རིགས་ལམ་ནི་ནང་བསམ་བློའི་སློབ་སྦྱོང་ཐད་རིག་པ་དང་རྒྱུ་མཚན་གྱི་ལམ་ནས་འགྲོ་ཐུབ་པའི་རིག་པའི་ལམ་མཆོག་ཏུ་གྱུར་བ་ཞིག་ཡིན་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠ སྟེང་དྷ་སྟེང་བོད་ཁྱིམ་སློབ་གྲྭའི་ཚོགས་ཁང་ཆེན་མོའི་ནང་། ཕྱི་ལོ་ ༢༠༡༩ ལོའི་བོད་ཁྱིམ་སློབ་གྲྭའི་རིགས་ལམ་འདུ་འཛོམས་ཆེན་མོ་ཐེངས་དགུ་པ་དབུ་འཛུགས་གནང་སོང་བ་དང་། མཛད་སྒོའི་སྐུ་མགྲོན་གཙོ་བོར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྲོལ་རྒྱུན་དང་དེང་རབས་ཚན་པའི་འགན་འཛིན་བསྟན་འཛིན་རྡོ་རྗེ་ལགས། བོད་ཁྱིམ་སྤྱི་ཁྱབ་འགན་འཛིན་ཐུབ་བསྟན་རྡོ་རྗེ་ལགས། བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་རྒན་བསོད་ནམས་སྲིད་ཆོས་ལགས་གཙོ་བོར་གྱུར་བའི་བོད་ཁྱིམ་སློབ་གྲྭ་ཁག་གི་དབུ་འཛིན་རྣམ་པ་དང་ལྟ་གྲུབ་དགེ་རྒན་རྣམ། དྷ་སྟེང་བོད་ཁྱིམ་སློབ་གྲྭའི་དགེ་རྒན་རྣམ་པ། རིགས་ལམ་འདུ་འཛོམས་ཁྲོད་མཉམ་ཞུགས་གནང་མཁན་སློབ་ཕྲུག་ ༢༤༢ དང་དྷ་སྟེང་བོད་ཁྱིམ་སློབ་གྲྭའི་སློབ་མ་ཡོངས་བཅས་ཁྱོན་མི་གྲངས་ ༡༠༠༠ མ་ཟིན་ཙམ་འཛོམས་འདུག

མཛད་སྒོའི་ཐོག་མར་དྷ་སྟེང་བོད་ཁྱིམ་སློབ་གྲྭའི་ངེས་སྟོན་པ་ཚུལ་ཁྲིམས་རྡོ་རྗེ་ལགས་ནས་འཚམས་འདྲིའི་གསུང་བཤད་སྐབས། ལོ་རེ་བཞིན་བོད་ཁྱིམ་ནང་ཁུལ་དུ་རིགས་ལམ་འདུ་འཛོམས་ཆེན་པོ་ཐེངས་རེ་གནང་བཞིན་ཡོད་པ་ལྟར། འདི་ལོའི་རིགས་ལམ་འདུ་འཛོམས་དེ་དྷ་སྟེང་བོད་ཁྱིམ་སློབ་གྲྭའི་གོ་སྒྲིག་འོག་ཚོགས་བཞིན་ཡོད་པ་དང་། སྤྱིར་རིགས་ལམ་སློབ་སྦྱོང་བྱས་ཏེ་རིག་པའི་ལམ་ནས་དཔྱད་པ་གཏོང་དགོས་པ་དེ་རྒྱལ་བ་རིན་པོ་ཆེ་མཆོག་གི་དགོངས་གཞི་ཡིན་པས། བོད་ཁྱིམ་ངོས་ནས་ད་བར་རིགས་ལམ་སློབ་སྦྱོང་ཐད་ཧུར་བརྩོན་བྱས་ཏེ་ད་ལྟའི་ཆར་གྲུབ་འབྲས་གང་འཚམ་བསླེབས་ཡོད་པ་དང་། མ་འོངས་པར་མུ་མཐུད་སློབ་ཕྲུག་ཚོར་རིག་པའི་ལམ་ནས་བརྟག་དཔྱད་ཀྱིས་འགྲོ་ཐུབ་པར་རིགས་ལམ་དེ་སློབ་ཚན་ཚང་མའི་ནང་ཁྱབ་ཐུབ་པ་བཟོ་དགོས་སོགས་བརྗོད་སོང་།

