བོད་མི་མེ་མདས་བསད་པའི་སྐོར་ལ་དཔྱད་པ།
རྩོམ་པ་པོ། ཁྲིན་བིས་ཅན།
ཉེ་ཆར་བོད་པ་སྐོར་ཞིག་རྒྱ་གར་ཏུ་བྲོས་བྱོལ་གྱིས་བཙན་བྱོལ་བོད་གཞུང་ལ་སྐྱབས་བཅོལ་ཏུ་ཡོང་བ་དང༌། བྱིས་པ་ཡང་ཚུད་པའི་བོད་པ་དེ་ཚོ་ལོ་ངོ་སྟོང་ཕྲག་རིང་འཁྱགས་རོམ་གྱིས་བསྡམས་པའི་ནང་པ་ལ་བརྒྱུད་སྐབས་བཅིངས་འགྲོལ་དམག་གིས་མེ་མདའ་བརྒྱབ་སྟེ་མི་གཉིས་བསད་པ་རེད། སྡུག་རྩུབ་ཀྱི་བྱ་སྤྱོད་དེ་ཁོང་ཚོ་དང་ཐག་མི་རིང་བའི་རྒྱལ་སྤྱིའི་རི་འཛེགས་མི་སྣ་དྲུག་ཅུ་ཙམ་གྱིས་མཐོང་ཡོད་ལ། ཁོང་ཚོས་རྒྱ་ནག་གི་དམག་མིའི་ཚམ་ཚོམ་ཅི་ཡང་མེད་པར་ས་རུ་་བསྡད་དེ་བོད་པ་དེ་ཚོའི་ཕྱོགས་སུ་མེ་མདའི་ཁ་གཏད་དཻ་ཡང་དུ་བསྐྱར་ཏུ་གངས་ནང་དུ་ཕྱོགས་བཞིར་བྲོས་ཤིང་གྱོན་གོས་ཧྲུལ་རལ་ཅན་གྱི་ཕོ་མོ་དང་བྱིས་པ་ཚོར་མེ་མདའ་བརྒྱབ་པ་དང༌། ཞེད་སྣང་སྐྱེས་བའི་བྱིས་པ་བཅུ་གྲངས་ཙམ་ཞིག་བྱི་མི་ཡིས་ཙི་ཙི་བཟུང་བ་བཞིན་ཁོང་ཚོས་འཇུས་བ་མཐོང་ཡོད་པ་རེད། ཕྱི་ལོ་༢༠༠༨ ལོར་ཨོ་ལིམ་པིཀ་ཚུགས་རྒྱུ་ཡིན་པའི་རྒྱལ་ཁབ་ཀྱིས་འདི་ལྟར་རང་ཉིད་ཀྱི་མི་སེར་ཀླ་ཀློའི་ངང་དམར་གསོད་གཏོང་བཞིན་པ་དེ་རི་འཛེགས་པ་ཚོ་ཡིད་ཆེས་ཀྱི་མེད་པ་རེད། ཡོངས་ཁྱབ་ཀྱི་དམར་གསོད་དོན་རྐྱེན་དེ་རྒྱལ་སྤྱིའི་གསར་ལམ་ཁག་གིས་སྤེལ་བའི་འཛམ་གླིང་ནང་ཧངས་སངས་བ་ཞིག་ཆགས་པ་དང༌། དེ་ནི་རྒྱལ་སྤྱིའི་ཁྲིམས་ནང་མངོན་གསལ་གྱིས་གཏན་འབེས་བྱས་ཡོད་པ་ནི་མཐའ་མཚམས་སྲུང་དམག་གིས་ཁོང་ཚོའི་ཚེ་སྲོག་ལ་ཉེམ་ཁ་འཕྲད་སྐབས་གཞི་ནས་མཐར་ཐུག་གི་ཐབས་ཤེས་ཏེ་མེ་མདའ་བེད་སྤྱད་ཆོག་ཅེས་བཀོད་ཡོད། ཡིན་ན་ཡང་བོད་མི་བྲོས་བྱོལ་བ་དེ་ཚོ་ནི་ལག་ཏུ་ཅི་ཡང་མེད་ལ་ངོ་རྒོལ་གྱི་ནུས་ཤུགས་མེད་པའི་ཉམ་ཐག་པ་རེད།
