དགེ་འདུན་པར་རྒྱ་གཞུང་གིས་ཚོད་ལྟ་བྱས་པ།

རྒྱ་གཞུང་གིས་ལོ་ལྟར་བོད་ནང་གི་དགོན་སྡེ་ཁག་ལ་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་གྱིན་ཡོད་མོད། ད་ལོ་བྱ་འགུལ་དེའི་ངོ་བོ་དང་བརྗོད་བྱའི་ནང་དོན་སོགས་སྔར་དང་ཅུང་མི་འདྲ་བ་ཆགས་ཡོད་སྟབས། དགེ་འདུན་པ་ཚོར་དོགས་གཞི་ཆེན་པོ་ཞིག་བསླངས་ཡོད་འདུག
ཉེ་ཆར་འདི་གའི་གསར་འགོད་པར་ཨ་མདོ་བླ་བྲང་དགོན་པའི་དགེ་འདུན་པ་ཞིག་གིས་གློག་ཀླད་བརྒྱུད་གནས་ཚུལ་མཁོ་སྤྲོད་བྱས་པ་ལྟར་ན། ད་ལོའི་ཕྱི་ཟླ་ ༥ བ་ནས་ཀན་ལྷོ་ཁུལ་དང་བསང་ཆུ་རྫོང་ཆོས་ལུགས་སྡེ་ཁག དགོན་པའི་དོ་དམ་ལྷན་ཁང་སོགས་མཉམ་འབྲེལ་ཐོག བླ་བྲང་དགོན་པའི་དགེ་འདུན་པ་ཡོངས་ལ། བོད་བརྒྱུད་ནང་བསྟན་དགོན་པའི་དོ་དམ་རྟོག་ཞིབ་དྲི་ཤོག ཟེར་བའི་བདམས་གསེས་དང་དྲིས་ལན་རྒྱག་དགོས་པའི་ཚོད་ལྟའི་ཡིག་ཆ་ཞིག་བཀྲམས་ཡོད་པ་དང་། ཡིག་ཆ་དེའི་སྔོན་གླེང་ནང་། རང་རྒྱལ་བོད་བརྒྱུད་ནང་བསྟན་དགོན་པར་སྡོད་པའི་མིག་སྔའི་རྩ་བའི་གནས་ཚུལ་ལ་རྒྱུས་ལོན་ཡང་དག་ཅིག་བྱ་ཆེད། ང་ཚོས་ཐེངས་འདིའི་དྲི་ཤོག་རྟོག་ཞིབ་ཚན་ཁག་འདི་རྩ་འཛུགས་བྱས་པ་ཡིན་ལ། དྲི་ཤོག་རྟོག་ཞིབ་སྟེང་སྒེར་མིང་ཡི་གེར་མི་འགོད་ཅིང་། ཁྱོད་ཀྱིས་གནངས་པའི་དྲིས་ལན་རྣམས་ཀྱང་གསང་རྒྱ་དམ་པོ་མཛད་ངེས་ཡིན། ཉིད་ཀྱིས་དོན་དངོས་ཇི་བཞིན་འབྲི་བར་མཁྱེན། ཁྱོད་ཀྱི་གནས་ཚུལ་ངོ་མའམ་བསམ་ཚུལ་དང་མཐུན་པའི་བདམས་ཚན་ནང་རྟགས་བརྒྱབ་ཆོག་ལ། ཡང་ན་འཕྲེད་ཐིག་སྟེང་སྒེར་གྱི་བསམ་ཚུལ་བྲིས་ཀྱང་ཆོག བྱ་བ་འདིར་རོགས་སྒྲུབ་ཡོང་བའི་བཀའ་དྲིན་ཞུ་ཞེས་བཀོད་འདུག ཡིག་ཆ་དེར་མགོ་མཇུག་དང་ཚན་པ་ག་ཚོད་ཡོད་པ་གསལ་བོ་མི་འདུག་མོད། འདི་གར་འབྱོར་བར་ཤོག་ངོས་ ༡༠ དང་། དོན་ཚན་ ༢༡ ཙམ་འདུག་ལ། ཚན་པ་དེ་དག་གི་ནང་དོན་གཤམ་གསལ་ལྟར་ཡིན།
དང་པོ། ཁྱོད་རང་ཆོས་སྒོར་ཞུགས་པའི་རྒྱུ་རྐྱེན་གཙོ་བོ་གང་ཡིན། རང་གི་དད་པ། ཕ་མ་འམ། ཤ་ཉེ། གྲོགས་པོས་གྲོས་འདོན་བྱས་པ། རྒྱུ་རྐྱེན་གཞན།
གཉིས་པ། ཁྱོད་ལྟར་ན་དགོན་པར་ཞུགས་རྗེས་ཐག་ཆོད་སོང་བའི་གནད་དོན་ཚབས་ཆེ་བ་གང་ཡིན། སློབ་གཉེར་གནད་དོན། འཚོ་བའི་གནད་དོན། བྱ་བའི་གནད་དོན། གནད་དོན་གཞན།
