འོད་ཟེར་གྱིས་བརྩམས། གཟུངས་ཕྱུག་སྐྱིད་ཀྱིས་བོད་བསྒྱུར་བྱས། རྡ་ས
དེ་མིན་རང་རིགས་སྤུན་ཟླ་རྣམས་ལ་ཕུལ་བའི་འཕྲིན་ཞེས་པའི་ནང་འདི་ལྟར་བྲིས་ཡོད་དེ། བོད་མི་མང་གི་མཐོང་སྣང་དུ་བྱུང་བའི་རླབས་རྒྱུན་དྲག་པོ་ཞིག་ནི། དོན་དངོས་སུ་བོད་ཀྱི་བདག་པོ་སུ་ཡིན་པ་ངོས་ཟིན་བྱུང་པ་དེ་ཡིན་པས། བོད་ལ་རང་དབང་སྤྲོད་མིན་དེ་རྒྱ་ནག་གཞུང་ཕྱོགས་ཁོ་ནས་ཐག་གཅོད་བྱེད་ཐུབ་པ་ཞིག་གཏན་ནས་མ་རེད། ང་ཚོས་ད་ལྟའི་གནས་བབ་དག་ལ་བལྟས་ཀྱང་བོད་ཀྱི་གཞོན་སྐྱེས་དག་གིས་བདེན་དོན་དབྱེ་འབྱེད་ཐད་རྒྱ་གཞུང་ལ་ཁྲིམས་མཐུན་རང་བཞིན་ཅན་དང༌། གནོན་ཤུགས་ཆེ་བའི་ལས་འགུལ་འདྲ་མིན་སྤེལ་ནས་གནད་དོན་ཐག་གཅོད་བྱེད་པར་འབོད་སྐུལ་མང་དུ་བྱ་རྒྱུ་ཡང་དོན་དངོས་རེད། ད་དུང་རྟོགས་སད་ཀྱི་རླབས་རྒྱུན་དྲག་པོ་འདི་མི་རབས་གཅིག་ལས་གཅིག་གིས་རྒྱུན་མཐུད་དེ་ཇེ་ཆེར་ཡང་འགྲོ་ངེས་པས། བོད་ཀྱི་རང་དབང་མངོན་འགྱུར་ཡོང་བའི་རེ་བ་དེ་ད་ལྟ་ཇེ་ཆེ་ནས་ཇེ་ཆེ་རེད། རྒྱ་ནག་གཞུང་གིས་གནས་ལུགས་འདྲ་མིན་བཀོལ་ནས་རང་གི་བྱས་ཉེས་ཀྱི་ངོ་གདོང་རྫུན་མ་དེ་འགེབས་སྲུང་དང༌། གཞན་ལ་གཞོལ་ཐབས་དུ་མ་བྱེད་པའི་སྣང་ཚུལ་འདི་ཡང་རྒྱལ་སྤྱིའི་སྤྱི་ཚོགས་ཀྱིས་གསལ་བོར་བཟོ་ཐུབ་པ་ཞིག་ཀྱང་མ་རེད། ཡིན་ནའང་མི་རབས་གསར་བའི་བོད་མི་དག་གིས་ཁོ་ཚོའི་གནས་ལུགས་དེར་ངོས་ལེན་རྩ་བ་ནས་མི་བྱེད་པ་མ་ཟད། བོད་མི་རེ་རེའི་ངོས་ནས་ཕན་ཚུན་བར་ལ་བསམ་ཚུལ་བརྗེ་རེས་དང་གླེང་སློང་མང་དུ་བྱས་པ་བརྒྱུད་ནས། ནམ་ཞིག་རྒྱ་ནག་གཞུང་གི་གདོང་འབག་རྫུན་མ་གསལ་བོར་ཕྱི་སྲིད། དེ་བཞིན་བོད་ཀྱི་གནད་དོན་ནི། བོད་མི་རེ་རེས་སྒེར་ངོས་ཀྱི་དོན་དག་ཞིག་གི་ཚུལ་དུ་བཟུང་ནས་བསྒྲུབ་དགོས་ལ། ཐ་ན་ཕྱུགས་འཚོ་བའི་རྫི་བོ་དང་རླངས་འཁོར་ཁ་ལོ་བ་ཚུན་ཆད་ཀྱིས་ཕན་ཚུན་བར་ལ་གླེང་སློང་དང་འབྲེལ་འདྲིས་མང་པོ་བྱས་ནས། བོད་མི་ཡོད་ཚད་མཐུན་སྒྲིལ་གྱི་ལག་རྡང་གཅིག་ཏུ་སྦྲེལ་དགོས་པའི་སྐུལ་མ་གཏོང་བཞིན་ཡོད། འདི་ལྟར་ཕན་ཚུན་ལ་རྒྱུས་ལོན་སྐུལ་འདེད་བྱས་ནས་བོད་ཀྱི་སྤྱི་ཚོགས་ནང་ཁུལ་ལ་འགྲིག་མཐུན་ཡོང་བ་བྱ་རྒྱུ་ནི། བོད་མི་སུ་འདྲ་ཞིག་ཡིན་ཡང་སེམས་སུ་དམ་པོར་འཛིན་འོས། དེ་བས་ང་ཚོ་སྐྲག་མི་དགོས་ལ། མིག་ཆུ་དེ་བས་ཀྱང་མི་དགོས། ང་ཚོ་ནམ་ཡང་རྒྱལ་ངེས་ཡིན། སྙིང་ཉེ་བའི་གངས་ལྗོངས་མི་མང་རྣམ་པ། བདག་གི་ཤ་ཁྲག་གིས་སྦྲེལ་བའི་ཡུལ་མི་སྤུན་ཟླ་རྣམ་པ། ང་ཚོས་མུ་མཐུད་དུ་རྒྱུན་འཁྱོངས་བྱོས་དང༌། ང་ཚོར་འོད་སྟོང་འཕྲོ་བའི་མདུན་ལམ་ཞིག་ཅིས་ཀྱང་ཡོད་ངེས། ཁྱེད་ཚོས་ཨེ་ཤེས། གསུམ་པའི་ཚེས་བཅུ་ནི་ཅི་ཞིག་གི་ཉིན་མོ་རེད། དེ་ནི་བོད་ཀྱི་རང་དབང་བསུ་བའི་ཉིན་མོ་རེད། དམིགས་བསལ་གྱི་ཉིན་མོ་འདི་ནི་བོད་མི་ཁྲི་ཁྲི་འབུམ་འབུམ་མང་པོས་སེམས་སུ་འཛིན་རོགས་གནང༌། གནས་སྐབས་སུ་ང་ཚོ་ཕམ་སྲིད་ཀྱང༌། ཕམ་ཁའི་རྗེས་ན་རྒྱལ་ཁ་ཡང་ཡོད་པའི་གནས་ལུགས་ཤེས་དགོས།
ང་ཚོའི་ཁྲག་རྩའི་སྦུབས་སུ་རྒྱུན་གཅིག་པའི་ཁྲག་གི་འཁོར་བསྐྱོད་ཅིག་འཕར་ལྡིང་བྱེད་བཞིན་ཡོད་ལ། ང་ཚོའི་ཤ་རུས་ཀྱི་བར་གསེང་རེ་ན་རྒུད་བཞིན་པའི་རིགས་རྒྱུད་ཅིག་གི་ལ་རྒྱའི་རུས་རྐང་ཡང་བསྐྱར་གསོ་བཞིན་ཡོད། ང་ཚོས་རྣམ་ཤེས་ཀྱི་ཟབ་ས་ཞིག་ནས། ཉམས་བཞིན་པའི་མི་རིགས་ཤིག་གི་ཁྱིམ་གཞི་སྲུང་དགོས། འདི་དག་ཡོད་ཚད་ཀྱིས་ད་གཟོད་ང་ཚོའི་ས་གཞི་ཆེན་པོ་འོད་དུ་སྦར་སྲིད། གནམ་རྒན་མས་ཀྱང་ང་ཚོའི་ཆེད་དུ་བདེན་དཔང་འབྱེད་ངེས། དཀོན་མཆོག་གིས་ཀྱང་ང་ཚོའི་ཆེད་དུ་སྨོན་ལམ་འདེབས་ངེས། ང་ཚོས་འདི་ལྟར། ང་ཚོ་དང་མིའི་རིགས་ཀྱི་ཆེད་དུ་འཐབ་རྩོད་བྱེད་དགོས།
