གྲྭ་བ་ལོག་རྐྱེན་ལ་རིགས་མ་འདྲ་བ་མང་པོ་ཡོད་ཀྱང་ཁོ་ཚོ་གྲྭ་བ་ལོག་རྗེས་སྤྱི་མཐུན་ལ་ཡོད་པ་གཟན་ཤམ་དམར་པོ་དེ་ཕུད་དེ་སྐྱ་ཆས་སྤྲས་རྒྱུ་དེ་རེད། སྐྱ་ཆས་སྤྲས་རྗེས་ང་ཚོས་ཁོ་ཚོ་ལ་གྲྭ་ལོག་ཞེས་འབོད་ཀྱིན་ཡོད་ཀྱང༌། དོན་དངོས་སུ་ད་དུང་དེ་འདྲའི་གྲས་དེ་གྲྭ་ལོག་ཏུ་གྱུར་མི་འདུག་པ་མ་ཟད་ཐ་ན་ཕྲུ་གུའི་ཨ་ཕ་འགྱུར་ཡང་རུང༌། ཆང་དང་ཐ་མག་སྤྱད་ཀྱང་རུང༌། བུད་མེད་ལ་བསྟེན་ཡང་རུང༌། མཐར་གཏུག་ན་ཁོ་ཚོའི་ནང་སེམས་དེ་གྲྭ་བ་བྱས་མ་ཐུབ་པ་དང་གྲྭ་ལོག་ཀྱང་བྱས་མ་ཐུབ་པ་ཞིག་ཆགས་ཡོད་པ་རེད། དེར་བརྟེན་ང་ཚོས་གྲྭ་མིན་སེར་མིན་དུ་འབོད་པའི་དེང་རབས་ཀྱི་གྲྭ་བ་དེ་ཚོ་དང་གྲྭ་ལོག་གི་བར་ཏུ་ཁྱད་པར་ཆེན་པོ་མེད་ཅེས་བརྗོད་ཆོག
སྤྱིར་བཏང་རྒྱལ་ཁབ་ཞིག་དང་མི་རིགས་ཅིག་ལ་མཚོན་ན་ཚོགས་སྡེའམ་ཡང་ན་ལས་རིགས་མང་པོ་ཞིག་མཉམ་དུ་སྡོམ་པ་ལས་ཚོགས་སྡེ་ཆེན་པོ་གཅིག་ཆགས་ཀྱིན་ཡོད། དེ་ན་བོད་མི་རིགས་ཀྱི་ཁྲོད་ནས་ཚོགས་སྡེ་ཆེན་པོ་གཅིག་ནི་གྲྭ་བའི་དཔུང་སྡེ་རེད། དེ་བཞིན་གྲྭ་མིན་སེར་མིན་གྱི་ཚོགས་སྡེ་འདིས་ཀྱང་བོད་སྤྱི་ཚོགས་ཀྱི་མགོ་བཀའ་ཁྲི་ནས་གཞུང་ཞབས་དང༌། ཚོང་པ་སོགས་བོད་མིའི་ཚོགས་པ་ཞིག་གང་ན་ཡོད་ཚེ་དེ་རུ་མེད་པའི་སྲོལ་མེད་པ་རེད། རྡ་རམ་ས་ལའི་ཉིན་སྲུབ་ཏུ་གྲྭ་ལོག་གིས་ཁེངས་པ་མཐོང་རྗེས་ང་ཚོས་རང་བཞིན་གྱིས་བོད་སྤྱི་ཚོགས་སུ་གྲྭ་ལོག་ཇེ་མང་འགྲོ་བཞིན་པའི་བདེན་པ་གསལ་བོ་རྙེད་ཐུབ། བོད་དུ་མཚོན་ན་གྲྭ་ལོག་ནི་དགོན་པར་མཐའ་མ་འཁྱོངས་བར་ཕྱིར་གྲོང་ལ་ཕེབས་པའི་མི་ལ་ངོས་འཛིན་བྱས་པ་མ་ཟད༌། མིང་གཞན་ལ་བན་ལོག་ཞེས་ཀྱང་འབོད་སྲོལ་ཡོད་པ་དང་བན་ལོག་ལ་མནའ་མ་མི་རག་པའི་གཏམ་དཔེ་ཡང་ཡོད། ཡིན་ན་ཡང་བཙན་བྱོལ་སྤྱི་ཚོགས་སམ་རྡ་སའི་ཉེ་འཁོར་རུ་གྲྭ་བ་ཚོར་མིང་སྙན་པོ་ཞིག་བཏགས་ཡོད་པ་དང༌། གྲྭ་ལོག་དེ་ཚོར་སེམས་པ་ཡག་པོ་ཡོད་པས་བུ་མོ་ལ་མགོ་བསྐོར་མི་གཏོང་ཞེས་པའི་ཁ་རྒྱུན་ཞིག་ཡོད་པ་རེད། སྤྱིར་གྲྭ་ལོག་ཚོར་ཡང་བཟང་ཆ་མེད་པ་མིན་ཏེ་སྟོན་པའི་ན་བཟའ་གཙང་མར་ཕུད་པ་དེ་རེད། ཡིན་ན་ཡང་མི་འདི་དག་ད་དུང་ཡང་གྲྭ་མིན་སེར་མིན་ཡིན་ཏེ་དུས་ནམ་ཡང་གྲྭ་མིན་སེར་མིན་གྱི་དྲ་བ་ལས་བརྒལ་མི་ཐུབ།
