བྱིས་པ་ཚོ་ཕྱིར་མེས་རྒྱལ་དུ་ཁྲིད་ཤོག་ཟེར།

རྒྱ་ནག་གུང་ཁྲན་ཏང་ཡོན་དང་རྒྱལ་ཁབ་ཀྱི་ལས་བྱེད་པའི་བུ་ཕྲུག་རྣམས་བཙན་བྱོལ་བོད་པའི་སློབ་གྲྭ་དང་དགོན་སྡེ་ཁག་ཏུ་སློབ་གཉེར་བྱེད་བཞིན་པ་རྣམས་ཕྱི་ཟླ་དགུ་བའི་ཚུན་ལ་ཕྱིར་བོད་དུ་མ་ལོག་ཚེ། བུ་ཕྲུག་དེ་དག་གི་ཕ་མ་རྣམས་གུང་ཁྲན་ཏང་ཡོན་དང་། ལས་ཀ་ནས་ཕྱིར་འཕུད་བྱ་རྒྱུའི་སྒྲིག་ཁྲིམས་གསར་བ་ཞིག་གཏན་འབེབས་བྱས་ཡོད་འདུག

ཟླ་སྔོན་མའི་ཚེས་ ༡༥ ཉིན་བོད་རང་སྐྱོང་ལྗོངས་དམར་ཤོག་སྒྲིག་བཤེར་ཁང་དང་། ལྗོངས་ལྟ་ཞིབ་ཁང་གཉིས་མཉམ་འབྲེལ་འོག གུང་ཁྲན་ཏང་ཡོན་དང་རྒྱལ་ཁབ་སྤྱི་ཞབས་པའི་བུ་ཕྲུག་ཕྱི་ལོགས་ཀྱི་ཏཱ་ལའི་རུ་ཚོགས་ཀྱིས་བཙུགས་པའི་སློབ་གྲྭའི་ནང་སློབ་སྦྱོང་བྱེད་པར་སྒྲིག་ཁྲིམས་གཏན་འབེབས། ཞེས་པའི་ཁྲིམས་གཞི་གསར་བ་ཞིག་བཟོས་ཡོད་པ་མ་ཟད། བོད་རིགས་ཏང་མི་ ༡༣ ལ་ད་ལོའི་ལྷ་སའི་གྱེན་ལངས་ནང་ཞུགས་པའི་ཉེས་མིང་འོག་ཉེས་ཆད་བཅད་ཡོད་འདུག

གོང་གི་གནས་ཚུལ་དེའི་ཐད་བོད་ཀྱི་འགྲོ་བ་མིེའི་ཐོབ་གིས་གསལ་བསྒྲགས་ཤིག་སྤེལ་ཏེ་རྒྱ་ནག་གཞུང་གི་གནས་ཚུལ་ལུང་འདྲེན་བྱས་དོན། གུང་ཁྲན་ཏང་ཡོན་དང་རྒྱལ་ཁབ་སྤྱི་ཞབས་པའི་བུ་ཕྲུག ཕྱི་རྒྱལ་ཏྰ་ལའི་རུ་ཚོགས་ཀྱི་སློབ་གྲྭའི་ནང་བསྐྱལ་བའི་བྱ་སྤྱོད་ལ་ཏང་ཁྲིམས་དང་། སྲིད་ཁྲིམས་ཐད་ཉེས་ཆད་ཕོགས་ཡོད། གཏན་འབེབས་འདི་དངོས་སུ་གསལ་བསྒྲགས་བྱས་རྗེས། གུང་ཁྲན་ཏང་ཡོན་དང་རྒྱལ་ཁབ་སྤྱི་ཞབས་པའི་བུ་ཕྲུག་ཏྰ་ལའི་རུ་ཚོགས་ཀྱི་སློབ་གྲྭ་དང་དགོན་སྡེ་ཁག་ཏུ་ཡོད་པའི་ཕ་མ་ཚང་མ་ཏང་དང་། ལས་གནས་ནས་ཕྱིར་འཕུད་ཀྱིས་ཉེན་ཆད་གཅོད་རྒྱུ་ཡིན། གཏན་འབེབས་འདི་གསལ་བསྒྲགས་མ་བྱས་གོང་དུ་བུ་ཕྲུག་ཚོ་ཕྱིར་ལོག་བྱས་ཏེ། རང་འགུལ་གྱིས་གནས་ཚུལ་གསལ་བཤད་བྱས་ན། ཉེས་ཆད་ཡང་དུ་གཏོང་བའམ་མེད་པར་བཟོ་རྒྱུ། སྔར་བུ་ཕྲུག་ཚོར་ཕྱི་རོལ་ལོག་སྤྱོད་པའི་སློབ་གསོ་ཐོབ་པ་དང་། ཁ་བྲལ་གཏོར་བཤིག་གི་བྱེད་སྒོར་ཞུགས་མཁན་ཚོར་ཞིབ་བཤེར་གཏིང་ཟབ་བྱ་རྒྱུ་དང་། གནས་ཚུལ་སྦ་གསང་དང་དུས་བཀག་ལྟར་ཕྱིར་ལོག་མི་བྱེད་མཁན་ལ་ཆད་པ་ནན་མོ་གཅོད་རྒྱུ་ཡིན། ཞེས་བཀོད་ཡོད་འདུག

