ཕྱི་ཚེས་ ༤ ཞོགས་པར་༧གོང་ས་མཆོག་དབུ་བཞུགས་འོག བཙན་བྱོལ་བོད་གཞུང་གིས་༡༩༨༩ ལོར་པེ་ཅིན་གྱི་གནམ་བདེ་སྒོ་མོ་ཆེའི་ཐང་ཆེན་ནས་དམངས་གཙོ་དོན་གཉེར་བྱེད་མཁན་སློབ་ཕྲུག་སྟོང་ཕྲག་ལྷག་རྒྱ་གཞུང་གིས་དམར་གསོད་བྱས་པ་ཚོའི་དོན་དུ་བསྔོ་བ་དང་སྨོན་ལམ་འདེབས་ཀྱིན་ཡོད་ལ། ཨ་མ་ཏིན་ཙི་ལིན་གྱིས་ཀྱང་༧གོང་ས་མཆོག་གིས་སློབ་ཕྲུག་འདི་དག་གི་ཆེད་དུ་བསྔོ་སྨོན་གནང་བ་ཐོས་དུས་ཤིན་ཏུ་ནས་དགའ་མགུ་བྱུང་ཞེས་དར་སྐབས་ཤིག་ནས་གསུང་ཡོད་པ་རེད། ཁོང་མོ་ནི་པེ་ཅིན་གྱི་གནམ་བདེ་སྒོ་མོ་ཆེ་ཐང་ཆེན་གྱི་ཨ་མའི་ཚོགས་པ་སྟེ། སོ་སོའི་བྱིས་པའི་ཚེ་སྲོག་ཤོར་མཁན་ཚོའི་གྲས་ནས་ལས་འགུལ་སྤེལ་མཁན་ཤུགས་ཆེ་ཤོས་ཤིག་ཆགས་ཡོད་པ་རེད།
དེ་བཞིན་ཕྱི་ཚེས་ ༥ དང་ ༦ ཉིན་༧གོང་ས་མཆོག་གིས་བཙན་བྱོལ་སྤྱི་ཚོགས་ནང་གི་བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་གསུང་ཆོས་གནང་གི་ཡོད་པ་རེད། འདིར་རྒྱ་གར་གྱི་མཐོ་སློབ་ཁག་ནང་ཡོད་པའི་བོད་རིགས་སློབ་མ་དང་། ཝར་ཎ། ས་རཱ། ནོར་གླིང་། ཤེས་རབ་དགའ་ཚལ་སློབ་གླིང་། སྨན་རྩིས་ཁང་བཅས་བོད་མིའི་མཐོ་སློབ་ཁག་གི་སློབ་མ། དེ་བཞིན་བོད་ཁྱིམ་སློབ་གྲྭ་ཁག་དང་། མ་སུ་རི་བོད་ཁྱིམ་བཅས་ཀྱི་སློབ་མ་དང་། སྤྱི་ཚོགས་སྟེང་གི་གཞོན་སྐྱེས་རྣམས་བཅས་གསུང་ཆོས་ཞུ་བར་ཡོང་ཡོད་པ་རེད། གསུང་ཆོས་འདི་གོ་སྒྲིག་གནས་མཁན་ནི་ངྷ་ས་ནང་ཆོས་གོ་སྒྲིག་ཚོགས་ཆུང་ཡིན་ལ། ནང་ཆོས་ངོ་སྤྲོད་ཀྱི་རིམ་པ་དང་པོ་ནི་ལོ་སྔོན་མའི་སྤྱི་ཟླ་དྲུག་པའི་ནང་བོད་ཁྱིམ་སློབ་གྲྭར་འཚོགས་ཡོད་ལ། རིམ་པ་གཉིས་པ་ནི་ཟླ་འདིའི་ཚེས་ ༡ དང་ ༢ ཉིན་ས་སྐྱ་བདག་ཁྲི་རིན་པོ་ཆེ་མཆོག་གིས་སུ་ཇ་བོད་ཁྱིམ་དུ་གནང་ཡོད་པ་རེད།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།