བོད་མི་མང་ལ་རོགས་རམ་བྱ་རྒྱུའི་ཆོད་སེམས་སྔོན་མ་ནས་ཡོད།

གནས་མཆོག་རྡོ་རྗེ་གདན་དུ་དུས་དབང་ཐེངས་སོ་གཉིས་པ་ཕྱི་ཚེས་ ༡༠ ཉིན་ཡོངས་སུ་མཇུག་བསྒྲིལ་མ་ཐག ཕྱི་ཚེས་ ༡༡ ཉིན་གསར་འགོད་པས་ཐེངས་འདིའི་སྤྱིན་བདག་གཙོ་བོ་ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་འདས་པོ་རྡོ་རྗེ་མཁའ་འགྲོའི་བུ་ཨ་རུ་ན་ཅལ་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་ལ་བཅར་འདྲི་ཞུས་ཡོད།

དྲི་བ། སྐུ་ཉིད་ཀྱི་ཕ་དམ་པ་རྡོ་རྗེ་མཁའ་འགྲོ་མཆོག་གིས་ཐོག་མར་༧གོང་ས་མཆོག་ལ་དུས་འཁོར་དབང་ཆེན་ཞུས་པར་ཐུགས་རེ་གཙོ་བོ་གང་འདྲ་གནང་ཡོད་པ་དང་། དུས་དབང་གནང་ཡུལ་རྡོ་རྗེ་གདན་དུ་གོ་སྒྲིག་ཞུ་དོན་ཅི་ཡིན།

ལན། ངའི་ཡབ་དམ་པ་ཁོ་རང་སྔོན་མ་ནས་༧རྒྱལ་བ་རིན་པོ་ཆེ་མཆོག་ལ་དད་གུས་ཆེན་པོ་ཡོད་པ་རེད། ༧རྒྱལ་བ་རིན་པོ་ཆེ་མཆོག་གིས་ཀྱང་ཕ་ལགས་ལ་ཐུགས་ཉེ་བོ་གནང་གི་རེད། ལྷག་པར་དུ་ང་ཚོ་ཨ་རུ་ན་ཅལ་ཕྱོགས་སུ་ནང་པའི་ཆོས་བྱེད་མཁན་མང་པོ་དང་། ཁོང་ཅག་༧རྒྱལ་བ་རིན་པོ་ཆེ་ལ་བློ་གཅིག་སེམས་གཅིག་གིས་ཡིད་ཆེས་དང་དད་པ་ཡོད་མཁན་ཤ་སྟག་རེད། ཁོང་ཅག་གིས་སྔོན་མ་ནས་༧རྒྱལ་བ་རིན་པོ་ཆེ་མཆོག་ལ་དུས་འཁོར་དབང་ཆེན་ཞུ་ཐུབ་ན་སྙམ་པའི་རེ་འདོད་ཆེན་པོ་བྱེད་ཀྱི་ཡོད་ཀྱང་། ཨ་རུ་ན་ཅལ་མངའ་སྡེ་ནང་དེ་འདྲ་ཞིག་གོ་སྒྲིག་ཐུབ་པ་ཁག་པོ་རེད། ས་ཐག་རིང་པོ་དང་། ས་ཆའི་མཐུན་རྐྱེན་ཡང་འཛོམས་པོ་ཡོད་པ་མ་རེད། ཕ་ལགས་ཀྱིས་མི་མང་གི་རེ་འདོད་བསྐོང་ཆེད་༧རྒྱལ་བ་རིན་པོ་ཆེ་ལ་དུས་འཁོར་དབང་ཆེན་ཞུས་པ་རེད་ལ། སྐྱབས་འཇུག་ཞུས་པ་བཞིན་ཞལ་བཞེས་ཀྱང་ཐོབ་སྟེ། ས་ཆ་རྡོ་རྗེ་གདན་ལ་གཏན་འཁེལ་བ་རེད། རྡོ་རྗེ་གདན་ནི་རྒྱ་གར་གྱི་དཀྱིལ་དབུས་ལྟ་བུ་རེད། རྒྱ་གར་རྒྱལ་ཡོངས་ཀྱི་ནང་པ་ཚོར་སྟབས་བདེ་བོ་ཡོད་པ་མ་ཟད། བོད་ནང་ནས་ཕེབས་མཁན་དང་། ཕྱི་རྒྱལ་ཁག་ནས་ཕེབས་མཁན་ཚོས་དབང་གི་ཞོར་དུ་གནས་མཇལ་ཡང་ཐུབ་ཀྱི་ཡོད་པ་རེད།  

དྲི་བ། དུས་འཁོར་དབང་ཆེན་གྱི་ལས་དོན་མགོ་འཛུགས་བྱས་ཏེ་ད་ལྟའི་བར་དཀའ་ངལ་གང་དག་འཕྲད་ཡོད་དམ།

