ལོ་རྒྱུས་ཐོག་བོད་ནི་ང་ཚོའི་མ་རེད་ཟེར།

རྒྱ་ནག་གི་ལོ་རྒྱུས་མཁས་པ་དང་རྒྱ་ནག་གཞུང་གི་ལོ་རྒྱུས་སློབ་དེབ་ཀྱི་སློབ་སྟོན་ཚོགས་ཆུང་གི་ཚོགས་མི་ཞིག་གིས་བོད་ནི་ང་ཚོའི་མ་རེད་ཅེས་རྒྱ་ནག་གཞུང་གིས་བོད་འདི་ལོ་རྒྱུས་ཐོག་རྒྱ་ནག་གི་ཆ་ཤས་ཤིག་ཡིན་ཞེས་བཤད་པ་དེ་ལོ་རྒྱུས་ལ་ངོས་ལེན་མ་བྱས་པ་རེད་ཅེས་བརྗོད་འདུག
རང་ལོ་༦༢ལ་སོན་ཞིང་རྒྱ་ནག་ཧྲང་ཧེ་གྲོང་ཁྱེར་ཧྥུ་དན་སློབ་གྲ་ཆེན་མོའི་ཀྲུང་གོའི་ལོ་རྒྱུས་ས་ཁམས་རིག་པ་དང་ལོ་རྒྱུས་ས་ཁམས་རིག་པའི་ཞིབ་འཇུག་ལྟེ་གནས་ཁང་གི་མཁས་དབང་ཀུག་ཅེན་ཞོང་གིས་རྒྱ་ནག་བསྐྱར་ཞིབ་དུས་དེབ་ཀྱི་ཐོག་རྩོམ་ཡིག་ཅིག་སྤེལ་ཏེ། དུས་རབས་བདུན་པ་ནས་བཅུ་པའི་བར་གྱི་ཐང་རྒྱལ་རབས་སྐབས་རྒྱ་ནག་ཅི་ཙམ་གྱི་ཆེན་པོ་ཡོད་པར་བསམ་ཞིབ་བྱེད་སྐབས་ང་ཚོས་མཚོ་བོད་མཐོ་སྒང་འདི་ནང་དུ་ཚུད་རུང་གི་མ་རེད། མཚོ་བོད་མཐོ་སྒང་ནི་སྐབས་དེར་ཐུ་བྷོད་དམ་ཐུ་ཧྥན་གྱིས་དབང་བསྒྱུར་གྱི་ཡོད་པ་རེད་ཅེས་བརྗོད་འདུག
    མཁས་དབང་ཀུག་ཅེན་ཞོང་གིས་རྩོམ་ཡིག་དེའི་ནང་བསྟན་དོན།  ཐུ་བྷོད་ནི་ཐང་རྒྱལ་རབས་རང་བཙན་གྱི་རྒྱལ་ཁབ་ཅིག་རེད། མ་མཐར་ཡང་ཐང་རྒྱལ་རྒྱུད་ཀྱིས་འཛིན་སྐྱོང་བྱས་ཡོད་པ་ཞིག་མ་རེད། གལ་ཏེ་ཐང་རྒྱལ་རབས་ཀྱིས་འཛིན་སྐྱོར་འོག་ཡོད་ཚེ་སྐབས་དེར་ཐང་ཐེ་ཙུང་གིས་རང་གི་སྲས་མོ་ལྦུན་ཤིང་ཀོར་ཇོ་བོད་ཀྱི་རྒྱལ་པོ་སྲོང་བཙན་སྒམ་པོའི་བཙུན་མོར་སྟེར་དགོས་དོན་ཡང་མི་འདུག་ཅེས་བརྩད་ཡོད་པ་རེད། བོད་ནི་ཐང་རྒྱལ་རབས་སྐབས་ནས་བཟུང་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཚུལ་བཤད་བཞིན་པ་ནི་ལོ་རྒྱུས་ལ་ངོས་ལེན་མ་བྱས་པ་རེད་ཅེས་བརྗོད་ཡོད་པ་རེད།
    ཀུག་ཅེན་ཞོང་གི་རྩོམ་ཡིག་དེ་ནི་ལོ་རྒྱུས་ཀྱི་ཁྲོད་རྒྱ་ནག་ཧན་མི་རིགས་ཀྱི་ངོ་རྟགས་འཚོལ་ཕྱོགས་དང་མི་རིགས་དེའི་འཕེལ་འགྱུར་གྱི་སྐོར་ཡིན་འདུག་ལ། ཁོས་བོད་འདི་རྒྱ་ནག་གི་ཆ་ཤས་སུ་གྱུར་ཚུལ་ངོས་ལེན་བྱེད་སྟངས་ནི་ལོ་རྒྱུས་སྨྲ་མཁན་མང་པོ་ཞིག་གིས་དུས་རབས་༡༧པ་ནས་༢༠བར་གྱི་ཆིན་རྒྱལ་རབས་སྐབས་སུ་བོད་འདི་རྒྱ་ནག་གི་ཆ་ཤས་སུ་གྱུར་ཚུལ་དང་འདྲ་མཚུངས་ཡིན་འདུག  