གཅིག་གྱུར་ཆེན་པོ་གཉིས།

ང་ནི་གོ་རིམ་གྱི་འགོ་འཛུགས་ས་དང་མཇུག་སྡུད་ས་གཉིས་ཀ་བྱེ་བྲག་ཡིན་པའི་ལྟ་སྟངས་ལ་མོས་མཐུན་ཡོད་མཁན་ཞིག་ཡིན་ལ། བོད་པ་སུ་ཡིན་རུང་བོད་ཀྱི་མ་འོངས་པའི་ཐད་རང་ཉིད་ལ་ལྟ་སྟངས་ཁེར་ཚུགས་ཅན་ཡོད་ཆོག་ལ། ཐབས་ལམ་དང་འཆར་གཞི་བྱེ་བྲག་པ་ཡོད་ཆོག་པའི་ཡིད་ཆེས་བྱེད་ཀྱི་ཡོད། འོན་ཀྱང་མ་མཐའ་ཡང་ང་ཚོ་གནད་དོན་འདི་དག་ལ་བསམ་བློ་གཏོང་ཁུལ་བྱེད་མཁན་ཞིག་ཡིན་པའི་ཆ་ནས་སྐད་ཆ་དྲང་མོ་ཙམ་བཤད་ཐུབ་དགོས་ཀྱི་འདུག རང་ཉིད་དང་བགྲོ་གླེང་གི་ཁོར་ཡུག་གཉིས་ལ་བསམ་བློ་གཏོང་དགོས་ཀྱི་འདུག དྲང་མོ་བཤད་ན་དེང་གི་ཟམ་གདོང་དང་རྒྱ་རི་སོགས་ཀྱིས་༸གོང་ས་མཆོག་གི་དགོངས་གཞི་དང་མི་མཐུན་པ་ཞིག་དང་དབུ་མའི་ལམ་གྱི་སྲིད་བྱུས་དང་མི་མཐུན་པ་ཞིག་བྱེད་ཀྱི་ཡོད་པའི་ངེས་ཤེས་དང་དཔང་རྟགས་གསལ་པོ་ཡོད་ན་གསལ་འདོན་བྱེད་དགོས་པ་རེད། དེ་མིན་ཁོང་ཚོ་ནི་གཞུང་གི་མགྲིན་ཚབ་པ་ཙམ་དང་༸གོང་ས་མཆོག་གི་རྗེས་འཇུག་ཙམ་རེད། དེ་ཙམ་གྱིས་མ་འགྲིག་པ་ཡིན་ན་སྐྱོན་བརྗོད་བྱེད་སྟངས་གཞན་ཞིག་དགོས་ཀྱི་རེད། དེ་བཞིན་དུ་བོད་ཀྱི་གནད་དོན་ལ་བསམ་བློ་གཏོང་སྐབས་བོད་ནང་གི་གནས་སྟངས་དང་ཁོང་ཚོའི་དངོས་ཡོད་ཀྱི་བདེ་སྡུག་གཞི་རྩར་འཛིན་དགོས་པ་རེད། ང་ཚོ་ནི་མ་མཐའ་སྲོག་ཉེན་མེད་ས་ན་ཡོད་པ་རེད། ང་ཚོ་བཙོན་ཁང་གི་ཕྱི་ལོག་ན་ཡོད་པ་རེད། དེའི་ཕྱིར་དཔའ་ཉམས་དང་རང་ཚུགས་ལ་རྒྱ་དང་ཞེ་འཁོན་སོགས་དྲན་ཐུབ་ནི་རེད། འོན་ཀྱང་ང་ཚོ་ལ་འདི་དག་ཡོད་ཙམ་གྱིས་འཛམ་གླིངདང་རྒྱ་ནག་སྒུལ་ཐུབ་ཀྱི་རེད་དམ། བོད་ནང་གི་སྡུག་བསྔལ་སེལ་ཐུབ་ཀྱི་རེད་དམ། ངས་བསམ་ན་སྟོབས་ཤུགས་ཐམས་ཅད་ཀྱི་སྟོབས་ཤུགས་ནི་ཐབས་ཤེས་ཀྱི་སྟོབས་ཤུགས་རེད། གལ་ཏེ་ཁྱེད་ཀྱིས་ཁྱེད་རང་གཅིག་བུའི་མ་འོངས་པར་ཅི་ཞིག་བྱེད་རྒྱུ་ཡིན་མིན་བཤད་བཞིན་ཡོད་ན་དེ་ང་ཚོས་མཉམ་གླེང་བྱེད་དགོས་དོན་མི་འདུག