ལན། སྤྱི་ཡོངས་ཀྱི་ཐོག་ནས་དཀའ་ངལ་ཆེན་པོ་གང་ཡང་འཕྲད་མ་སོང་། དེ་༧རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཞིག་ལ་ངོས་འཛིན་བྱེད་ཀྱི་ཡོད། ཉེ་ཆར་དུས་དབང་བསླེབ་ལ་ཉེ་སྐབས་ཆོས་ཞུ་བར་གུར་རྒྱག་རྒྱུའི་ཐོག་དཀའ་ངལ་ཏོག་ཙམ་འཕྲད་སོང་། ཐོག་མ་བྷེ་ཧྭར་མངའ་སྡེ་གཞུང་ལ་ས་ཆ་གཡར་དུ་ཕྱིན་སྐབས། ས་ཆ་གཡར་ལ་མ་གཡར་ལ་དང་། དུས་ཚོད་གང་འཚམ་འགོར་འགྱངས་བྱས་སོང་། ས་ཆ་གཡར་བ་དེ་ཡང་ཆུང་དྲགས་པའི་དབང་གིས་ས་གནས་ཁག་གསུམ་ནང་གུར་རྒྱག་དགོས་བྱུང་སོང་། མ་གྷ་ངྷི་གཙུག་ལག་སློབ་གྲྭའི་གླིང་གར་ཆོ་ཞུ་བ་སྤྱི་ཡོངས་ལ་གུར་བརྒྱབ་པ་རེད། བཀའ་བརྒྱུད་དགོན་པའི་ཉེ་འགྲམ་དུ་ཨ་རུ་ན་ཅལ་གྱི་ཆོས་ཞུ་བ་ཚོར་གུར་བརྒྱབ་པ་རེད། གསུམ་པ། བོད་ནས་ཕེབས་མཁན་ཚོར་ཆུ་བོ་ཎེར་ཛ་ནའི་འགྲམ་དུ་བརྒྱབ་ཡོད། ཆོས་ཞུ་བ་མང་ཤོས་སྡོད་སའི་མ་གྷ་ངྷ་གཙུག་ལག་སློབ་གྲྭའི་གུར་ནང་ཆུ་དང་གློག་ཀྱང་སྤྲད་ལ་མ་སྤྲད་ལ་བྱས་སོང་། དེ་ནས་ཕྱི་ཚེས་ ༡ ཉིན་གསུང་ཆོས་མགོ་འཛུགས་བྱས་མ་ཐག་ཆར་བ་བབས་ཏེ་ཆོས་ཞུ་བ་ཚོར་དཀའ་ངལ་གང་འཚམ་འཕྲད་ཡོད་པ་རེད།

དྲི་བ། གོ་སྒྲིག་ཚོགས་ཆུང་གིས་ཐོག་མར་བྷེ་ཧར་མངའ་སྡེ་གཞུང་གིས་རྒྱབ་སྐྱོར་ཆ་ཚང་ཡོད་སྐོར་དང་། གོ་སྒྲིག་ཚོགས་ཆུང་གི་ངོས་ནས་ཀྱང་གྲ་སྒྲིག་ཨང་གསར་བྱས་ཡོད་ཚུལ་བརྗོད་ཀྱང་། ལས་དོན་དངོས་གཞིའི་ཐོག་དེ་འདྲ་བྱུང་མེད་དོན་གང་ཡིན།