བཙན་བྱོལ་བོད་གཞུང་གིས་བསྡོམས་རྩིས་ལྟར་ན། ལོ་རེ་བོད་ནས་གངས་རི་བརྒྱུད་བལ་ཡུལ་ས་ཐོག་ཏུ་འཛུལ་བ་དང་དེ་ནས་རྒྱ་གར་གྱི་བཙན་བྱོལ་བོད་གཞུང་གི་བསྟི་གནས་རྡ་རམ་ས་ལར་འབྱོར་མཁན་མི་གྲངས་ཉིས་སྟོང་ལྔ་བརྒྱ་ཙམ་ཡོད་པ་རེད། ཡིན་ན་ཡང་བྲོས་བྱོལ་བ་མི་འབོར་མི་ཉུང་བ་ཞིག་གནམ་གཤིས་ཤིན་ཏུ་སྡུག་པའི་གངས་རི་བརྒྱུད་སྐབས་འདས་གྲོངས་སུ་གྱུར་བ་དང༌། ལམ་ཁ་དེར་རྟག་པར་བྲོས་བྱོལ་བ་ཚོ་དུས་གཏན་དུ་འཁྱགས་ཤི་ཐེབས་པའི་བེམ་པོ་མཐོང་རྒྱུ་ཡོད་པ་དང༌། དེ་ནི་བྲོས་བྱོལ་བ་ཚོ་བཅིངས་འགྲོལ་དམག་གིས་རྗེས་འདེད་དང་མེ་མདའ་ལས་བྱོལ་ཆེད་ཆེས་ཉེན་ཁ་ཆེ་བའི་ལམ་ཁ་དེ་བདམས་དགོས་བ་རེད། དམག་མི་ལ་ཡིབ་ནས་གངས་རི་བརྒལ་རྗེས་ད་དུང་བལ་ཡུལ་ས་ཁུལ་གྱི་རྦབ་རྡོ་གྲིལ་པའི་ས་ཁུལ་ཞིག་བརྒྱུད་དགོས་བ་དང༌། བོད་པ་ཚོའི་དེ་ལ་འཆི་བའི་གྲོང་དུ་འབོད་ལ་ས་ཁུལ་དེར་ཡིད་གཟབ་མེད་པར་རྦབ་རྡོ་ཞིག་མར་འགྲིལ་ཚེ་རྦབ་རྡོ་གཞན་ཚང་མ་འབྲུག་སྒྲ་གྲགས་པ་བཞིན་མར་འགྲིལ་ཡོང་བ་དང༌། བོད་པ་མང་པོ་ཞིག་རྦབ་རྡོའི་འོག་ནས་རྐྱེན་ལམ་དུ་གྱུར་ཡོད། སྟབས་ལེགས་ནས་རྦབ་རྡོའི་ས་ཁུལ་ལས་ཐར་ཏེ་བལ་ཡུལ་ཏུ་སླེབས་ན་ཡང་རང་དབང་ཐོབ་པར་ད་དུང་རྒྱང་ཐག་ཤིན་ཏུ་རིང་བ་དང༌། དེ་ནི་བལ་ཡུལ་སྲིད་གཞུང་ལ་རྒྱ་ནག་གཞུང་གིས་གནོན་ཤུགས་སྤྲད་དེ་ཁོང་ཚོས་བོད་པ་ཚོ་བརྒྱུད་པའི་ལམ་ཁར་འགག་སྒོ་བཟོས་བ་དང་བྲོས་བྱོལ་ལ་ཡོང་བའི་བོད་མི་འཛིན་བཟུང་བྱས་ཏེ་ཕྱིར་རྒྱ་ནག་གཞུང་ལ་རྩིས་སྤྲོད་བྱེད་ཀྱི་ཡོད། བོད་མི་མང་པོ་ཞིག་འཆི་ལམ་སྙེགས་ཏེ་རྒྱ་དམར་གྱི་སྡེར་འོག་ནས་ཐར་ན་ཡང་བལ་ཡུལ་དམག་མིས་འཛིན་བཟུང་བཙོན་འཇུག་བྱས་པ་དང་མཐར་བོད་དུ་ཕྱིར་བསྐྱལ་གྱི་ཡོད་ལ། རྒྱ་དམར་གྱིས་བྲོས་བྱོལ་བ་ཚོར་ཉེས་ཆད་ཁྲིམས་ཐག་གཅོད་ཀྱི་ཡོད། ང་རང་སྔོན་མ་རྒྱ་གར་རྡ་རམ་ས་