ཨ་རིའི་གཞུང་གིས་ཨ་རུ་ན་ཅལ་ནང་གཞུང་འབྲེལ་སྐུ་ཚབ་བཏང་སྟེ་མངའ་ཁུལ་དེའི་ནང་སྲིད་ལ་ཐེ་གཏོགས་བྱས་པ་དེས་རྒྱ་དཀར་ནག་གཉིས་བར་གྱི་མངའ་ཁོངས་རྩོད་གླེང་ཆེ་རུ་བཏང་ཡོད་ཟེར།
དེ་རིང་རྒྱ་གར་ཉིན་རེའི་གསར་ཁང་ (Scroll.in) ཞེས་པས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཀང་ (Lu Kang) ཟེར་བ་ཞིག་གིས། ཨ་རིའི་སྐུ་ཚབ་རེ་ཆར་ཌི་ཝིར་མ་ (Richard Verma) ལགས་ཨ་རུ་ན་ཅལ་ནང་གཟིགས་སྐོར་བྱས་པ་དེར་རྒྱ་ནག་གིས་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་པ་དང་། གནས་ཚུལ་དེས་རྒྱ་དཀར་ནག་གི་མཐའ་མཚམས་ཞི་བདེ་ལྷིང་འཇགས་ལ་གནོན་སྐྱོན་བཟོས་ཡོད་པ་དང་། རྒྱ་ནག་གི་ངོས་ནས་ཨ་རིའི་གཞུང་གིས་རྒྱ་དཀར་ནག་གཉིས་ཀྱི་མཐའ་མཚམས་རྩོད་གླེང་ནང་ཐེ་གཏོགས་བྱེད་རྒྱུ་མཚམས་བཞག་སྟེ། ན་རུ་ན་ཅལ་ནང་སྔར་ལས་ལྷག་པའི་ཞི་བདེ་ལྷིང་འཇགས་ཀྱི་ཁེ་ཕན་བསྐྲུན་དགོས་པ་དང་། རྒྱ་དཀར་ནག་གཉིས་ནས་གྲོས་མོལ་བརྒྱུད་སྐབས་བབ་ཀྱི་མཐའ་མཚམས་རྩོད་རྙོག་གི་དཀའ་ངལ་སེལ་བཞིན་ཡོད་ཚུལ་བཤད་འདུག
ཡིན་ནའང་རྒྱ་གར་དབུས་ནང་སྲིད་ལྷན་ཁང་གི་བློན་ཆེན་ཀེ་རིན་རེ་ཇེ་ཇོ་ (Kiren Rijiju) ལགས་ཀྱིས་ཨ་རིའི་གཞུང་ཚབ་པ་སྐུ་ཞབས་ཝིར་མ་ལགས་མོན་རྟ་དབང་ནང་དུས་ཆེན་ཞིག་གི་ཐོག་མཉམ་ཞུགས་བྱས་པ་ཡིན་པ་ལས། ཁོང་གི་གཟིགས་སྐོར་དེ་ཆབ་སྲིད་དང་འབྲེལ་བ་མེད་པ་དང་། རྒྱ་ནག་གཞུང་ཕྱོགས་ནས་སྐུ་ཞབས་ཝིར་མ་ལགས་ཀྱི་གཟིགས་སྐོར་ལ་ངོ་རྒོལ་བྱས་པ་དེས་རྒྱ་དཀར་ནག་གཉིས་བར་གྱི་མངའ་ཁོངས་རྩོད་གླེང་གི་གནས་སྟངས་སྔར་བས་རྙོག་འཛིང་བཟོས་ཡོད་སྐོར་བརྗོད་འདུག