ལན། ང་རང་ལས་འདོན་འདི་མགོ་འཛུགས་བྱས་ཏེ་ཐེངས་ ༤ ཙམ་ལ་ཨ་རུ་ན་ཅལ་ནས་ཆེད་དུ་རྡོ་རྗེ་གདན་ལ་བཅར་དགོས་བྱུང་སོང་། བྷེ་ཧྭར་མངའ་སྡེ་སྤྱི་ཁྱབ་བློན་ཆེན་མཆོག་གི་སར་ཐེངས་ ༢ ལ་བཅར་ཏེ་རྒྱབ་སྐྱོར་རོགས་རམ་ཡོང་བའི་རེ་སྐུལ་ཞུས་པ་ཡིན། གང་ལྟར་མངའ་སྡེ་གཞུང་དང་ས་གནས་ལས་བྱེད་ཚོས་སྤྱི་ཡོངས་ཀྱི་ཐོག་ལ་རྒྱབ་སྐྱོར་གནང་སོང་། ཐུགས་རྗེ་ཆེ་ཞུ་རྒྱུ་ཡིན། འོན་ཀྱང་ལས་དོན་ཕྲན་བུ་རེ་ཟུང་ཐོག་འཐུས་ཤོར་དང་འགོར་འགྱངས་བྱས་སོང་། ཆོས་ཞུ་བའི་སྡོད་གུར་རྒྱག་ཡུལ་ཐད་ནས་ཀྱང་མངའ་སྡེ་བློན་ཆེན་གྱིས་བཀའ་གནང་སྟེ་རིམ་པ་འོག་མ་དག་གིས་ས་ཆ་ཁག་གསུམ་དུ་བགོས་ནས་སྤྲད་འདུག་ལ། ས་ཆར་རིན་པ་ཡང་གང་འཚམ་ཐག་གཅོད་བྱས་འདུག ང་ཚོས་ས་གནས་རྫོང་ལ་རེ་སྐུལ་ཞུས་ཏེ་དུས་འཁོར་དབང་ཆེན་འདི་ཆོས་ཀྱི་དགེ་རྩ་ཞིག་དང་། མང་ཚོགས་ལ་ཞབས་འདེགས་བསྒྲུབ་པ་ཞིག་ཡིན་སྐོར་ཞུས་ཀྱང་། ས་གནས་རྫོང་དཔོན་གྱི་ངོས་ནས་ས་རིན་ལེན་དང་མི་ལེན་ང་ཚོར་ཐག་གཅོད་ཀྱི་དབང་ཆ་ཡོད་པ་མ་རེད། མངའ་སྡེ་གཞུང་ལ་ཞུ་དགོས་པ་རེད་གསུངས་སོང་། དེ་ནས་གོ་སྒྲིག་ཚོགས་ཆུང་གི་ཚོགས་གཙོས་མངའ་སྡེ་བློན་ཆེན་གྱི་ཕྱག་ཏུ། ས་རིན་དང་གློག་རིན་ཐོག་དགོངས་བཞེས་ཡོང་བའི་རེ་ཞུ་ཞིག་ཕུལ་བ་རེད། ད་དུང་ཐག་གཅོད་གང་ཡང་འབྱོར་མ་སོང་། ས་གནས་མི་མང་ལ་མཚོན་ན་ང་ཚོས་རྒྱབ་སྐྱོར་དགོས་པའི་རེ་སྐུལ་ཞུས་ཡོད་པ་མ་རེད་ལ། ཁོ་རང་ཚོས་དངོས་ནས་ཀྱང་རོགས་འདེགས་དེ་འདྲ་གནང་མ་སོང་ལ། སྡུག་ཅག་དེ་འདྲ་ཡང་བྱས་མ་སོང་བས་ཐུགས་རྗེ་ཆེ་ཞུ་རྒྱུ་ཡིན།

དྲི་བ། ཆོས་ཞུ་བའི་སྡོད་གུར་ནང་ཆུ་དང་གློག གསང་སྤྱོད་སོགས་ཀྱི་མཐུན་རྐྱེན་འཛོམས་མིན་དང་། ལྷག་པར་དུ་ཉིན་འགའི་སྔོན་ཆར་བ་བབས་ཏེ་མི་མང་ལ་དཀའ་ངལ་འཕྲད་པའི་དབང་གིས་གོ་སྒྲིག་ཚོགས་ཆུང་གིས་གུར་གླ་ཆ་ཚང་མི་མང་ལ་ཕྱིར་སློག་གནང་བ་དེས་དཔལ་འབྱོར་ཐོག་དཀའ་ངལ་འཕྲད་ཡོད་དམ།  

