༸སྐྱབས་རྗེ་ཟམ་གདོང་རིན་པོ་ཆེ་མཆོག་གིས་གཞུང་ཆེན་ལ་སློབ་གཉེར་གནང་མཁན་མང་པོས་འཆད་པ་དང་རྩོད་པའི་བྱ་བར་འགྲན་ཟླ་མེད་ཀྱང་། ཐ་སྙད་ཀྱི་རིག་གནས་དང་ཡི་གེ་འབྲི་ཀློག་ལ་ཐུགས་སྣང་མ་གནང་བས་རྩོམ་པའི་བྱ་བ་གནང་མཁན་དཀོན་པོ་འདུག་ཅེས་གསུངས།
ཕྱི་ཟླ་ ༤ ཚེས་ ༢ ཉིན་དྷ་ས་རྒྱུད་སྟོད་གྲྭ་ཚང་གི་དཔེ་མཛོད་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་གི་གསུང་རྩོམ་སྤྱན་རས་གཟིགས་བླ་མའི་རྣལ་འབྱོར་དངོས་གྲུབ་ཀུན་འབྱུང་གི་འགྲེལ་བ་དགྱེས་བརྩེ་པདྨ་དཀར་པོའི་འཛུམ་མདངས་ཞེས་པ་དབུ་འབྱེད་གནང་ཡོད་ཅིང་། དབུ་འབྱེད་མཛད་སྒོའི་ཐོག་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་དང་། ༸སྐྱབས་རྗེ་མཁན་ཟུར་རིན་པོ་ཆེ་རྗེ་བཙུན་བློ་བཟང་མཁས་གྲུབ་མཆོག ༸སྐྱབས་རྗེ་མཁན་རིན་པོ་ཆེ་ཁང་སེར་སྤྲུལ་སྐུ་བསྟན་འཛིན་དཔལ་ལྡན་རིན་པོ་ཆེ་མཆོག དེ་བཞིན་ཕྱོགས་མཐའ་ཁག་དང་གྲྭ་ཚང་གི་དགེ་བའི་བཤེས་གཉེན་སོགས་ལྷན་འཛོམས་གནང་འདུག
ཕྱག་དེབ་ཀྱི་འགྲེལ་བ་རྩོམ་མཁན་དགེ་བཤེས་མཁས་གྲུབ་ནོར་བཟང་ལགས་ཀྱིས། སྤྱན་རས་གཟིགས་བླ་མའི་རྣལ་འབྱོར་ཞེས་པ་མདོ་སྔགས་ཡོངས་སུ་རྫོགས་པ་འདུས་པའི་༧གོང་ས་རྒྱལ་བ་རིན་པོ་ཆེ་མཆོག་གི་ཞལ་གསུང་དྲི་མ་མེད་པ་ཞིག་ཡིན་དུས། འདིའི་ཐོག་ཉམས་ལེན་བྱས་ཏེ་སྐྱེ་བ་ཚེ་རབས་ཐམས་ཅད་དུ་བླ་མའི་རྗེས་སུ་འཛིན་ཐུབ་པའི་རྒྱུ་ཚོགས་བསགས་ཧ་ཅང་གལ་ཆེན་པོ་རེད། དེ་ཡང་སྨོན་ལམ་ཙམ་མ་ཡིན་པར་ཚོགས་བསགས་རྒྱུ་སོ་སོའི་ལག་པར་ཡོད། ལྷག་པར་དུ་བཙན་བྱོལ་དུ་ཡོད་པའི་བོད་མི་རྣམས་མཐུན་པོ་བྱ་རྒྱུ་ཧ་ཅང་གལ་ཆེན་པོ་རེད། ༧གོང་ས་རྒྱལ་བ་རིན་པོ་ཆེ་མཆོག་ནས་མི་ལོ་དྲུག་ཅུ་ལྷག་གི་རིང་ཕྱོགས་གང་ཅིའི་ཐོག་ནས་སྐུ་ལས་བསྐྱོན་ཡོད། ཁོང་གི་མཛད་པ་འཕྲིན་ལས་མཇུག་སྐྱོང་བྱེད་པར་ང་ཚོ་ནུས་པ་གོང་བུ་གཅིག་མེད་ཚེ། ཆོས་དང་སྲིད་ཀྱི་འདོད་དོན་གང་ཡང་འགྲུབ་ཐུབ་ཀྱི་མེད། གནས་སྐབས་སོ་སོའི་བསམ་བློའི་ཐོག་ནས་འགྱུར་བ་འདྲ་མིན་ཤར་གྱི་ཡོད་ཀྱང་། གཞི་རྒྱ་ཆེན་པོའི་ཐོག་ནས་བསམ་བློ་གཏོང་དགོས། ལས་དོན་བྱེ་བྲག་པ་ཞིག་གི་འདོད་པ་ཁེངས་མིན་བྱེད་པ་ཆོས་རབ་ཏུ་རྣམ་འབྱེད་ཀྱི་སྒོ་རྒྱག་གི་ཡོད། ཐུགས་མདུན་ཁྲིམས་གཙང་ཡག་པོ་བྱས་ན་བླ་མའི་བརྟན་བཞུགས་ངོ་མ་དེ་རེད། ཅེས་གསུངས་སོང་།