སྒྲོལ་མ་སྐྱབས་ཀྱི་རྩོམ་ཡིག་དེ་དག་ལ་བལྟས་ན། ང་ཚོའི་གྲས་ཀྱི་ཡིག་རིགས་གཅིག་གམ་ཡང་ན་དེ་ལས་མང་བའི་ཡིག་རིགས་འདྲ་མིན་ཤེས་པའི་རྩོམ་པ་པོ་ཡོད་ཚད་ཁོ་ལ་ངོ་གནོང་དགོས་པའི་གསལ་བརྡ་ཞིག་བཏང་བ་རེད་ལ། ད་དུང་ཁོང་ལ་གུས་ཕྱག་ཞུ་འོས་པའི་གནས་ལུགས་ཀྱང་བསྟན་པ་རེད། ངས་<<ལྷིང་འཇགས་མེད་པའི་རི་བོ་ཧི་མ་ལ་ཡ>>ཞེས་པའི་རྩོམ་དེབ་དེ་ཀློག་ཚར་རྗེས། བདག་ལ་ཚད་མེད་པའི་སྒུལ་ཤུགས་དང་སེམས་འགུལ་མང་པོ་ཐེབས་བྱུང༌། མིག་སྔར་ཁོང་ལ་ཁྱབ་བསྒྲགས་བྱས་ཟིན་པའི་འདྲ་པར་རེ་གཉིས་ལས་མེད་ཀྱང༌། དཔང་ཡིག་སྟེང་གི་འདྲ་པར་དེར་ལྟ་དུས། ཁོའི་འཛུམ་མདངས་ཀྱིས་ཁེངས་པའི་བཞིན་རས་དེ་ནི་ཇི་འདྲའི་དྭངས་ཤིང་གཙང་བ་ཞིག་རེད་ཨང༌། སྐམ་ཅིང་རིད་པའི་འགྲམ་རུས་གཉིས། དཀྱུས་རིང་བའི་མིག་ཟུང༌། གནག་ཅིང་སུ་ལུར་འཁྱིལ་པའི་སྐྲ་ལོ། ཆེས་སྤྱིར་བཏང་གི་གོན་ཆོས། ད་དུང་སྐེ་ལ་བཏགས་པའི་སྲུང་མདུད་དེ་ཡང་སྟོད་གོས་ཀྱི་གོང་ཁ་ནས་གསལ་བོར་མཐོང་ཐུབ། དེ་ནི་ཕལ་ཆེར་༧གོང་ས་རྒྱལ་བ་རིན་པོ་ཆེས་བྱིན་རླབས་ཞུགས་ཡོད་པའི་སྲུང་མདུད་ཞིག་ཡིན་ཡང་སྲིད། གལ་ཏེ་ང་རང་ལ་ཁོང་ལ་མཇལ་བའི་གོ་སྐབས་ཤིག་བྱུང་ཚེ། ངས་རང་ཉིད་ཀྱི་མགོ་བོ་ཐུར་དུ་བཀུག་ནས་ཁོང་ལ་གུས་འདུད་ཞུ་ངེས། རྒྱུ་མཚན་ནི་སྒྲོལ་མ་སྐྱབས་ནི་བོད་ཀྱི་གཞུང་ཆེན་བསྟན་བཅོས་དག་གི་ནང་ན་བསྟོད་པ་མཛད་འདུག་པའི་སེམས་དཔའ་ངོ་མ་ཞིག་སྟེ། ཡིག་འབྲི་རེ་རེ་ལས་ཁོང་གི་གཡོ་བ་མེད་པའི་ཞི་དྲག་གཉིས་ཀྱི་ཆ་རེས་མོས་སུ་འཁོར་བའི་བསམ་བློའི་རིན་ཐང་མངོན་ལ། རང་ཉིད་རང་ཉིད་ཀྱིས་སྐྱོབ་དགོས་པའི་གནས་ལུགས་དང་སྤོབས་པས་ཀྱང་ཁེངས་འདུག