རང་དབང་པའི་རྒྱལ་ཁབ་ནང་དུའང་རྒྱ་ནག་གཞུང་གིས་མང་གཙོ་དང་རང་དབང་ལ་རྩིས་མེད་རྡོག་རོལ་གཏོང་སྐབས་གདོང་ལེན་བྱེད་ཐུབ་ཀྱི་མེད་ཀྱང་ང་ཚོ་མཐུན་ཕྱོགས་མནའ་འབྲེལ་འོག་ནས་མཐའ་གཅིག་ཏུ་ངོ་རྒོལ་གདོང་ལེན་བྱ་རྒྱུ་ལས་དེ་མུར་བཞག་ནས་ངན་པ་རྒྱ་ཡན་དུ་གཏོང་ཐབས་རྩ་བ་ནས་མེད་སྐོར་སོགས་ཀྱི་གྲོས་ཆོད་དོན་ཚན་བརྒྱད་བཞག
ཁ་སང་བོད་མིའི་སྒྲིག་འཛུགས་ཀྱི་བོད་ཁང་ཆེན་མོའི་ཚོགས་ཁང་ནང་། འདས་པའི་ཉིན་གྲངས་ ༣ རིང་ཚོགས་པའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་ ༨ པ་མཇུག་བསྡོམས་ཀྱི་གསར་འགོད་གསལ་བསྒྲགས་ཤིག་གནང་བའི་ནང་། ད་ལྟའི་བོད་ནང་གི་གནས་སྟངས་དེ་སྔར་བས་ཇེ་སྡུག་ཏུ་སོང་ཡོད་པ་དང་། རྒྱ་ནག་གཞུང་ངོས་ནས་དབུ་མའི་ལམ་གཞིར་བཞག་ཐོག་༧གོང་ས་མཆོག་གི་སྐུ་ཚབ་ལྷན་གྲོས་མོལ་བསྐྱར་གསོ་བྱེད་དགོས་པ། ལྷན་ཚོགས་ངོས་ནས་དམངས་གཙོའི་རིན་ཐང་དང་ཁྲིམས་ཀྱི་དབང་བསྒྱུར་སོགས་ཡར་བར་དོར་ཏེ་རྒྱ་ནག་གཞུང་ལ་སྐབས་བསྟུན་བྱེད་མཁན་གྱི་སྲིད་གཞུང་དང་ཚོགས་སྡེ་རྣམས་ཐེར་འདོན་བྱ་རྒྱུ་ཡིན་པ། བོད་དེ་གོ་ལའི་ཁོར་ཡུག་འགྱུར་ལྡོག་གི་གླེང་གཞིའི་ནང་བཙུད་ཐབས། ༧གོང་ས་རྒྱལ་བ་རིན་པོ་ཆེའི་སྐུའི་ཡང་སྲིད་ཕེབས་ཕྱོགས་དེ་མགོན་པོ་གང་ཉིད་དང་དགའ་ལྡན་ཕོ་བྲང་ཐེབས་རྩ་ཁོ་ནའི་འགན་འཁྲི་ཞིག་ལས། རྒྱ་ནག་གཞུང་གིས་དེར་ཐེ་བྱུས་བྱེད་མི་ཆོག་པ་དང་། བོད་དོན་བདེན་མཐའ་མ་གསལ་བར་དུ་ལྷན་ཚོགས་ནས་དེའི་ཐོག་འཐབ་རྩོད་བྱ་རྒྱུ་ཡིན་སྐོར་སོགས་བཀོད་འདུག
དེ་ཡང་བསྒྲགས་གཏམ་ནང་། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཁྲིམས་འགལ་ཐོག་ནས་ལོ་ངོ་ ༧༠ ཙམ་རིང་བོད་ས་ཧམ་བཟུང་བྱས་རྐྱེན་བོད་མིར་དཀའ་ངལ་འཕྲད་ཡོད་ཀྱང་ད་དུང་དཀའ་ངལ་དེ་དག་སེལ་ཐབས་ཆེད་༧སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་། བོད་མིའི་སྒྲིག་འཛུགས་ཀྱི་སྐུ་ཚབ་དང་ལྷན་གྲོས་མོལ་ཞུ་རྒྱུའི་བཟང་ཕྱོགས་ཀྱི་བརྡ་ལན་ཞིག་རྩ་བ་ནས་མ་བསྟན་པར་དེ་མུར་གནས་ཡོད། དེར་བརྟེན་ང་ཚོས་རྒྱ་ནག་གཞུང་ལ་བོད་རྒྱ་འབྲེལ་མོལ་མགྱོགས་མྱུར་བསྐྱར་གསོ་གནང་དགོས་པ་ཞུ་རྒྱུ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ནས་ཀྱང་རྒྱ་ནག་གཞུང་ལ་བོད་རྒྱ་འབྲེལ་མོལ་བསྐྱར་གསོ་དགོས་པའི་འབོད་སྐུལ་གནང་རོགས་ཞུ་རྒྱུ་ཡིན། དེ་དང་ཆབས་ཅིག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་ཚོས་འཚེ་མེད་ཞི་བའི་ལྟ་བར་མཐའ་གཅིག་ཏུ་ཡིད་ཆེས་མཛད་ནས་བོད་རྒྱ་གཉིས་སྨན་གྱི་སྲིད་བྱུས་རྒྱུན་སྐྱོང་མཛད་བཞིན་པར་ང་ཚོས་ཡི་རངས་བསྔགས་བརྗོད་ཞུ་བཞིན་ཡོད། ལྷག་པར་གཞིས་ལུས་བོད་མི་ཚོས་ཞུམ་པ་མེད་པའི་ལྷག་བསམ་དང་སྙིང་སྟོབས་ཀྱི་གོ་ཆ་གྱོན་ནས་རང་མི་རིགས་ཀྱི་ངོ་བོ་སྲུང་སྐྱོབ་ཆེད། རྒྱ་ནག་གཞུང་གི་དབང་སྒྱུར་ལ་གདོང་ལེན་གནང་བཞིན་པ་དེར་ང་ཚོས་ཡི་རངས་བསྔགས་བརྗོད་རྒྱ་ཆེ་ཞུ་བཞིན་ཡོད།
རྒྱ་ནག་གཞུང་གིས་བོད་དང་ཤར་ཏུར་ཀི་སི་ཐན། ལྷོ་སོག་པོ་བཅས་ཀྱི་ནང་ལོ་ངོ་བཅུ་ཕྲག་མང་པོའི་རིང་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་བརྩི་མེད་རྡོག་རོལ་བཏང་ཡོད་ཀྱང་། སྲིད་གཞུང་མང་པོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་སྐྱོན་བརྗོད་བྱ་རྒྱུར་འཇིགས་ནས་ཅི་ཡང་མི་སྨྲ་བའི་རྟུལ་ཞུགས་འཛིན་པ་མཐོང་སྐབས་ང་ཚོར་བློ་ཕམ་སྐྱེ་བཞིན་འདུག ད་ཆ་ཧོང་ཀོང་མི་མང་ཚོ་ཡང་རྒྱ་ནག་གཞུང་གིས་དམ་བསྒྲགས་སུན་གཙེར་ཧ་ཅང་བཟོ་བཞིན་ཀྱང་སྣང་མེད་དུ་གཏོང་བཞིན་ཡོད། བྱེད་བབ་དེ་དག་ནི་བློ་ཕམ་གྱི་གནས་རེད། སྲིད་གཞུང་ཁག་དང་ཚོང་དོན་སྒྲིག་འཛུགས་ཁག་གཅིག་གིས་དྲང་བདེན་གྱི་ཕྱོགས་སུ་རྒྱབ་ལང་བྱ་རྒྱུའི་ཚབ་ཏུ། འཕྲལ་སེལ་དཔལ་འབྱོར་གྱི་ཁེ་ཕན་ཁོ་ནར་དམིགས་ནས་མང་གཙོ་དང་ཁྲིམས་ཀྱི་དབང་སྒྱུར། རང་ཐག་རང་གཅོད། འགྲོ་བ་མིའི་ཐོབ་ཐང་གི་རིན་ཐང་བཅས་ལ་རྩིས་མེད་རྡོག་རོལ་བཏང་ནས་རྒྱ་ནག་གཞུང་དང་བསྟུན་མཁས་ཁོ་ན་བྱེད་བཞིན་ཡོད།
