རྒྱ་ནག་གི་ཤེས་ལྡན་མི་སྣས་བོད་དོན་ཐག་གཅོད་ཕྱོགས་ཀྱི་བསམ་ཚུལ་གླེང་བ།

བོད་ཀྱི་རྒྱལ་ས་ལྷ་ས་གཙོས་བོད་ཆོལ་གསུམ་ས་ཁུལ་ཡོངས་སུ་་བོད་མི་ཚོས་རྒྱ་གཞུང་ལ་ཞི་བའི་ངོ་རྒོལ་གྱི་ལས་འགུལ་སྤེལ་བར་རྒྱ་གཞུང་གིས་་ཁྲག་དྲི་བྲོ་བའི་དྲག་གནོན་ཚབས་ཆེན་བྱེད་བཞིན་པའི་སྐབས་འདིར་རྒྱ་ནག་སྐམ་ས་ཆེན་པོར་བཅའ་བཞུགས་རྒྱ་ནག་གཞུང་དང་ལྟ་སྤྱོད་མི་མཐུན་མཁན་རྩོམ་པ་པོ་གྲགས་ཅན་ཝང་ལིས་ཞོན་དང་ལིས་ཞོ་པོ་བཅས་ཤེས་ལྡན་མི་སྣ་སུམ་ཅུ་ཙམ་གྱིས་་བོད་ཀྱི་གནས་སྟངས་ཐག་གཅོད་ཐད་ཀྱི་བསམ་ཚུལ་བཅུ་གཉིས་ཞེས་བ་ཞིག་ལ་མཚན་རྟགས་བཀོད་དེ་ཡོངས་ཁྱབས་གསལ་བསྒྲགས་བྱས་པ་གཤམ་གསལ།

དང་པོ། མིག་སྔར་རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་གིས་ཕྱོགས་གཅིག་རྐྱང་བ་ཁྱབ་བསྒྲགས་བྱེད་པའི་རྣམ་པ་དེས་མི་རིགས་ཀྱི་འཁོན་འཛི་སྐུལ་སློང་དང་གནས་སྟངས་ཚབས་ཆེ་རུ་གཏོང་བའི་འབྲས་བུ་མངོན་པ་དང༌། རྒྱལ་ཁབ་གོང་བུ་གཅིག་གྱུར་སྲུང་སྐྱོབ་ཀྱི་ཕུགས་རྒྱང་རིང་བའི་དམིགས་བྱ་ལ་གནོད་པ་ཤིན་ཏུ་ཆེ་བས། ང་ཚོ་ཁྱབ་བསྒྲགས་འདི་ལྟ་བུ་མཚམས་འཇོག་དགོས་བའི་འབོད་སྐུལ་བྱེད་ཀྱི་ཡོད།
གཉིས་པ། ང་ཚོས་ཏཱ་ལའི་བླ་མས་ཞི་བདེ་འབོད་སྐུལ་ལ་རྒྱབ་སྐྱོར་དང༌། དྲང་བདེན་དང་ཞི་བདེ། འཚེ་མེད་ཞི་བའི་རྩ་དོན་གཞིར་བཟུང་ནས་མི་རིགས་ཀྱི་འགལ་ཟླ་སེལ་དགོས་བའི་རེ་བ་བྱེད་ཀྱི་ཡོད། ང་ཚོས་ཉེས་མེད་མི་སེར་དཀྱུས་མ་ཚོ་ལ་དམིགས་པའི་་དྲག་པོའི་བྱ་སྤྱོད་མཐའ་དག་ལ་སྐྱོན་བརྗོད་དང༌། རྒྱ་ནག་གཞུང་གིས་དྲག་པོའི་བཙན་གནོན་བྱེད་བཞིན་པར་མཚམས་འཇོག་དགོས་བའི་སྐུལ་འདེད་བྱེད་ཀྱི་ཡོད་ལ། བོད་རིགས་མི་མང་ཚོས་དྲག་པོའི་ལས་འགུལ་མི་སྤེལ་བའི་རེ་བ་བྱེད་ཀྱི་ཡོད།