ལན། ཉེ་ཆར་ཆར་བ་འབབ་སྐབས་ང་འདིར་བསྡད་མེད། ཕྱི་ཚེས་ ༡ ནས་ ༦ བར་ཚོགས་འདུ་སོགས་ལས་དོན་གཞན་ཁག་ཅིག་གི་ཆེད་དུ་ལྡི་ལིར་སྡོད་དགོས་བྱུང་སོང་། དུས་ཚོད་དེའི་རིང་ལ་ཆར་བ་བབས་པ་དང་ཆོས་ཞུ་བའི་གསང་སྤྱོད་འཁྲུས་ཁང་མ་འགྲིག་པ་སོགས་ཀྱི་དཀའ་ངལ་འཕྲད་ཡོད་ས་རེད། ཡིན་ནའང་ང་རང་ཐེངས་འདིའི་སྦྱིན་བདག་ཡིན་པ་ཙམ་ལས། ལས་དོན་མང་ཆེ་བ་གོ་སྒྲིག་ཚོགས་ཆུང་གིས་ཐག་གཅོད་གནང་གི་ཡོད་པ་རེད། གནས་སྟངས་ལ་གཟིགས་ཏེ་འགྲོ་སོང་ག་ཚོད་གཏོང་དགོས་པ་དང་། ཕྱག་ལས་ག་རེ་གནང་དགོས་པ་ཁོ་རང་ཚོས་གནང་གི་ཡོད་པ་རེད། རྗེས་སུ་དེ་དག་གི་རྩིས་ཐོ་དང་འགྲེལ་བཤད་ང་ལ་འབྱོར་དགོས་པ་རེད། ད་དུང་ལས་རིམ་དེར་བསླེབས་ཡོད་པ་མ་རེད། གཅིག་བྱས་ན། ཁྱོད་ཀྱིས་ང་ལ་ཐེངས་འདིའི་བྱུང་སོང་གི་དངུལ་རྩིས་སྐོར་འདྲི་སྲིད་པ་རེད། ད་ལྟ་རྩིས་ཁྲའི་སྐོར་ཁྱེད་ལ་ཞུ་ཐུབ་ཀྱི་མི་འདུག ཕར་འགྲོ་སོང་ག་ཚོད་ཕྱིན་པ་དང་། ཚུར་ཡོང་འབབ་ག་ཚོད་ཡོད་པ་སོགས་རྩིས་ཁྲ་གཙང་མ་གཙང་རྐྱང་ཞིག་རྗེས་མ་གསལ་བསྒྲགས་ཞུ་རྒྱུ་ཡིན། ཁ་སང་༧གོང་ས་མཆོག་གིས་ཀྱང་ཁྱེད་རང་ཚོས་རྩིས་ཁྲ་ཕྱི་གསལ་ནང་གསལ་ཞིག་བཟོས་ཞེས་བཀའ་ཕེབས་སོང་། ཉི་མ་གཅིག་གཉིས་ནང་རྩིས་ཁྲའི་ལས་རིམ་དེ་གྲུབ་རྗེས་བོད་ཡིག་དང་དབྱིན་གཉིས་ཐོག་ནས་གསལ་བསྒྲགས་ཞུ་ངེས་ཡིན། སྐབས་དེར་ཁྱེད་རང་ཚོས་མང་ཚོགས་ལ་གསལ་བོ་ཞིག་བསྒྲགས་རྒྱུའི་རེ་བ་ཞུ་བཞིན་ཡོད། 

དྲི་བ། ད་ལྟ་དུས་འཁོར་དབང་ཆེན་ལེགས་པར་གྲུབ་སྟེ་ཁྱེད་སྦྱིན་བདག་རྣམ་པའི་དམིགས་ཡུལ་དང་ཆོས་ཞུ་བ་རྣམས་ཀྱི་རེ་འདོད་ཡོངས་སུ་གྲུབ་ཡོད་སྟབས་སེམས་ཚོར་གང་འདྲ་འདུག་གམ།

ལན། ༧རྒྱལ་བ་རིན་པོ་ཆེ་ལ་དུས་འཁོར་དབང་ཆེན་ཐོག་མ་ཞུ་མཁན་ཡབ་དམ་པ་རྡོ་རྗེ་མཁའ་འགྲོ་ཁོ་རང་རེད། ཡིན་ནའང་ཁོ་རང་ཚེ་ཡི་བར་ཆད་ཀྱི་དབང་གིས་ཁོང་གིས་ད་ལྟ་དབང་དངོས་སུ་ཞུ་ཐུབ་མེད་ཀྱང་། ང་རང་ཁོང་གི་བུ་ཡིན་པའི་ངོས་ནས་ཁོང་གི་རེ་བ་མཇུག་སྐྱོང་བྱས་ཏེ། དེ་རིང་དུས་འཁོར་དབང་ཆེན་བདེ་ལེགས་ངང་གྲུབ་པར་སེམས་པ་ཧ་ཅང་སྐྱིད་པོ་འདུག ཁ་སང་ཁེ་ཉིན་དབང་མགོ་བཙུགས་ཏེ་༧གོང་ས་མཆོག་གི་གསུང་སྐད་ཐོས་སྐབས། སེམས་པ་སྐྱོ་ལྷང་ལྷང་ཞིག་འདུག ལས་ཀ་འདི་འདྲ་རླབས་ཆེན་ཞིག་མགོ་འཛུགས་གནང་མཁན་ཕ་ལགས་ཡིན་ཡང་། ཁོ་རང་ད་ལྟ་འདིར་༧གོང་ས་མཆོག་གི་གསུང་ཆོས་ཞུ་རྒྱུའི་གོ་སྐབས་རག་ཡོད་པ་མ་རེད། ད་ལྟ་དམིགས་ཡུལ་ཡོངས་སུ་གྲུབ་པ་རེད། ང་ཚོའི་ནང་མི་ཚང་མ་ཧ་ཅང་དགའ་བོ་བྱུང་འདུག ལྷག་པར་དུ་དུས་ཡུན་འདིའི་རིང་༧གོང་ས་མཆོག་གི་སྐུ་གཟུགས་བདེ་བོ་བྱུང་བ་དང་། མི་མང་འབུམ་གཉིས་ལྷག་འཛོམས་པ་རེད། དཀའ་ངལ་ཕྲན་བུ་རེ་བྱུང་ཡོད་ཀྱང་། རྙོག་དྲ་དང་ཆག་སྒོ་ཆེན་པོ་དེ་འདྲ་མ་བྱུང་བར་མཇུག་བསྐྱལ་ཐུབ་པ་འདི་རྨི་ལམ་འདྲ་བོ་ཞིག་རེད།

