ཐའེ་ཝན་གྱི་རྒྱལ་ས་ཐའེ་པེ་ལ་ཡོད་པའི་ཨ་རིའི་ཚོང་པའི་ལྷན་ཚོགས་ཀྱིས་རྒྱབ་ཤ་དཀར་པོའི་དེབ་ཅིག་བཏོན་ཏེ་ཨ་རྒྱ་གཉིས་ཀྱི་ཚོང་འབྲེལ་འཐབ་འཁྲུག་ཁྲོད་ཐའེ་ཝན་གྱིས་གོ་སྐབས་དམ་འཛིན་བྱས་ཏེ་ཨ་རིར་ཚོང་འབྲེལ་གྲོས་ཆོད་འཇོག་དགོས་པའི་འབོད་སྐུལ་ཞུས་འདུགཐའེ་ཝན་གསར་ཁང་(Taiwan News)གིས་གནས་ཚུལ་སྤེལ་བ་ལྟར་ན། ཁ་སང་ཐའེ་པེ་ཨ་རིའི་ཚོང་པའི་ལྷན་ཚོགས་(American Chamber of Commerce)ཀྱིས། ཁ་བྱང་ལ་ལག་བསྟར་བྱེད་པའི་དུས་ཤིག་ཅེས་པའི་རྒྱབ་ཤ་དཀར་པོའི་དེབ་ཅིག་བཏོན་ཏེ། ཨ་རྒྱ་གཉིས་ཀྱི་ཚོང་འབྲེལ་འཐབ་འཁྲུག་འགྲོ་བཞིན་པའི་སྐབས་འདིར། རྒྱ་ནག་ཏུ་ཡོད་པའི་ཐའེ་ཝན་གྱི་བཟོ་གྲྭ་ཁག་ཕྱིར་ཐའེ་ཝན་ནང་ལོགས་ཏེ་སོ་སོའི་རྒྱལ་ཁབ་ནང་ལས་ཀའི་གོ་སྐབས་བསྐྲུན་པ་དང་། རྒྱལ་ཁབ་ལ་ཡོང་འབབ་བཟོ་དགོས་སྐོར་དང་།  དེ་བཞིན། ཕྱོགས་ཡོངས་ཀྱི་བཟོ་ཚོང་འཕེལ་རྒྱས་སུ་འགྲོ་བཞིན་པའི་སྐབས་འདིར། ཐའེ་ཝན་གཞུང་གིས་བློ་རིག་སྒྲིམ་སྟེ་ཨ་རིར་ཚོང་འབྲེལ་གྲོས་ཆོད་ཅིག་འཇོག་ཐབས་དགོས་པའི་འབོད་སྐུལ་ཞུས་འདུག

རྒྱབ་ཤ་དཀར་པོའི་དེབ་དེའི་ནང་།  ཨ་རྒྱའི་ཚོང་འབྲེལ་འཐབ་འཁྲུག་གིས་གོ་ལའི་བཟོ་སྐྲུན་ལ་ཉེན་ཁ་ཆེ་བའི་འགྱུར་ལྡོག་གཏོང་བཞིན་ཡོད་པ་དང་། ཐའེ་ཝན་ལ་ཆ་མཚོན་ན། སོ་སོའི་ཚོང་འབྲེལ་ཆེ་གྲས་རྒྱལ་ཁབ་ཁག་དང་ལྷན་དུ་ཟུང་འབྲེལ་དང་མཉམ་འདུས་ཀྱི་ཚོང་འབྲེལ་གྲོས་ཆོད་གང་ཡང་མེད་སྟབས།  ཨ་རྒྱའི་ཚོང་འབྲེལ་འཐབ་འཁྲུག་ཁྲོད་ཐའེ་ཝན་ལ་གྱོང་གུད་ཆེན་པོ་ཐེབས་ཀྱི་ཡོད། ཅེས་བརྗོད་འདུག

ཐའེ་པེ་ཨ་རིའི་ཚོང་པའི་ལྷན་ཚོགས་ཀྱིས། ཨ་རྒྱ་གཉིས་ཀྱི་ཚོང་འབྲེལ་འཐབ་འཁྲུག་གིས་ཐའེ་ཝན་གྱི་བཟོ་ཚོང་ཁང་མང་པོའི་ཁེ་སྤོགས་འཕྲོག་འགྲོ་ཡི་ཡོད་པའི་སྐབས་འདིར། ཐའེ་ཝན་གཞུང་གིས་འདས་པའི་ཨ་ཐའེ་གཉིས་ཀྱི་སྐྱུག་བྲོ་བའི་ཚོང་འབྲེལ་གྱི་ལོ་རྒྱུས་དོར་ཏེ། གོ་སྐབས་དམ་འཛིན་གྱིས་ཨ་རིའི་ལྷན་དུ་ཚོང་འབྲེལ་གྲོས་ཆོད་འཇོག་པར་འབད་པ་བྱ་རྒྱུ་གལ་ཆེན་ཡིན། ཞེས་བརྗོད་འདུག

ད་ལྟའི་ཆར་ཐའེ་ཝན་གྱིས་ཨ་རིའི་ཕག་ཤ་དང་གླང་ཤ་སོགས་ཤ་རིགས་ཀྱི་ཐོན་རྫས་ནང་འདྲེན་བྱེད་པར་བཀག་སྡོམ་བྱེད་ཀྱི་ཡོད་པ་དང་། སྤྱིར་བཏང་ཕྱི་ལོ་ ༢༠༠༩ ལོར་ཨ་ཐའེ་གཉིས་བར་གཞི་རྩའི་ཚོང་འབྲེལ་གྲོས་ཆོད་ཅིག་བཞག་སྟེ།  ཕྱོགས་གཉིས་བར་ཁྲོམ་ར་སྒོ་འབྱེད་བྱེད་རེས་བྱས་ཡོད་ཀྱང་། ཕྱི་ལོ་ ༢༠༡༠ ལོར་ཐའེ་ཝན་གྱིས་ཨ་རིའི་ཤ་རིགས་ཀྱི་ཐོན་རྫས་ནང་འདྲེན་གྱི་སྲིད་བྱུས་ལ་འགྱུར་བ་བཏང་སྟེ། ད་བར་བཀག་སྡོམ་བྱས་ཡོད་པ་དང་། དེ་ནི་ཡུལ་གཉིས་བར་གྱི་ཚོང་འབྲེལ་འགོག་རྐྱེན་ཆེ་ཤོས་དེ་ཆགས་ཡོད་འདུག་ལ། ཨ་རིའི་ཚོང་སྡེ་ལྷན་ཚོགས་ཀྱི་ཚོགས་གཙོ་ལེའོ་སིས་ཝལ་ཌི་(Leo Seewald)ལགས་ཀྱིས། ཨ་ཐའེ་གཉིས་བར་གྱི་གནད་འགག་ཆེ་ཤོས་ནི་ཕག་ཤ་དང་གླང་ཤའི་རིགས་ཡིན་ཡང་། དོན་དག་འདི་གནད་དོན་ཆེན་པོ་ཞིག་མིན་པས་ང་ཚོས་སེལ་ཐུབ་ཀྱི་རེད་བསམ་གྱི་འདུག ཅེས་ཤ་རིགས་བཀག་སྡོམ་མཚམས་འཇོག་བྱེད་ཐུབ་སྐོར་བརྗོད་ཡོད་འདུག

