ལོ་ངོ་ ༢༠ མ་ཟིན་ཙམ་གྱི་རྗེས་སུ་རྒྱ་ནག་གཞུང་གིས་དྲུག་བཞིའི་དམངས་གཙོའི་ཡར་ལངས་ལ་རྒྱབ་སྐྱོར་བྱེད་མཁན་སྲིད་བློན་འདས་པོ་ཀྲོའོ་ཙི་ཡཱང་ལ་དུར་བྱང་སྟབས་བདེ་ཞིག་བཟོས་ནས་དམ་དྲག་དང་གསང་རྒྱའི་འོག་ནང་མི་ཚོར་འདས་མཆོད་བྱེད་བཅུག་ཡོད་འདུག 

དེ་རིང་རྒྱལ་སྤྱིའི་གསར་ལམ་ཁག་ཏུ་སྤེལ་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༩ ཉིན་རྒྱ་ནག་གཞུང་གིས་ལོ་ངོ་ ༡༦ རིང་བཟང་བཙོན་དུ་བཅུག་ཞིང་ལོ་ངོ་ ༢༠ མ་ཟིན་རིང་ཁོང་གི་གནས་ཚུལ་གསང་རྒྱ་དང་དམ་དྲག་འོག་བཞག་པའི་རྒྱ་ནག་གི་སྲིད་བློན་འདས་པོ་དང་དྲུག་བཞིའི་སློབ་མའི་དམངས་གཙོའི་ལས་འགུལ་ལ་རྒྱབ་སྐྱོར་བྱེད་མཁན་སྐུ་ཞབས་ཀྲོའོ་ཙི་ཡཱང་(Zhao Ziyang)གི་ཕུང་པོ་སྲེག་པའི་རུས་ཐལ་ནང་མིར་ཕྱིར་སྤྲད་ནས། པེ་ཅིན་གྲོང་ཁྱེར་གྱི་ཁྲིན་པན(Changping cemetery)དུར་ཁྲོད་དུ་ཁོང་ལ་སྟབས་བདེའི་དུར་བྱང་ཞིག་བཙུགས་ཏེ། ཧ་ཅང་དམ་དྲག་དང་གསང་རྒྱའི་འོག་ནང་མི་ཚོར་འདས་མཆོད་ཆོ་ག་བྱེད་བཅུག་ཡོད་འདུག

གནད་དོན་དེའི་ཐད་ཀྲོའོ་ཡི་བུ་ཝང་ཀྲོའོ་ཧོ་(Wang Zhihua)ཡིས་ཧྥ་རན་སའི་ཨ་པེ་གསར་ཁང་ལ་ཁ་པར་བརྒྱུད། ལོ་ངོ་མང་པོ་ཞིག་ལ་ང་ཚོས་མུ་མཐུད་འབད་བརྩོན་བྱས་མཐར་ཡུན་རིང་ཞིག་གི་རྗེས། ང་ཚོས་པ་ལགས་ཀྱི་རུས་ཐལ་མདུན་ནས་གུས་འདུད་དང་སེམས་གསོ་བྱེད་ཐུབ་སོང་ཞེས་དང་། ཡང་ཁོས་ཐེངས་འདིར་པ་ལགས་ཀྱི་མདས་མཆོད་ཆོ་གའི་སྟེང་ནང་མི་དང་ཉེ་འབྲེལ་སོགས་མི་གྲངས་ ༢༠ མ་ཟིན་ཙམ་ཞིག་མཉམ་ཞུགས་བྱས་ཡོད་སྐོར་བརྗོད་པ་ལས། གཞན་ད་བར་རུས་ཐལ་ཕྱིར་ནང་མིར་རྩིས་སྤྲོད་མི་བྱེད་དགོས་དོན་སོགས་གནས་ཚུལ་ཞིབ་གསལ་གང་ཡང་བཤད་མེད་འདུག