དྲི་བ། དུས་འཁོར་དབང་ཆེན་འདིའི་སྔ་ཕྱིར་སྐུ་ཉིད་༧གོང་ས་མཆོག་ལ་མཇལ་འཕྲད་བྱུང་ཡོད་མེད་དང་། ཡོད་ཚེ་ཁོང་གིས་ལམ་སྟོན་གང་འདྲ་གནང་བྱུང་ངམ།

ལན། དུས་འཁོར་དབང་ཆེན་དངོས་གཞི་མགོ་འཛུགས་བྱས་པའི་སྔ་ཕྱིར་མཇལ་རྒྱུ་བྱུང་མ་སོང་། ཕ་ལགས་སྐུ་གྲོངས་བའི་རྗེས་སུ་ང་ཚོ་ནང་མི་ཚང་མ་ལྷན་དུ་༧གོང་ས་མཆོག་ལ་མཇལ་ཁ་ཐེངས་གཅིག་རག་སོང་། སྐབས་དེར་༧གོང་ས་མཆོག་གིས་རྡོ་རྗེ་མཁའ་འགྲོ་མཆོག་སྐུ་མ་གཤེགས་གོང་གི་དམ་བཅའ་དེར་ཁྱེད་ཅག་གིས་འཕྲོ་སྐྱོང་གནང་བ་ཡག་པོ་རེད། འདི་མི་མང་ལ་ཕན་ཐོགས་ཡོད་པའི་བྱ་བ་རླབས་ཆེན་ཞིག་རེད་ཅེས་གསུངས་སོང་ལ། ཐེངས་གཉིས་པ། ངས་འདི་ནས་གསོལ་ཚིགས་གཅིག་གྲ་སྒྲིག་ཞུས་ཏེ་༧གོང་ས་མཆོག་གདན་འདྲེན་ཞུས་པ་ཡིན། དམིགས་བསལ་བཀའ་མོལ་དེ་འདྲ་གནང་རྒྱུ་མ་བྱུང་ཡང་ཁོང་གིས་ཐུགས་ཉེས་པ་ཞེ་དྲག་གནང་གི་འདུག དེ་རིང་༧རྒྱལ་བ་རིན་པོ་ཆེ་ཕྱིར་ངྷ་རམ་ས་ལར་ཕེབས་སྐབས། ང་རང་གནམ་ཐང་ལ་ཕེབས་སྐྱེལ་དུ་ཕྱིན་པ་ཡིན། སྐབས་དེར་ཁོང་གིས་ང་ལ་ཁྱོད་ཀྱིས་ལས་དོན་འདིའི་མགོ་མཇུག་བར་གསུམ་ལ་དཀའ་ལས་ཆེན་པོ་བརྒྱབ་སོང་། ད་ལྟ་ལས་འགན་གྲུབ་པ་རེད། དུས་འཁོར་དབང་ཆེན་འདིས་མི་མང་ལ་ཕན་ཐོགས་ཆེན་པོ་བྱུང་སོང་། ཐུགས་རྗེ་ཆེ་ཞེས་གསུངས་བྱུང་།

དྲི་བ། མ་འོངས་པར་༧གོང་ས་ཨ་རུ་ན་ཅལ་དུ་གདན་འདྲེན་ཞུ་རྒྱུ་སོགས་༧གོང་ས་མཆོག་ལ་བསྐྱར་དུ་ཆོས་འབྲེལ་དེ་འདྲ་འཇོག་རྒྱུའི་འཆར་གཞི་ཡོད་དམ།