དེ་ལྟར་ཡང༌།  ཀུག་ཅེནུ་ཞོང་གིས་བོད་རྒྱ་ནག་གི་ཆ་ཤས་སུ་གྱུར་ཚུལ་བཤད་སྟངས་དེ་ནི་རྩོད་གཞི་ཅན་ཡིན་ལ། ལྷག་པར་དུ་རྒྱ་ནག་དམར་ཤོག་ཚོགས་པའི་སྲིད་བྱུས་འཛིན་ཕྱོགས་ཀྱི་སྟེང་ནས་བོད་འདི་ནམ་ཡང་རྒྱ་ནག་ཁ་བྲལ་ཐབས་མེད་པའི་ཆ་ཤས་ཤིག་ཡིན་ལ། གཞུང་གི་ལངས་ཕྱོགས་འདི་ནུས་མེད་དུ་གཏོང་མཁན་གྱི་རིགས་ནི་རྒྱལ་ཁབ་ལ་རྒོལ་མཁན་དང༌།  ཁ་བྲལ་བ་ཡིན་པའི་འགག་ཕྱོགས་ཤིག་ཡོད་སྟབས།  ཐེངས་འདིར་ཀུག་ཅེན་ཞོང་གི་རྩོམ་ཡིག་འདི་ལ་རྒྱ་ནག་གི་གཞུང་འབྲེལ་ངོས་ནས་ལན་འདེབས་གང་འདྲ་ཞིག་ཡོང་རྒྱུ་དེ་ནི་སུས་ཀྱང་ཁ་ཚོན་གཅོད་མི་ཐུབ་པ་དང་ཐོས་འདོད་པའི་གནད་དོན་ཞིག་ཆགས་ཡོད། 
ཀུག་ཅེན་ཞོང་གི་ཞིབ་འཇུག་གི་རྣམ་གྲངས་གཙོ་བོ་ཁག་ནི་ལོ་རྒྱུས་སྟེང་གི་མི་འབོར་གྱི་ས་ཁམས་ཆགས་ཚུལ་དང༌།  མི་འབོར་དང་མི་སེར་གནས་སྤོར་གྱི་ལོ་རྒྱུས།  རིག་གཞུང་གི་ལོ་རྒྱུས་སོགས་ཡིན་འདུག་ལ།  ཁོང་གི་རྩོམ་ཡིག་མཐའ་མ་དེའི་ནང་དུ་རྒྱ་ནག་ངོས་འཛིན་བྱས་དོན། ༡༩༡༢ཀྱི་ཡར་སྔོན་ལ་ཀྲུང་ཧྭ་སྤྱི་མཐུན་རྒྱལ་ཁབ་གཞུང་འབྲེལ་གྱིས་མགོ་བཙུགས་དུས་རྒྱ་ནག་གམ་ཀྲུང་གོ་ཞེས་པ་དེར་ངོས་འཛིན་གསལ་བོ་ཞིག་མེད་ལ།  ཐ་ན་ཆིན་རྒྱལ་རབས་སྐབས་སུའང་ཀྲུང་གོ་ནི་ཆིན་རྒྱལ་རབས་དང་ཆིན་རྒྱལ་རབས་ཀྱི་དབང་བསྒྱུར་མངའ་ཁུལ་ཙམ་ལ་གོ་གི་ཡོད་པ་རེད།  མཚམས་རེར་ཀྲུང་གོ་ནི་མན་ཇུ་དང་ནང་སོག  བོད།  ཤེར་ཏུར་ཀེ་སི་ཐན་བཅས་ཕུད་པའི་རྒྱ་ནག་གི་ཞིང་ཆེན་༡༨ལ་གོ་གི་ཡོད་འདུག   དེའི་རྐྱེན་གྱིས་ཁོང་གིས།   གལ་སྲིད་ང་ཚོས་གནའ་བོའི་རྒྱ་ནག་གི་མངའ་ཁུལ་ཆེ་ཆུང་གཞལ་སྐབས་དུས་ངེས་ཅན་ཞིག་ནང་གི་རྒྱལ་རབས་ངེས་ཅན་ཞིག་གི་སྐབས་སུ་དབང་བསྒྱུར་བྱེད་པའི་ས་ཁུལ་ལ་བལྟ་དགོས་པ་རེདཅེས་བསྒྲུབས་ཡོད་པ་རེད། 
    ཁོང་གིས་མཐའ་མ་དེར་རྒྱ་ནག་གི་མགོ་ཁྲིད་ཚོར་བསྟན་དོན།  རྒྱ་ནག་འདི་དོན་དམ་གྱིས་ཞི་བའི་སྒོ་ནས་འཕེལ་རྒྱས་སུ་འགྲོ་འདོད་ཡོད་ཚེ་ངེས་པར་དུ་རང་གི་ལོ་རྒྱུས་ལ་བསྡོམས་རྒྱབ་ཏེ་ཉམས་མྱོང་གི་ཁྲོད་ནས་སློབ་སྦྱོང་བྱེད་དགོས་པ་རེད་ཅེས་བརྗོད་ཡོད་པ་རེད།