སྤྱིར་རྒྱལ་ཁབ་སྐྱོང་མི་ཤེས་པ་དང་སྤྱི་ཚོགས་སྐྱོང་མི་ཤེས་པ། བུད་མེད་གཉེར་མི་ཤེས་པ་སོགས་བོད་མི་རིགས་ཀྱི་སྤྱི་ཚོགས་འདི་རྙི་ཐག་ལྟ་བུའི་ནང་དུ་འཇུག་མཁན་ནི་དེ་རིང་ང་ཚོའི་མིག་མདུན་དང་ཁ་ཐུག་ཏུ་ལངས་པའི་གྲྭ་ལོག་འདི་དག་རེད། ཁོ་ཚོར་གནས་ལུགས་ལ་དཔྱད་པ་གཏོང་བའི་བློ་མིག་དོག་པ་དང༌། འཇིག་རྟེན་ཁྱིམ་པ་བཞིན་འཁོར་བ་སྐྱོང་མི་ཤེས་པ། བྱ་བ་གང་འདྲ་ཞིག་ཡིན་ཡང་ཆོས་དང་འཇིག་རྟེན་མཉམ་དུ་བསྲེས་པ། འཇིག་རྟེན་ལ་ལྟ་ཚུལ་ཡང་དག་མེད་པ་སོགས་ཡོད་འོད་སྣང་ལས་མུན་པའི་ཕྱོགས་སུ་ཁྲིད་འགྲོ་བའི་གྲྭ་མིན་སེར་མིན་གྱི་ཁ་གྲངས་ཀྱིས་ང་ཚོ་མུན་པར་འཇུག་བཞིན་ཡོད།
ཚེ་སྐྱིད།
ཨ་རོ་ཚེ་སྐྱིད་ལགས།
ཁྱེད་རང་གི་སྙིང་ཁུང་ན་གྲ་ལོག་ཞིག་གིས་བཞག་པའི་རྨ་ཁ་ལྗི་མོ་ཞིག་ཡོད་པ་མངོན་དོད་དུ་ཤར་འདུག་ཀྱང་། དེ་འདྲའི་ལྐུགས་རྟགས་ཀྱི་སྡོམ་ཚིག་བཞག་ནས་གྲ་ལོག་ཚང་མར་རྒྱུག་པ་ལེབ་རྡུང་བྱས་ན་ཁྱེད་རང་ལ་རྒྱུས་མངའ་ཅི་ཡང་མེད་པའི་མི་གང་མང་ཞིག་ལའང་དོ་ཕོག་བཏང་བ་མ་རེད་དམ།། ཁྱེད་ཉིད་ཀྱི་སྨྱུག་རྩེ་ཡིས་ཁྱེར་བའི་བརྡ་འཕྲིན་ལ། སྤོབས་པ་དང་སྐུལ་སློང་གི་ཡར་སེམས་ཡོད་ན་རང་ཉིད་ཀྱི་ཤེས་ཡོན་དེའི་དོན་གོ་ཆོད། འོན་ཀྱང་ཞེ་སྡང་དང་འཁོན་སེམས་སློང་བའི་ངུ་སྐད་ཞིག་ཡིན་ན་མ་རིག་གི་ཁ་སྣོན་ཙམ་ལས་ཅི། ཁྱེད་རང་བུ་མོ་ཤེས་ཡོན་ཅན་ཞིག་ཡིན་པས་རང་ཉིད་ཀྱི་ཕྲག་ན་ཡོད་པའི་འོས་འགན་དེ་སྐད་ཅིག་ཅིག་གི་ཉོན་མོངས་ལ་ཞེན་པའི་དབང་ནས་ནག་བསུབ་མི་བྱེད་རོགས།
རེད་ཡ། ངོ་མ་ཁྱོད་ཀྱི་བཤད་པ་ཧ་ཅང་བདེན་མོད་ཀྱི། འོན་ཀྱང་རང་ཡང་གྲ་ལོག་གི་བེད་སྤྱོད་བྱས་པ་དེ་འདིར་མི བཀོད་རྒྱུ་ཅི།
འཇིགས་རྟེན་འདི་ན་ལེགས་ཉེས་ཀྱི་བླང་དོར་ཇི་ཡིན་ཤེས་མཁན་མང་མོད་ཀྱི་ལག་ལེན་དོན་འཁྱོལ་གནང་མཁན་ཤིན་ཏུ་ཉུང་ཉུང་ཡིན་པ་ཡང་ཁྱོད་ཀྱི་མཁྱེན་གསལ་རེད་། དེ་ལྟར་ན་ཁྱོད་ཀྱིས་གྲ་ལོག་ཁོ་ནར་འཁོན་འཛིན་བྱེད་དོན་ཅི།
ས་མཚམས་ནས་ལྷ་མོ་སྐྱིད་ནས།