རྒྱ་ནག་གི་སློབ་ཆེན་ ༡༡༥ ཙམ་དམར་དམག་དང་འབྲེལ་བ་དམ་ཟབ་འདུག་ཟེར།

ཨོ་གླིང་གཞུང་དང་ཡུལ་དེའི་སློབ་ཆེན་ཁག་སོགས་ཀྱིས་རྒྱ་ནག་གི་ཚོགས་སྡེ་ཁག་ལ་མཉམ་འབྲེལ་བྱེད་ཀྱི་ཡོད་པ་དེས་ཨོ་གླིང་གི་འགྲོ་བ་མིའི་ཐོབ་ཐང་རྡོག་རོལ་དང་བདེ་འཇགས་ལ་ཉེན་ཁ་ཆེ་རུ་འགྲོ་བཞིན་ཡོད་པའི་སྙན་ཐོ་བཏོན།ཁ་སང་ཕྱི་ཚེས་ ༢༥ ཉིན་ཨོ་གླིང་འཐབ་བྱུས་ཉམས་ཞིབ་ལྟེ་གནས་ཁང་(Australian Strategic Policy Institute)གིས་རྒྱ་ནག་དང་འབྲེལ་བའི་སྙན་ཐོ་ཞིག་བཏོན་ཏེ། རྒྱ་ནག་གི་སློབ་ཆེན་བརྒྱ་ལྷག་དམར་དམག་དང་འབྲེལ་བ་དམ་ཟབ་ཡོད་པ་ཤེས་རྟོགས་བྱུང་ཡོད་སྟབས། ཨོ་གླིང་གི་སློབ་ཆེན་ཁག་ནས་སློབ་ཆེན་དེ་དག་ལ་མཉམ་འབྲེལ་མཚམས་འཇོག་དགོས་པའི་འབོད་སྐུལ་གནང་ཡོད་འདུག

སྙན་ཐོ་དེའི་ནང་། འདས་པའི་ལོ་ངོ་བཅུ་ཕྲག་འགའི་ནང་རྒྱ་ནག་དམར་ཤོག་ཚོགས་པས་རྒྱ་ནག་གི་སློབ་ཆེན་ཁག་དང་དམག་སྡེ། དེ་བཞིན་བདེ་སྲུང་ཚན་པ་ཁག་བར་འབྲེལ་བ་ཆེ་རུ་བཏང་སྟེ། དམག་ཤུགས་ཀྱི་ཁྱབ་ཚད་ཆེ་རུ་གཏོང་བཞིན་ཡོད་པ་དང་། རྒྱ་ནག་གི་སློབ་ཆེན་ཧ་ཅང་མང་པོ་ཞིག་རྒྱལ་སྲུང་ཞིབ་འཇུག་དང་རྒྱལ་སྲུང་ཚན་རིག་པར་སྦྱོང་བརྡར་སྤྲོད་པ། དམག་སྡེ་དང་རྒྱལ་སྲུང་ཚན་པར་མཉམ་འབྲེལ་དང་གསང་བའི་ཡིག་ཆ་ཁག་ལ་འབྲེལ་བ་ཡོད་པ། དེ་བཞིན་ཉུང་མཐར་སློབ་ཆེན་ཁག་ ༡༥  དྲྭ་གནས་འཇབ་རྒོལ་དང་གསང་ཉུལ་ཁྲིམས་འགལ་གྱི་དངོས་ཟོག་ཕྱིར་འདྲེན་སོགས་ལ་འབྲེལ་བ་ཡོད་པ་དང་། རྒྱལ་སྲུང་ཚན་པས་སློབ་ཆེན་ཁག་ ༩ ལ་བཀོད་འདོམས་དང་། དེའི་ལས་མི་སྟོང་ཕྲག་མང་པོ་ཕྱིའི་རྒྱལ་ཁབ་ཁག་ལ་སྦྱོང་བརྡར་དུ་བཏང་རྗེས། ཕྱིར་རྒྱ་ནག་ཏུ་འབོད་འགུག་གིས་དམག་དོན་ཆེད་ལས་ཀ་བྱེད་དུ་འཇུག་གི་ཡོད་པ་སོགས་བཀོད་འདུག

ཡང་ཨོ་གླིང་གི་ཉམས་ཞིབ་ལྟེ་གནས་ཁང་དེའི་སྙན་ཐོའི་ནང་། ཨོ་གླིང་གི་སློབ་ཆེན་ཁག་གིས་རྒྱ་ནག་གི་སློབ་ཆེན་ཁག་ ༡༡༥ ཙམ་དམར་དམག་དང་འབྲེལ་བ་དམ་པོ་ཡོད་པར་བརྟེན། དེ་དག་དང་མཉམ་འབྲེལ་བྱེད་མཚམས་འཇོག་དགོས་པ་དང་། སློབ་ཆེན་ཁག་གི་ནང་རང་དབང་ལྡན་པའི་ཉམས་ཞིབ་ཁང་འཛུགས་པ། དེ་བཞིན་ཨོ་གླིང་གཞུང་ནས་གཞུང་འབྲེལ་གྱི་ཉམས་ཞིབ་ཁང་ཁག་ལ་རོགས་དངུལ་མང་དུ་བཏང་སྟེ། སློབ་ཆེན་ཁག་ལ་མཉམ་འབྲེལ་ཞིབ་འཇུག་ཡར་རྒྱས་གཏོང་བ་དང་། དེ་དང་འབྲེལ་ནས་རྒྱལ་སྲུང་དང་བདེ་འཇགས་ཀྱི་ཆེད་དོ་ནན་བྱེད་དགོས་པའི་འབོད་སྐུལ་གནང་འདུག

