བཙན་བྱོལ་བོད་གཞུང་གི་བཀའ་ཟུར་རྣམ་པའི་ཚོགས་འདུ་དེ་ཕྱི་ཚེས་ ༢༢ ཉིན་མགོ་བཙུགས་ཏེ་ཉིན་ ༥ ལྷག་གི་རིང་བཞུགས་སྒར་ཉེ་འདབས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་ འཚོགས་ཀྱིན་ཡོད་པ་དང་། ཐེངས་འདིའི་ཚོགས་འདུའི་བརྗོད་གཞི་ནི་བོད་ཀྱི་རྩ་དོན་དང་བོད་རྒྱ་ཞི་མོལ། དེ་བཞིན་རྒྱ་ནག་གཞུང་གིས་༧གོང་ས་མཆོག་ལ་མུ་མཐུད་སྐྱོན་བརྗོད་བྱེད་ཀྱིན་པར་ བོད་གཞུང་དམངས་གཉིས་ཀྱིས་ཇི་ལྟར་ལན་འདེབས་བྱེད་ཕྱོགས་བཅས་ཡིན་པ་དང་། དེ་བཞིན་དུ་ལོ་མཇུག་འདིར་བོད་ཀྱི་དམིགས་བསལ་ཚོགས་ཆེན་ཞིག་འཚོགས་གཏན་འཁེལ་ ཡོད་པ་འདིའི་ཐོག་བཀའ་ཟུར་རྣམ་པས་ཆ་ཤས་ལེན་ཕྱོགས་ལའང་བཀའ་བསྡུར་བྱེད་ཀྱི་ཡིན་ཚུལ་འདུག
ཐེངས་འདིར་བཀའ་ཟུར་རྣམས་ཀྱི་ཚོགས་འདུའི་བརྗོད་གཞི་གཙོ་བོའི་སྐོར་ལ་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་གསུངས་དོན། ད་ལོ་བོད་ནང་དམིགས་བསལ་གྱིས་ཛ་དྲག་གི་གནས་ཚུལ་ཤུགས་ཆེན་པོ་བྱུང་བ་དང་། བོད་ཀྱི་ས་ཁུལ་མང་པོར་བོད་ཀྱི་རྩ་དོན་ལ་ཕན་ཞིང་སྤྱིའི་རྩ་དོན་ཐོག་རྣམ་འགྱུར་ཤུགས་ཆེན་པོ་བསྟན་པ་དེ་ལ་བཀའ་ཟུར་རྣམ་པས་རྒྱབ་སྐྱོར་ལྟ་བུ་དང་། དེ་དང་ཆབས་ཅིག་རྒྱ་ནག་གཞུང་གིས་བཙན་གནོན་ཤུགས་ཆེན་པོ་བྱེད་བཞིན་པ་འདི་ལ་བསམ་ཚུལ་བསྡུ་བ། བོད་རྒྱ་ཞི་མོལ་ཡག་པོ་ཡོང་བའི་ཐོག་ལ་རྒྱལ་བ་རིན་པོ་ཆེའི་སྐུ་ཚབ་ཚོ་ཕེབས་གི་ཡོད་པ་རེད། རྒྱལ་བ་རིན་པོ་ཆེས་དབུ་མའི་ལམ་གྱི་དགོངས་བཞེས་ཤིག་གནང་གི་ཡོད་པ་རེད་དེ། རྒྱ་མིའི་ངོས་ནས་འདི་རྩིས་མེད་བྱས་པས་མི་ཚད། ད་ལོ་རྒྱལ་བ་རིན་པོ་ཆེ་ལ་བོད་ཀྱི་གནད་དོན་སྐོར་གསུང་རྒྱུའི་ཐོབ་ཐང་ཡོད་པ་མ་རེད་ཅེས་བཤད་པ་དེ་ནི་རྩིས་མེད་ཀྱི་སྐད་ཆ་རང་ཡིན་སྟབས། འདི་ལ་ང་ཚོའི་ཕྱོགས་ནས་ལན་ག་རེ་རྒྱག་དགོས་ཀྱི་འདུག