རྒྱ་ནག་གི་དུས་རབས་ ༢༡ པའི་ཤེས་ཡོན་སྲིད་བྱུས།

རྒྱ་ནག་གཞུང་གིས་དཔལ་འབྱོར་འཛུགས་སྐྲུན་དང་འཕྲུལ་རིག་གསར་གཏོད་ལ་ཤུགས་སྣོན་བྱེད་པའི་ཆེད་དུ། འབྱུང་འགྱུར་གྱི་ལོ་ ༡༢ རིང་གི་ཤེས་ཡོན་སྲིད་བྱུས་བཅོས་བསྒྱུར་དང་གོང་སྤེལ་གྱི་འཆར་ཟིན་ཞིག་ཕབ་ཡོད་འདུག

རྒྱ་ནག་གི་ཤེས་རིག་ལྷན་ཁང་གི་སྐུལ་འདེད་ལྟར། རྒྱལ་ཡོངས་ཚན་རིག་དང་འཕྲུལ་རིག་སློབ་གསོའི་སྣེ་ཁྲིད་ཚོགས་ཆུང་གིས་གཟའ་པ་སངས་ཉིན་འབྱུང་འགྱུར་གྱི་ལོ་ ༡༢ རིང་གི་སློབ་གསོའི་འཆར་ཟིན་གྱི་སྙན་ཐོ་ལ་ཆོག་མཆན་སྤྲད་ཡོད་འདུག

སྙན་ཐོ་དེའི་ནང་བརྗོད་དོན།  འཛམ་གླིང་རང་བཞིན་དང་རྒྱལ་ནང་གི་འཕེལ་ཕྱོགས་དང་མི་དམངས་ཀྱི་རེ་འདུན་ལ་དཔག་པའི་ཚད་ལྡན་གྱི་སྤྱི་ཚོགས་ཤིག་འཛུགས་སྐྲུན་བྱེད་པའི་ཕྱོགས་ཡོངས་ཀྱི་ཆ་རྐྱེན་གསར་པ་ལྟར། བརྒྱུད་ལམ་དང་མིག་རྒྱང་རིང་བའི་སློབ་གསོ་བཅོས་བསྒྱུར་དང་ཡར་རྒྱས་ཀྱི་འཆར་གཞི་དགོས་རྒྱུ་ནི་གཡོལ་ཐབས་མེད་པ་ཞིག་རེད། ཟེར།

སྙན་ཐོ་དེའི་ནང་སྐུལ་མ་བྱས་དོན། འཕྲུལ་རིག་གསར་གཏོད་ཀྱི་ཕྱོགས་སུ་ལག་རྩལ་གོང་སྤེལ་དང་རྒྱུ་སྤུས་མཐོར་འདེགས། གདམ་ག་དང་པོ་འཇོག་དགོས་ཟེར་ལ། མུ་མཐུད་ནན་སྐུལ་བྱས་དོན། དཔལ་འབྱོར་གྱི་སྤྱི་ཚོགས་ཤིག་ཡར་རྒྱས་གཏོང་བའི་ཁྲོད་ཤེས་ཡོན་སྲིད་བྱུས་ཀྱིས་ནུས་པ་ངེས་ཅན་ཞིག་འདོན་དགོས་པ་རེད་ཟེར།

མངའ་ཁུལ་མི་འདྲ་བ་དང་དུས་རིམ་མི་འདྲ་བའི་ནང་དུ་ཤེས་ཡོན་སྲིད་བྱུས་དེའི་ཁྱབ་ཚད་དང་གྲུབ་ཆ། སྤུས་ཀ དམིགས་ཡུལ་བཅས་ནི་ངེས་གསལ་ཡིན་དགོས་པའི་ཐད་གོང་གི་སྣེ་ཁྲིད་ཚོགས་ཆུང་དེ་གཅིག་མཐུན་བྱུང་ཡོད་པ་རེད། དེའི་ནང་དུ་གོ་རིམ་ཡོད་པའི་ཐོག་མཐོ་སློབ་དང་ལག་ཤེས། གཞི་རིམ་གྱི་བསྒྱུར་བཅོས་སོགས་གནད་དོན་ཆེ་ཁག་ཀྱང་ཚུད་ཡོད་ཚུལ་འདུག

འཆར་ཟིན་འདི་ནི་རྒྱལ་ཁབ་འདིས་དུས་རབས་ ༢༡ པའི་ནང་བཏིང་བའི་ཤེས་ཡོན་སྲིད་བྱུས་ཐོག་མ་དེ་ཡིན་ཟེར་ལ། འདི་ནི་རྒྱ་ནག་གི་སྤྱི་ཚོགས་ཧྲིལ་བོར་ཁྱབ་པའི་རྙོག་འཛིང་གི་ལས་འཆར་ཞིག་ཀྱང་ཡིན་ཟེར།

ཚོགས་ཆུང་འདིས་ཡིད་ཚིམས་པའི་མཛུབ་སྟོན་ཞིག་ཡོང་བའི་ཆེད་དུ་ཕ་མ་དང་སློབ་ཕྲུག ཆེད་ལས་མཁས་པ་བཅས་ཀྱི་ས་ནས་བསམ་ཚུལ་བསྡུ་ལེན་བྱེད་ཀྱི་ཡིན་འདུག
སྲིད་བློབ་ཝུན་ཇ་པའོ་ཡིས་ཚོགས་འདུ་འདི་གཙོ་སྐྱོང་བྱས་པ་མ་ཟད། ཚོགས་ཆུང་འདིའི་ཚོགས་གཙོའི་འགན་ཡང་ཁྱེར་ཡོད་པ་རེད།