རྒྱ་ནག་གིས་ཁམས་ནང་ཆེན་འབྲོག་ཤོག་ཞང་གི་བོད་རིགས་མང་ཚོགས་ཚོར་ཨོ་ལིམ་པིག་རྩེད་འགྲན་ལ་དགའ་བསུའི་རྣམ་འགྱུར་ཡོད་པའི་སྤྲོ་ཚོགས་ཤིག་འཚོགས་བཅུགས་ཡོད་ནའང༌། བོད་མི་ཚོས་འདི་ལོ་ནི་བོད་མི་རྣམས་ཀྱི་མྱ་ངན་གྱི་ལོ་ཞིག་ཡིན་པ་ལས་སྤྲོ་སྐྱིད་གཏོང་བའི་ལོ་ཞིག་མིན་པའི་ངོས་འཛིན་བྱས་ཏེ་དང་ལེན་བྱས་མི་འདུག
ཟླ་ ༧ པའི་ཚེས་ ༢༦ ཉིན་ཁམས་ནང་ཆེན་འབྲོག་ཤོག་ཞང་དུ་བོད་མི་ཚོས་རྒྱ་ནག་ལ་ཞི་བའི་ངོ་རྒོལ་བྱས་ཡོད་ཅིང༌། དེ་ནི་འདི་ལོ་ཡུལ་ཤུལ་བོད་རིགས་རང་སྐྱོང་ཁུལ་དུ་རྒྱ་ནག་གི་ཚོགས་ཆེན་ཞིག་བསྡུ་སྐབས་ཨོ་ལིམ་པིག་རྩེད་འགྲན་སྐབས་བོད་ཀྱི་ཐུན་མོང་མ་ཡིན་པའི་ཁྱད་ཆོས་ལྡན་པའི་གཞས་ཞབས་བྲོ་འཁྲབ་སྟེ་དགའ་བསུ་བྱེད་དགོས་པའི་བཙན་བཀའ་བཏང་ཐོག ས་གནས་མགོ་འཛིན་ནམ་བོད་རིགས་གུང་ཁྲན་ཏང་ཡོན་པ་ཚེ་མགོན་འབོད་པས་དབྱར་སྐྱིད་རྩེད་འགྲན་ཞེས་པ་འབྲོག་ཤོག་ཞང་དུ་འཚོགས་རྒྱུར་འགན་ལེན་ཆ་ཚང་བྱས་པ་དང༌། དེའི་སྐོར་ཚོགས་ཆེན་ཐོག་ཞུས་ཏེ། རྩེད་འགྲན་ཆེད་རྒྱ་སྒོར་ཁྲི་ ༣༥ བླངས་པ་དང་མི་མང་ལག་ནས་ཀྱང་རྒྱ་སྒོར་མང་བོ་བསྡུ་རུབ་བྱས་ཡོད་པ་མ་ཟད། མགོ་འཛིན་ཚེ་མགོན་ཁོ་རང་ས་གནས་སུ་འབྱོར་རྗེས་ས་གནས་སྡེ་དཔོན་ཚང་མ་བརྗེ་བོ་བརྒྱབས་པ་དང༌། རྩེད་འགྲན་དེའི་སྐོར་མི་མང་ནང་ཁྱབ་བསྒྲགས་ཤུགས་ཆེར་བྱས་པས། གྲྭ་པ་དང་མི་མང་གིས་ལོ་འདིར་གཞིས་ལུས་བོད་མི་ཚོས་རྒྱ་ནག་ལ་ཞི་བའི་ངོ་རྒོལ་བྱེད་སྐབས་རྒྱ་ནག་གིས་དྲག་གནོན་བྱས་ཡོད་སྟབས་རྩེད་འགྲན་དེ་མི་འཚོགས་རྒྱུར་འབོད་སྐུལ་རབ་དང་རིམ་པ་བྱས་ནའང༌། ནང་ཆེན་རྫོང་སྲིད་གཞུང་གིས་རྩེད་འགྲན་འདི་ནི་རྒྱ་ནག་གི་མཐོ་རིམ་མི་སྣ་དང་ཞིང་ཆེན་རིམ་པའི་བཀའ་ཡིན་སྟབས་ངེས་པར་འཚོགས་དགོས་སྐོར་བརྗོད་པ་དང༌། ཞིང་འབྲོག་མང་ཚོགས་ཚོས་དབྱར་རྩྭ་དགུན་འབུ་བརྐོས་ཚར་རྗེས། རྫོང་གི་ལས་བྱེད་མི་སྣས་མི་ཚང་རེ་ནས་མི་རེས་བོད་ཀྱི་ཆས་གོས་སྤྲས་ཏེ་རྩེད་འགྲན་ཐོག་ཡོང་དགོས་པ་དང༌། གལ་སྲིད་ཆས་གོས་སྤྲས་པ་མི་འགྲིག་པ་དང་མ་ཡོང་ཚེ་མི་རེར་རྒྱ་སྒོར་ཆིག་སྟོང་རེའི་དངུལ་ཆད་གཅོད་རྒྱུ་ཡིན་ཞིང༌། མི་ཚང་རེ་ནས་མི་གཅིག་ལས་མང་བ་ཡོང་ན་དགའ་བསུ་ཡོད་སྐོར་བརྗོད་དེ་མགོ་སྐོར་བསླུ་བྲིད་ཀྱི་ཁྱབ་བསྒྲགས་ཤུགས་ཆེར་བྱས་ཡོད་འདུག རྫོང་གི་ལས་བྱེད་མི་སྣས་ཟླ་གཉིས་ཀྱི་སྔོན་ཚུད་ནས་གཞས་ཞབས་བྲོའི་འགྲན་བསྡུར་དང༌། མི་དམངས་དཀྱིལ་དུ་ཆས་གོས་དང་ལང་ཚོ་ངོམས་སོ་བྱེད་མཁན་ཡང་གྲ་སྒྲིག་དགོས་པའི་བཙན་བཀའ་བཏང་ཡོད་འདུག