བཙན་གྱིས་བསྒྱུར་དུ་མེད་པའི་ཀླད་གྱོང་གི་བུ་ང་།།
བློ་རིག་དཔའ་རྩལ་དར་བའི་ཕ་བཟང་གི་བུ་ཡིན།།
ཤི་ཡང་རྒྱ་མི་དམར་པོའི་རྩ་ཁྲིམས་ཀྱི་འོག་ཏུ།།
སུ་ཡིས་བསྐུལ་ཀྱང་མི་འགྲོ་རང་ཐག་དེ་བཅད་ཡིན།།

རྩ་ཕྲན་དྲུག་བརྒྱའི་སྦུབས་ན་ལྷོག་ལྷོག་ཏུ་བཞུར་བའི།།
འབྲི་མོའི་འོ་མའི་བསྐྱེད་པའི་འབྲོག་ཕྲུག་གི་ཁྲག་འདི།།
འབུ་བཟན་རྒྱ་ཡི་མི་དང་བསྲེས་འདོད་དེ་མེད་པས་།།
སྡུག་ཀྱང་ས་མཐའ་ཞིག་ནས་འཆི་བ་རང་དགའ་འོ།།

ཟམ་གདོང་རྒྱ་རི་སོགས་ཀྱིས་རྒྱ་དར་དེ་འཕྱར་ནས་།།
རྒྱ་ས་པེ་ཅིན་ཕྱོགས་ལ་ནམ་ཞིག་ཏུ་ཕེབས་ཀྱང།།
བདག་མེད་བུ་ལྡོམ་ང་ལ་ཕྲག་དོག་ནི་མེད་ཀྱང།།
ཚེ་འདིར་གཞུང་དང་ཕྱི་མའི་མགོན་སྐྱབས་ཀྱང་མི་དགོས།།

གས་ཆགས་ཏུ་བཏང་བའི་སྙིང་ནད་པ་འདི་དང་། ཐོར་ཞིག་ཏུ་སོང་བའི་ངའི་ཀླད་ཞོ་རྙོག་མ་འདིས་མི་རིགས་ཀྱི་ལ་རྒྱ་འཛིན་རྒྱུའི་ནུས་པ་ཤོར་ཚར་བས་ད་ནས་གང་ཡང་གླེང་འདོད་མེད། འོན་ཀྱང་བཤད་འདོད་པ་ཞིག་ལ། ང་སྲོག་ལ་ཐུག་ཀྱང་རྒྱ་ནག་གི་རྩ་ཁྲིམས་འོག་སླར་ཡང་ལོག་མི་སྲིད།
ཟམ་གདོང་དང་རྒྱ་རི་སོགས་ལ་རྒྱ་ནག་གི་རྩ་ཁྲིམས་ནང་ཡོད་པ་དེ་དང་རིག་གཞུང་རང་སྐྱོང་གཉིས་ཐོབ་ནས་ཕ་ཡུལ་དུ་ལོག་འགྲོ་དུས། ངས་ཕྱི་རྒྱལ་གྱི་སྲང་མདོ་ཞིག་ནས་ལྟད་མོ་ལྟ་ཆོག

དེ་རིང་གི་ཉི་མ་མ་ཤར་བར་དུ་ང་ལ་དད་པ་བྱེད་ས་དང་ཡིད་ཆེས་བྱེད་ས། མགོན་སྐྱབས་བཅོལ་ས་དང་སྐྱིད་སྡུག་བཤད་སའི་མགོན་སྐྱབས་སྲིད་ན་འགྲན་ཟླ་བྲལ་ཞིག་ཡོད་བསམ་ནས་སྤོབས་པ་རི་འདྲ་དང་ཡིད་ཆེས་མཚོ་ལས་ཟབ་པ་ཡོད། ད་ཇི་ལྟར་མི་ཚེ་བསྐྱལ་དགོས་སམ། རྨོངས་དད་ཀྱིས་གང་ཡང་མི་ཕན། སེམས་པ་མི་བདེ་བ་ཆགས་འདུག་པས་འདི་ལྷག་འབྲི་མི་ཐུབ་པ་ཆགས་་་་་་་་་་་་་་་་་་་་་་་་