ཁོ་གཅིག་པུས་འདི་ལྟར་བྲིས་ཤིང༌། གཅིག་པུ་འདི་ལྟར་སོང་བ་རེད། ད་དུང་བཙོན་ཁང་དུ་ཡང་ཁོ་གཅིག་པུ་འདི་ལྟར་བསྡད་ཡོད་པ་རེད། ད་བར་དུ་གཞིས་ལུས་བོད་མི་སུ་འདྲ་ཞིག་གིས་ཀྱང་དབང་བསྒྱུར་པ་ཞེས་པའི་ཐ་སྙད་འདི་དག་བཀོལ་ཏེ། བོད་ཀྱི་ལོ་རྒྱུས་དང་ད་ལྟ། ལྷག་པར་དུ་དངོས་ཡོད་འཚོ་བའི་ཕྱོགས་ཡོངས་ནས་བལྟས་ཏེ། ང་ཚོར་གཞན་གྱི་དབང་བསྒྱུར་བྱས་པའི་བརྒྱུད་རིམ་དང༌། དེ་ལས་ཇི་ལྟར་གཞོལ་དགོས་པའི་ཐབས་ལམ་ཞིག་གསལ་བརྗོད་བྱེད་ཐུབ་མེད། འདི་ལྟ་བུའི་ཛ་དྲག་གི་དུས་སྐབས་སུ། ང་ཚོའི་ཤེས་ཡོན་པ་ཚོས་གང་ཡང་འབྲི་མི་ཕོད་ལ། ཅི་ཡང་བཤད་མ་ནུས་ན་དེ་ནི་དོན་དངོས་དང་མཐུན་ནམ། ཐ་ན་མི་ཚེའི་ཉམས་མྱོང་ཁྲོད་བརྗེད་དུ་མེད་པའི་ཟིན་ཐོ་ཙམ་ཡང་འགོད་མ་ཐུབ་ན། དེ་ནི་རྩོམ་པ་པོ་ཟེར་བའི་རླབས་ཆེ་བའི་མིང་དོན་དང་འགལ་མེད་དམ།
འདི་ལྟར་དྲང་བདེན་གྱི་སྨྲ་བརྗོད་ཙམ་ལ་བརྟེན་ནས་ཁྲིམས་ཆད་བཅད་པའི་སྒྲོལ་མ་སྐྱབས་ད་ལྟ་གང་དུ་ཡོད་དམ། ལ་ལས་བཤད་ན་ད་དུང་ལྷ་སའི་ཉེ་འཁོར་གྱི་བཙོན་ཁང་དེ་ན་ཡོད་ཟེར། ཡང་ལ་ལས་བཤད་ན་མཚོ་སྔོན་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་བརྗེ་འདུག་ཟེར། ཡིན་ནའང་ཁོང་བཙོན་འཇུག་བྱས་པའི་གནས་ཚུལ་དང་བརྒྱུད་རིམ་ཆ་ཚང༌། འགལ་རྐྱེན་མང་པོ་ཞིག་གི་གཏིང་རིམ་བརྟོལ་ནས་ཕྱི་ཕྱོགས་ནས་ཤེས་རྟོགས་བྱུང་རྗེས། རྒྱ་ནག་གཞུང་གིས་ད་དུང་འཛེམ་དོགས་མེད་པར་འདི་ལྟར་བཤད་ཀྱིན་ཡོད། སྒྲོལ་མ་སྐྱབས་ཟེར་བའི་ཨ་མདོའི་བོད་མི་ཞིག་དེ་སྔ་ཁོ་ཚོས་འཛིན་མྱོང་མེད་ཚུལ་དང༌། ཀན་སུའུ་ཞིང་ཆེན་གྱི་བཙོན་ཁང་ཞིག་ཏུ་མིང་ལ་སྒྲོལ་མ་སྐྱབས་ཟེར་བའི་ཉེས་ཅན་ཞིག་ཡོད་ཀྱང་དེ་ནི་རྐུན་མ་ཞིག་ཡིན་ཚུལ་གྱི་ཁུངས་ལུང་མེད་པའི་རྫུན་གཏམ་མང་པོ་ཞིག་སྒྲོག་དང་བསྒྲགས་བཞིན་ཡོད།