འབྲོག་ཤོག་ཞང་ཁོངས་སུ་སྡེ་བ་དྲུག་ཡོད་ཅིང༌། སྡེ་བ་རེ་རེ་ནས་ཡོང་བའི་རྩེད་འགྲན་རུ་ཁག་རྣམས་ནང་ཁུལ་ཕན་ཚུན་ལ་འགྲན་བསྡུར་བྱས་ཏེ་ཕུལ་བྱུང་འཁྲབ་སྟོན་པ་རྣམས་པེ་ཅིན་ཨོ་ལིམ་པིག་རྩེད་འགྲན་དུ་དགའ་བསུ་བྱེད་དུ་འགྲོ་དགོས་ཀྱི་ཡོད་འདུག ཟླ་ ༧ ཚེས་ ༢༤ ཉིན་མི་དམངས་ཚང་མ་འཛོམས་དགོས་པའི་བཀའ་བཏང་བར་མི་དམངས་དང་འཁྲབ་སྟོན་པ་རྣམས་ལྷན་འཛོམས་སར། འཁྲབ་སྟོན་པ་རྣམས་ཀྱིས་ཟླ་གཉིས་རིང་གྲ་སྒྲིག་བྱས་པའི་གཞས་ཚིག་ནང་༧གོང་ས་མཆོག་དང་༧རྒྱལ་པ་ཀརྨ་རྣམ་གཉིས་ལ་བསྟོད་ཚིག་དང༌། བོད་ནང་གཞིས་ལུས་སྤུན་ཟླ་མང་བོས་རང་སྲོག་ལ་མ་འཛེམས་པར་ཞི་བའི་ངོ་རྒོལ་བྱེད་སྐབས་འདས་གྲོངས་སུ་སོང་བ་རྣམས་ཀྱི་ཆེད་དུ་མྱ་ངན་གྱི་ཚིག་སོགས་ཡིན་སྟབས། རྫོང་གི་ལས་བྱེད་མི་སྣས་གཞས་ཚིག་དེ་དག་བརྗེ་བསྒྱུར་བྱེད་དགོས་སྐོར་བརྗོད་པས་མི་མང་གིས་ངོས་ལེན་མེད་པའི་རྣམ་འགྱུར་ཤུགས་ཆེར་བསྟན་པ་མ་ཟད། ཚེས་ ༢༦ ཉིན་རང་ལོ་ ༣༡ ཡིན་པའི་ཨ་བཟང་དང༌། རང་ལོ་ ༣༥ ཡིན་པའི་དངོས་བསོད། འཇམ་བཟང་དང་དགའ་རྡོ་ཉི་མ་བཅས་བོད་མི་བཞིས་རྫོང་གི་མགོ་ཁྲིད་དང་མི་དམངས་འཛོམས་སར་སྐད་གསེང་མཐོན་པོས། ད་ལོ་བོད་མི་ཚོར་མཚོན་ན་མི་སྤྱོད་ལས་འདས་པའི་སྡུག་སྦྱོང་མནར་གཅོད་བཏང་ཡོད་པས་སྤྲོ་སྐྱིད་གཏོང་བའི་དུས་ཚོད་མིན་པར་མྱ་ངན་བྱེད་དགོས་པའི་དུས་ཤིག་ཡིན་ལ། བོད་རང་བཙན་དང་༧གོང་ས་མཆོག་བོད་དུ་གདན་འདྲེན་ཞུ་དགོས་ཞེས་སྐད་འབོད་དང་ཡིག་ཆ་འབོར་ཆེན་བཀྲམས་ཤིང༌། མི་མང་རྣམས་ཕྱིར་རང་ཁྱིམ་དུ་ལོགས་དགོས་པའི་རེ་སྐུལ་ཞུས་པར་མི་མང་རྣམས་མ་གྲོས་བསམ་པ་གཅིག་མཐུན་གྱིས་གུར་དང་ཅ་དངོས་བསྡུས་ཏེ་གྲོལ་བར་བརྟེན། ཤུལ་དུ་རྫོང་གི་ལས་བྱེད་མི་སྣའི་གུར་གཅིག་པུ་མ་གཏོགས་ལྷག་མི་འདུག
ཉིན་དེའི་དགོང་མོ་རྫོང་ཉེན་རྟོག་པས་བོད་མི་སྐད་འབོད་བྱེད་མཁན་བཞི་བཟུང་ཡོད་པར་བརྟེན། ཚེས་ ༢༨ ཉིན་མི་མང་གིས་ཁོང་རྣམས་གློད་དགོས་པ་ལས་མུ་མཐུད་བཀག་ཉར་བྱས་ཚེ་འབྲོག་ཤོག་ཞང་གི་བོད་མི་རྣམས་ཕ་བསད་བུར་ཐུག་ཀྱང་ཞི་བའི་ངོ་རྒོལ་ཤུགས་ཆེར་བྱེད་རྒྱུ་ཡིན་ཚུལ་བཀོད་པའི་ཡི་གེ་ཞིག་རྫོང་སྲིད་གཞུང་ལ་ཕུལ་ཡོད་འདུག