གསུམ་པ། རྒྱ་ནག་གཞུང་གི་ཁུངས་འཕེར་ར་སྤྲོད་ལྟར་ན་འདི་ནི་ཏཱ་ལའི་ཚོགས་ཁག་གིས་རྩ་འཛུགས་དང་ལྐོག་ཇུས། ཞིབ་ཚགས་སྒོས་འཆར་གཞི་བཏིངས་བའི་གནད་དོན་ཞིག་ཡིན་པར་ཁྱབ་བསྒྲགས་བྱས་ཡོད་ལ། ང་ཚོའི་རེ་བར་སྲིད་གཞུང་གིས་ར་སྤྲོད་བདེན་དཔང་གསལ་སྟོན་དགོས་པ་དང༌། དེ་དང་ལྷན་སྲིད་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྒྱུན་ལས་ཚོགས་པ་གདན་འབོད་ཀྱིས་ར་སྤྲོད་བདེན་དཔང་དང་གནད་དོན་གྱི་བརྒྱུད་རིམ། རྨས་སྐྱོན་ཕོག་པའི་མི་གྲངས་སོགས་ལ་རང་དབང་གིས་བརྟག་དཔྱད་གནང་བཅུག་སྟེ་རྒྱལ་སྤྱིའི་སྤྱི་ཚོགས་ཀྱིས་ལྡོག་ཕྱོགས་ཀྱི་ལྟ་ཚུལ་དང་ཡིད་མི་ཆེས་བའི་སེམས་ཁམས་ལ་འགྱུར་བ་གཏོང་དགོས་བའི་བསམ་ཚུལ་འདོན་གྱི་ཡོད།

བཞི་བ། ང་ཚོའི་བསམ་པར་བོད་ལྗོངས་ས་ཁུལ་གྱི་དམར་ཕྱོགས་མགོ་ཁྲིད་ཀྱིས་ཏཱ་ལའི་བླ་མ་ནི་ཆོས་གོས་བསྣམས་པའི་སྤྱང་ཀི་ཞིག་དང༌། མིའི་གདོང་ཅན་དང་གཅན་གཟན་སྙིང་ཅན་གྱི་གདོན་འདྲེ་ཞིག་རེད་ཅེས་པའི་རིག་གནས་གསར་བརྗེ་ཡི་བརྗོད་ཚིག་དེ་དག་གིས་གནད་དོན་ཞི་བར་མི་ཕན་པ་མ་ཟད་རྒྱ་ནག་སྲིད་གཞུང་གི་སྣང་བརྙན་ལའང་མི་ཕན། ང་ཚོའི་བསམ་པར་རྒྱལ་སྤྱིའི་སྤྱི་ཚོགས་ནང་ཞུགས་པར་ཤུགས་རྒྱག་བཞིན་པའི་རྒྱ་ནག་སྲིད་གཞུང་གིས་ངེས་པར་དུ་དེང་རབས་ཀྱི་དཔལ་ཡོན་དང་འཚམ་པའི་གཞུང་འཛིན་གྱི་རྣམ་པ་སྟོན་དགོས་བ་རེད།

ལྔ་བ། ང་ཚོའི་དོ་སྣང་ལྟར་ན་ལྷ་སར་དྲག་པོའི་ཟིང་འཁྲུག་ལངས་པའི་ཉིན་དེར་ཟླ་༣ ཚེས ༡༤ ཉིན་བོད་རང་སྐྱོང་ལྗོངས་ཀྱི་འགན་ཡོད་མི་སྣའི་ཁུངས་འཕེར་ར་སྤྲོད་ལྟར་ན་འདི་ནི་ཏཱ་ལའི་ཚོགས་ཁག་གིས་རྩ་འཛུགས་དང༌། ལྐོག་ཇུས། ཞིབ་ཚགས་སྒོས་འཆར་བཀོད་བྱས་པ་ཞིག་ཡིན་ཚུུལ་ཁྱབ་བསྒྲགས་གནང་བ་དང༌། དེས་བོད་ལྗོངས་གཞུང་འཛིན་པས་ཟིང་འཁྲུག་སློང་རྒྱུ་ཡིན་པ་སྔོན་ནས་ཤེས་ཡོད་ན་ཡང༌། གནད་དོན་འབྱུང་བ་དང་རྒྱ་ཁྱབ་ཏུ་མི་འགྲོ་བར་དོན་ཕན་ལྡན་པའི་བཀག་འགོག་བྱ་ཐུབ་མེད་པ་དེའི་ཁྲོད་ལས་དོན་སྣང་མེད་འཐུས་ཤོར་ཏུ་ཕྱིན་པ་ཞིག་ཡིན་མིན་བརྟག་དཔྱད་ནན་མོ་བྱས་ཏེ་ཐག་གཅོད་དགོས་བ་རེད།

