ཧྥ་རན་སིའི་སྲིད་འཛིན་མེག་རོན་ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུག་འཕྲད་སྐབས་ཧོང་ཀོང་གི་གནས་སྟངས་ཞི་འཇགས་བཟོ་དགོས་སྐོར་འབོད་སྐུལ་གནང་ཡོད་འདུགཁ་སང་ཕྱི་ཚེས་ ༦ ཉིན་རྒྱ་ནག་གི་རྒྱལ་ས་པེ་ཅིན་དུ། ཧྥ་རན་སིའི་སྲིད་འཛིན་མེག་རོན་ལགས་ཀྱི་ཉིན་གྲངས་ ༣ རིང་གི་རྒྱ་ནག་ནང་གི་གཟིགས་སྐོར་མཇུག་བསྡུས་ཡོད་པ་དང་། ཐེངས་འདིར་གཟིགས་སྐོར་ཁྲོད་རྒྱལ་ཁབ་གཉིས་བར་མཁའ་སྐྱོད་ཚོང་འབྲེལ་དང་།  ཡུལ་སྐོར་སྤྲོ་འཆམ། ཞིང་ལས་དང་འབྲེལ་བའི་ཐོན་རྫས། རྡུལ་ཕྲན་མཚོན་ཆའི་རྒྱུ་ཆ་སོགས་ཁྱོན་ཨ་སྒོར་དུང་ཕྱུར་ ༡༥ ཡི་ཚོང་འབྲེལ་གྲོས་ཆོད་བཞག་ཡོད་འདུག་ལ། དེའི་ཁྲོད་ཧྥ་རན་སིའི་བཟོ་གྲྭ་ ༢༠ ནས་རྒྱ་ནག་ནང་བྱ་ཤ་དང་གླང་ཤ། དེ་བཞིན། ཕག་ཤ་སོགས་ནང་འདྲེན་བྱེད་ཆོག་པ་བཟོས་ཡོད་འདུག

སྲིད་འཛིན་གཉིས་ཀྱི་ཐུག་འཕྲད་སྐབས་ཧྥ་རན་སིའི་སྲིད་འཛིན་མེག་རོན་ལགས་ཀྱིས། ང་ཁྱེད་དང་ལྷན་དུ་འཛམ་གླིང་འདི་ལ་གདོང་བསྟན་འདོད་ཡོད། ང་ཚོའི་མ་འོངས་པ་དང་མི་མང་གི་འཚོ་གནས་སླད། ང་ཚོས་ཧྥ་རན་སི་དང་རྒྱ་ནག་མཉམ་འབྲེལ་གྱི་སྲིད་བྱུས་སྔར་ལྷག་གོང་མཐོར་གཏོང་རྒྱུ་དང་སྟོབས་ཤུགས་ལྡན་པའི་རྒྱལ་ཁབ་ཁག་གི་འབྲེལ་ལམ་ལས་ཆེས་གལ་ཆེན་གྱི་འབྲེལ་ལམ་ཞིག་ཏུ་བསྒྱུར་བར་མུ་མཐུད་འབད་བརྩོན་བྱེད་རྒྱུ་ཡིན། ཞེས་བརྗོད་ཡོད་པ་དང་། ཐེངས་འདིའི་ཐུག་འཕྲད་སྐབས་རྒྱ་ནག་གིས་པེར་སི་གོ་ལའི་གནམ་གཤིས་ཚ་དྲོད་ཀྱི་གྲོས་ཆོད་ཐད་མཉམ་ལས་ཤུགས་ཆེན་བྱེད་རྒྱུ་ཡིན་པའི་ཁས་ལེན་བྱུང་ཡོད་སྟབས། ཧྥ་རན་སིའི་ཕྱོགས་ནས་ལས་དོན་འདི་གཞི་རྒྱ་ཆེ་རུ་གཏོང་བའི་རེ་བ་རྒྱག་གི་ཡོད་འདུག

རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ང་ཚོས་མཉམ་དུ་འཛམ་གླིང་ལ་ཚོང་འབྲེལ་རང་དབང་དང་མཉམ་ལས། གུ་ཡངས་རྒྱལ་སྤྱིའི་ཚོང་འབྲེལ་སོགས་གལ་ཆེན་ཡིན་པའི་བརྡ་ལན་ཆེན་པོ་ཞིག་བསྟན་ཡོད། ཅེས་བརྗོད་ཡོད་པ་དང་། ད་རེས་ཐུག་འཕྲད་འདི་བརྒྱུད་རྒྱ་ནག་གིས་ཡུ་རོབ་མཐུན་ཚོགས་ཀྱི་སྟོབས་ཤུགས་ཆེ་བའི་རྒྱལ་ཁབ་ཧྥ་རན་སི་བརྒྱུད་ཡུ་རོབ་ཀྱི་ཁྲོམ་རར་གོ་སྐབས་དམ་འཛིན་བྱས་ཡོད་པ་མ་ཟད། ཡུ་རོབ་ཀྱི་ཁྲོམ་ར་ནི་རྒྱ་ནག་ལ་མཚོན་ན་ཨ་རྒྱ་གཉིས་ཀྱི་ཚོང་འབྲེལ་འཐབ་འཁྲུག་ཁྲོད་དཔལ་འབྱོར་གྱི་དཀལ་ངལ་སེལ་ཐབས་ཡག་ཤོས་ཆགས་ཀྱི་ཡོད་པ་རེད།

ཆབ་སྲིད་དཔྱད་བརྗོད་པས། ཨ་རྒྱ་གཉིས་ཀྱི་ཚོང་འབྲེལ་འཐབ་འཁྲུག་ཁྲོད་ཕྱོགས་གཉིས་ལ་དཀའ་ངལ་ཡོད་པའི་སྐབས་འདིར། རྒྱ་ནག་གིས་ཡུ་རོབ་ཀྱི་ཁྲོམ་ར་འཛིན་ཐབས་བྱས་ཏེ། དཀའ་ངལ་འདི་ལས་གཡོ་ཐབས་བྱེད་བཞིན་ཡོད་པ་དང་། ཡང་ཨ་རི་པེར་སི་གོ་ལའི་གནམ་གཤིས་གྲོས་ཆོད་ལས་ཕྱིར་འཐེན་བྱས་པར་བརྟེན། རྒྱ་ནག་ཨ་རིའི་ཚབ་ཏུ་ལངས་ཏེ་གོ་ལའི་སྣེ་འཁྲིད་ཀྱི་རྒྱལ་ཁབ་ཅིག་ཏུ་འགྱུར་བར་དམིགས་འབེན་འཛིན་བཞིན་ཡོད་སྐོར་སོགས་བརྗོད་འདུག

ད་ལན་སྲིད་འཛིན་མེག་རོན་རྒྱ་ནག་ཏུ་མ་ཕེབས་གོང་དུ་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་དང་། ཧྥ་རན་སིའི་བོད་རང་བཙན་སློབ་ཕྲུག་ཚོགས་པ། རྒྱ་ནག་གི་ཚོགས་པ། དེ་བཞིན། ཡེ་ཤུ་ཆོས་ལུགས་ཀྱི་ཚོགས་པ་དང་ཡུ་གུར་སོགས་ཀྱི་ལས་འགུལ་ཚོགས་པ་མང་པོས་སྲིད་འཛིན་མེག་རོན་ལགས་ཀྱིས། རྒྱ་ནག་ནང་གི་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་དགོས་པའི་འབོད་སྐུལ་ཞུས་ཡོད་ཀྱང་། ད་རེས་ཡོངས་གྲགས་ཀྱི་ཐོག་ནས་སྲིད་འཛིན་མེག་རོན་ནས་རྒྱ་ནག་གཞུང་གིས་ཧོང་ཀོང་གི་གནས་སྟངས་ཞི་འཇགས་བཟོ་དགོས་སྐོར་གསུངས་ཡོད་པ་ལས། བོད་དང་ཡུ་གུར་སོགས་ཀྱི་གནད་དོན་གླེང་སློང་གནང་ཡོད་མེད་གོ་ཐོས་མེད་པ་རེད།

གསར་འགོད་པ། སྐལ་བཟང་སྦྱིན་པ།