དབྱར་རྩྭའི་དཀའ་རྙོག་སེལ་བར་གནད་དོན་ལྔ་ངེས་པར་དུ་ཤེས་དགོས།

བོད་ནང་དབྱར་རྩྭ་ཡག་པོ་བརྐོ་རྒྱུ་ཡོད་པའི་ས་ཆ་རྣམས་རྒྱ་རིགས་ཚོང་པ་ཚོས་སྡེབ་ཉོ་བྱས་པ་དང་ས་རིན་ལོ་རེ་བཞིན་འཕར་བཞིན་ཡོད་པས་ས་གནས་བོད་མི་མང་པོར་དཀའ་ངལ་འཕྲད་བཞིན་ཡོད་འདུགའདི་ལོར་བོད་ནང་གི་དབྱར་རྩྭ་དགུན་འབུ་སྐྱེ་ཡུལ་ཡག་ཤོས་མང་པོ་རྒྱ་རིགས་ཚོང་པས་སྡེབ་ཉོ་བྱས་པ་མ་ཟད། ཉིན་གླ་བ་མང་པོ་འཁྲིད་ཡོང་ནས་དབྱར་རྩྭ་རྐོ་རུ་འཇུག་གི་ཡོད་སྟབས། ལོ་རེའི་ཡོང་འབབ་གཙོ་བོ་དབྱར་རྩྭ་ལ་བརྟེན་པའི་ས་གནས་བོད་མི་མང་པོར་དཀའ་ངལ་འཕྲད་བཞིན་ཡོད་པ་དང་། ཡང་ས་གནས་ཁག་ཅིག་ནས་སྲིད་གཞུང་གིས་བརྡ་ཁྱབ་བཏང་སྟེ་ཕྱི་མི་དབྱར་རྩྭ་རྐོ་རུ་ཡོང་བ་དང་དབྱར་རྩྭ་ཉོ་ཚོང་མི་ཆོག་པ་དང་། གལ་སྲིད་ཁྲིམས་འགལ་བྱེད་མཁན་ཡོད་ན་མཇུག་འབྲས་ལ་དོ་བདག་གིས་འགན་འཁུར་དགོས་སྐོར་བསྒྲགས་འདུག