བོད་གཞུང་དམངས་གཉིས་ཀའི་ངོས་ནས་ལན་གསལ་བོ་ཞིག་རྒྱག་དགོས་གི་འདུག གནད་དོན་འདི་གཉིས་ཀ་གཙོ་བོ་ཡིན་པ་འདྲ། ང་ཚོ་ད་རེབ་གནད་དོན་འདི་ཚོའི་ཐོག་ལ་འཛོམས་ནས་རྒྱལ་བ་རིན་པོ་ཆེ་དང་བོད་གཞུང་། བོད་མི་དམངས་བཅས་ལ་ང་ཚོའི་བསམ་འཆར་ཟེར་ན་མི་འདུག ང་ཚོའི་བསམ་ཚུལ་འདྲ་བོ་ཕན་ཐོགས་པ་ག་རེ་འདུག་དེ་ཚོ་འབུལ་རྒྱུ་ཡིན་ཞེས་གསུངས་བྱུང་།
ཐེངས་འདིར་བཀའ་ཟུར་རྣམ་པའི་དགོངས་ཚུལ་ཕྱོགས་བསྡུ་གནང་སྟེ་རྒྱལ་བ་རིན་པོ་ཆེ་དང་བོད་གཞུང་དམངས་གཉིས་ལ་འབུལ་གྱི་ཡིན་སྟབས། འདི་ལ་ནུས་པ་གང་འདྲ་ཞིག་ཐོན་པར་དགོངས་ཀྱི་ཡོད་མེད་དྲིས་པར་ཁོང་གིས། ནུས་པ་ག་རེ་ཞིག་འཐོན་གི་ཡོད་མེད་བཤད་ཐུབ་པ་མི་འདུག་མོད། ད་རེབ་བཀའ་ཟུར་བགྲེས་པ་དེ་འདྲ་ཕེབས་ཡོད་པ་རེད། བོད་ཀྱི་གནད་དོན་ཐོག་ལ་ཉམས་མྱོང་མང་པོ་ཡོད་མཁན། རྒྱ་མི་དང་འབྲེལ་བའི་ཐོག་ཉམས་མྱོང་ཡོད་མཁན་མང་པོ་ཡོད་སྟབས་ང་ཚོས་གང་ཐུབ་ཐུབ་དང་བསམ་བློ་གསར་པ་ག་རེ་འདུག ང་ཚོས་འབད་བརྩོན་བྱེད་ཀྱི་ཡོད་པ་རེད། ཡིན་ནའང་བོད་ཀྱི་གནད་དོན་འདི་སྔོན་མ་ནས་རྙོག་འཛིང་ཚ་བོ་རེད། བསམ་འཆར་ལས་སླ་བོ་དང་འགྲུབ་ཆོག་ཆོག་ཅིག་ཡོང་གི་བསམ་གི་མི་འདུག འོན་ཀྱང་། བོད་ནང་ཡོད་པའི་མི་དམངས་དང་ང་ཚོ་ཚང་མས་བསམ་བློ་གཅིག་གི་ཐོག་ནས་བོད་འདི་གནས་ཐུབ་པ་ཞིག་གི་ཐོག་ལ་འབད་བརྩོན་བྱེད་དགོས་པ་རེད་ཅེས་ད་རེབ་བསམ་འཆར་སླེབས་སྲིད་གི་རེད། ཅེས་གསུངས་བྱུང་།
ཡང་། ཉེ་ཆར་༧གོང་ས་མཆོག་གིས་བོད་ཀྱི་ཚོགས་ཆེན་ཞིག་སྐོང་དགོས་པའི་བཀའ་གནང་བ་ལྟར་ལོ་མཇུག་འདིར་བཀའ་ཟུར་རྣམ་པས་ཀྱང་ཚོགས་ཆེན་འདིའི་ཆ་ཤས་གལ་ཆེན་པོ་ཞིག་ལེན་གྱི་ཡོད་སྟབས། ཚོགས་ཆེན་འདི་ལ་དམིགས་པའི་གྲོས་གཞི་འདྲ་ཡོད་མེད་དྲིས་པར་བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་གིས། གནད་དོན་འདིའི་ཐོག་ངས་ལམ་སེང་ཞུ་ཐུབ་པ་མི་འདུག