གསལ་བསྒྲགས་དེར་མུ་མཐུད་བརྗོད་དོན། ཉེ་ཆར་བོད་ནང་གཞི་རྒྱ་ཆེ་བའི་གྱེན་ལངས་བྱུང་རྗེས། རྒྱ་གཞུང་གིས་བོད་ཀྱི་དགོན་སྡེ་ཁག་གི་གྲྭ་བཙུན་དང་། ཞིང་འབྲོག་མི་དམངས། སློབ་ཕྲུག གྲོང་མི། ལས་བྱེད། བཟོ་བ་བཅས་ཀྱི་ཁྲོད་དུ་རྒྱལ་གཅེས་རིང་ལུགས་ཀྱི་སློབ་གསོའི་བྱ་འགུལ་དང་། ལྷག་པར་དུ་བོད་མི་ལས་བྱེད་པར་དམ་དྲག་ཤུགས་ཆེན་བྱེད་ཀྱིན་འདུག ལས་བྱེད་མི་རེ་ངོ་རེར་ཞིབ་བཤེར་བྱས་ཏེ་ཁ་བྲལ་ལ་ངོ་རྒོལ་གྱི་ལངས་ཕྱོགས་གསལ་སྟོན་ཡིན་མིན་དང་། ཁྱིམ་ཚང་གི་འབྲེལ་བ། བསམ་བློའི་འཁྱེར་སྟངས་སོགས་ལའང་དཔྱད་ཞིབ་བྱེད་ཀྱིན་ཡོད། ཀྲུང་གོའི་བོད་ཀྱི་གསར་འགྱུར་དྲ་བའི་སྟེང་། ཕྱི་ཟླ་ ༧ པའི་ཚེས་ ༡༠ ཉིན་གནས་ཚུལ་སྤེལ་བའི་ནང་། ལྷ་ས་གྲོང་ཁྱེར་གྱིས་ཁ་བྲལ་ངོ་རྒོལ་དང་། བརྟན་ལྷིང་སྲུང་སྐྱོབ། འཕེལ་རྒྱས་སྐུལ་འདེད་ཆེད། རྒྱལ་གཅེས་རིང་ལུགས་ཀྱི་སློབ་གསོ་སྤེལ་སྐབས། གྲོང་ཚོ་ ༡༥ ཙམ་ལ་ལེགས་བཅོས་ཟིན་པ་དང་། ཟླ་ ༣ ཚེས་ ༡༤ དོན་རྐྱེན་ནང་ཞུགས་མཁན་ཏང་ཡོན་ ༡༣ ལ་གཏན་འབེབས་གཞིར་བཟུང་ཐག་གཅོད་ཡོད་ཅེས་བཀོད་འདུག ཟླ་ ༤ ཚེས ༢༡ ཉིན་ལྷ་ས་གྲོང་ཁྱེར་གྱི་སྤྱི་ཁྱབ་རྡོ་རྗེ་ཚེ་རིང་གིས། ཐེངས་འདིའི་སློབ་གསོའི་བྱ་འགུལ་ནི། ཏང་ཡོན་ལས་བྱེད་ཀྱི་ཚད་གཞིར་རྟོག་ཞིབ་བྱེད་པ་ཡིན་ཞེས་བརྗོད་འདུག

སྤྱི་ལོ་ ༡༩༩༤ ལོར་རྒྱ་གཞུང་གིས་བཙན་བྱོལ་ནང་སློབ་གཉེར་བྱེད་བཞིན་པའི་ལས་བྱེད་ཀྱི་བུ་ཕྲུག་ཕྱིར་ལོག་དགོས་པའི་ལས་འགུལ་སྤེལ་ཡོད། སྐབས་དེར་སློབ་ཕྲུག་འགའ་རེའི་ཕ་མར་དཀའ་ངལ་འཕྲད་དེ། སློབ་མཚམས་བཞག་སྟེ་ཕྱིར་ལོག་དགོས་བྱུང་ཡོད། རྒྱ་གཞུང་གི་གསལ་བསྒྲགས་ལྟར་ན། ཐེངས་འདིའི་སྒྲིག་ཁྲིམས་ཟླ་ ༩ བའི་ཟླ་དཀྱིལ་ཙམ་ནས་དངོས་སུ་ལག་བསྟར་བྱ་རྒྱུ་དང་། ཟླ་གཉིས་ནང་ཚུད་དུ་བུ་ཕྲུག་དེ་དག་ཕྱིར་ལོག་དགོས་ཤིང་། དུས་བཀག་ལས་ཡོལ་ན། ཕ་མ་རྣམས་ཏང་དང་། ལས་གནས་ནས་ཕྱིར་འཕུད་བྱ་རྒྱུ་ཡིན་པ་མ་ཟད། འཛིན་བཟུང་གི་ཉེན་ཁ་ཡང་ཡོད་སྟབས། ད་ལྟ་ཁོང་ཚོའི་གནས་སྟངས་ཐད་བློ་འཚབ་ཆེན་པོ་ཡོད། དེར་བརྟེན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། རྒྱ་གཞུང་གིས་མངོན་གསལ་འཛེམ་མེད་དུ་བོད་མིའི་ཐོག་དྲག་གནོན་དང་། མནར་གཅོད། དྲང་བདེན་མིན་པའི་ཆད་པ། གང་འདོད་དུ་ལས་གནས་ནས་ཕྱིར་འཕུད། ལྷག་པར་དུ་བོད་མིའི་ལས་བྱེད་པའི་ཐོབ་ཐང་ཁག་ལ་རྡོག་རོལ་དང་གནོད་འཚེ་གཏོང་བ་སོགས་འཕྲལ་དུ་མཚམས་འཇོག་དགོས་པའི་འབོད་སྐུལ་ཤུགས་ཆེན་ཞུ་བཞིན་ཡོད་ཅེས་བཀོད་འདུག