ས་གནས་ཀྱི་གནས་ཚུལ་མཁོ་སྤྲོད་པ་ཞིག་གིས། བོད་ཡུལ་གྱི་དབྱར་རྩྭ་དགུན་འབུའི་ཐོན་ཁུངས་ལེགས་ཤོས་གྲས་མཚོ་སྔོན་ཞིང་ཆེན་མཚོ་ལྷོ་ཁུལ་ཁྲི་ཀ་རྫོང་སྒོ་མོ་གཡུ་ཚ་སྡེ་བའི་མཐའ་འཁོར་དང་། མགོ་ལོག་རྨ་ཆེན་གངས་རིའི་གཡས་གཡོན་གྱི་ས་ཆ་རྣམས་རྒྱ་ནག་པེ་ཅིན་དང་ཧྲང་ཧེ། ཟི་ལིང་སོགས་ནས་ཡོང་བའི་ཚོང་པ་ཆེན་པོ་དེ་ཚོས་སྡེབ་ཉོ་བྱེད་ཀྱི་ཡོད་པ་དང་། ནམ་རྒྱུན་ས་ཁྱོན་རྨིད་གྲུ་བཞི་མ་ ༡༦༠༠༠ ལ་ཟླ་གཉིས་རིང་དབྱར་རྩྭ་བརྐོས་པ་ཡིན་ན། ས་རིན་རྒྱ་སྒོར་ཁྲི་ ༡༥༠ ཡིན་ཡང་། ད་ལོར་ས་གོང་འཕར་ཏེ་ས་ཁྱོན་རྨིད་གྲུ་བཞི་མ་ ༡༦༠༠༠ ལ་རྒྱ་སྒོར་ཁྲི་ ༣༠༠ བྱས་ནས་བཙོང་གི་ཡོད་འདུག ཚོང་པ་ཆེན་པོ་དེ་ཚོས་འབུ་རྐོ་བ་ ༣༠༠ ནས་ ༤༠༠ ཡས་མས་དེ་འདྲར་ཉིན་གླ་སྤྲད་དེ་དབྱར་རྩྭ་རྐོ་རུ་འཇུག་གི་ཡོད་འདུག དེ་བཞིན་ཀོང་པོ་སྨན་གླིང་རྫོང་ (米林县) ཕྱོགས་སུ་དབྱར་རྩྭ་ཡག་པོ་ཡོད་པས་འདི་ལོར་རྒྱ་མི་དབྱར་རྩྭ་རྐོ་མཁན་ཧ་ཅང་མང་པོ་བསླེབས་ཡོད་པ་དང་། ས་གནས་གཞན་དུ་དབྱར་རྩྭ་རྐོ་བར་ཕྱིན་ན་འདས་ལོར་མི་རེར་ས་རིན་རྒྱ་སྒོར་ ༢༥༠༠ ཡིན་ཡང་། ད་ལོར་མི་རེས་རྒྱ་སྒོར་ ༤༥༠༠ རེ་སྤྲོད་དགོས་པ་ཆགས་ཡོད་པ་དང་། གཞན་ཡང་། སི་ཁྲོན་ཞིང་ཆེན་དཀར་མཛེས་ཁུལ་སེལ་ཤུལ་རྫོང་སེལ་ཤུལ་དགོན་རིའི་རྒྱབ་ཕྱོགས་ཀྱི་ས་གནས་གྲགས་འབྱུང་དང་སྲིབ་ལུང་སོགས་སུ་དབྱར་རྩྭ་རྐོ་ཧ་ཅང་མང་དུ་ཕྱིན་ཏེ། ས་ཆའི་བདག་པོ་ལ་ཟླ་གཉིས་རིང་མི་རེས་ས་རིན་རྒྱ་སྒོར་ ༨༠༠༠ སྤྲོད་དགོས་ཀྱི་ཡོད་འདུགཟླ་འདིའི་ཕྱི་ཚེས་ ༦ ཉིན་མཚོ་སྔོན་ཞིང་ཆེན་རྐང་ཚ་རྫོང་མི་དམངས་སྲིད་གཞུང་གིས་ཕྱི་མི་བསྡུས་ཏེ་དབྱར་རྩྭ་བརྐོ་མི་ཆོག་པའི་ཡོངས་ཁྱབ་བརྡ་ཐོ་ཞིག་བཏང་བའི་ནང་དུ།  མཚོ་སྔོན་པོའི་འབབ་རྒྱུད་ཀྱི་སྣོད་བཅུད་ཁོར་ཡུག་སྲུང་སྐྱོང་ལ་ཤུགས་སྣོན་ཏན་ཏིག་རྒྱག་ཆེད།《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩྭ་ཐང་བཅའ་ཁྲིམས》སོགས་འབྲེལ་ཡོད་ཁྲིམས་སྲོལ་དང་ས་ཁོངས་དེ་གའི་རྩྭ་ཐང་སྣོད་བཅུད་ཁོར་ཡུག་གི་གནས་ཚུལ་ལ་གཞིགས་ནས་རྐང་ཚ་རྫོང་མི་དམངས་སྲིད་གཞུང་གིས་ཕྱོགས་ཡོངས་ནས་ཕྱི་ཡོང་མི་སྣས་རྐང་ཚ་རྫོང་ཁོངས་སུ་དབྱར་རྩྭ་དགུན་འབུ་རྐོ་བ་བཀག་འགོག་བྱ་རྒྱུའི་གཏན་འབེབས་བྱས་ཡོད། བཀག་སྡོམ་གྱི་བསླབ་བྱ་ལ་མི་ཉན་པར་རྐང་ཚ་རྫོང་ཁོངས་སུ་དབྱར་རྩྭ་དགུན་འབུ་བརྐོ་མཁན་ཡོད་ན། མཇུག་འབྲས་ཡོད་ཚད་རང་གིས་འགན་འཁུར་དགོས། ཁྲོམ་རའི་ནང་ལས་མི་བསྡུས་ནས་རྐང་ཚ་རྫོང་ཁོངས་སུ་དབྱར་རྩྭ་དགུན་འབུ་བརྐོ་བའི་སྣང་ཚུལ་ཚང་མ་མགོ་གཡོག་མགོ་སྐོར་གྱི་བྱ་སྤྱོད་ཡིན་པས། འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞིར་བཟུང་ཆད་པ་གཅོད་རྒྱུ་ཡིན་པས་ཆེད་དུ་བརྡ་ཁྱབ་འདི་བཏང་བ་ཡིན། ཞེས་བརྗོད་འདུགདེ་བཞིན་ཉེ་སྔོན་ཕྱི་ཟླ་ ༤ ཚེས་ ༢༩ ཉིན་མཚོ་བྱང་ཁུལ་མདོ་ལ་རྫོང་སྲིད་གཞུང་གིས་བརྡ་ཁྱབ་ཅིག་བཏང་སྟེ། རྫོང་ཁོངས་ཀྱི་ཁོར་ཡུག་དང་རྩྭ་ཆུར་སྲུང་སྐྱོབ་བྱེད། རྒྱལ་ཁབ་ཀྱི་རྩྭ་ཐང་བཅའ་ཁྲིམས་སོགས་གཞིར་བཟུང་རྫོང་ཡོངས་ཀྱི་ནང་དབྱར་རྩྭ་དགུན་འབུ་བརྐོ་མི་ཆོག་པ་གཏན་འབེབ་བྱས་ཟིན་པས། ཁྲིམས་འགལ་ཐོག་དབྱར་རྩྭ་རྐོ་བ་དང་ཕྱི་མི་ཡོང་ནས་དབྱར་རྩྭ་ཉོ་ཚོང་སོགས་བྱེད་མི་ཆོག་པ་དང་། གལ་སྲིད་ཁྲིམས་འགལ་བྱེད་མཁན་བྱུང་ན་མཇུག་འབྲས་ལ་དོ་བདག་སོ་སོས་འགན་འཁུར་དགོས་སྐོར་བསྒྲགས་འདུག

གཞན་ཡང་། ཉེ་བའི་ལོ་ཤས་ནང་དཔལ་འབྱོར་གྱི་ཁེ་བཟང་ཆེད། ཚོང་པ་ཁག་ཅིག་གིས་ཚན་རྩལ་ལ་བརྟེན་ནས་དབྱར་རྩྭ་དགུན་འབུ་འདེབས་འཛུགས་བྱེད་མགོ་ཚུགས་ཡོད་པ་དང་། འདེབས་འཛུགས་བྱས་པའི་དབྱར་རྩྭ་དེ་རིགས་ཀྱི་རིན་གོང་རང་བྱུང་གི་དབྱར་རྩྭ་དགུན་འབུ་ལས་དམའ་བོ་ཡོད་ཀྱང་། ཕྱི་ནས་བལྟས་ན་གཉི་ག་འདྲ་བོ་ཡོད་པས་མགོ་སྐོར་འོག་ཚུད་པའི་གནད་དོན་ཡང་བྱུང་གི་ཡོད་འདུག བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ད་ལྟའི་ཆར་ཉུང་མཐའ་ཡང་བོད་ཁུལ་དུ་ཚན་རྩལ་ལ་བརྟེན་ནས་དབྱར་རྩྭ་དགུན་འབུ་འདེབས་འཛུགས་བྱེད་ཡུལ་མི་འདྲ་བ་གསུམ་ཡོད་པ་གཅིག་ནི་བོད་རང་སྐྱོང་ལྗོངས་ཀྱི་ལྷོ་ཕྱོགས་དང་། སི་ཁྲོན་ཞིང་ཆེན་གྱི་བྱང་ཕྱོགས། དེ་བཞིན་སི་ཁྲོན་ཁྲིན་ཏུའུ་ཡི་ཉེ་འགྲམ་ཞིག་ཏུ་ཡོད་པ་དང་། དབྱར་རྩྭ་འདེབས་འཛུགས་བྱེད་ཐབས་ལ་ཞིབ་འཇུག་བྱེད་མཁན་ཡང་མང་དུ་འགྲོ་བཞིན་ཡོད་འདུགཁྲིམས་གླེང་དྲ་བའི་( http://trimleng.org)ནང་དུ་དབྱར་རྩྭ་དགུན་འབུ་ནི་བོད་མི་མང་པོ་ཞིག་གི་དཔལ་འབྱོར་གྱི་བརྟེན་ས་གཙོ་བོ་ཞིག་ཡིན་པས། རྒྱ་ནག་གཞུང་གི་ཁྲིམས་ལུགས་གཞིར་བཟུང་གིས་དབྱར་རྩྭ་དང་འབྲེལ་བའི་གནད་དོན་ལྔ་ངེས་པར་དུ་ཤེས་དགོས་སྐོར་བཀོད་པའི་ནང་། གནད་དོན་དང་པོ་སོའི་རྩྭ་སའི་སྟེང་དབྱར་རྩྭ་དགུན་འབུའི་ཐོན་ཁུངས་ཡོད་མཁན་གྱི་འབྲོག་པ་དག་གིས་རྩྭ་སའི་བདག་དབང་གཏན་ནས་གཞན་ལ་ཤོར་དུ་འཇུག་མི་ཉན་པར་སྲུང་སྐྱོབ་བྱེད་རྒྱུ་ནི་ཧ་ཅང་གལ་ཆེ་བ་དང་། གནད་དོན་གཉིས་པ་སོ་སོའི་ས་ཐོག་ཏུ་དབྱར་རྩྭ་དགུན་འབུ་བརྐོ་ན་ཡང་སྲིད་གཞུང་ནས་ཆོག་མཆན་ཞུ་དགོས་པ་དང་། སྲིད་གཞུང་གིས་དུས་ཐོག་ཏུ་ཐག་བཅད་ནས་ལན་སྟེར་དགོས། གལ་ཏེ་ཆོག་མཆན་མ་སྤྲད་ན་གོང་རིམ་ལས་ཁུངས་ལ་སྲིད་འཛིན་བསྐྱར་གྲོས་དང་། ཁྲིམས་ཁང་དུ་སྲིད་འཛིན་གཏུག་བཤེར་སོགས་བྱས་ཆོག་པའི་ཐོབ་ཐང་བརྒྱུད་ནས་རང་གི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་ཆོག་གི་ཡོད་འདུག