ལན། ཡོད་དང་ཡོད། ༧རྒྱལ་བ་རིན་པོ་ཆེ་མཆོག་དང་ང་ཚོའི་བར་གྱི་ཆོས་འབྲེལ་མཚམས་འཇོག་ཐབས་ཡོད་པ་མ་རེད། ང་རང་གིས་མོན་རྟ་དབང་དགོན་པའི་ཉེ་འཁྲིས་རྒྱལ་དབང་དྲུག་པ་ཚངས་དབྱངས་རྒྱ་མཚོ་སྐུ་འཁྲུངས་ཡུལ་ཨོ་རྒྱན་གླིང་དུ་མཐོ་ཚད་ཧྥེ་ཊི་ ༡༠༠ ཙམ་ཡོད་པའི་མཆོད་རྟེན་ཆེན་མོ་ཞིག་བཞེངས་བཞིན་ཡོད། ༢༠༠༩ ལོར་༧གོང་ས་མཆོག་མོན་རྟ་དབང་ལ་ཕེབས་སྐབས་མཆོད་རྟེན་གྱི་ས་ཆར་རབ་གནས་བྱིན་རླབས་མཛད་པ་རེད། མ་འོངས་པར་མཆོད་རྟེན་ཡོངས་སུ་གྲུབ་རྗེས་དབུ་འབྱེད་མཛད་སྒོར་༧རྒྱལ་བ་རིན་པོ་ཆེ་ཕེབས་ཏེ་རབ་གནས་ཤིག་གནང་ཐུབ་ན་བསམ་སྟེ་རེ་བ་རྒྱག་གི་ཡོད། ཡིན་ནའང་ད་དུང་སྙན་གསེང་ཞུས་མེད།

དྲི་བ། ཉིད་ཀྱི་ཡབ་དམ་པ་རྡོ་རྗེ་མཁའ་འགྲོ་མཆོག་༧གོང་ས་མཆོག་ལ་དད་གུས་ཆེན་པོ་ཡོད་པ་མ་ཟད། ༢༠༠༨ ལོར་བོད་ནང་དོན་རྐྱེན་བྱུང་སྐབས་ངྷ་རམ་ས་ལར་བཅར་བ་སོགས་བོད་མི་མང་དང་བོད་དོན་ལའང་ཤ་ཚ་ཡོད་མཁན་ཞིག་རེད། ཁྱེད་རང་གིས་བོད་མི་དང་བོད་པའི་རྩ་དོན་ཐོག་ལངས་ཕྱོགས་གང་འདྲ་འཛིན་གྱི་ཡོད་དམ།

ལན། ང་རང་གི་ཡབ་དམ་པར་མཚོན་ན་བོད་མི་མང་ལ་ཤ་ཚ་རྒྱབ་སྐྱོར་ཆེན་པོ་ཡོད་པ་ངས་གསལ་བོ་ཤེས་ཀྱི་ཡོད། དེ་ཆབ་སྲིད་ཀྱི་དགོས་མཁོ་དང་མི་སྒེར་གྱི་ཁེ་ཕན་དེ་འདྲ་ཁྱོན་ནས་མ་རེད། སེམས་གཏིང་ནས་བོད་མི་མང་ལ་དགའ་ཞེན་ཡོད་པ་རེད། ཁོ་རང་གིས་བོད་མི་ཚོར་ག་རེ་གནང་ཐུབ་པ་དེ་གནང་བ་རེད། མ་གཞི་ང་རང་གིས་ཡབ་དམ་པའི་དགོངས་གཞི་དང་ལས་དོན་གལ་ཆེན་དག་རྒྱུན་སྐྱོང་རྒྱུའི་དམ་བཅའ་ཡོད་ལ། ང་རང་སྒེར་ངོས་ནས་ཀྱང་བོད་མི་མང་ལ་རྒྱབ་སྐྱོར་རོགས་རམ་གང་ཐུབ་པ་དེ་བྱ་རྒྱུའི་ཆོད་སེམས་སྔོན་མ་ནས་ཡོད། ཨ་རུ་ན་ཅལ་ཕྱོགས་སུ་བོད་པའི་གཞས་ཆགས་ཁག་ ༤ ཙམ་ཡོད་པ་རེད། ང་རང་ལས་དོན་ཞིག་གི་ཞོར་དུ་ཏེ་ཛུ་བོད་མིའི་གཞས་ཆགས་སུ་ཕྱིན་ཏེ་གཞས་ཆགས་ཀྱི་མགོ་བར་ཆེད་དུ་ཐུག་པ་ཡིན། གཞས་ཆགས་ནང་དཀའ་ངལ་ག་རེ་ཡོད་མེད་དྲིས་སྐབས། ཁོ་རང་གིས་འཐུང་ཆུའི་སྐོར་གྱི་དཀའ་ངལ་ཞིག་ལབ་སོང་། ཁྲོན་པ་བརྐོ་དགོས་ཀྱི་ཡོད་པ་འདྲ། ངས་དེ་ལ་ཧིན་སྒོར་འབུམ་བཞི་ ༤༠༠༠༠༠ སྤྲད་པ་ཡིན། རྗེས་སུ་ཁོང་གིས་ཁྲོན་པ་བརྐོས་ཏེ་འབུམ་ ༢ ཙམ་ལས་ཕྱིན་མ་སོང་ཟེར། དངུལ་ལྷག་པ་དེ་དག་ཀྱང་ང་ལ་ཕྱིར་སློག་མི་དགོས། སློབ་གྲྭ་དང་གཞས་ཆགས་ཀྱི་དཀའ་ངལ་ཐོག་གཏོང་རོགས་ཞེས་བཤད་ཡོད། གཞས་ཆགས་གཞན་དག་ལའང་སོ་སོ་སྒེར་ཡིན་ན་འདྲ་ལ། གཞུང་ཡིན་ནའང་འདྲ། རོགས་པ་ག་རེ་བྱ་དགོས་ཀྱང་ནུས་པ་ཡོད་ཚད་འདོན་དགོས་བསམ་ཡོད། བོད་ནས་གསར་དུ་སྐྱབས་བཅོལ་ལ་ཡོང་མཁན་ཚོར་ཡང་རོགས་པ་ག་འདྲ་ཞིག་བྱ་ཐུབ་ན་བསམ་ནས་སེམས་ལ་ཐེངས་ཁ་ཤས་དྲན་སོང་། ཡིན་ནའང་ད་སྔ་རོགས་པ་དེ་འདྲ་བྱས་མྱོང་མེད། ཁ་སང་བཀའ་བློན་ཁྲི་པ་བློ་བཟང་སེང་གེ་ལའང་ཐུག་སོང་། ཁོ་རང་མ་འོངས་པར་ཨ་རུ་ན་ཅལ་དུ་ཕེབས་རྒྱུའི་འཆར་གཞི་ཞིག་ཡོད་པ་འདྲ། ང་རང་སྒེར་དང་གཞུང་གང་ནས་རོགས་རམ་དགོས་ཀྱང་གསུངས་དང་འབད་བརྩོན་ཞུ་ངེས་ཡིན་ཞེས་ཁས་ལེན་ཞུས་ཡོད།