ང་ཚོ་རང་དབང་ཡོད་མཁན་རྒྱལ་ཁབ་ནང་དུའང་རྒྱ་ནག་གཞུང་གིས་མང་གཙོ་དང་རང་དབང་ལ་རྩིས་མེད་རྡོག་རོལ་གཏོང་སྐབས་གདོང་ལེན་བྱེད་ཐུབ་ཀྱི་མེད། འོན་ཀྱང་ང་ཚོས་རྒྱ་ནག་གཞུང་གིས་གནས་དུས་ཚོད་རྩིས་ཀྱི་བྱེད་བབ་དེར་ང་ཚོ་བློ་མཐུན་ཐུན་མོང་མནའ་འབྲེལ་འོག་ནས་མཐའ་གཅིག་ཏུ་ངོ་རྒོལ་གདོང་ལེན་བྱ་རྒྱུ་ལས་དེ་མུར་བཞག་ནས་ངན་པ་རྒྱ་ཡན་དུ་གཏོང་ཐབས་རྩ་བ་ནས་མེད།
བོད་ནི་གོ་ལའི་སྣེ་གསུམ་པ་ཡིན་སྟབས་བོད་མཐོ་སྒང་གི་ཁོར་ཡུག་དེ་གོ་ལའི་གནམ་གཤིས་འགྱུར་ལྡོག་དང་འབྲེལ་བ་ཧ་ཅང་ཡོད་སྟབས། ང་ཚོས་རྒྱལ་སྤྱིའི་ཁོར་ཡུག་གི་གནད་དོན་ཐོག་བགྲོ་གླེང་ནམ་བྱུང་སྐབས་བོད་ཀྱི་ཁོར་ཡུག་དེ་གནད་དོན་གཙོ་བོ་ཞིག་ལ་ངོས་འཛིན་ཡོང་ཐབས་བྱ་རྒྱུ་ཡིན། བོད་བརྒྱུད་ནང་བསྟན་ནི་འཛམ་གླིང་སྐྱེ་འགྲོ་ཀུན་གྱི་བདེ་སྡུག་དང་འབྲེལ་བ་ཧ་ཅང་ཡོད་སྟབས། དེ་ལ་བརྟེན་པའི་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་དགོས་རྒྱུ་ཧ་ཅང་གལ་ཆེ་ཡིན་པ་ང་ཚོས་ཡོངས་གྲགས་ངོས་འཛིན་ཞུ་བཞིན་ཡོད།
འདི་ལོའི་ཕྱི་ཟླ་ ༡༠ ནང་བཞུགས་སྒར་དུ་དམིགས་བསལ་ཚོགས་ཆེན་སྐབས་འབྱུང་འགྱུར་༸གོང་ས་ཏཱ་ལའི་བླ་མ་མཆོག་གི་སྐུའི་ཡང་སྲིད་ཀྱི་གནད་དོན་ཐག་གཅོད་ཞུ་རྒྱུའི་བདག་དབང་དེ་༸གོང་ས་ཏཱ་ལའི་བླ་མ་མཆོག་དང་དགའ་ལྡན་ཕོ་བྲང་ཐེབས་རྩའི་དབང་ལྡན་འགན་འཛིན་ཁོ་ནར་ཡོད་པའི་གྲོས་ཆོད་དེར་ང་ཚོས་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན། དེར་བརྟེན་༸རྒྱལ་བའི་ཡང་སྲིད་ཀྱི་གནད་དོན་ཐག་གཅོད་ཞུ་རྒྱུའི་ཐད་རྒྱ་ནག་གཞུང་གིས་ཐེ་བྱུས་བྱས་ཚེ་ང་ཚོས་དེར་ངོ་རྒོལ་མཐའ་གཅིག་ཏུ་བྱ་རྒྱུ་དང་། རྒྱ་ནག་གཞུང་ལ་དེ་ལྟར་བྱ་རྒྱུའི་ཁྲིམས་མཐུན་གྱི་བདག་ཐོབ་རྩ་བ་ནས་མེད་པར་ངོས་འཛིན་བྱེད་བཞིན་ཡོད། དེར་བརྟེན་རྒྱལ་སྤྱིའི་སྤྱི་ཚོགས་ནས་ཀྱང་དེར་ངོ་རྒོལ་གནང་དགོས་པ་མ་ཟད། ཁྲིམས་འགལ་ཉེས་ཆད་བཀལ་དགོས་པའི་འབོད་སྐུལ་ཞུ་བཞིན་ཡོད། ཅེས་སོགས་བཀོད་འདུག
Leave a Reply