ལར་འགྲོ་མྱོང་ལ་བཙན་བྱོལ་ཏུ་ཡོང་བའི་བོད་མི་ཁ་ཤས་ལ་བཅར་འདྲི་བྱས་པ་དང༌། མི་མང་པོ་ཞིག་གིས་གངས་རི་བརྒྱུད་སྐབས་ཕྱིད་སོང་བའི་རྐང་ལག་ང་ལ་བསྟན་པ་དང༌། ཁོང་ཚོ་བྲོས་བྱོལ་དུ་ཡོང་བའི་བརྒྱུད་རིམ་ལ་ཕྱིར་དྲན་སྐབས་དེ་ནི་འཇིགས་སྣང་ཆེ་བའི་རྨི་ལམ་ཞིག་རྨིས་པ་དང་མཚུངས། ངས་ཁོང་ཚོ་ལ་ཅིའི་ཕྱིར་ཉེན་ཁ་ཆེན་པོ་འདི་འདྲ་ཞིག་བརྒྱུད་ནས་བྲོས་བྱོལ་ཏུ་ཡོང་བ་ཡིན་ནམ་ཅེས་དྲིས་བར། སྐབས་དེར་ཁོང་ཚོས་ང་ལ་དགོད་འཛུམ་དང་བཅས་ཏཱ་ལའི་བླ་མ་འཇལ་བའི་ཆེད་དང༌། རང་དབང་གི་ཆེད། སོ་སོའི་རིག་གཞུང་སློབ་སྦྱོང་ཆེད་ཡིན་པར་བརྗོད།
རྡ་རམ་ས་ལའི་བཙན་བྱོལ་བོད་གཞུང་དེ་ཕྱུག་པོ་ཞིག་མིན་ལ། གཞུང་ཞབས་ཚོའི་ཟླ་རེ་གསོལ་ཕོགས་ནི་ཨ་སྒོར་བརྒྱ་ཙམ་རེད། ཡིན་ན་ཡང་བྲོས་བྱོལ་ཏུ་ཡོང་བའི་བོད་མི་ཚོའི་འཚོ་བ་དང་སློབ་སྦྱོང་ཐད་བཀོད་སྒྲིག་ལེགས་པོ་བྱེད་ཀྱི་ཡོད་ལ། ལྷག་པར་ཏུ་སློབ་གསོའི་སྟེང་བཙན་བྱོལ་ཁུལ་ཏུ་སློབ་གྲྭ་ཆེན་པོ་ལས་གཞན་པའི་སློབ་གསོ་མ་ལག་བཙུགས་ཡོད་ལ། སློབ་གྲྭར་ཡོད་པའི་སློབ་མ་ཚང་མ་ས་གནས་རང་གི་ཡིན་ན་ཡང་འདྲ་བྲོས་བྱོལ་ཏུ་ཡོང་མཁན་ཡིན་ན་ཡང་ཚང་མའི་སློབ་ཡོན་སྤྲོད་མི་དགོས་བའི་སློབ་གསོའི་ལམ་ལུགས་ལག་བསྟར་བྱེད་ཀྱི་ཡོད། སློབ་མ་ཚོས་སློབ་ཡོན་སྐར་གང་སྤྲོད་མི་དགོས་བ་མ་ཟད་འཚོ་བའི་འགྲོ་གྲོན་ཡང་སྲིད་གཞུང་གིས་གཏོང་གི་ཡོད་ལ། སློབ་མ་ཞིག་གིས་ཟླ་གཅིག་གི་འགྲོ་གྲོན་ནི་སྲིད་གཞུང་གི་རོའུ་པིས་རྒྱ་གར་སྒོརཉིས་སྟོང་འགྲོ་བ་དང༌། གཞན་སློབ་མ་ཚོ་གཞན་པའི་འགྲོ་སོང་གཏོང་སྤྱད་སྒོར་བརྒྱ་གནང་གི་ཡོད། དགེ་རྒན་ཚོའི་གསོལ་ཕོགས་ནི་ཟླ་རེ་རོའུ་པིས་སུམ་སྟོང་བཞི་སྟོང་ཡིན་ལ་དགེ་རྒན་མང་པོ་ཞིག་དང་དམིགས་བསལ་ཕྱི་རྒྱལ་མི་སེར་ཡིན་པའི