གེ་སར་གནམ་ཐང་ལེགས་འགྲུབ་བྱུང་ཡོད་ཟེར།

རྒྱ་ནག་གཞུང་གིས་བོད་དཀར་མཛེས་ཁུལ་གྱི་གནམ་ཐང་གསུམ་པ་དཀར་མཛེས་གེ་སར་གནམ་ཐང་གི་འཛུགས་སྐྲུན་གྲུབ་སྟེ་གནམ་གྲུ་འཕུར་སྐྱོད་མགོ་བཙུགས་ཡོད་སྐོར་བསྒྲགས་འདུགདེ་རིང་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༦ ལོའི་ཕྱི་ཟླ་ ༡༦ ནས་མགོ་འཛུགས་བྱས་པའི་བོད་དཀར་མཛེས་རྫོང་ཁོངས་ཀྱི་གེ་སར་གནམ་ཐང་གི་འཛུགས་སྐྲུན་ལས་གཞི་ཡོངས་སུ་གྲུབ་སྟེ། དེ་རིང་ནས་གནམ་གྲུ་འཕུར་གཏོང་མགོ་བཙུགས་ཡོད་སྐོར་བསྒྲགས་འདུག་ལ། གནམ་གྲུ་ཐང་དེ་དཀར་མཛེས་ཁུལ་གྱི་གནམ་གྲུ་ཐང་གསུམ་པ་དེ་ཆགས་ཡོད་འདུག

དེ་འབྲེལ་གྱི་རྒྱ་ནག་གཞུང་གི་གསར་འགྱུར་ནང་། དཀར་མཛེས་གེ་སར་གནམ་གྲུ་ཐང་ནི་དཀར་མཛེས་རྫོང་དང་སྡེ་དགེ་རྫོང་གཉིས་ཀྱི་ས་མཚམས་སུ་ཁེལ་ཡོད་ཅིང་། ཆགས་ཡུལ་གྱི་ས་བབ་མཐོ་ཚད་མཚོ་ངོས་ལས་སྨིས་ ༤༠༦༨ དང་། འཕུར་སྐྱོད་ས་ཁུལ་གྱི་ཚད་རིམ་ 4C ཞེས་པ་དེ་ཡིན་ལ། གནམ་ཐང་དེར་རིང་ཚད་སྨིས་ ༤༠༠༠ དང་། ཞེང་ཚད་སྨིས་ ༤༥ ཡོད་པའི་རྒྱུག་ལམ་དང་། སྨིས་གྲུ་བཞི་མ་ ༣༦༠༠ ཡོད་པའི་མཁའ་སྐྱོད་ས་ཚིགས་ཀྱི་ཐོག་ཁང་། དེ་བཞིན། མཁའ་སྐྱོད་དོ་དམ་དང་སྣུམ་བླུག་ས། མེ་འགོག་ཉེན་སྐྱོབ་དང་སྤྱི་པའི་སྒྲིག་ཆས་ཆ་ཚང་ཡོད་སྐོར་སོགས་བརྗོད་འདུག

རྒྱ་ནག་གཞུང་གིས་ཕྱི་ལོ་ ༢༠༢༠ ལོར་བོད་ནང་ཡུལ་སྐོར་བའི་གྲངས་འབོར་ས་ཡ་ ༣༠ བརྒལ་ཐུབ་པའི་དམིགས་ཚད་བཟུང་སྟེ། བོད་དང་རྒྱ་ནག་གི་གྲོང་ཁྱེར་ཆེ་ཁག་བར་འགྲོ་འོང་གི་འབྲེལ་བ་རྒྱ་སྐྱེད་གཏོང་ཆེད་བོད་ཁུལ་དུ་ཁྱོན་གནམ་ཐང་ ༡༥ ལྷག་བརྒྱབས་ཟིན་ཡོད་ལ། ད་ལྟ་རྒྱག་བཞིན་པ་དང་རྒྱག་འཆར་ཡོད་པའི་གནམ་ཐང་ ༤ ཡས་མས་ཡོད་འདུག རྒྱ་ནག་གཞུང་ནས་བོད་ཁུལ་གྱི་དཔལ་འབྱོར་ཡར་རྒྱས་དང་འགྲུལ་སྤྱོད་སྟབས་བདེ་ཡོང་སླད་གནམ་ཐང་རྒྱག་གི་ཡོད་སྐོར་འགྲེལ་བརྗོད་བྱེད་ཀྱི་ཡོད་ཀྱང་། འདི་ལོའི་ཕྱི་ཟླ་ ༨ ནང་རྒྱ་གར་གསང་བའི་ལས་ཁུངས་ཀྱིས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ཉེ་འགྲམ་གྱི་གནམ་ཐང་མང་པོ་ཞིག་ལ་དམག་གི་རྟེན་གཞི་འཛུགས་སྐྲུན་དང་དྲག་པོའི་མཚོན་ཆ་འགྲེམས་འཇོག་བྱེད་ས་བཟོས་ཡོད་པའི་པར་རིས་དང་བཅས་ཡོངས་བསྒྲགས་བྱས་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༩/༠༩/༡༦

Leave a Reply

One thought on “གེ་སར་གནམ་ཐང་ལེགས་འགྲུབ་བྱུང་ཡོད་ཟེར།

  1. གཞུང་པ་ཚེ་དབང་བསོད་ནམས་

    གླིང་གེ་སར་དམག་གི་དམག་གཡང་དེ།
    དེ་རིང་འདི་རུ་གཡང་ལ་བྱོན།
    རྒྱ་ནག་གི་བོད་བཙན་བཟུང་བྱས་ནས་བོད་ནང་གནམ་ཐང་༡༥་
    ཙམ་བཟོས་ཡོད་ན་གནམ་ཐང་དེའི་ནང་བོད་མི་ལས་བྱེད་ག་
    ཚོད་ཡོད་དམ་བོད་ནང་འཛུགས་བསྐྲུན་གྱིས་ལས་གཞི་ཇི་ཙམ་སྤེལ་
    ཀྱང་བོད་མིར་ལས་ཀ་སྤྲོད་དགོས་པ་ལས་རྒྱ་ནག་ནས་རྒྱ་མི་སྐད་
    བཏང་ནས་ལས་ཀ་ཚང་མ་རྒྱ་མི་ཁོ་རང་ཚོར་སྤྲད་ནས་དོན་གྱི་
    བདག་པོ་བོད་མི་ཚོ་སོ་སོའི་ལུང་པའི་ནང་ལས་མེད་འཇོག་རྒྱུ་དེ་
    མི་རིགས་འདྲ་མཉམ་གྱིས་སྲིད་ཇུས་དང་ཡོངས་སུ་འགལ་ཡོད་ན་
    མཐའ་ཅིག་ཏུ་ངོ་རྒོལ་ཡོད་ན་གནས་དོན་འདིའི་ཐད་རྒྱལ་སྤྱིའི་
    འགྲོ་བ་མིའི་ཐོབ་ཐང་ཚོགས་ཆུང་ནས་ཞིབ་འཇུག་ནན་པོ་གནང་
    དགོས་པའི་འབོད་བསྐུལ་སྤྱི་སྒེར་ཚང་མས་ཞུ་དགོས་པ་དེ་གལ་ཆེན་
    དོན་ཆེན་ཞིག་ལ་ངོས་འཛིན་ཞུ་གི་ཡོད།