དྲུག་པ། གལ་སྲིད་མཐར་གཏུགས་གནད་དོན་འདི་ནི་རྩ་འཛུགས་ཡོད་པ་དང༌། ལྐོག་ཇུས་ཡོད་པ། ཞིབ་ཚགས་སྒོས་འཆར་བཀོད་བྱས་པ་ཞིག་ཡིན་པ་བདེན་དཔང་བྱེད་མ་ཐུབ་པར། མི་མང་ངར་སློང་བར་སྐུལ་བའི་འགྱུར་བ་ཞིག་ཡིན་ཚེ་གནས་ཚུལ་རྫུན་བཟོ་བྱས་ཏེ་ཀྲུང་དབྱང་དང་མི་མང་ལ་མགོ་སྐོར་གཏོང་མཁན་གྱི་འགན་ཁུར་མི་སྣ་ལ་རྩད་གཅོད་བྱས་ཏེ། ནོར་འཁྲུལ་ལ་བསྐྱར་ཞིབ་དང་ཉམས་མྱོང་ཕྱོགས་སྡོམ་བྱས་ཏེ་རྗེས་སུ་ཡང་བསྐྱར་ལམ་ཁ་འདིར་མི་བསྐྱོད་པའི་སྔོན་འགོག་བྱེད་དགོས།

བདུན་པ། ང་ཚོས་བོད་རིགས་མང་ཚོགས་རེ་རེ་ལ་ཞིབ་བཤེར་དང་རྗེས་སུ་ཉེས་ཆད་གཏོང་རྒྱུའི་ལས་འགུལ་མི་སྤེལ་པའི་རེ་འདུན་ནན་མོ་བྱེད་ཀྱི་ཡོད་ལ། འཇུ་བཟུང་བྱས་པ་རྣམས་ལ་ཡོངས་ཁྱབ་དང༌། དྲང་བདེན། གསལ་བོ་སྒོས་ཁྲིམས་བཤེར་གྱི་བརྒྱུད་རིམ་ལ་བརྩི་སྲུང་བྱས་ཏེ་ཕྱོགས་ཚང་མའི་འདོད་བློ་ཁེངས་བའི་ཚད་ཞིག་ཏུ་སླེབས་འཇུག་དགོས།

བརྒྱད་པ། ང་ཚོས་རྒྱ་ནག་སྲིད་གཞུང་གིས་ཡིད་ཆེས་འཕེར་བའི་རྒྱལ་ཁབ་ཕྱི་ནང་གི་གསར་འགོད་པ་ཁག་བོད་ཁུལ་དུ་བསྐྱོད་དེ་རང་དབང་གིས་བཅར་འདྲི་སྙན་སྒྲོག་བྱེད་ཆོག་པའི་སྐུལ་མ་བྱེད་ཀྱི་ཡོད། ང་ཚོའི་བསམ་པར་མིག་སྔར་གྱི་གསར་འགོད་བཀག་སྡོམ་བྱས་པ་དེས་རྒྱལ་ནང་མི་མང་དང་རྒྱལ་སྤྱིའི་སྤྱི་ཚོགས་ཀྱི་ཡིད་ཆེས་ཐོབ་དཀའ་བ་མ་ཟད། རྒྱ་ནག་སྲིད་གཞུང་གི་ཡིད་ཆེས་ལ་གནོད་གི་རེད།  གལ་སྲིད་སྲིད་གཞུང་ལ་བདེན་དཔང་ཡོད་ཚེ་སྐྱོན་བརྗོད་སྣ་མང་བྱེད་པར་སྐྲག་དགོས་དོན་མེད་ལ། ཡོངས་སུ་སྒོ་ཕྱེས་བའི་རྣམ་འགྱུར་ལག་བསྟར་བྱས་ཚེ་ད་གཟོད་རྒྱལ་སྤྱིའི་སྤྱི་ཚོགས་ཀྱིས་མིག་སྔར་ང་ཚོའི་སྲིད་གཞུང་ལ་ཡིད་མི་ཆེས་བའི་རྣམ་པ་དེ་བསྒྱུར་ཐུབ།

དགུ་པ། ང་ཚོའི་རྒྱལ་ཁབ་ཕྱི་ནང་གི་རྒྱ་རིགས་མང་ཚོགས་ཚོས་ཞི་འཇགས་དང་བཟོད་སྒོམ་གྱིས་བསམ་ཞིབ་ནན་མོ་གནང་དགོས་བའི་འབོད་སྐུལ་བྱེད་ཀྱི་ཡོད་ལ། ཚོར་ཤུགས་ཆེ་བའི་མི་རིགས་རིང་ལུགས་ཀྱི་རྣམ་འགྱུར་ལ་རྒྱལ་སྤྱིའི་སྤྱི་ཚོགས་ཀྱིས་དགའ་མོས་མི་བྱེད་པར་རྒྱ་ནག་གི་རྒྱལ་སྤྱིའི་སྣང་བརྙན་ལ་གནོད་གི་རེད།

