བཀའ་ཟུར་ཞིག་སྐུ་གྲོངས་བར་མཆོད་འབུལ་མྱ་ངན་ཞུས།

བཀའ་ཟུར་མདོ་སྔགས་བསྟན་འཛིན་མཆོག་སྐུ་གྲོངས་བར་བོད་མིའི་སྒྲིག་འཛུགས་ཀྱིས་གཞུང་འབྲེལ་མཆོད་འབུལ་སྨོན་ལམ་གནང་བ་དང་མྱ་ངན་གུས་འདུད་ཞུ་ཆེད་ཉིན་རྒྱབ་ནས་ལས་ཁུངས་ཁག་སྒོ་བརྒྱབས་འདུག 

དེ་རིང་ཉིན་གུང་ཆུ་ཚོད་ ༡༢ ཐོག གངས་སྐྱིད་བོད་ཁང་ཆེན་མོའི་ཚོགས་ཁང་དུ་བོད་མིའི་སྒྲིག་འཛུགས་ཆེས་མཐོའི་ཁྲིམས་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་ཆེ་བ་གཞན་གཉིས། བོད་མི་མང་སྤྱི་ཁག་ཅིག་དང་སྲིད་སྐྱོང་བློ་བཟང་སེང་གེ་མཆོག་གཙོའི་བཀའ་བློན་རྣམས་དང་སྲི་ཞུ་ལས་བྱེད་ཆེ་ཕྲ་ཡོངས་ནས། ཟླ་འདིའི་ཕྱི་ཚེས་ ༧ ཉིན་བཀའ་ཟུར་མདོ་སྔགས་བསྟན་འཛིན་མཆོག་ཨ་རིའི་ཝི་སི་ཁན་སིན་མངའ་སྡེའི་ (Wisconsin) ནང་སྐུ་གྲོངས་བར་གཞུང་འབྲེལ་མྱ་ངན་གུས་འདུད་དང་མཆོད་འབུལ་སྨོན་ལམ་གནང་སོང་།

མཆོད་འབུལ་བསྔོ་སྨོན་རྗེས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་བཀའ་ཟུར་མཆོག་སྐུ་གྲོངས་བར་བོད་མིའི་སྒྲིག་འཛུགས་ངོས་མྱ་ངན་གུས་འདུད་དང་ཤུལ་ལུས་ནང་མི་ཡོངས་ལ་ཐུགས་གསོ་དང་། བཀའ་ཟུར་མཆོག་ལ་གཞུང་འབྲེལ་མྱ་ངན་གུས་འདུད་མཚོན་ཆེད་དེ་རིང་ཉིན་རྒྱབ་ནས་བོད་མིའི་སྒྲིག་འཛུགས་ཀྱི་ལས་ཁུངས་ཁག་སྒོ་བརྒྱབ་ཡོད་སྐོར་གསུངས་སོང་།

དེའི་རྗེས་བོད་མིའི་སྒྲིག་འཛུགས་བཀའ་དྲུང་ནས་བཀའ་ཟུར་མཆོག་གི་ལོ་རྒྱུས་སྒྲོག་སྦྱང་གནང་བ་ལྟར་ན། བཀའ་ཟུར་མདོ་སྔགས་བསྟན་འཛིན་མཆོག་ནི། ཕྱི་ལོ་ ༡༩༤༠ ལོར་བོད་ཀྱི་རྒྱལ་ས་ལྷ་སར་ཡབ་ལྷུན་གྲུབ་སྐལ་བཟང་དང་ཡུམ་འཇམ་དབྱངས་ཆོས་མཚོ་གཉིས་ཀྱི་བུ་རུ་སྐྱེས་ཤིང་།དགུང་ལོ་ ༨ ནས་ ༡༤ བར་གྲ་བཞི་དམག་སྒར་དུ་བོད་ཡིག་དང་རྩིས་ཀྱི་སློབ་སྦྱོང་གནང་རྗེས། དགུང་ལོ་ ༡༥ ནས་ ༢༡ བར་སྤྱིར་བཏང་གི་དམག་སྦྱོང་ཆ་ཚང་གནང༌པ་དང་། དམག་ཞབས་ཞུ་རིང་མདོ་སྤྱི་ལྷ་ཀླུའི་སྒྲ་སྲུང་ཁོངས་ཆབ་མདོར་ཕེབས་ཡོད་འདུག་པ་མ་ཟད། ཕོ་བྲང་པོ་ཏཱ་ལའི་ཤར་རྒྱུད་གོ་མཛོད་སྲུང་འདོམས་ཞུས་ཡོད་འདུག ཕྱི་ལོ་ ༡༩༥༩ ལོར་ནོར་གླིང་ཆུ་རྒྱུས་དགྲ་སྡེ་སྲུང་འགོག་ཞུས་པ་དང་། བོད་ཟླ་ ༢ ཚེས་ ༨ མཚན་མོའི་ཆུ་ཚོད་ ༡༡ ཐོག་༧གོང་ས་༧སྐྱབས་མགོན་ཆེན་པོ་རེ་ཞིག་བཙན་བྱོལ་དུ་ལྷོ་བརྒྱུད་ཆིབས་བསྒྱུར་སྐབས་ཆིབས་ཞབས་སྐུ་སྲུང་ཁོངས་སུ་རང་དམག་རུ་ཤོག་གཉིས་དང་བཅས་རྒྱ་བོད་ས་མཚམས་ཆུ་དངས་མོ་བར་སྐུ་ཕྱྭའི་སྲུང་འདོམས་གནང་།