གནད་དོན་གསུམ་པ་སྲིད་གཞུང་ནས་ཆོག་མཆན་ཐོབ་ཡོད་ཀྱང་ཉེན་རྟོག་ལས་ཁུངས་སོགས་གཞུང་གི་ལས་ཁུངས་འདྲ་མིན་ནས་གང་བྱུང་ཆད་པ་སོགས་བཅད་ན། ཆད་པ་ཕོག་མཁན་གྱིས་རང་ལ་ཁེ་དབང་གང་དག་ཡོད་པ་ངོས་ཟིན་པའི་ཐོག་ནས་དུས་ཐོག་ཏུ་གོང་རིམ་སྲིད་གཞུང་དང་ཁྲིམས་ཁང་ལ་ཞུ་གཏུག་བྱེད་ཆོག གནད་དོན་བཞི་པ་དབྱར་རྩྭ་རྐོ་བ་དང་ཉོ་འཚོང་ཆོག་པའི་ཡི་གེ་སོགས་ཕྱིར་བསྡུ་དང་། དངུལ་ཆད་གཅོད་པ། དབྱར་རྩྭ་གཞུང་བཞེས་གཏོང་བ་སོགས་བྱས་ན། ཆད་པ་བཅད་པ་དེ་ཁྲིམས་མཐུན་དང་དྲང་བདེན་ཡིན་མིན་ཁྲིམས་མཐུན་འགྲོ་ལུགས་འོག་ཉན་ཞིབ་ཚོགས་འདུ་བསྡུ་དགོས་པའི་རེ་བ་འདོན་ཆོག་གི་ཡོད་འདུག

གནད་དོན་ལྔ་པ་གལ་ཏེ་དབྱར་རྩྭ་རྐོ་མཁན་དང་ཉོ་འཚོང་བྱེད་མཁན་ལ་ཆད་པ་ཕོག་ན་ངེས་པར་དུ་ཆད་པ་ཕོག་པ་ཤེས་རྟོགས་བྱུང་བའི་ཚུན་གྱི་ཉིན་དྲུག་བཅུའི་ནང་གོང་རིམ་ལ་སྲིད་འཛིན་བསྐྱར་གྲོས་ཞུ་རྒྱུའི་རེ་བ་འདོན་དགོས། སྲིད་འཛིན་བསྐྱར་གྲོས་ཀྱི་ཐག་གཅོད་ལ་མོས་མཐུན་མེད་ཚེ་ཐག་གཅོད་ཡི་གེ་དེ་ལག་ཏུ་འབྱོར་བའི་ཚུན་གྱི་ཉིན་བཅོ་ལྔའི་ནང་མུ་མཐུད་ནས་གནད་དོན་དེ་ཁྲིམས་ཁང་ལ་གཏུག་བཤེར་བྱེད་ཆོག གལ་ཏེ་སྲིད་འཛིན་བསྐྱར་གྲོས་མ་བརྒྱུད་ཚེ་ཆད་པ་ཕོག་པ་ཤེས་རྟོགས་བྱུང་བའི་ཚུན་གྱི་ཟླ་གསུམ་གྱི་ནང་ཐད་ཀར་ཁྲིམས་ཁང་ལ་གཏུག་བཤེར་བྱེད་ཆོག

གལ་ཏེ་ཆད་པ་གཅོད་སྐབས་འབྲེལ་ཡོད་ཀྱི་ཐོབ་ཐང་ཅི་ཡོད་གསལ་བཤད་མ་བྱས་པ་ཡིན་ན་གཏུག་བཤེར་གྱི་དུས་ཡུན་དེ་ལོ་གཉིས་ནས་ལྔ་ཡི་བར་བསྲིང་ཆོག་པའི་ཐོབ་ཐང་ཡང་ཡོད་ལ། ཁྲིམས་མཐུན་མིན་པའི་ཐོག་དབྱར་རྩྭ་རྐོ་མཁན་སོགས་འཛིན་བཟུང་བཀག་ཉར་དང་། དབྱར་རྩྭ་དང་དངོས་པོ་གཞུང་བཞེས་སོགས་བྱས་པ་ཡིན་ན་དོ་བདག་ལ་སྲིད་གཞུང་ནས་གུན་གསབ་ལེན་པའི་ཐོབ་ཐང་ཡང་ཡོད་པ་སོགས་བཀོད་འདུག

རྒྱ་གར་ལྷོ་ཕྱོགས་ས་གནས་གསར་འགོད་པ་དོན་གྲུབ་བཀྲ་ཤིས།

བསྐྱར་བཅོས།: ༢༠༡༩/༠༥/༠༩

Leave a Reply