབ་ཐང་། གསར་འགོད་རང་དབང་། དེ་བཞིན། འཇིག་རྟེན་ཀུན་ཁྱབ་རིན་ཐང་སོགས་ཀྱི་དགྲ་བོ་ཡིན་ཞེས་བརྗོད་ཡོད་པ་རེད།
ཡང་སྙན་ཐོ་དེའི་ནང་། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་གསར་འགྱུར་དང་གནས་ཚུལ། རྒྱ་ནག་གི་མི་སེར་རྣམས་ལ་དྲ་ཐོག་ནས་ལྟ་རྟོག་ནན་མོ་བྱས་པའི་འོག འཕྲུལ་རིག་གསར་པ་ལ་བརྟེན་ནས་རང་ཉིད་སྤྱི་ཚོགས་ཀྱི་མིག་དཔེར་འོས་པའི་མི་སྣ་ཞིག་ཏུ་བསྐྲུན་ཐབས་བྱེད་ཀྱི་ཡོད་ལ། དེ་དང་བསྟུན་ནས་རྒྱ་ནག་གི་གནོན་ཤུགས་ལ་བརྟེན་ནས་ཕྱིའི་རྒྱལ་ཁབ་ཁག་ཏུ་གོ་ལའི་གནས་ཚུལ་སྒྲིག་ཁྲིམས་གསར་པ་ (New World Media Order) དར་སྤེལ་གཏོང་ཐབས་བྱེད་ཀྱི་ཡོད་པ་དང་། རྒྱ་ནག་གི་གཞུང་འབྲེལ་དང་སྒེར་བའི་གསར་ཁང་ཁག་དམར་ཤོག་གཞུང་གི་ལྟ་རྟོག་ནན་མོའི་འོག་ཡོད་པ་མ་ཟད། རྒྱ་ནག་ནང་གི་ཕྱིའི་གསར་འགོད་པར་ཡུལ་དངོས་སུ་དཀའ་ཁག་ཆེ་ནས་ཆེ་རུ་འཕྲད་ཀྱི་ཡོད་པ། དེ་བཞིན་ད་ལྟ་རྒྱ་ནག་གཞུང་གི་བཀག་ཉར་འོག་ཡོད་པའི་གསར་འགོད་པ་དང་དྲ་ཐོག་ཟིན་བྲིས་བ་མི་གྲངས་ ༦༠ ལྷག་སྲོག་ཉེན་གྱི་ནང་ལྷུང་ཡོད་པ་རེད། ཅེས་སོགས་བཀོད་འདུག
ཟླ་འདིའི་ཕྱི་ཚེས་ ༡༧ ཉིན་ཧོང་ཀོང་གསར་འགོད་མཐུན་ཚོགས་ཀྱིས་གསར་འགོད་རང་དབང་གི་ལོ་འཁོར་སྙན་ཐོ་ཞིག་བཏོན་ཡོད་པའི་ནང་། དི་ལོར་ལེ་ཚན་དེའི་ནང་ཧོང་ཀོང་གི་རང་དབང་གསར་ཁང་ ༣༠ ནས་ ༤༠ བར་གྱི་གསར་འགོད་པ་ཁྱོན་ ༥༣༥ དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་འཐུས་མི་ ༡༠༠༣ ཙམ་ལ་ཧོང་ཀོང་གི་གསར་འགོད་རང་དབང་ཐོག་བསམ་ཚུལ་བསྡུ་ལེན་བྱེད་སྐབས། གསར་འགོད་པ་བརྒྱ་ཆ་ ༨༡ གིས་ཧོང་ཀོང་གཞུང་ནས་གསར་འགོད་པ་མི་སྒེར་གྱི་རང་དབང་བཀག་སྡོམ་བྱས་ཏེ། ཧོང་ཀོང་རང་བཙན་དང་འབྲེལ་བའི་གསར་འགྱུར་རིགས་སྤེལ་བར་གནོན་ཤུགས་སྤྲོད་ཀྱི་ཡོད་པ་དང་། མི་མང་གི་གསར་འགོད་རང་དབང་ངོས་འཛིན་གྱི་ཚད་གཞི་བརྒྱ་ཆའི་ ༤༥ ལ་མར་ཆག་སྟེ། ད་བར་གྱི་སྙན་ཐོའི་ནང་གི་ཚད་གཞི་དམའ་ཤོས་དེ་ཆགས་ཡོད་སྐོར་དང་། ཧོང་ཀོང་མི་མང་བརྒྱ་ཆ་ ༧༠ ཙམ་གྱིས་སྐྱོན་བརྗོད་དང་། རྒྱ་ནག་གཞུང་ནི་ཧོང་ཀོང་གི་གསར་འགོད་རང་དབང་རྨང་ནས་གཏོར་མཁན་ཡིན་པའི་ངོས་འཛིན་བྱུང་ཡོད་པ་རེད།
གསར་འགོད་པ། ཀླུ་མགོན་ཐར།