ཡངཁོང་གིས་མུ་མཐུད་ཕྱི་ལོ་ ༡༩༦༠ ནང་མ་སུ་རི་གཏན་སློབ་རྩ་འཛུགས་སློབ་གྲངས་ ༥༠ ཁོངས་སུ་ཞུགས་ཏེ། གཞི་རིམ་མ་ཐོན་གོང་ཨུ་ཏར་པར་ཌེ་ཤི་མངའ་སྡེའི་ (Uttar Pradesh) རྒྱལ་སའི་ནང་དགེ་རྒན་སློབ་སྦྱོང་གནང་རྗེས་མ་སུ་རིར་ལུས་རྩལ་དང་བོད་ཡིག རྩིས་བཅས་ཀྱི་དགེ་རྒན་གནང༌། ཕྱི་ལོ་ ༡༩༦༢ ཟླ་ ༢ ཚེས་ ༢༧ ཉིན་ནས་གཞུང་ཞབས་སུ་བཞུགས་ཏེ། ཨོ་རི་ས་དོན་གཅོད་ལས་རོགས་དང་མཉམ་སྦྲེལ་ཚོང་སྤྱིའི་ལས་ཁུར། སྦིར་ནང་ཆེན་གཞིས་མགོ་ནང་སྲིད་དྲུང་ཆེ་ལས་ཚབ། ནང་སྲིད་དྲུང་ཆེ། བཀའ་དྲུང་བཅས་ཀྱི་མཛད་ཁུར་བཞེས་ཡོད་པ་དང་། ཕྱི་ལོ་ ༡༩༩༡ ཟླ་ ༩ ཚེས་ ༡༩ ནས་སྤྱི་ཁྱབ་རྩིས་ཞིབ་འགན་འཛིན་དང་། ཕྱི་ལོ་ ༡༩༩༦ ཟླ་ ༦ ཚེས་ ༥ ནས་ ༡༩༩༧ ཟླ ༡ ཚེས ༢༡ བར་བདེ་སྲུང་བཀའ་བློན་གྱི་མཛད་ཁུར་བཞེས་ཡོད་འདུག

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༠༦/༡༠

Leave a Reply

One thought on “བཀའ་ཟུར་ཞིག་སྐུ་གྲོངས་བར་མཆོད་འབུལ་མྱ་ངན་ཞུས།

  1. གཞུང་པ་ཚེ་དབང་བསོད་ནམས་

    གཞུང་འབྲེལ་སྨོན་ལམ་ཚོགས་སྐབས་བོད་མི་རིགས་ཀྱི་རིག་
    གཞུང་སྒོམ་བཤིས་བཟང་པོའི་ལམ་ལུགས་བཞུགས་གདན་ཐོག་
    དཀྱིལ་བསྐྲུམ་དུ་བཞུགས་ནས་སྨོན་ལམ་སྲུངས་དགོས་པ་ལས་
    ཚོགས་འདུ་ཚོགས་པ་ནང་བཞིན་ཞབས་ཀྱག་ཐོག་ཆོས་ཕྱོགས་ཀྱི་
    སྨོན་ལམ་གསུང་རྒྱུ་དེ་དབུས་བོད་མིའི་སྒྲིག་འཛུགས་ཀྱི་གསར་གཏོད་
    ཀྱི་ཆ་ཤས་ཞིག་ཡིན་ལས་དེ་མིན་བསྟན་པ་འགོ་ནས་མ་ཤིག་ན་ཡག་ལེ་
    རདེ་དོ།