གསུམ་པ། ཆོས་སྒོར་ཞུགས་རྗེས་ཁྱོད་ལ་ཤན་ཤུགས་ཆེས་ཆེ་བ་ཐེབས་མཁན་གྱི་མི་སུ་ཡིན། ཡོངས་འཛིན། རང་དགོན་གྱི་སྤྲུལ་སྐུ། ཆོས་གྲོགས། སྡེ་དམངས་དོ་དམ་ཁང་གི་མགོ་ཁྲིད།
བཞི་བ། དུས་རྒྱུན་ཁྱོད་དང་ཕན་ཚུན་འགྲོ་འོང་བྱེད་པའི་མི་སུ་ཡིན། རང་གི་ཁྱིམ་མི། ཡོངས་འཛིན། ཆོས་གྲོགས། ཡང་ན་མི་གཞན།
ལྔ་བ། ཁྱོད་རང་མི་མང་པོ་འཛོམས་སའི་རྩ་འཛུགས་ཆེ་ཆུང་ནང་ཞུགས་མྱོང་ངམ། ཞུགས་མྱོང་། ཞུགས་མ་མྱོང་། གལ་ཏེ་ཞུགས་མྱོང་བ་ཡིན་ན། ཟླ་རེར་ཐེངས་གཅིག ལོ་ཕྱེད་རེར་ཐེངས་གཅིག ལོ་རེར་ཐེངས་གཅིག དུས་ངེས་མེད།
དྲུག་པ། དོན་ཚན་དྲུག་པའི་ནང་དོན་གློག་ཀླད་ནང་ཧ་ཅང་མཐོང་དཀའ་བས་འདིར་བཀོད་ཐུབ་མ་བྱུང་།
བདུན་པ། ཁྱོད་ཀྱིས་ཕྱི་ཡུལ་དུ་འབྲེལ་གཏུགས་བྱེད་སའི་བརྒྱུད་ལམ་གཙོ་བོ་གང་དག་ཡིན། དྲ་རྒྱ། ཁ་པར། ལག་ཁྱེར། འཕྲིན་སྐུར། སྐད་སྐུར། ཡང་ན་གཞན།
བརྒྱད་པ། ཁྱོད་ལ་འཕྲིན་གསར་ཐོབ་བྱེད་ཀྱི་བརྒྱུད་ལམ་གཙོ་བོ་གང་ཡིན། ཁ་པར། སྦྲག་སྲིད། རླུང་འཕྲིན། བརྙན་འཕྲིན།
དགུ་བ། ཁྱོད་ཀྱིས་རྒྱལ་ནང་གི་རླུང་འཕྲིན་དང་བརྙན་འཕྲིན་སོགས་ལ་ཉན་གྱིན་ཡོད་དམ། གཏན་ནས་མེད། སྐབས་རེར། རྒྱུན་དུ།
བཅུ་བ། ཁྱོད་ཀྱིས་ཕྱི་རྒྱལ་གྱི་རླུང་འཕྲིན་ལ་ཉན་གྱིན་ཡོད་དམ། གཏན་ནས་མེད། སྐབས་རེར། རྒྱུན་དུ།
བཅུ་གཅིག ཁྱོད་ཀྱི་འཚོ་བའི་ཡོང་ཁུངས་གཙོ་བོ་གང་དག་ཡིན། ཁྱིམ་ནས་མཁོ་སྤྲོད། སྦྱིན་བདག་གིས་ཐད་ཀར་སྤྲོད་པ། སྦྱིན་བདག་གིས་དགོན་པ་བརྒྱུད་ནས་སྤྲོད་པ། དགོན་གཞུང་ནས་འགྱེད་གཏོང་། སྲིད་གཞུང་གི་རོགས་རམས། གཞན།
བཅུ་གཉིས། ཁྱོད་ཀྱིས་བསམ་ན་ད་ལྟ་ཁྱོད་ལ་དམ་ཆོས་སློབ་གཉེར་གྱི་ཁོར་ཡུག་དང་ཆ་རྐྱེན་ཅི་འདྲ་འདུག ཧ་ཅང་བཟང་། བཟང་། སྤྱིར་བཏང་། མི་བཟང་།
བཅུ་གསུམ། ཁྱོད་ཀྱིས་དམ་ཆོས་གང་ནས་བསླབས་པ་ཡིན། ནང་བསྟན་སློབ་གླིང་། མཚན་ཉིད་འཛིན་གྲྭ ཡོངས་འཛིན་གྱི་བཞུགས་ཤག ཡང་ན་གཞན།
བཅུ་བཞི། ཉིན་ལྟར་ཁྱོད་ཀྱི་ཆེས་ཆེ་བའི་དཀའ་ངལ་གང་ཡིན། འཚོ་བའི་གནད་དོན། སློབ་གཉེར་གྱི་གནད་དོན། ཡང་ན་གཞན།
བཅོ་ལྔ། ཁྱོད་ལ་སྤྱིར་བཏང་ཞིག་ལ་ཡོད་ཆོག་པའི་དབང་ཆ་དང་འོས་འགན་ཡོངས་སུ་འཛོམས་ཡོད་དམ། མེད། ཡོད། གསལ་བོ་མི་ཤེས།
བཅུ་དྲུག ཁྱོད་རང་ཕྱི་ཡུལ་ལ་ཆོས་སློབ་ཏུ་སོང་མྱོང་ཡོད་དམ། སོང་མྱོང་། སོང་མ་མྱོང་།
བཅུ་བདུན། གལ་ཏེ་ཁྱོད་རང་ཕྱི་ཡུལ་ལ་ཆོས་སློབ་ཏུ་སོང་ཡོད་ན་ཆོས་སློབ་པའི་དུས་ཡུན་ག་ཚད་འགོར་ཡོད། ལོ་གཅིག ལོ་གཅིག་ནས་གསུམ། ལོ་གསུམ་ནས་ལྔ། ལོ་ལྔ་ལས་ལྷག
བཅོ་བརྒྱད། ཁྱོད་ཀྱིས་བལྟས་ན། ཐེངས་འདིར་ལྷ་ས་དང་བོད་ཡུལ་གཞན་ནས་བྱུང་བའི་གྲྭ་བཙུན་སྐོར་ཅིག འཕྲོག་བཅོམ་བསྲེགས་གསུམ་གྱི་ལས་སུ་ཞུགས་པ་དེ། དམ་པའི་ཆོས་ཀྱི་དགོངས་དོན་དང་། འདུལ་བའི་བསླབས་ཁྲིམས་གཉིས་སུ་རྒྱབ་འགལ་བྱས་སོང་འདོད་དམ། འདོད། མི་འདོད། མི་ཤེས།
བཅུ་དགུ། དགེ་འདུན་པའི་ཁྲོད་དུ་སྤྲུལ་སྐུའི་མཚན་སྙན་ཕྱོགས་གང་དག་ནས་རྒྱས་བཞིན་ཡོད་དམ། ཆོས་སློབ་པའི་ཕྱོགས། དགོན་པའི་དོ་དམ་གྱི་ཕྱོགས། དགོན་པའི་མཚན་སྙན་གྱི་ཕྱོགས། དགོན་པའི་དཔལ་འབྱོར་གྱི་ཕྱོགས། ཆབ་སྲིད་ཀྱི་ཕྱོགས།
ཉི་ཤུ། དགོན་པའི་དོ་དམ་ལྷན་ཁང་གི་བྱ་བར་ཁྱོད་ཀྱིས་གདེང་འཇོག་གང་འདྲ་བྱེད་ཀྱིན་ཡོད་དམ། ལེགས། མི་ལེགས། ད་དུང་ལེགས་བཅོས་བྱ་དགོས། བཤད་དཀའ།
ཉེར་གཅིག ཁྱོད་ཀྱིས་བལྟས་ན་ཆོས་ལུགས་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ནུས་པ་གང་འདྲ་འདོན་སྤེལ་གནང་ཡོད་དམ། ཕན་པ་གནོད་པ་ལས་ཆེ། གནོད་པ་ཕན་པ་ལས་ཆེ། ཕན་གནོད་གཉིས་ཀ་མཆིས། གསལ་བོ་བཤད་དཀའ། ཞེས་བཀོད་འདུག
གོང་གི་ཡིག་ཆ་མཁོ་སྤྲོད་བྱེད་མཁན་ལ། ཡིག་ཆ་དེར་གྲྭ་བ་ཚོས་ལན་འདེབས་གང་འདྲ་རྒྱག་གིན་ཡོད་པ་དང་། ཡིག་ཆའི་ནང་དོན་ཐད་དགོན་པའི་ནང་དུ་བསམ་ཚུལ་གང་འདྲ་ཡོང་གིན་ཡོད་མེད་སྐད་ཆ་དྲིས་པར་ཁོང་གིས། དགེ་འདུན་པ་མང་ཆེ་བས་ཡིག་ཆ་དེར་ལན་འདེབས་ཚིག་གཅིག་ཀྱང་བྱེད་ཀྱིན་མེད་པར་ཕྱིར་སྤྲོད་ཀྱིན་འདུག འགའ་རེ་ཡིས་ཡིག་ཆའི་སྟེང་གི་བདམས་གསེས་རྣམས་སྟོང་བར་བཞག་སྟེ། ཟུར་དུ་རང་ཉིད་སྒེར་གྱི་བསམ་ཚུལ་དང་རེ་འདུན་སོགས་བྲིས་ཏེ་སྤྲོད་ཀྱིན་འདུག དགོན་པའི་བླ་སྤྲུལ་དང་གྲྭ་བ་རྒན་པ་ཚོས། ཐེངས་འདིའི་བྱ་འགུལ་ལ་གཟབ་གཟབ་བྱོས། ཚོད་ལྟ་འདིའི་དམིགས་ཡུལ་དང་རྒྱབ་ལྗངས་སོགས་ལ་ཚོད་དཔག་བྱེད་དཀའ་བ་ཞིག་རེད་ཟེར་གྱིན་འདུག་ཅེས་བརྗོད་བྱུང་།