ཨོ་གླིང་གི་ཉམས་ཞིབ་ལྟེ་གནས་ཁང་གི་ཉམས་ཞིབ་པ་ཨེ་ལེག་སི་ཇོ་སི་ཀེ་ (Alex Joske) ལགས་ཀྱིས། གཞུང་དང་སློབ་ཆེན། བཟོ་ཚོང་ཁང་ཁག་གིས་རྒྱ་ནག་དམར་ཤོག་ཚོགས་པའི་ཚོགས་པ་ཁག་ལ་མཉམ་འབྲེལ་བྱས་པ་ཡིས། རྒྱ་ནག་གི་མི་དམངས་བཅིངས་གྲོལ་དམག་གམ་བདེ་སྲུང་ཚན་པ་ཁག་གིས་ཉུལ་ཞིབ་དང་འགྲོ་བ་མིའི་ཐོབ་ཐང་རྡོག་རོལ། དེ་བཞིན་དམག་དོན་ཐད་ཁེ་ཕན་སྒྲུབ་ཆེད་བེད་སྤྱོད་གཏོང་བའི་ཉེན་ཚབ་ཆེ་རུ་འགྲོ་བཞིན་ཡོད་པ་དང་། ཨོ་གླིང་གཞུང་དང་སློབ་ཆེན་ཁག་གིས་རྒྱ་ནག་གི་སློབ་ཆེན་ཁག་བར་མཉམ་འབྲེལ་གྱི་ཉེན་ཁ་དེར་ནུས་པ་ལྡན་པའི་ཐོག་ནས་གདོང་ལེན་བྱེད་ཐུབ་ཀྱི་མེད་པར་ལུས་ཡོད་པ་རེད། ཅེས་བརྗོད་འདུག

འདས་པའི་ལོ་ཤས་གོང་ནས་བཟུང་རྒྱ་ནག་གཞུང་གིས་ཞི་བདེ་རྒྱ་མཚོའི་ཁུལ་གྱི་བདག་དབང་དང་ཨོ་གླིང་ནང་གི་བྱེད་སྒོ་ཁག་ལ་བརྟེན། ཕྱོགས་གཉིས་ཀྱི་འབྲེལ་བ་ཇེ་སྡུག་དུ་འགྲོ་བཞིན་ཡོད་ལ། ལྷག་པར་དུ་འདི་ལོའི་ཕྱི་ཟླ་ ༥ ནང་རྒྱལ་ཡོངས་འོས་བསྡུའི་སྐབས་རྒྱ་ནག་གཞུང་གིས་ཨོ་གླིང་གྲོས་ཚོགས་དང་ཆབ་སྲིད་ཚོགས་པ་ཁག་གསུམ་ལ་དྲ་གནས་འཇབ་རྒོལ་བྱས་ཡོད་པ་དང་། རྒྱ་ནག་གི་ཁ་པར་བཟོ་ཚོང་ཁང་ཧྭ་ཝེ་ཡི་དྲ་གནས་ཚད་རིན་ལྔ་པར་རྒྱལ་ཁབ་ཀྱི་བདེ་སྲུང་ལ་ཉེན་ཁ་ཡོད་པའི་དོགས་གཞི་བྱུང་བ་ནས་བཟུང་འབྲེལ་བ་ཇེ་སྡུག་ཏུ་ཕྱིན་ཡོད་པ་རེད།

ཨོ་གླིང་ནང་ཕྱིའི་རྒྱལ་ཁབ་ཁག་ནས་སློབ་མ་འབོར་ཆེན་ལེན་གྱི་ཡོད་འདུག་ལ། འདས་ལོར་ཕྱིའི་རྒྱལ་ཁབ་ནས་ཡོང་བའི་སློབ་མའི་བརྒྱ་ཆའི་ ༣༨ ལྷག་ཙམ་ནི་རྒྱ་ནག་ནས་ཡོང་བ་ཡིན་འདུག་ལ། དེ་ནི་ཕྱིའི་རྒྱལ་ཁབ་ཁག་ནས་ཡོང་བའི་སློབ་མའི་སུམ་ཆའི་གཅིག་ལྷག་ཟིན་ཡོད་སྟབས། ཨོ་གླིང་གཞུང་ནས་རྒྱ་ནག་གཞུང་གིས་གནས་བབ་དེ་བེད་སྤྱད་ནས་སློབ་ཆེན་ཁག་ནང་ཤུགས་རྐྱེན་སྤྲོད་པའི་དོགས་པ་བྱེད་ཀྱི་ཡོད་པ་དང་། རྒྱ་ནག་གཞུང་འབྲེལ་གྱི་ཁུང་ཙི་ལྟེ་གནས་ཁང་ལ་ཨོ་གླིང་གི་སློབ་ཆེན་ཁག་ནས་མཉམ་འབྲེལ་གྱི་གན་རྒྱ་མཚམས་འཇོག་བྱེད་བཞིན་ཡོད་པ་རེད།

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༡༡/༢༦

Leave a Reply