༸སྐྱབས་རྗེ་ཁང་སེར་རིན་པོ་ཆེ་མཆོག་གིས། སྤྱིར་ཕྱག་དཔེ་ཀློག་མཁན་རྣམས་ཀྱིས་དོ་སྣང་བྱས་ཏེ་ཡང་ནས་བསྐྱར་དུ་བཀླག་རྒྱུ་གལ་ཆེན་པོ་རེད། དེང་སང་དེབ་ཀྱི་བརྗོད་བྱ་ལ་བལྟས་པ་ལས་དེབ་ཀྱི་ཚོང་བྲིན་ཆེ་མིན་(best seller) ལ་ལྟ་བཞིན་འདུག ང་རང་སྒེར་གྱི་ཉམས་མྱོང་ཐོག་ནས་བཤད་ན། ལོ་འགའི་སྔོན་ལ་ངའི་དེབ་ཁ་ཤས་ཤིག་ཐའེ་ཝན་དང་། མཱ་ལི་ཤི་ཡ། ལྷོ་ཁོ་རི་ཡ་བཅས་སུ་དེབ་བྲིན་ཆེ་བའི་ཁོངས་སུ་ཚུད་དུས། དེབ་ཀྱི་བརྗོད་བྱ་ལ་མ་བལྟས་པར་དེབ་མིང་ལ་ལྟ་བཞིན་ཡོད་པ་དེང་སང་གི་སྤྱི་ཚོགས་འགྲོ་སྟངས་ཤིག་ཆགས་ཡོད་པས། ང་རང་གི་ངོས་ནས་དེབ་ཀྱི་བརྗོད་བྱའི་ནང་དོན་ལ་བལྟ་རྒྱུ་གནད་འགག་ཆེན་པོ་རེད། ད་ལན་གྱི་དེབ་ནང་སྤྱན་རས་གཟིགས་དང་༧གོང་ས་རྒྱལ་བ་རིན་པོ་ཆེ་མཆོག་རྣམ་གཉིས་ཟུང་དུ་འབྲེལ་ནས་སྔགས་ཀྱི་བླ་མའི་རྣལ་འབྱོར་བརྗོད་བྱ་ཟབ་མོ་ཞིག་རེད། ཅེས་དང་། ད་ལྟའི་དུས་སྐབས་སུ་གཏིང་ཟབ་བརྗོད་བྱ་འདིར་ཧ་ཅང་ཉེ་བར་མཁོ་བ་ཞིག་ཡིན་པས་ཚང་མས་ཐུགས་སྣང་གནང་རོགས། ཅེས་གསུངས་སོང་།
༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས། འཆད་རྩོད་ཀྱི་བྱ་བ་དེ་གནས་སྐབས་སམ་མི་རབས་གཅིག་ཙམ་གྱི་ནང་དུ་ཕན་ཐོགས་པ་མ་གཏོགས། མི་རབས་ནས་མི་རབས་བར་རྒྱུན་འཛིན་བྱེད་པར་ཕན་ཐོགས་པ་ཞིག་ཡོང་གི་མི་འདུག རྒྱུན་འཛིན་ཡོང་བར་བསྟན་བཅོས་བརྩམས་པའི་ཐོག་ནས་ཡིག་ཐོག་ཏུ་འཇོག་ཐུབ་ཚེ། མི་རབས་མང་པོའི་ནང་དུ་རྒྱུན་འཛིན་བྱེད་ཐུབ་པ་ཞིག་ཡོང་གི་ཡོད། རྗེ་ཡབ་སྲས་མ་བཞུགས་ཀྱང་གསུང་གི་ཆ་ཤས་དེ་བླ་མའི་སྐུ་ཚབ་ཀྱི་དོན་དུ་བཞུགས་ཏེ་འགྲོ་དོན་མཛད་ཀྱི་རེད་ཅེས་པ་བདེན་པ་རེད། བོད་ཀྱི་གཞུང་ཆེན་ལ་སློབ་གཉེར་གནང་མཁན་མང་པོས་འཆད་པ་དང་རྩོད་པའི་བྱ་བར་འགྲན་ཟླ་མེད་ཀྱང་། ཐ་སྙད་ཀྱི་རིག་གནས་དང་ཡི་གེ་འབྲི་ཀློག་ལ་ཐུགས་སྣང་མ་གནང་བས་རྩོམ་པའི་བྱ་བ་གནང་མཁན་དཀོན་པོ་འདུག