དྲི་བ། ངྷ་རམ་ས་ལའི་བོད་མིའི་སྒྲིག་འཛུགས་དང་བོད་རིགས་མང་ཚོགས་ཀྱི་ངོས་ནས་ཨ་རུ་ན་ཅལ་ཕྱོགས་ལ་རོགས་རམ་དང་། མཉམ་ལས་གནང་དགོས་པ་དེ་འདྲ་གཟིགས་ཀྱི་ཡོད་དམ། 

ལན། ཨ་རུ་ཅལ་ཕྱོགས་ཀྱི་གྲྭ་ཕྲུག་མང་པོ་ཞིག་སྔོན་མ་ནས་ལྷོ་ཕྱོགས་གདན་ས་ཁག་ཏུ་ནང་ཆོས་སློབ་ཏུ་འགྲོ་བཞིན་ཡོད་པ་རེད། ཕར་ནས་ཕེབས་པའི་ཆོས་དང་རིག་གནས་ཀྱི་དགེ་རྒན་ཡང་མང་པོ་ཞིག་ཨ་རུ་ན་ཅལ་ཁུལ་དུ་བཞུགས་ཡོད། བོད་གཞུང་བཀའ་དྲན་ཆེན་པོ་ཡིན། དེའི་སྒང་ལ་ང་ཚོས་རེ་བ་ཆེན་པོ་རྒྱག་གི་མེད། གཞན། བཙན་བྱོལ་བོད་གཞུང་གི་ངོས་ནས་སྔོན་མ་ནས་སློབ་གྲྭ་ཁག་རེ་ཟུང་ནང་ཨ་རུ་ན་ཅལ་གྱི་སློབ་ཕྲུག་བསྡུ་བའི་ས་མིག་ཅིག་ཡོད་པ་རེད། དེ་ཕན་ཐོགས་ཆེན་པོ་འདུག ཐུགས་རྗེ་ཆེ་ཞུ་རྒྱུ་ཡིན། ཕན་ཚུན་འབྲེལ་ལམ་རྒྱུན་གནས་ཐོག་ལའང་ཡག་པོ་ཡོད་པ་རེད། དེ་ནས་སྨན་རྩིས་ཁང་ཟེར་བ་དེ་ལ་ཨ་རུ་ན་ཅལ་གྱི་མི་མང་ཚོས་དགའ་བོ་ཞེ་དྲག་བྱེད་ཀྱི་འདུག འབུམ་སྡེ་ལ་དང་། ཨེ་ཊ་ན་གྷར་སོགས་སུ་སྨན་རྩིས་ཁང་གི་ཡན་ལག་རེ་ཟུང་ཡོད་ས་རེད། ད་དུང་མང་དུ་བཏང་སྟེ་ཨ་རུ་ན་ཅལ་གྱི་ས་ཁུལ་གཞན་དག་ལའང་འཛུགས་ཐུབ་ན་ཕན་ཐོགས་ཆེན་པོ་ཡོང་ས་རེད།

