ཧན་བོད་ཀྱི་འགལ་བ་ཨེ།

ལོ་འདིར་གཞིས་ལུས་མི་དམངས་ཡར་ལངས་པ་ནས་བཟུང་བོད་ཀྱི་འཐབ་རྩོད་ལ་སེམས་ཁྲལ་གཉིས་དང་རེ་བ་གཅིག་སླེབས་པར་གྱུར ། སེམས་ཁྲལ་དང་པོ་ནི ། བོད་མི་རིགས་ཀྱི་འཐབ་རྩོད་འདི་ཕྱིར་༥༠ང་གྲངས་ཀྱི་ནང་དུ་ལོག་འགྲོ་བ་དང་ །  གཉིས་པ་ནི ། ལོ་༥༠རིང་མཉམ་གཤིབ་བྱས་རྗེས་གཞི་ནས་ཧན་མི་རིགས་དང་བོད་མི་རིགས་ཀྱི་བར་ལ་འགལ་བའི་རྩ་བ་ཟུག་མིན་དེ་ཡིན ། རེ་བ་གཅིག་པུ་ནི ། ད་ཆ་རྒྱ་ནག་གིས་བོད་མི་རིགས་འདི་རྡ་སའི་ལག་ཏུ་ཡོངས་སུ་ཤོར་ཞིང་ ། འདིའི་རྗེས་ནས་པེ་ཅིན་དང་རྡ་ས་གཉིས་ཀྱིས་རྒྱ་ནག་གི་ཧན་མི་རིགས་རྩོད་རྒྱུ་དེ་ཡིན །
བོད་ཀྱི་གནད་དོན་འདི་སེལ་དགོས་པ་ནི་གནས་སྟངས་ཀྱིས་ཐག་བཅད་པ་རེད ། འདི་མུ་མཐུད་ནར་འགྱངས་བྱས་ཚེ་བོད་ཀྱི་གནད་དོན་དེ་གནས་སྐབས་རིང་ལྷག་རུང་ ། འདིའི་རྩོད་གཞི་གལ་ཆེའི་གྲས་མྱུར་ཏུ་རྩ་མེད་དུ་འགྱུར་འགྲོ་སྟབས་བོད་དོན་འཐབ་རྩོད་ཀྱི་ཚེ་སྲོག་ལ་ཚབས་ཆེའི་རྨས་སྐྱོན་ཕོག་འགྲོ་བ་ཡིན ། སྐབས་འདིར་པེ་ཅིན་གྱི་དཔོན་རིགས་ཚོར་བོད་ཀྱི་གནད་དོན་སེལ་རྒྱུའི་འདོད་པ་མེད་ཅིང་ ། རྒྱལ་སྤྱིའི་སྤྱི་ཚོགས་ལ་འདིའི་ཐད་ནུས་པ་དང་ཐབས་ཤེས་ཟད་པའི་སྐབས་འདིར་བོད་མི་རིགས་ཀྱིས་བློ་ཐག་ཆོད་པའི་གོམ་པ་སྤོ་དགོས་པར་ཐུག་ཅིང་ །  རྒྱ་རྒོལ་གྱི་ལས་འགུལ་འདི་བོད་ས་ཁྱོན་ཡོངས་ནས་དུས་གཅིག་ཏུ་སྤེལ་བ་རེད ། ཡིན་ནའང་སེམས་ཁྲལ་གཙོ་བོ་ནི ། འདིའི་བརྒྱུད་རིམ་དང་མཇུག་འབྲས་ནི་ ༥༠ ང་གྲངས་ཀྱི་གནས་སྟངས་དང་གཅིག་མཚུངས་སུ་འགྱུར་བ་དང་ ། རྒྱ་ནག་གིས་ཞི་དྲག་གང་དགོས་ཀྱང་ལག་བསྟར་བྱེད་ངེས་ལ ། སྔོན་དང་མི་འདྲ་བའི་ཁྱད་ཆོས་གཙོ་བོ་ནི་དམར་དམག་རྒྱང་སྐྱོད་ཀྱི་ཆེད་དུ་ད་ཆར་མེ་འཁོར་ལྕགས་ལམ་ཡོད་སྟབས་རྒྱ་ནག་ལ་ལས་སླ་རུ་ཕྱིན་ཡོད ། དྲག་གནོན་གྱི་རྗེས་ནས་རྒྱ་ནག་གིས་གྲལ་རིམ་འཐབ་རྩོད་དང་རིག་གནས་གསར་བརྗེ་ཡང་སྔོན་མ་བཞིན་མགོ་ནས་རྩོམ་པར་འགྱུར་བ་ཡིན ། སེམས་ཁྲལ་གཞན་ཞིག་ནི། ཐ་ན་བོད་མི་རིགས་དང་འདིའི་འཐབ་རྩོད་ཚུན་ཆད་ནག་པོ་བཟོ་ཐབས་དེ་རེད ། ལར་ནས་རྒྱ་ནག་ནི་དམངས་གཙོའི་རྒྱལ་ཁབ་མིན་སྟབས། རྒྱ་ནག་གི་མི་འབོར་ཐེར་འབུམ་གཅིག་ལྷག་འདིས་པེ་ཅིན་གྱི་སྲིད་བྱུས་དང་ཐག་གཅོད་བཅས་ལ་ཕན་གནོད་ཀྱི་ནུས་པ་གང་འདྲ་ཞིག་སླེབས་ཐུབ་མིན་ནི་དྲི་བ་གཞན་ཞིག་ཡིན ། གལ་སྲིད་མི་འབོར་ཐེར་འབུམ་འདིར་ཤུགས་རྐྱེན་ཆེན་པོ་ཞིག་ཡོད་ཚེ །འདིའི་ཁེ་ཕན་པེ་ཅིན་གཅིག་པུར་བདག་པ་མིན་ལ ། བརྒྱུད་ལམ་ཡང་པེ་ཅིན་གཅིག་པུར་ཡོད་པ་མིན ། ང་ཚོས་ཀྱང་རེ་བ་གསར་པ་ཞིག་བཟུང་སྟེ་བོད་དོན་འཐབ་རྩོད་ཀྱི་ཐིག་རིས་འཐེན་བཞིན་འདིའི་ཁྱབ་ཁོངས་རྒྱ་ཆེ་རུ་བཏང་ཆོག
     དེ་ལྟར་ལྷ་སའི་ཡར་ལངས་ཀྱི་རྗེས་ནས་ང་ཚོས་སློབ་སྤྱོང་བྱེད་འོས་པ་ནི་༧གོང་ས་མཆོག་གིས་རྒྱ་ནག་མི་དམངས་ལ་གནང་བའི་གསུང་འཕྲིན་གྱི་དགོངས་དོན་ཡིན ། གསུང་འཕྲིན་འདི་ཡོངསལ་ཁྱབ་ཏུ་བསྩལ་སྟབས་གང་མྱུར་ཅི་མགྱོགས་ཀྱིས་ཡོངས་སུ་ཁྱབ་དགོས་ལ ། ལྷག་པར་དུ་རྒྱ་ནག་ཧན་མི་རིགས་དང་ ། འདིའི་ནང་འཐིམ་བཞིན་པའི་གྲངས་ཉུང་མི་རིགས་གཞན་དག་གིས་ཀྱང་སློབ་སྦྱོང་བྱེད་པར་རིགས ། ད་ལྟ་བོད་དོན་འཐབ་རྩོད་ཀྱི་རིམ་པ་གསར་བ་ཞིག་ལ་སླེབས་མིན་མི་ཤེས་ཀྱང་ ། འདི་ནི་རླབས་ཆེན་གྱི་དབུ་ཁྲིད་ཅིག་གིས་བོད་མི་ས་ཡ་དྲུག་དང་རྒྱ་ནག་ཧན་མི་རིགས་གཙོས་པའི་མི་འབོར་ཐེར་འབུམ་གཅིག་ལྷག་གི་ཕུག་རྒྱང་རིང་པོའི་བདེ་ཐབས་དང་རང་དབང་ལ་འགན་ལེན་གནང་བའི་གསུང་འཕྲིན་ཡིན་སྟབས ། བོད་རྒྱའི་ལོ་རྒྱུས་ཀྱི་ས་ཚིགས་ཁག་ཏུ་གནའ་བོའི་རྡོ་རིང་ལྟ་བུ་རེ་བཞེངས་མི་ཐུབ་ཀྱང་བོད་རྒྱ་གཉིས་ཀྱི་ལོ་རྒྱུས་ཀྱི་ཡིག་ཚང་དུ་ཅི་ནས་ཀྱང་འཁོད་དགོས་པར་འདོད་དོ།།