བོད་ཀྱི་ལ་སྒྲོན།

མི་གྲངས་ས་ཡ་བརྒྱ་ ༡༠༠་༠༠༠་༠༠༠་ ཡིས་འཛམ་གླིང་སྟེང་གི་འོད་ཀྱི་ངོ་རྒོལ་ཆེ་ཤོས་དེ་སྤེལ་གྱི་ཡིན་འདུག་ལ། ལས་འགུལ་འདི་ནི་ ༢༠༠༨ ལོའི་ཕྱི་ཟླ་ ༨ ཚེས་ ༧ གྱི་དགོང་མོར་འཁེལ་བར་བྱས་ཡོད་ཅིང་། ལས་འགུལ་གྱི་མིང་ལ་བོད་ཀྱི་ལ་སྒྲོན་ཞེས་བཏགས་ཡོད་པ་རེད།

ལས་འགུལ་འདི་ཐོག་མར་ཨིས་སི་རལ་གྱི་མི་སེར་ད་ཆར་རྒན་ཡོལ་བྱས་ཟིན་པ། སྐུ་ཞབས་ཌེ་ཝི་ཌུ་ ཁ་ལི་ཧྥ་ འབོད་པ་དེའི་གློག་ཀླད་ངོས་ཀྱི་སྤྱི་ཚོགས་འབྲེལ་གཏུགས་དྲ་རྒྱ་ facebook ཞེས་པ་དེའི་སྟེང་ནས་མགོ་འཛུགས་བྱས་ཏེ། རིམ་བཞིན་སྐད་ཡིག་ ༢༥ ནང་ཕབ་སྟེ་དྲ་ཐག་ཆེན་པོ་བརྒྱུད་གླིང་ལྔ་མཚོ་བཞི་བསྐོར་ནས་སྤེལ་གྱི་ཡིན་པ་དང་། ད་བར་དུ་ལས་འགུལ་འདིའི་ཆེད་དུ་མི་ ༥༠༠་༠༠༠ ཡིས་མཚན་རྟགས་བཀོད་ཡོད་འདུག

བོད་ཀྱི་ལ་སྒྲོན་ཞེས་པའི་ལས་འགུལ་སྤེལ་མཁན་རྣམས་ཀྱིས་ས་སྟེང་གི་སྐྱེ་བོ་སུ་ཡིན་རུང་དྲ་ཐོག་དང་གློག་ཀླད་ཀྱི་ནང་བསླེབས་དུས་ངེས་པར་དུ་གློག་ཀླད་ཀྱི་སྐར་ཁུང་དང་དྲ་ངོས་སུ་ཡཱང་ལ་འདི་སྒྲོན་དགོས་པའི་རེ་སྐུལ་བྱེད་ཀྱི་འདུག་ལ། འོད་ཀྱི་ངོ་རྒོལ་འདི་ཨོ་ལིམ་པིག་འཚོགས་པའི་ཉིན་དེར་མི་གྲངས་ཐེར་འབུམ་གྱིས་བརྙན་འཕྲིན་བརྒྱུད་ནས་མཐོང་ཐུབ་པའི་རེ་བ་རྒྱག་གིན་ཡོད་པ་རེད། དེའི་ཕྱི་ཉིན་ནས་བཟུང་མི་ཚང་མས་རང་རང་གི་རྒྱལ་ཁབ་ཀྱི་དབུ་ཁྲིད་དག་གི་མཚན་ཐོག་ལ་ཡི་གེ་ཕུལ་ཏེ། རྒྱལ་ཁབ་འདིའི་ནང་གི་མི་ཇི་འདྲའི་མང་པོ་ཞིག་གིས་བོད་ལ་རང་དབང་ཐོབ་པའི་སྨོན་ལམ་འདེབས་ཀྱིན་པ་དང་། ལས་འགུལ་འདིའི་ནང་ཞུགས་མཁན་ས་སྟེང་གི་སྐྱེ་བོ་ཚང་མས་བོད་ལ་རང་དབང་ཐོབ་པའི་ཆེད་དུ་ལས་དོན་ཅི་རིགས་སྤེལ་གྱི་ཡིན་སྐོར་ཞུ་རྒྱུ་ཡིན་འདུག

ལས་འགུལ་འདི་ཅིའི་ཕྱིར་སྤེལ་ཅེ་ན། འོད་ཀྱི་ངོ་རྒོལ་འདི་ནི་དེང་སྐབས་ཀྱི་གོ་ལ་རང་བཞིན་གྱི་བརྒྱུད་ལམ་འདིའི་ཐོག་ནས་མི་གཅིག་ཡིན་ནའང་རླབས་ཆེ་བའི་བྱ་བཞག་ཅིག་གི་ཆེད་དུ་ལངས་ཐུབ་པ་དང་། ཁོ་སའི་གོ་ལའི་སྟེང་གི་མི་གྲངས་ས་ཡ་མང་པོར་འབྲེལ་ནས་དུས་ཚོད་སྐད་ཅིག་མ་ཞིག་གི་ནང་དུ་དམིགས་ཡུལ་རྐྱང་བ་ཞིག་གི་དོན་དུ་ལས་ཀ་ངེས་ཅན་ཞིག་བྱེད་ཐུབ་པའི་གོ་སྐབས་སྟེར་རྒྱུ་དེ་ཡིན་ལ། རྒྱལ་མཚམས་ཀྱིས་མ་བཅད་པར་མི་སུ་ལའང་བསམ་ཚུལ་ཞིག་གི་སྟེང་འོས་འཕེན་པའི་ནུས་པ་ཡོད་པ་དང་། དེས་རེ་བ་ཞིག་འཁྱེར་ཡོང་བ་དེ་ཡིན་ལ། གཞན་ཡང་ལས་འགུལ་འདིས་མི་སྒེར་སུ་ལའང་རང་ཉིད་ཀྱི་མི་རིགས་དང་ཕོ་མོ། རིགས་རུས། ཆོས་ལུགས་དང་ཆབ་སྲིད་ཀྱི་ལྟ་བ་ཅི་ལའང་མ་ལྟོས་པར། དེ་རིང་གི་དུས་སྐབས་འདིར་ང་ཚོ་ཚང་མ་བསམ་ཚུལ་གཅིག་གི་ཐད་ལྡོག་རྩ་གཅིག་སྒྲིལ་གྱིས་ལངས་ཐུབ་པ་ཡིན་ན། དེ་མངོན་འགྱུར་བྱེད་ཐུབ་པ་བསྟན་ལ། འདི་ནི་ལྷག་པར་དུ་དེང་གི་དབ་ཁྲིད་དག་གིས་ཆ་འཇོག་བྱེད་ཀྱིན་པའི་བསམ་ཤོག་རྩ་ཆེན་དང་གལ་ཆེན་ཞིག་ཡིན། འགྲོ་བ་མིའི་བྱུང་བ་མགོ་བཙུགས་ནས་ད་བར་དུ་ལས་འགུལ་འདི་ལྟ་བུ་ཞིག་སྤེལ་མྱོང་མེད། འདི་ནི་ད་བར་གྱི་ལས་འགུལ་དག་ལ་བལྟས་ནའང་འཚེ་མེད་ཞི་བ་ཡིན་ལ། དེའི་ཁར་དོན་དམ་གྱིས་ཁེ་ལས་མིན་པའི་ལས་འགུལ་ཀྱང་ཡིན་སྟབས་ལས་འགུལ་འདི་སྤེལ་བ་ཡིན་འདུག