གནས་ཚུལ་ལྟར་ན། རྒྱ་ནག་གིས་རི་བོ་ཧི་མ་ལ་ཡའི་ཤར་རྒྱུད་ནས་སྤྱི་ལེ་གྲུ་བཞི་མ་ ༩༠༠༠༠ ལྷག་རྒྱ་ནག་གི་མངའ་ཁོངས་ཡིན་ལུགས་བཤད་ཀྱི་ཡོད་པ་དང་། མངའ་ཁུལ་དེ་ལ་ལྷོ་རྒྱུད་ཀྱི་བོད་ཅེས་འབོད་ཀྱི་ཡོད་ནའང་། རྒྱ་གར་ཕྱོགས་ནས་མངའ་ཁུལ་དེའི་ས་ཆ་མང་ཤོས་ཨ་རུ་ན་ཅལ་མངའ་སྡེ་ཆགས་ཀྱི་ཡོད་སྟབས། དེ་རྒྱ་གར་གྱི་མངའ་ཁོངས་ཡིན་སྐོར་བརྗོད་ཀྱི་ཡོད་པ་རེད།
ད་ལོའི་ཕྱི་ཟླ་ ༨ པའི་ནང་རྒྱ་གར་གཞུང་གིས་མེ་ཤུགས་འཕུར་མདེལ་མང་པོ་ཨ་རུ་ན་ཅལ་ནང་སྐྱེལ་འདྲེན་བྱ་ཆར་ཡོད་པ་དེས་རྒྱ་ནག་གཞུང་ལ་དོ་ཕོག་བཟོས་ཡོད་པ་དང་། རྒྱ་གར་མཐའ་མཚམས་དམག་གིས་གནས་ཚུལ་དེ་ནི་རྒྱ་གར་གྱི་བདེ་འཇགས་ཁེ་ཕན་གཞིར་བཟུང་སྟེ་ཐག་གཅོད་བྱས་པ་ཞིག་ཡིན་སྐོར་བརྗོད་འདུག
རྒྱ་གར་གཞུང་གི་ངོས་ནས་རྒྱ་ནག་གིས་ནུབ་རྒྱུད་ཀྱི་ཨ་ཀ་ས་ཆེན་ (Aksai Chin) ས་ཁུལ་ནས་སྤྱི་ལེ་གྲུ་བཞི་མ་ ༣༨༠༠༠ ལྷག་བཙན་བཟུང་བྱས་པ་མ་ཟད། ད་དུང་འདས་པའི་ལོ་ངོ་བཅུ་ཕྲག་རིང་གི་རྒྱ་གར་དང་པ་ཀི་སི་ཐན་གཉིས་བར་གྱི་རྩོད་རྙོག་སྐབས་སུ། རྒྱ་ནག་གིས་དངོས་ཤུགས་བརྒྱུད་གསུམ་ནས་པ་ཀི་སི་ཐན་ལ་རོགས་རམ་བྱེད་ཀྱི་ཡོད་སྐོར་སྐྱོན་འཛུགས་བྱས་ཡོད་འདུག
ཨ་རིའི་གཞུང་གི་སྐུ་ཚབ་རེ་ཆར་ཌི་ཝིར་མ་ལགས་ཟླ་འདིའི་ཕྱི་ཚེས་ ༢༡ ཉིན་རྒྱ་གར་བྱང་ཤར་མངའ་སྡེ་ཨ་རུ་ན་ཅལ་ནང་སྐོར་བསྐྱོད་བྱས་ཡོད་པ་དང་། སྐབས་དེར་ཁོང་གིས་ཨ་རུ་ན་ཅལ་ནི་རང་བྱུང་གི་མཛེས་ལྗོངས་ཁྱད་དུ་འཕགས་པ་ཞིག་ཡིན་པ་དང་། མོན་རྟ་དབང་གཞུང་དམངས་གཉིས་ནས་ཁོང་ལ་སྣེ་ལེན་གཟབ་རྒྱས་གནང་བར་ཐུགས་རྗེ་ཆེ་ཞུས་ཡོད་པ་རེད།
གསར་འགོད་པ། པདྨ་རྒྱལ།