ཨ་པེ་གསར་ཁང་གིས་སྤེལ་བའི་གནས་ཚུལ་ནང། ནང་མི་ཚོས་ཀྲོའོ་ཡི་དུར་བྱང་ལ་ཆོ་ག་གྲུབ་རྗེས་དུར་བྱང་ངོས་སུ་བཀལ་བའི་ཁོང་གི་པར་རིས་ཉེན་རྟོག་པས་བླངས་ནས་མི་མཐོང་བ་བྱས་ཡོད་པ་དང་། གསར་འགོད་པ་ཚོར་ཁོང་གི་དུར་བྱང་པར་དང་བརྙན་སོགས་གང་ཡང་ལེན་བཅུག་མེད་པ་མ་ཟད། དེར་ཡོད་ཕར་འགྲོ་ཚུར་འོང་གི་མི་མང་གི་འགྲོ་འདུག་སྤྱོད་གསུམ་ལ་དམ་དྲག་དང་། ཀྲོའོ་ཡི་དུར་བྱང་ལ་འདས་མཆོད་སྒྲུབ་བཞིན་པའི་རྣམ་པ་མཐོང་བཅུག་མེད་ན་ཡང་། འདས་མཆོད་ཚར་རྗེས་མི་རེ་གཉིས་ཡོང་ནས་ཁོང་གི་དུར་བྱང་ལ་གུས་འདུད་བྱས་ཡོད་པ་མ་ཟད། མི་ཞིག་གིས་ཁོང་གི་དུར་བྱང་མདུན་དུ་པུས་མོ་བཙུགས་ཏེ་གུས་ཕྱག་ཐེངས་གསུམ་ལ་འཚལ་ཡོད་སྐོར་བརྗོད་འདུག

སྐུ་ཞབས་ཀྲོའོ་ཙི་ཡཱང་ལགས་ཕྱི་ལོ་ ༡༩༨༠ ལོར་རྒྱ་ནག་དམར་ཤོག་ཚོགས་པའི་སྲིད་བློན་དུ་བསྐོས་ཡོད་པ་དང་། དེའི་རྗེས་ཕྱི་ལོ ༡༩༨༧ ལོར། རྒྱ་ནག་དམར་ཤོག་དབུས་དྲུང་ཆེར་བསྐོས་ཡོད་ན་ཡང་། ཕྱི་ལོ ༡༩༨༩ ལོའི་ཟླ ༡ ཚེས ༡༥ ཉིན་སྐུ་ཞབས་ཧའོ་ཡོ་པང་སྐུ་གཤེགས་པ་དེས་དྲུག་བཞིའི་དམངས་གཙོའི་ལས་འགུལ་བྱུང་བ་དང་། སྐབས་དེར་སྐུ་ཞབས་ཀྲོའོ་ཙི་ཡཱང་གིས་རྒྱ་ནག་གཞུང་གིས་སློབ་མར་དྲག་གནོན་བྱེད་རྒྱུར་ངོ་རྒོལ་མཐའ་གཅིག་ཏུ་བྱས་སྟབས། སྐབས་དེའི་རྒྱ་ནག་གི་མགོ་འཁྲིད་ཏིང་ཞོ་ཕེང་གིས་གཙོས་ཆབ་སྲིད་མི་སྣ་རྒན་གྲས་ཚོས་ཁོང་གོ་གནས་ནས་གནས་དབྱུང་བཏང་བ་མ་ཟད། དེ་ནས་བཟུང་པེ་ཅིན་གྲོང་ཀྱེར་གྱི་རང་ཁྱིམ་དུ་བཟང་བཙོན་ལ་བཅུགས་པ་དང་། ལོ ༡༦ གི་རྗེས་ཏེ། ཕྱི་ལོ ༢༠༠༥ ཟླ ༡ ཚེ ༣ ཉིན་ཉིན་སྐུ་གཤེགས་ཡོད་ན་ཡང་། འདས་པའི་ལོ་ངོ་ ༢༠ མ་ཟིན་ཙམ་རིང་ཁོང་གི་དུར་ཐ་ནང་མིར་རྩིས་སྤྲོད་བྱས་མེད་པ་དང་། རྒྱ་ནག་གི་མཐོ་རིམ་མགོ་འཁྲིད་ཚོ་ལྟར་ཁོང་ལ་དུར་བྱང་བཙུགས་བཅུག་མེད་པ་མ་ཟད། རྒྱ་ནག་གི་དྲ་ལམ་ཁག་ཏུ་ད་བར་ཁོང་གི་མིང་དང་ལོ་རྒྱུས་སོགས་འབྲེལ་ཡོད་ཤེས་བྱ་མེད་པ་བཏང་ཡོད་འདུག

གསར་འགོད་པ། སངས་རྒྱས་དཀོན་མཆོག