རྒྱ་ནག་གི་གནོན་ཤུགས་འོག རྒྱལ་སྤྱིའི་སྲིད་གཞུང་མང་པོ་ཞིག་གིས་ཐའེ་ཝན་དང་རྒྱལ་འབྲེལ་མཚམས་འཇོག་བྱེད་ཀྱི་ཡོད་ཀྱང་། ད་ལྟའི་ཆར་ཨ་རི་དང་ཐའེ་ཝན་གཉིས་ཀྱི་འབྲེལ་བ་ཉིན་རེ་བཞིན་ཇེ་བཟང་དུ་འགྲོ་ཡི་ཡོད་པའི་རྣམ་པ་ཤུགས་ཆེན་པོ་མངོན་ཡོད་པ་མ་ཟད། ཨ་རིས་ད་དུང་ཐའེ་ཝན་མཚོ་གླིང་ལ་འབྲེལ་ལམ་དམ་འཛིན་གྱིས་གཞུང་འབྲེལ་མི་སྣ་མངགས་གཏོང་སྔར་ལྷག་བྱེད་བཞིན་ཡོད་པ་དང་། ཕྱི་ལོ་ ༢༠༡༨ ལོ་ཁོ་ནར་ཨ་རིས་ཐའེ་ཝན་ནང་གཏོང་བཞིན་པའི་ཚོང་ཟོག་བརྒྱ་ཆ་ ༡༧།༥ ཡར་འཕར་ཏེ། ཁྱོན་ཨ་སྒོར་ཐེར་འབུམ་ ༣༠།༢ ཙམ་དང་། ཐའེ་ཝན་གྱིས་ཨ་རིར་ཕྱིར་ཚོང་བྱེད་བཞིན་པའི་ཚོང་ཟོག་བརྒྱ་ཆ་ ༧།༨ ཡར་འཕར་ཏེ་ཁྱོན་ཨ་སྒོར་ཐེར་འབུམ་ ༤༥།༨ ཀྱི་ཚོང་ལས་འབྲེལ་བ་འཛིན་གྱི་ཡོད་འདུག

ཡང་རྒྱབ་ཤ་དཀར་པོའི་དེབ་དེའི་ནང་། ཨ་ཐའེ་གཉིས་ཀྱི་འབྲེལ་ལམ་ཇེ་བཟང་དུ་འགྲོ་བཞིན་པའི་རྒྱུ་རྐྱེན་ནི། ཨ་རི་དང་རྒྱ་ནག་གི་འབྲེལ་ལམ་ཇེ་ཞན་དུ་འགྲོ་བཞིན་ཡོད་པས་ཡིན་པ་དང་། ཨ་རིས་མུ་མཐུད་ཐའེ་ཝན་ནི་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་བརྟན་ལྷིང་དང་མཉམ་འབྲེལ་བྱེད་རོགས་ཡིན་པར་བསྔགས་བརྗོད་བྱེད་ཀྱི་ཡོད། ཅེས་དང་། སྔོན་གླེང་ནང་གལ་སྲིད་ཐའེ་ཝན་གྱིས་བློ་སྟོབས་ཆེན་པོས་ལག་བསྟར་བྱེད་པར་གྲ་སྒྲིག་ཡོད་ཚེ། ཐའེ་པེ་ཨ་རིའི་ཚོང་པའི་ལྷན་ཚོགས་ལ་རྒྱབ་སྐྱོར་བྱེད་པའི་གྲ་སྒྲིག་ཡོད། ཅེས་བཀོད་ཡོད་པ་རེད།

ཐའེ་པེ་ཨ་རིའི་ཚོང་པའི་ལྷན་ཚོགས་ནི་ཕྱི་ལོ་ ༡༩༥༡ ལོར་གསར་དུ་བཙུགས་ཡོད་ཅིང་།  རྒྱལ་སྤྱིའི་ཚོང་ལས་ཚོགས་པ་ཤུགས་ཆེ་ཤོས་ཀྱི་གྲས་ཤིག་ཡིན་འདུག་ལ།  ད་ལྟའི་བར་རྒྱལ་སྤྱིའི་སྟེང་བཟོ་ཚོང་ཁང་ ༥༠༠ ལྷག་གི་ཚོགས་མི་ ༡༠༠༠ ཙམ་ཡོད་པ་དང་། ད་བར་ཟླ་རེར་རྒྱབ་ཤ་དཀར་པོའི་དེབ་སོགས་བཏོན་ཏེ། ཐའེ་ཝན་ནང་གསར་གཏོད་རང་བཞིན་ལྡན་པའི་དྲིལ་བསྒྲགས་དང་། དྲ་ལམ་ཚོང་འབྲེལ། དེ་བཞིན། ཆེད་ལས་ཀྱི་གོ་སྐབས་དང་ཚོང་འབྲེལ་ཡར་རྒྱས་སོགས་ཀྱི་སྡིངས་ཆ་མང་པོ་བསྐྲུན་ཡོད་འདུག

གསར་འགོད་པ། སྐལ་བཟང་སྦྱིན་པ།