སྤྱིར་བོད་དུ་ནང་ཆོས་ཐོག་རྩོམ་པ་པོ་མང་པོ་བྱུང་བ་དེ་ཡུལ་གྲུ་དང་རྒྱལ་ཁབ་གང་དུའང་བྱུང་མྱོང་མེད། གདན་ས་ཁག་ལ་མཚོན་ན་འཆད་རྩོད་ཀྱི་བྱ་བ་གནང་མཁན་ཁྲི་ཕྲག་མང་པོ་ཡོད་པ་ལས། རྩོམ་གྱི་བྱ་བ་གནང་མཁན་དེ་བཅུ་ཕྲག་དང་བརྒྱ་ཕྲག་མ་གཏོགས། སྟོང་ཕྲག་དང་ཁྲི་ཁྲག་གི་གྲངས་ཀ་དེ་ཡོང་ཁག་པོ་འདུག ང་ཚོའི་མི་ཚེ་ནང་དྲན་པའི་མཁས་པ་རྣམས་མཚོན་ནའང་། བོད་དུ་དགེ་བཤེས་ལྷ་རམས་པ་གྲགས་ཅན་གདན་སའི་མཁན་པོ་གནང་མཁན་གྱི་ཁྲོད་དུ་སོ་སོའི་མཚན་འབྲི་མི་ཤེས་པ་དང་། དབུ་ཅན། དབུ་མེད། འཁྱུག་ཡིག་བཅས་ལྗགས་ཀློག་གནང་མི་ཤེས་མཁན་མང་པོ་མཇལ་མྱོང་། རྒྱ་གར་དུ་བསླེབས་ཏེ་དྷ་རམ་ས་ལར་ཚོགས་འདུ་འཚོགས་པའི་སྐབས་སུ། མཁན་རིན་པོ་ཁ་ཤས་ཀྱིས་མཚན་དེ་འབྲི་རོགས་ཟེར་མཁན་དེ་འདྲ་ཡོད་པ་རེད། ཅེས་གསུངས་སོང་།
ཡང་རིན་པོ་ཆེ་མཆོག་གིས། རྗེ་རིན་པོ་ཆེ་མཆོག་ནས་མཁས་པའི་ཡོན་ཏན་དང་བྱ་བ་གཉིས་སྦྱར་སྟེ་བསྡོམས་བརྒྱབ་ནས་གསུངས་ཡོད་པ་བཞིན། གཞུང་ལུགས་གདམས་པར་ཤར་བའི་ཉམས་ལེན་དང་རིགས་ལམ་ཕྲ་མོའི་རྣམ་དཔྱོད་གཉིས་མཉམ་དུ་མེད་ཚེ། རིགས་ལམ་ཕྲ་མོའི་རྣམ་དཔྱོད་དོན་མེད་དུ་འགྲོ་ཡི་ཡོད། ང་ཚོའི་ཉམས་མྱོང་ཁྲོད་ཤེས་རབ་འཆལ་བ་དེ་འདྲ་ཡོང་གི་ཡོད། དེ་གཉིས་ཡོད་ཀྱང་ཚིག་སྦྱོར་ཚུལ་ལ་མཁས་པའི་ངག་གི་དཔལ་དེ་མེད་ཚེ། འཆད་རྩོད་རྐྱང་པ་ལས་རྩོམ་པའི་བྱ་བར་གཞོལ་བའི་ནུས་པ་མེད་པར་ཆགས་ཀྱི་ཡོད། དུས་ཀྱི་སྙིགས་མ་ལའང་བྱ་བ་འདི་འདྲའི་བྱེད་ཐུབ་པ་དེ་༧རྒྱལ་དབང་སྐུ་ཕྲེང་བཅུ་བཞི་པ་ཆེན་མོའི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཞིག་རེད་ལ། བོད་དུ་དུས་འགྱུར་ཆེན་པོ་བྱུང་ནས་བསྟན་པ་དང་ཆབ་སྲིད་ཀྱི་མིང་གི་ལྷག་མ་ལུས་པ་དང་། ང་ཚོས་རང་དབང་གི་ལུང་པར་ཆོས་སྤྱོད་ཤེས་རབ་ཀྱི་བྱ་བ་བྱེད་བཞིན་ཡོད་པ་ཧ་ཅང་དགའ་ཚོར་སྐྱེ་འོས་པ་ཞིག་རེད། ད་ལན་གྱི་ཕྱག་དཔེ་འདི་ལ་བརྟེན་ནས་དོན་གཉེར་ཅན་མང་པོར་ཕན་ཐོགས་ཡོང་བ་དང་། གྲྭ་ཚང་གི་ངོས་ནས་ཀྱང་བསྟན་པའི་བྱ་བ་རླབས་ཆེན་དུ་འགྲོ་བའི་དགེ་མཚན་ཆེན་པོ་འབྱུང་གི་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