དེའི་རྗེས་བོད་ཁྱིམ་སློབ་གྲྭ་ཁག་གི་འཛིན་གྲྭ་ ༦ པ་ནས་ ༨ པ་བར་གྱི་སློབ་ཕྲུག་ཚོས་རིགས་ལམ་རྩོད་བཤད་དང་། ལོ་མང་རིང་དྷ་སྟེང་བོད་ཁྱིམ་སློབ་གྲྭའི་རིགས་ལམ་སྦྱོང་བརྡར་ཁྲོད་འཛུལ་ཞུགས་གནང་མཁན་དགེ་རྒན་ ༤༠ ལ་ལེགས་གསོའི་ཕྱག་རྟགས་གནང་སོང་བ་དང་། མཇུག་ཏུ་དགེ་བཤེས་ལྷ་རྡོར་ལགས་ནས་རིགས་ལམ་ནི་དངོས་པོའི་གནས་ལུགས་ཇི་བཞིན་ཤེས་པར་བརྟག་དཔྱད་ཀྱི་ལམ་ནས་སློབ་སྦྱོང་བྱེད་པའི་ཐབས་ལམ་ཡག་ཤོས་ཤིག་ཡིན་པ་དང་། དེང་སང་ཤེས་ཡོན་པ་ཟེར་དུས་འབྲི་ཀློག་ཤེས་མཁན་ཙམ་ལ་ངོས་འཛིན་གྱིས་ནང་བསམ་བློའི་ཤེས་ཡོན་སྣང་མེད་དུ་འཇོག་གི་ཡོད་སྟབས། ༧གོང་ས་རྒྱལ་བ་རིན་པོ་ཆེ་མཆོག་གིས་ནམ་རྒྱུན་ཤེས་ཡོན་སྡེ་ཚན་ནང་ཕྱི་དངོས་པོའི་སློབ་གཉེར་ཙམ་མིན་པར་ནང་བསམ་བློའི་ཤེས་ཡོན་སློབ་གཉེར་ལ་འབད་བརྩོན་དགོས་པར་སྐུལ་མ་གནང་བཞིན་ཡོད་སྟབས། རིགས་ལམ་དེ་ནང་བསམ་བློའི་སློབ་སྦྱོང་ཐད་རིག་པ་དང་རྒྱུ་མཚན་གྱི་ལམ་ནས་འགྲོ་ཐུབ་པའི་རིག་པའི་ལམ་མཆོག་ཏུ་གྱུར་བ་ཞིག་ཡིན་སྐོར་གསུངས་སོང་།

ཡང་ཁོང་གིས། བོད་ཁྱིམ་སློབ་གྲྭ་ཁག་ནང་རིགས་ལམ་སློབ་གཉེར་བྱེད་བཞིན་པ་དེ་ཧ་ཅང་ཡག་པོ་ཡིན་ན་ཡང་། ༧གོང་ས་མཆོག་གིས་གསུངས་པ་རེད་ཅེས་གང་བྱུང་མི་བྱེད་པར་རིགས་ལམ་གྱིས་དངོས་ནས་སློབ་མའི་རིག་པར་ཕན་ཐོགས་འདུག་གམ། དེ་བཞིན་སློབ་ཕྲུག་ཚོས་རིགས་ལམ་སྦྱོང་སྐབས་ངག་ཐོག་ལ་སྐྱོར་བ་ཙམ་མ་ཡིན་པར། སོ་སོས་རིག་པ་བཏང་ནས་སྦྱང་བ་ཡིན་ན་རིག་པ་ཡར་རྒྱས་དང་སློབ་སྦྱོང་ཐད་ཕན་ཐོགས་ཆེན་པོ་ཡོད་པ་དང་། སྤྱིར་རིགས་ལམ་སྦྱང་བ་དེས་མི་སྒེར་གྱི་ཤེས་ཡོན་གཙོའི་བློ་སྤོབས། གདེང་ཚོད་འཕེལ་བ། རྒྱུ་མཚན་ལྡན་པའི་བསམ་བློ་གཏོང་ཐུབ་པ་སོགས་ལ་ཕན་ཐོགས་ཡོད་སྐོར་གསུངས་སོང་།

ཐེངས་འདིའི་བོད་ཁྱིམ་སློབ་གྲྭ་ཁག་གི་རིགས་ལམ་འདུ་འཛོམས་དེ་བདུན་གཅིག་རིང་ཚོགས་བཞིན་ཡོད་པ་དང་། རིགས་ལམ་འདུ་འཛོམས་ཁྲོད་འཛུལ་ཞུགས་གནང་མཁན་རྒྱ་གར་ཧི་མ་ཅལ་མངའ་སྡེ་ཁུལ་དུ་ཡོད་པའི་བོད་ཁྱིམ་སློབ་གྲྭ་ཁག་གཙོ་བོར་གྱུར་བའི་མེས་དབོན་གཙུག་ལག་དཔེ་སྟོན་སློབ་གྲྭ་དང་ཅོན་ཏཱ་ར་སམ་བྷོཊ་སློབ་གྲྭ་གཉིས་བཅས་ཁྱོན་སློབ་གྲྭ་ཁག་ ༦  ནས་སློབ་ཕྲུག་ ༢༤༢ དང་། དྷ་སྟེང་བོད་ཁྱིམ་ནས་སློབ་ཕྲུག་ ༡༡༣  བཅས་ཁྱོན་སློབ་ཕྲུག་ ༣༥༥  མཉམ་ཞུགས་གནང་འདུག

གསར་འགོད་པ། སངས་རྒྱས་དཀོན་མཆོག