ཕྱི་ཟླ་ ༩ ཚེས་ ༡༡ ཉིན་ནས་རྒྱ་གར་རྒྱལ་ཡོངས་ཀྱི་གློག་བརྙན་ཁང་ཁག་ཏུ་བོད་པའི་གློག་བརྙན་འཁྲབ་ཁྲིད་པ་ཁྱིམ་གསར་གཞན་ཕན་ལགས་ཀྱི་གློག་བརྙན་ཆུ་བཞི་སྒང་དྲུག་ཅེས་པ་དངོས་སུ་སྟོན་འཆར་ཡོད་ཅིང་། ཕྱི་ཟླ་ ༨ ཚེས་ ༤ ཉིན་གློག་བརྙན་གྱི་ཧིན་རྡུ་སྐད་ཀྱི་དྲིལ་བསྒྲགས་བརྙན་ཐུང་ཁྱབ་བསྒྲགས་བྱ་རྒྱུ་རེད་འདུག
གནས་ཚུལ་དེའི་ཐད་ཁྱིམ་གསར་གཞན་ཕན་ལགས་ཀྱིས། ངའི་མིང་ལ་ཁྱིམ་གསར་གཞན་ཕན་ཟེར། ང་གློག་བརྙན་བཟོ་མཁན་ཞིག་ཡིན། ཕྱི་ཟླ་ ༩ ཚེས་ ༡༡ ཉིན་རྒྱ་གར་རྒྱལ་ཡོངས་ཀྱི་གློག་བརྙན་ཁང་དུ་ཆུ་བཞི་སྒང་དྲུག་ཅེས་པའི་གློག་བརྙན་དངོས་སུ་ཤར་སྟོན་བྱ་རྒྱུའི་གསལ་བསྒྲགས་བྱེད་བཞིན་ཡོད། ང་ཚོས་ཆུ་བཞི་སྒང་དྲུག་གི་བརྙན་གློག་འདི་རྒྱལ་སྤྱིའི་སྟེང་དུ་བསྟན་རྗེས། ད་ལྟ་དངོས་སུ་རྒྱ་གར་ནང་སྟོན་འཆར་ཡོད་པས། ངས་འདི་ནས་ཁྱེད་ཅག་གིས་ང་ཚོར་རྒྱབ་སྐྱོར་གནང་བའི་རེ་བ་ཞུ་བཞིན་ཡོད། ང་ཚོ་གློག་བརྙན་འཁྲབ་སྟོན་པ་གྲགས་ཅན་དང་བཟོ་སྐྲུན་མཁན་གྲགས་ཅན་དེ་འདྲ་མིན་ཡང་། ཆུ་བཞི་སྒང་དྲུག་ཅེས་པ་ནི་གློག་བརྙན་གལ་ཆེན་ཞིག་པ་མ་ཟད། ལོ་རྒྱུས་ཧ་ཅང་གལ་ཆེན་ཞིག་ཀྱང་ཡིན་པས། ཁྱེད་ཚོས་གཟིགས་རྒྱུ་མ་བརྗེད་པ་གནང་རོགས། ངས་ལས་རོགས་ཡོངས་ཀྱི་ཚབ་ཞུས་ཏེ་ད་སྔ་བར་ཁྱེད་ཅག་གིས་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
ཆུ་བཞི་སྒང་དྲུག་ཅེས་པའི་བོད་པའི་གློག་བརྙན་དེ་ཕྱི་ལོ་ ༢༠༢༥ ཟླ་ ༢ ཚེས་ ༡ ཉིན་རྒྱལ་སྤྱིའི་རོ་ཌིར་ཌམ་ (ROTTERDAM)གློག་བརྙན་དུས་སྟོན་སྟེང་ཐོག་མར་བསྟན་ཡོད་ཅིང་། གློག་བརྙན་དེ་བཟོ་སྐྲུན་པར་ལོ་རྒྱུས་འཚོལ་ཞིབ་དང་བསྡུ་སྒྲིག་གི་ཆེད་དུས་ཡུན་ལོ་ ༡༠ དང་གློག་བརྙན་དངོས་སུ་ཕབ་བསྐྲུན་ཆེད་ལོ་གསུམ་བཅས་ཁྱོན་ལོ་ཧྲིལ་པོ་ ༡༣ བཏང་ཡོད་འདུག་ལ། འགྲོ་གྲོན་གྱི་ཆ་ནས་རོབ་རྩིས་བྱས་ན་ཧིན་སྒོར་ཀ་རོ་ ༨།༣ ཙམ་ཕྱིན་ཡོད་འདུག
