བྷུ་ཤུས་པེ་ཅིན་ནས་བསྒྲགས་གཏམ་སྤེལ་དགོས་།

ཨོ་ལིམ་པིག་རྩེད་འགྲན་སླེབས་ལ་ཉེ་སྐབས་འདིར་ཨ་རིའི་གྲོས་ཚོགས་ནང་དུ་པེ་ཅིན་ལ་ཁ་གཏད་དེ་གྲོས་གཞི་དོན་ཚན་ ༡༢ ཅན་ཞིག་ངོ་སྤྲོད་གནང་ཡོད་ལ། བོད་དང་ཞིན་ཅང་གི་འགྲོ་བ་མིའི་ཐོབ་ཐང་སྲུང་སྐྱོབ་དང་ཨོ་ལིམ་པིག་རྩེད་འགྲན་གྱི་སྲོལ་རྒྱུན་གྱི་རང་དབང་དང་གུ་ཡངས་རང་བཞིན་རྒྱུན་འཁྱོངས་བྱེད་དགོས་པའི་འབོད་སྐུལ་ཞུས་ཡོད།

གོང་གསལ་གྲོས་གཞི་དེ་ཕྱི་ཟླ་ ༧ ཚེས་ ༢༣ ཉིན་གྲོས་ཚོགས་འོག་མའི་ཕྱི་འབྲེལ་སྲིད་བྱུས་ཀྱི་ལས་དོན་ཚོགས་ཆུང་གི་དམངས་གཙོ་ཚོགས་པའི་ཚོགས་གཙོ་ ཧོ་ཝར་ཌི་ བྷེར་མན་ལགས་ཀྱིས་ངོ་སྤྲོད་གནང་ཡོད། གྲོས་གཞི་འདིའི་སྟེང་མུ་མཐུད་གྲོས་བསྡུར་དང་བཅས་ཕྱི་ཚེས་ ༢༤ ཉིན་གྲོས་ཚོགས་ཁང་དུ་གྲོས་གཞི་འདི་ཚུད་ཀྱི་ཡོད་མེད་ཐད་འོས་འཕེན་གནང་སྲིད་པའི་སྐོར་བརྗོད་ཡོད་པ་རེད།

གྲོས་གཞི་འདིས་པེ་ཅིན་གྱི་མགོ་ཁྲིད་ཚོར་རང་གི་མི་སེར་གྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མཚམས་འཇོག་དང་། བོད་དང་ཡུ་གར་མི་རིགས་ལ་དྲག་པོའི་རྒོལ་རྡུང་བྱེད་ཀྱིན་པ་མཚམས་འཇོག འབར་མ་དང་སུ་ཌན་གཞུང་ལ་རྒྱབ་སྐྱོར་བྱེད་པ་མཚམས་འཇོག་བཅས་དོན་ཚན་ ༡༢ འཁོད་ཡོད་ལ། དོན་ཚན་དེ་དག་གི་གཅིག་ནི། ༢༠༠༨ ལོའི་པེ་ཅིན་གྱི་ཨོ་ལིམ་པིག་རྩེད་འགྲན་དེ་ཁོའི་སྲོལ་རྒྱུན་གྱི་རང་དབང་དང་གུ་ཡངས་རང་བཞིན་ལ་གུས་བརྩི་བྱེད་པའི་ཁོར་ཡུག་ཅིག་ནས་ཚུགས་དགོས་རྒྱུའི་འབོད་སྐུལ་ཞུས་འདུག

གཞན་ཡང་། སྲིད་འཛིན་བྷུ་ཤུ་པེ་ཅིན་དུ་ཨོ་ལིམ་པིག་རྩེད་འགྲན་གྱི་རྟེན་འབྲེལ་མཛད་སྒོར་ཕེབས་ཀྱི་ཡོད་སྟབས། སྐབས་དེར་པེ་ཅིན་ནས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཐད་ཡོངས་ཁྱབ་ཀྱི་བསྒྲགས་གཏམ་ནན་མོ་ཞིག་སྤེལ་དགོས་པ་དང་། རྒྱ་ནག་ནང་གི་སྲིད་དོན་བཙོན་པ་དང་ཁོང་ཚོའི་ནང་མི་ཉེ་འབྲེལ་ལ་མཇལ་འཕྲད་གནང་རྒྱུ། དེས་མི་ཚད། ཁོང་པེ་ཅིན་དུ་ཕེབས་པའི་རིང་། བོད་དང་ཞིན་ཅང་ནང་ལ་ལྟ་སྐོར་བྱེད་དགོས་པའི་འབོད་སྐུལ་ཞུས་ཡོད་པ་རེད།

གྲོས་གཞི་དེའི་ནང་དུ། པེ་ཅིན་གྱི་མགོ་ཁྲིད་ཚོས་༧གོང་ས་མཆོག་དང་མཉམ་དུ་ཐད་ཀར་བཀའ་མོལ་གནང་སྟེ་བོད་ཀྱི་གནད་དོན་འདི་ཐག་གཅོད་དགོས་པའི་སྐོར་ཡང་ཞུས་ཡོད་པ་རེད།