ཚེས་ ༣ ཉིན་རྒྱ་གར་གཞུང་གིས་རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག རྒྱ་གར་གྱི་མཐའ་མཚམས་མངའ་ཁུལ་ཁག་ལ་གཟིགས་སྐོར་གནང་རྒྱུར་ཆོག་མཆན་སྤྲད་ཡོད་འདུག
རྒྱལ་བ་ཀརྨ་པ་མཆོག་གིས་རྒྱ་གར་གཞུང་ལ་ལོ་འདིའི་ཕྱི་ཟླ་ ༧ པའི་ནང་ཁོང་ཉིད་ནས་ཧི་མ་ཅལ་མངའ་སྡེ་ནང་པའི་དགོན་སྡེ་ཁག་དང་ལྭ་དགས་སོགས་ནང་བའི་འབྲེལ་ཡོད་ས་གནས་ཁ་ཤས་ལ་གཟིགས་སྐོར་དུ་ཕེབས་རྒྱུའི་ཐུགས་རེ་བ་བཏོན་ཡོད་ཀྱང་། ད་ལྟའི་བར་ཆོག་མཆན་གནང་མེད་པ་རེད། ཉེ་ཆར་ནས་རྒྱ་གར་དབུས་གཞུང་གིས་ཁོང་ལ་ཆོག་མཆན་སྩལ་ཡོད་ཅིང་། ཕྱི་ཚེས་ ༨ ནས་རྒྱལ་བ་ཀརྨ་པ་མཆོག་གིས་ལྭ་དགས་ནས་ཆོས་ཕྱོགས་ཀྱི་མཛད་འཕྲིན་ཁག་མགོ་བརྩམ་རྒྱུ་ཡིན་འདུག་ལ། ལ་ཧོར་དང་སྤེ་ཏི་ས་གནས་ཁུལ་གྱི་སྨོན་ལམ་འཚོགས་ཐོག་སོགས་ལ་ཡང་ཆིབས་བསྒྱུར་བསྐྱང་རྒྱུ་ཡིན་པ་མ་ཟད། འཛམ་གླིང་ལ་སྐད་གྲགས་ཡོད་པའི་རྟ་ཕོ་དགོན་པར་ཡང་ཕེབས་རྒྱུ་ཡིན་འདུག
ཀརྨ་པ་མཆོག་ནི་སྤྱི་ལོ་ ༢༠༠༠ ལོའི་ཟླ་ ༡ ཚེས་ ༥ ཉིན་རྒྱ་གར་དུ་བཙན་བྱོལ་ལ་འབྱོར་བ་དང༌། དེ་ནས་བཟུང་དྷ་རམ་ས་ལའི་ཉེ་འཁྲིས་སུ་ཡོད་པའི་རྒྱུད་སྟོད་དགོན་པར་བཞུགས་ཡོད་པ་རེད། ༢༠༠༨ ལོའི་སྤྱི་ཟླ་ ༤ བའི་ནང་ཁོང་གིས་ཐེངས་དང་པོར་ཨ་རིར་གཟིགས་སྐོར་ལ་ཕེབས་ཡོད་ཅིང་། འདི་ནི་ཁོང་བཙན་བྱོལ་དུ་འབྱོར་བ་ནས་ཕྱི་རྒྱལ་དུ་ཕེབས་ཐེངས་དང་པོ་རེད། ཡིན་ན་ཡང་རྒྱ་གར་གཞུང་གིས་མུ་མཐུད་ནས་ཀརྨ་པ་མཆོག་འབྲས་ལྗོངས་སུ་ཡོད་པའི་རིམ་བཏེགས་དགོན་པར་ཕེབས་རྒྱུར་ཆོག་མཆན་གནང་མེད་པ་རེད།