ཆུ་བཞི་སྒང་དྲུག་གི་གློག་བརྙན་དེར་ཕྱི་ལོ་ ༢༠༢༥ ཟླ་ ༤ ནང་ཨ་རིའི་ལོ་ཝ་མངའ་སྡེའི་དྷུ་བྷུ་འུག་(dubuque ) ཏུ་འཚོགས་པའི་ཕྱི་ལོ་ ༢༠༢༥ ལོའི་ཇུ་ལེན་དྷུ་བྷུ་འུག་རྒྱལ་སྤྱིའི་གློག་བརྙན་དུས་སྟོན་(Julien Dubuque International Film Festival 2025) ཐོག་གདངས་(Soundtrack) ཡག་ཤོས་ཀྱི་བྱ་དགའ་ཐོབ་འདུག
ཆུ་བཞི་སྒང་དྲུག་ཅེས་པའི་གློག་བརྙན་དེ་ནི་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་སྐོར་གྱི་དངོས་བྱུང་གློག་བརྙན་རིང་ཤོས་ཡིན་ཞིང་། དེར་ལེའུ་བཞི་ཡོད་པའི་ནང་ཕྱི་ལོ་ ༡༩༥༨ ལོར་དམག་གི་སྒྲིག་འཛུགས་དེ་ཉིད་ཐོག་མ་དབུ་བརྙེས་པ་ནས་བཟུང་། ༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་ཏེ། ༡༩༧༤ བར་གྱི་ལོ་རྒྱུས་གསལ་ཡོད་ཅིང་། གློག་བརྙན་དེའི་ནང་གཙོ་བོ་རྒྱ་གཞུང་གིས་བོད་ནང་དྲག་པོ་བཙན་འཛུལ་གྱིས་བོད་མི་རིགས་བསྟན་སྲིད་དང་བཅས་པ་རྩ་མེད་གཏོང་བཞིན་པའི་སྐབས། ཆུ་བཞི་སྒང་དྲུག་གི་ཁྱབ་ཁོངས་སེར་སྐྱ་མི་མང་ཡོངས་ནས་རང་སྲོག་འབེན་ལ་བཙུགས་ནས་རྒྱ་གཞུང་ལ་འཐབ་རྒོལ་གནང་ཡོད་པའི་སྐོར་དང་། ལྷག་པར་དུ་ཆུ་སྒང་བསྟན་སྲུང་དང་བླངས་དམག་གི་སྒྲིག་འཛུགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་དུ་བཙན་བྱོལ་ལ་ཕེབས་སྐབས་༸མགོན་པོ་མཆོག་གི་༸སྐུ་ཕྱྭའི་ཉེན་སྲུང་གི་ཞབས་འདེགས་བསྒྲུབས་ཡོད་པ་སོགས་ཆུ་བཞི་སྒང་དྲུག་གི་ཚོགས་མི་རྣམས་ཀྱི་ཞུམ་པ་མེད་པའི་སྙིང་སྟོབས་དང་དཔའ་ངར། བློས་གཏོང་བཅས་གསལ་བའི་གློག་བརྙན་ཞིག་ཡིན་པ་རེད།
གློག་བརྙན་ཆུ་བཞི་སྒང་དྲུག་ནི་ཁྱིམ་གསར་གཞན་ཕན་ལགས་ཀྱིས་རྩོམ་འབྲི་དང་འཁྲབ་ཁྲིད་བྱས་ཡོད་པ་དང་། བདེ་བ་ཚང་རྡོ་རྗེ་དབང་འདུས་ལགས་ཀྱིས་བཟོ་སྐྲུན་བྱས་ཡོད་ཅིང་། གློག་བརྙན་དེའི་ནང་ཨ་རིའི་ཧོ་ལི་ཝོ་ཌིའི་གློག་བརྙན་བཟོ་སྐྲུན་པ་གྲགས་ཆེ་ཅན་བྷི་རཱན་ཌོན་(Brandon Cox) ལགས་དང་། རྒྱ་གར་དང་བལ་ཡུལ་གྱི་བརྙན་ལེན་པ་གྲགས་ཅན་ཁག་ཅིག་གིས་བརྙན་ལེན་བྱས་ཡོད་འདུག གློག་བརྙན་དེའི་ཕབ་སྐྲུན་ས་གཙོ་བོ་ནི་བལ་བོད་གཉིས་ཀྱི་ས་མཚམས་གློ་སྨོན་ཐང་ཁུལ་དུ་ཡིན་པ་དང་། གློག་བརྙན་འཁྲབ་སྟོན་བྱེད་མཁན་གྱི་མི་སྣ་གཙོ་བོ་བོད་པ་ཡིན་འདུག
གསར་འགོད་པ། སྐལ་བཟང་སྦྱིན་པ།