ད་གསུངས་རྒྱུ་རིག་གཞུང་རང་སྐྱོང་ཟེར་བ་དང་། རྩོད་རྒྱུ་རྒྱ་ནག་གི་རྩ་ཁྲིམས་ནང་ཡོད་པ་ཞེས་པ་ཞིག་ལས། ཆོལ་གསུམ་གཅིག་ཏུ་སྒྲིལ་བ་ཞེས་ཚིག་ཆེན་པོ་དེ་འདྲ་གསུངས་རྒྱུའི་བློ་ཁོག་མེད་པ་ཆགས་པ་འདྲ་བོ་འདུག བོད་རྒྱ་ནག་དང་ཁ་བྲལ་བྱེད་དགོས་ཤེར་མི་ཕོད་པ་གང་ཡིན་ནམ། དད་་ཡུལ་ལ་འགྱུར་ལྡོག་མང་བ་དེ་ཚོད་ཀྱིས་དད་མཁན་གྱི་དད་པའང་འགྱུར་བ་ཡོང་སྲིད་པ་ཞིག་རེད།

༸གོང་ས་མཆོག་གིས་བོད་ཀྱི་གནད་དོན་འདི་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ཆེན་པོ་ཞིག་གི་འོག་ནས་བྱུང་བ་དང་འདི་ཉིད་ཐག་གཅོད་ཀྱང་རྒྱལ་སྤྱིའི་ཆབ་སྲིད་འགྱུར་འགྲོས་ཀྱི་རྒྱབ་ལྗོངས་དང་མཐུན་པར་བྱེད་དགོས་པ་དེ་དུས་རབས་སྔོན་མའི་དུས་དཀྱིལ་ནས་དཔྱོད་དཔག་གིས་ལམ་སྟོན་དང་འཆར་སྣང་གི་དགོངས་ཚུལ་བཏོན་ཡོད་ལ། རྒྱང་བཀྱེད་ནས་བལྟས་ན་དབུ་མའི་ལམ་གྱི་སྲིད་བྱུས་ལ་དེ་ལྟ་བུའི་དུས་རབས་ཀྱི་རྒྱབ་ལྗོངས་ཡོད་པ་རེད། འོན་ཀྱང་༸གོང་ས་མཆོག་གིས་དགོངས་པ་བཞེས་ཕྱོགས་དང་དབུ་མའི་ལམ་གྱི་སྲིད་བྱུས་རང་སྟེང་ནས་བཤད་ན་དེའི་ཆེ་བ་རྒྱས་བཤད་བྱེད་རྒྱུ་ལས་ཀྱང༌། དེ་ཉིད་འགལ་ཟླ་འདུམ་འགྲིག་གི་ལམ་ནས་སེལ་ཐུབ་པའི་ལག་ལེན་གྱི་རང་བཞིན་ལྡན་པའི་ཐོག་མའི་ཡིད་ཆེས་དེ་མངོན་གྱུར་ཡོང་ཐབས་ལ་འབད་པ་བྱས་ཡོད་པ་རེད། དབུ་མའི་ལམ་གྱི་སྲིད་བྱུས་དེ་རྒྱལ་སྤྱིའི་འགལ་རྩོད་སེལ་ཕྱོགས་ཀྱི་༸གོང་ས་མཆོག་གི་སྤྱིར་བཏང་གི་དགོངས་པ་ལས་བྱུང་ཡང་ཆེད་དམིགས་ཀྱི་ཆ་ནས་དེ་ཉིད་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་ཞིག་ཡིན་ལ། སྲིད་བྱུས་འདི་༸གོང་ས་མཆོག་གི་དགོངས་གཞི་ཙམ་ལས་བོད་གཞུང་གི་ཁྲིམས་ཐོག་ནས་གཏན་འབེབས་བྱས་པའི་སྲིད་བྱུས་ཤིག་ཏུ་མ་གྱུར་བའི་ཡར་སྔོན་དེར་༸གོང་ས་མཆོག་གིས་བོད་ཀྱི་རྩ་དོན་ནི་བོད་མི་ས་ཡ་དྲུག་གི་བདེ་སྐྱིད་ཀྱི་ཆེད་ཡིན་ཞེས་བོད་ཀྱི་རྩ་དོན་དེ་བོད་མིའི་བདེ་སྐྱིད་ཀྱི་ཆེད་ཅེས་པར་ངོས་འཛིན་གནང་མྱོང་ཡོད། ཉེ་བའི་ཆར་༸གོང་ས་མཆོག་གིས་བོད་མིའི་སྡུག་བསྔལ་སེལ་ཆེད་ཅེས་པའི་ཚིག་འདི་བེད་སྤྱོད་གནང་གི་འདུག་ཅིང༌། དམིགས་བསལ་སྐུ་ཚབས་རྒྱ་རི་བློ་གྲོས་རྒྱལ་མཚན་ལ་༸གོང་ས་མཆོག་གིས་བཀའ་མངགས་ནན་པོ་བྱས་པའི་སྙིང་དོན་ཡང་བོད་མིའི་སྡུག་བསྔལ་སེལ་བའི་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་རེད། ༸གོང་ས་མཆོག་གིས་བོད་མིའི་བདེ་སྐྱིད་ཀྱི་ཆེད་ཅེས་པ་ནས་འགོ་བརྩམས་ཏེ་བོད་ཀྱི་གནད་དོན་ཐག་གཅོད་བྱེད་པའི་ཐབས་ལམ་དང་ཇུས་གཞི་གསལ་འདོན་གནང་བའི་གནས་ཚུལ་དེ་དཔེ་མཚོན་དུ་བཞག་ནས་ད་ལྟ་བོད་མིའི་སྡུག་བསྔལ་སེལ་ཆེད་དུ་ཐབས་ཤེས་ག་རེ་ཡིན་ནའང་བྱེད་དགོས་ཞེས་པ་དེ་ཁོང་གི་དགོངས་པ་དང་ཐབས་ཇུས་ལ་རྩ་བའི་ཆ་ནས་འགྱུར་ལྡོག་ཅིག་འགྲོ་བཞིན་པ་དང༌། བདེ་སྐྱིད་བསྒྲུབ་ཆེད་དང་སྡུག་བསྔལ་སེལ་ཆེད་དུ་ཞེས་པ་གཉིས་ལ་ཁྱད་པར་ཆེན་པོ་ཞིག་ཡོད་པ་ཡང་ངས་ངོས་འཛིན་བྱེད་ཀྱི་མེད། ཡིན་ནའང་བོད་མི་རིགས་འདི་གསོན་གནས་ཡོང་བ་ལ་ཕན་པའི་ཆེས་མཐའ་མཇུག་གི་གོ་སྐབས་ཀྱི་ཆེད་དུ་ཁོང་གིས་ག་རེ་ཡིན་ནའང་གནང་གི་རེད། ཁོང་ནི་ཐབས་ཤེས་དང་གདམ་ག་གཅིག་གིས་ནུས་པ་མ་ཐོན་པ་མངོན་གསལ་དུ་གྱུར་རུང་རང་ཉིད་ཀྱི་ལ་རྒྱ་སྲུང་སྐྱོབས་ཀྱི་ཆེད་དུ་གདམ་ག་གསར་བ་དང་ལེན་བྱེད་མི་ནུས་མཁན་དེ་འདྲ་གཏན་ནས་མ་རེད། དེང་སང་གི་བོད་ཀྱི་གནས་བབ་ལ་བསམ་ན་ང་ཚོས་ལ་རྒྱ་ལས་ཀྱང་དོན་དངོས་ལ་མཐོང་ཆེན་བྱེད་དགོས་པ་ཧ་ཅང་གལ་ཆེན་པོ་རེད། དོན་དམ་པའི་ང་ཚོ་ལ་ལ་རྒྱ་ཞིག་ཡོད་ན་ང་ཚོའི་གཞན་དང་གཞན་ལ་ངོ་རྒོལ་བྱེད་རྒྱུ་ལས་ཀྱང་རང་དང་རང