་དགེ་རྒན་ཚོས་དང་བླངས་ཀྱིས་དཔེ་ཁྲིད་བྱེད་ཀྱི་ཡོད། སྨན་ཡོན་དང་འཕྲོད་བསྟེན་ཐད་བཙན་བྱོལ་སྤྱི་ཚོགས་སུ་སྨན་ཡོན་མི་དགོས་བའི་སྨན་བཅོས་ལམ་ལུགས་ཆ་ཚང་ལག་བསྟར་བྱེད་མེད་མོད། ཡིན་ན་ཡང་འཕྲོད་བསྟེན་ལས་ཁུངས་ཀྱིས་ལོ་ན་དྲུག་ཅུ་རེ་ལྔ་བརྒལ་བའི་རྒན་རྒོན་དང་གསར་ཏུ་བཙན་བྱོལ་ལ་འབྱོར་བའི་བོད་མི་ཚོས་སྨན་ཡོན་སྤྲོད་མི་དགོས་བའི་སྨན་བཅོས་ལོངས་སུ་སྤྱོད་ཆོག་པའི་གཏན་འབེབས་མཛད་ཡོད་ལ། དགེ་འདུན་པ་དང་སློབ་མ་ལ་སྨན་ཡོན་ཕྱེད་ཀ་ལེན་གྱི་ཡོད། བཙན་བྱོལ་སྤྱི་ཚོགས་སུ་སློབ་ཡོན་སྤྲོད་མི་དགོས་བའི་སློབ་གསོ་དང་རྩ་བའི་ཆ་ནས་སྨན་ཡོན་སྤྲོད་མི་དགོས་བའི་སྨན་བཅོས་མ་ལག་ཡོད་པར་བརྟེན་བོད་མི་མང་པོ་ཞིག་གིས་ཅི་ལ་ཡང་མི་འཛེམ་པར་འདིར་བྲོས་བྱོལ་ཏུ་ཡོང་གི་ཡོད་ལ། ཆེས་གཙོ་བོ་ཞིག་ནི་འདིར་རང་དབང་དང་རྦད་དེ་ཞེད་སྣང་མེད་པའི་འཚོ་བ་ཞིག་རོལ་ཐུབ་པ་རེད།
ལོ་འདི་དག་རིང་རྒྱ་ནག་དམར་ཤོག་གིས་བོད་ཀྱི་འགྲོ་བ་མིའི་ཐོབ་ཐང་ཧ་ཅང་ལེགས་བཅོས་ཡོད་པ་དང་བོད་མི་དམངས་ཀྱི་འཚོ་བ་ཇེ་ཕྱུག་ཏུ་གྱུར་བ། བོད་མི་དམངས་ཀྱིས་རང་དབང་ངང་རང་ཉིད་ཀྱི་ཆོས་ལུགས་ལ་དད་མོས་བྱེད་ཆོག་པ་དང༌། རང་ཉིད་ཀྱི་རིག་གཞུང་ལ་སློབ་སྦྱོང་བྱེད་ཆོག་པ། རང་ཉིད་ཀྱིས་སྲོལ་རྒྱུན་འཚོ་བ་རོལ་སྟངས་ལོངས་སུ་སྤྱོད་ཆོག་པ་དང༌། རྒྱ་གར་བཙན་བྱོལ་སྤྱི་ཚོགས་སུ་བྲོལ་བྱོལ་ཕྱིན་པའི་བོད་མི་ཚང་མ་ནི་ཏཱ་ལའི་ཕྱོགས་ཁག་གིས་བསླུ་བྲིད་ཐེབས་པ་དང༌། ཁོང་ཚོ་མང་པོ་ཞིག་དེར་བྲོས་རྗེས་དེ་ཡི་འཚོ་བ་ནི་བོད་ཀྱི་འཚོ་བ་ལེགས་པོ་དང་གཏན་ནས་བསྡུར་ཐབས་མེད་པ་དང༌། བཙན་བྱོལ་བོད་གཞུང་གི་དཔོན་རིགས་ཀྱི་རུལ་སུངས་འཚོ་བ་མིག་གིས་མཐོང་རྗེས་ཕྱིར་བོད་དུ་ལོག་གི་ཡོད་པ་རེད་ཅེས་རྫུན་གཏམ་བསྒྲགས་བཞིན་ཡོད་པ་རེད། གློག་རྡུལ་ཆ་འཕྲིན་འགོག་ཐབས་བྲལ་བའི་དེ་རིང༌། རྒྱ་གར་གྱི་བཙན་བྱོལ་བོད་མིའི་འཚོ་བ་ཇི་འདྲ་ཡིན་པ་དང༌། བཙན་བྱོལ་སྲིད་གཞུང་གི་དཔོན་རིགས་གཙང་མ་ཡིན་མིན་རྦད་དེ་མགོ་བསྐོར་གཏོང་མི་ཐུབ་ལ། རྒྱ་གར་ཏུ་བྲོས་བྱོལ་ལ་ཡོང་བའི་བོད་མི་རེ་རེ་ཡིས་བཙན་བྱོལ་སྤྱི་ཚོགས་ཀྱི་དངོས་ཡོད་གནས་སྟངས་ཁོང་ཆོའི་བོད་ནང་གི་གཉེན་ཉེ་དང་གྲོགས་པོ་ཚོ་བརྗོད་ངེས་བ་རེད། དེར་བརྟེན་ལོ་ངོ་བཅུ་གྲངས་རིང་བོད་ནས་རྒྱ་གར་རྡ་རམ་ས་ལ་བསྐྱོད་པར་བརྒྱུད་དགོས་བའི་གངས་རིའི་སྟེང་དུ་བྲོས་བྱོལ་གྱི་རྐང་རྗེས་དེ་ནམ་ཡང་མཚམས་ཆད་མ་མྱོང་ལ། མི་ཇི་འདྲ་མང་པོ་ཞིག་བྲོས་བྱོལ་གྱི་ལམ་དུ་འགྱེལ་སོང་ན་ཡང་བོད་མི་ཚོ་ད་དུང་གཅིག་རྗེས་གཉིས་འབྲངས་ཡིན་ལ། ཁོང་ཚོའི་ཁ་བའི་སྟེང་བཀོད་པའི་ཁྲག་གི་རྐང་རྗེས་རེ་རེ་ཡིས་རྒྱ་དམར་དྲག་པོའི་སྲིད་དབང་ལ་འཁོན་ལན་དང་རྒྱ་གཞུང་གི་རྫུན་གཏམ་ཐེར་འདོན་བྱེད་ཀྱི་ཡོད་པ་རེད།
རྒྱ་དམར་གྱིས་བོད་མི་བྲོས་བྱོལ་པའི་སྟེང་མེ་མདའ་བརྒྱབ་པ་ཐེངས་དང་པོ་མིན་ལ་ཆེས་མཐའ་མ་ཡང་མིན། སྔོན་ཆད་གུང་ཁྲན་དམར་པོའི་དབང་བསྒྱུར་ལས་བྲོས་བྱོལ་ཆེད་བྷིར་ལེན་རྩིག་གྱང་བརྒལ་ཏེ་རང་དབང་ལ་ཕྱོགས་པའི་ཤར་འཇར་མན་མི་དམངས་ལ། ཤར་འཇར་མན་གྱི་དམག་མིས་མེ་མདའ་བརྒྱབ་ཏེ་བསད་པ་དང་ད་ལྟ་མེ་མདའ་བརྒྱབ་མཁན་དམག་མི་ཚོ་ལ་ཉེས་ཆད་ཁྲིམས་ཐག་བཅད་ཡོད་པ་རེད། རྒྱང་ཐག་མི་རིང་བའི་མ་འོངས་བར་བོད་པ་བྲོས་བྱོལ་བ་ཚོ་མེ་མདའ་བརྒྱབ་ཏེ་བསད་མཁན་དམག་མི་དེ་དག་ཡང་ནམ་ཞིག་ཤར་འཇར་མན་གྱི་དམག་མི་དང་འདྲ་བར་ཁྲིམས་ཐག་ཉེས་ཆད་གཏོང་བའི་ཡིད་ཆེས་ཡོད།
༼ས་དཀར་བཀྲ་ཤིས་ཀྱིས་བོད་བསྒྱུར་བྱས།༽
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།