དྲི་བ། དེ་རིང་གི་བཅར་འདྲི་བརྒྱུད་དེ་ཐེངས་འདིར་དུས་དབང་ལ་ཕེབས་མཁན་ཆོས་ཞུ་བ་རྣམས་ལ་ཞུ་རྒྱུ་འདྲ་ཡོད་དམ།

ལན། ད་ཐེངས་དུས་འཁོར་དབང་ཆེན་གྱི་སྦྱིན་བདག་ལྟེ་བ་ང་ཡིན་པ་འདྲ་བོ་རེད། ང་ལ་མཚོན་ན་ལས་གཞི་རྒྱ་ཆེན་པོ་འདི་འདྲ་ལ་ཉམས་མྱོང་གཅིག་ཀྱང་ཡོད་པ་མ་རེད། གོ་སྒྲིག་ཚོགས་ཆུང་ནང་དུའང་ཉམས་མྱོང་ཡོད་མེད་གཉིས་ཀ་རེད། སྤྱི་ཡོངས་ཀྱི་ཐོག་ལ་མ་འགྲིག་པ་དང་མ་འཁྱོང་ས་ཡོད་རྒྱུ་རེད། ལྷག་པར་དུ་ཆོས་ཞུ་བ་ཚོར་མཐུན་རྐྱེན་ཡག་པོ་ཞིག་སྦྱོར་མ་ཐུབ་པ་དེ་ང་ཚོའི་འཐུས་ཤོར་རེད། ཚང་མ་ལ་བཟོད་གསོལ་ཞུ་རྒྱུ་ཡིན། ད་ཐེངས་ཀྱི་ཉམས་མྱོང་འདི་བརྒྱུད་དེ་མ་འོངས་པར་སླར་ཡང་དུས་འཁོར་དབང་ཆེན་འདི་འདྲ་གོ་སྒྲིག་ཞུ་ཐུབ་པའི་རེ་བ་དང་སྨོན་ལམ་ཡོད་ལ། སྐབས་དེར་ཐེངས་འདི་ལས་དྲ་རྒྱས་པ་དང་ཚགས་ཚུད་པ་ཡོང་ཐུབ་པའི་ཡིད་ཆེས་ཡོད། གཉིས་པ། ང་ཚོ་སྦྱིན་བདག་ཚོའི་ངོས་ནས་ཐོག་མ་ནས་རེ་བ་ག་རེ་བརྒྱབ་ཡོད་པ་རེད་ཟེར་ན། གནས་རྩ་ཆེན་པོ་རྡོ་རྗེ་གདན་དུ། བླ་མ་རྩ་ཆེན་པོ་༧རྒྱལ་བ་རིན་པོ་ཆེ་མཆོག་གིས། དབང་རྩ་ཆེན་པོ་དུས་འཁོར་དབང་ཆེན་གནང་ཐུབ་པ་ཡིན་ན། ཆོས་ཞུ་མཁན་མང་ཚོགས་ལ་ཕན་ཐོགས་ཆེན་པོ་ཞིག་ཡོང་གི་རེད་དྲན་ཡོད། ༧རྒྱལ་བ་རིན་པོ་ཆེ་མཆོག་གིས་ཀྱང་དགོངས་པ་དེ་འདྲ་ཞིག་ལ་བཞེས་ཏེ་ཞལ་བཞེས་ཐོབ་པ་རེད། ༧རྒྱལ་བ་རིན་པོ་ཆེ་མཆོག་གིས་ཉིན་བཅུ་གྲངས་ཤིག་ལ་གནས་ཚུལ་མང་པོ་ཞིག་གི་ཐོག་ཏུ་བཀའ་སློབ་གནང་བ་རེད། ཆོས་ཞུ་བ་རྣམས་ཕྱིར་ལོག་རྗེས་ཉི་མ་རེ་རེའི་ལས་ཀའི་ཁྲོད་ནས་༧རྒྱལ་བ་རིན་པོ་ཆེའི་བཀའ་སློབ་དེ་དག་ཡིད་ལ་དྲན་དགོས་པ་རེད། བླ་མའི་བཀའ་གསུང་བརྩིས་ན་ང་ཚོར་ཡང་བསྐྱར་དུས་ཚོད་འདི་འདྲ་རག་གི་རེད།

གསར་འགོད་པ། དོན་འགྲུབ་བཀྲ་ཤིས།