་རིགས་དར་སྤེལ་གཏོང་བའི་གོ་སྐབས་དང་ཐབས་ལམ་ལ་བསམ་བློ་གཏོང་རན་རེད། ང་ཚོའི་རང་གི་རིགས་ལ་རུས་གཏིང་ནས་ཞེན་པ་ཡོད་པ་དེ་ཉིད་ང་ཚོར་གདུག་རྩུབ་ཀྱིས་མནར་གཅོད་དང་བཙན་གནོན་བྱེད་མཁན་ལ་མི་དགའ་བའི་རྒྱུ་མཚན་གྱིས་མིན་པར་རང་དང་རང་རིགས་ལ་དུང་ཞེན་ཡོད་པའི་རྒྱུ་མཚན་གྱིས་ཡིན་པ་དེ་ཡང་ཤེས་དགོས་ཀྱི་འདུག མཚམས་མཚམས་སུ་ང་ཚོ་ཡང་བཙན་གནོད་བྱེད་མཁན་དག་དང་འདྲ་བར་ཚོར་སྣང་གི་ཤུགས་ཀྱིས་རྣམ་དཔྱོད་ཉམས་བཞིན་པའི་རྣམ་འགྱུར་ཅན་དུ་འགྱུར་བཞིན་འདུག ངས་སྐད་ཆ་ཆེན་པོ་བཤད་གི་མ་བསམ་རོགས། འོན་ཀྱང་ལྷོད་ལ་བབ་ཏེ་བསམ་གཞིགས་བྱེད་སྐབས་ང་ཚོའི་འཐབ་རྩོད་ནི་རང་ཉིད་ཀྱི་ཐོབ་ཐང་བསྐྱར་གསོ་དང་འོས་འགན་ལེགས་བསྒྲུབ་ཀྱི་གོ་སྐབས་ཀྱི་ཆེད་ཡིན་པ་ལས་གང་ཞིག་རྩ་རྫོགས་དང་སུ་ཞིག་ལ་ཁ་གཏད་ཀྱི་ཆེད་དུ་མ་རེད། འདི་༸གོང་ས་མཆོག་གི་དགོངས་པ་རེད། ང་ཚོའི་རྩ་དོན་རེད། དེ་བཞིན་དུ་དབུ་མའི་ལམ་གྱི་སྲིད་བྱུས་ནི་བོད་དོན་ཐག་གཅོད་བྱེད་པའི་ཐབས་ལམ་ཡིན་པའི་ཆ་ནས་འདི་ལ་གོ་རིམ་ཞིག་ངེས་པར་དུ་དགོས་ཀྱི་རེད། ཚོད་ལྟ་ཞིག་ཀྱང་དགོས་ཀྱི་རེད། ཚོད་ལྟ་དང་གོ་རིམ་དེ་དག་གི་བརྒྱུད་རིམ་ནང་ང་ཚོ་ལ་ངང་རྒྱུད་རིང་པོའི་གཤིས་ཀ་ཞིག་ངེས་པར་དུ་དགོས་ཀྱི་རེད་ལ། བོད་མི་རིགས་ཀྱི་མཐའ་མཇུག་གི་ཚེ་སྲོག་ལ་ཐུག་པའི་གནད་འགག་གི་དུས་སྐབས་ཤིག་ཡིན་པའི་ཆ་ནས་ང་ཚོས་གནད་དོན་འདི་ཚོར་སྣང་གི་དབང་དུ་གཏོང་གཏན་ནས་ཉན་གྱི་མ་རེད། ཆབ་སྲིད་ཀྱི་དབུ་ཁྲིད་ལ་ཆོར་སྣང་དང་རྣམ་དཔྱོད་དོ་སྙོམས་པོ་དགོས་པར་བཤད་དེ་སྤྱི་ཡོངས་ནས་བཤད་ན་བདེན་མོད་ཀྱི་རྨས་སྐྱོན་ཐེབས་པའི་མི་རིགས་ཤིག་གི་ཚེ་སྲོག་སྐྱོབས་པའི་མཐའ་མའི་དམག་འཐབ་ལ་ཞུགས་པའི་དུས་སྐབས་ཤིག་ལ་ཚོར་སྣང་ལས་ཀྱང་རྣམ་དཔྱོད་གལ་ཆེ་བ་མ་རེད་དམ།