བཅུ་པ། ལོ་རབས་༨༠ ནང་བྱུང་བའི་བོད་ཀྱི་ཟིང་འཁྲུག་དེ་ལྷ་ས་ལས་བརྒལ་མེད། ཐེངས་འདིར་བོད་ཀྱི་ས་ཁུལ་ཡོངས་སུ་རྒྱ་ཁྱབ་ཏུ་ཕྱིན་ཡོད་ལ། གནས་ཚུལ་འདི་ལྟར་སྡུག་་ཏུ་ཕྱིན་པ་ནི་བོད་ཀྱི་ལས་དོན་ཐད་ལ་འཐུས་ཤོར་ཚབས་ཆེན་བྱུང་བ་ཡིན་པས། འབྲེལ་ཡོད་སྡེ་ཁག་གིས་ངེས་པར་དུ་བསྐྱར་ཞིབ་ཚ་ནན་བྱས་ཏེ་ཕམ་ཉེས་སུ་སོང་བའི་མི་རིགས་སྲིད་ཇུས་ལ་རྩ་བ་ནས་འགྱུར་བ་གཏོང་དགོས།

བཅུ་གཅིག རྗེས་སུ་གནད་དོན་འདི་ལྟ་བུ་མི་འབྱུང་ཆེད། སྲིད་གཞུང་གིས་ངེས་བར་ཏུ་རྒྱ་ནག་གི་རྩ་ཁྲིམས་ནང་གསལ་བའི་ཆོས་དད་རང་མོས་དང་སྨྲ་བརྗོད་རང་དབང་གི་ཐོབ་ཐང་ལ་བརྩི་སྲུང་བྱས་ཏེ། བོད་རིགས་མང་ཚོགས་ལ་ཁོང་ཚོས་མི་འདོད་པ་དང་རེ་བ་གང་ཡོད་བརྗོད་དུ་འཇུག་དགོས་པ་དང༌། མི་རིགས་སོ་སོའི་མི་མང་གིས་རང་དབང་གི་སྒོ་ནས་སྲིད་གཞུང་གི་མི་རིགས་སྲིད་ཇུས་ལ་སྐྱོན་བརྗོད་དང་གྲོས་འཆར་འདོན་དུ་འཇུག་དགོས།

བཅུ་གཉིས། ང་ཚོའི་བསམ་པར་ངེས་པར་དུ་མི་རིགས་དབར་གྱི་འཁོན་འཛིན་སེལ་དགོས་བ་དང༌། མི་རིགས་འཆམ་མཐུན་མངོན་དུ་འགྱུར་དགོས་བ་ལས། མི་རིགས་དབར་གྱི་འགལ་ཟླ་རྒྱ་ཆེ་རུ་གཏོང་རྒྱུ་དེ་མིན། རྒྱལ་ཁབ་ཞིག་གི་ས་ཁོངས་ཁ་བྲལ་དུ་མི་འགྲོ་བའི་སྔོན་འགྲོ་ནི་མི་རིགས་དབར་གྱི་འགལ་ཟླ་སེལ་དགོས་པ་དེ་རེད། དེར་བརྟེན། ང་ཚོའི་རེ་བར་རྒྱལ་ཁབ་ཀྱི་འགོ་ཁྲིད་མི་སྣ་ཐད་ཀར་ཏཱ་ལའི་བླ་མ་དང་བཀའ་མོལ་གནང་དགོས་བ་དང༌། ང་ཚོའི་རེ་བར་རྒྱ་བོད་མི་མང་གི་དོགས་པ་སེལ་བ་དང༌། འབྲེལ་འདྲིས་གོང་མཐོ། མཐུན་སྒྲིལ་མངོན་དུ་འགྱུར་བར་སྲིད་གཞུང་གི་སྡེ་ཁག་དང༌། ཡང་ན་དམངས་ཁྲོད་ཀྱི་ཚོགས་པ་དང་ཆོས་ལུགས་མི་སྣ་བཅས་ཚང་མས་འབད་བརྩོད་གནང་དགོས་བ་རེད།
 ༢༠༠༨ ལོའི་ཟླ་༣ ཚེས་༢༢ ཉིན།