ཡིན་ནའང་བཀའ་ཟུར་ཚོའི་ཚོགས་འདུ་འདི་ནི་ཟླ་བ་གཅིག་གཉིས་ཤིག་གི་སྔོན་ནས་གྲ་སྒྲིག་གནང་བ་རེད། ཡིན་ནའང་རྒྱལ་བ་རིན་པོ་ཆེའི་བཀའ་དེ་ཉེ་ཆར་རང་མར་ཕེབས་པ་རེད། ཚོགས་ཆེན་དེའི་ཐོག་བོད་ཀྱི་རྩ་དོན་དང་འབྲེལ་བའི་གནད་དོན་མང་པོར་གྲོས་བསྡུར་བྱེད་གི་རེད། ད་རེབ་ང་ཚོ་བཀའ་ཟུར་ཚོ་འཛོམས་ནས་བསམ་ཚུལ་འདྲ་ཕུལ་བ་ཡིན་ན་གཅིག་བྱས་ན་ཚོགས་ཆེན་སྟེང་ལའང་ཕན་ཐོགས་ཡོད་སྲིད་གི་རེད། ང་ཚོས་རེ་བ་དེ་འདྲ་ཞིག་རྒྱག་གི་ཡོད་ཟེར།
ཐེངས་འདིའི་ཚོགས་ཆེན་སྟེང་གི་བརྗོད་གཞི་གཙོ་བོ་ཞིག་ནི་བོད་རྒྱ་ཞི་མོལ་སྐོར་རེད། དེ་ཡང་བོད་རྒྱ་ཞི་མོལ་འདི་ཡོང་རེ་མེད་པའི་སྐོར་ཡིན་སྟབས། བཀའ་ཟུར་རྣམ་པའི་ཚོགས་ཐོག་ཏུ་ད་ལྟའི་བོད་རྒྱ་ཞི་མོལ་གྱི་གྲོས་རིམ་འདི་ཕྱིར་འཐེན་བྱེད་དགོས་པའི་དགོངས་ཚུལ་འདྲ་ཡོང་གི་ཡོད་མེད་དྲིས་པར་ཁོང་གིས། འདིའི་སྐོར་བཀའ་མོལ་མང་བོ་ཞིག་དགོངས་འཆར་གནང་བཞིན་པའི་སྐབས་རེད། ཕྱིར་འཐེན་བྱེད་དགོས་ཀྱི་འདུག་དང་མི་འདུག་ད་ལྟ་ཐག་ཆོད་པ་དེ་འདྲ་གང་ཡང་བྱུང་མ་སོང་། ཡིན་ནའང་ད་ལྟ་བར་དུ་སྐུ་ཚབ་རྣམ་པ་ཕེབས་པ་ཡིན་ནའང་། རྒྱ་མིའི་ངོས་ནས་འབྲེལ་བ་བཟང་པོ་ཞིག་བྱེད་ཀྱི་མེད་པ་དེ་གསལ་བོ་རེད། དེའི་སྒང་ལ་ག་དུས་ཡིན་ནའང་སྐྱོན་དེ་བོད་པའི་སྒང་ལ་བཞག དབུ་མའི་ལམ་གྱི་སྲིད་བྱུས་དང་རྒྱལ་བ་རིན་པོ་ཆེའི་གསུང་འཕྲིན་ལ་སྐྱོན་བརྒྱབས་པ་སོགས་གང་ལྟར་ང་ཚོའི་འདི་ཚོང་འདྲ་བོ་ཞིག་ཡིན་ན། ཚོང་དེ་མར་ནས་མར་གཅོག་གི་ཡོད་པ་རེད། དེ་འདྲའི་དགོསང་ཚུལ་ཞིག་བཀའ་ཟུར་མང་ཆེ་བར་ཡོད་པ་འདྲ། མུ་མཐུད་ནས་འབྲེལ་བ་གནང་དགོས་ཀྱི་འདུག་མི་འདུག དེ་ལས་གཞན་པའི་ཐབས་ཤེས་གཞན་པ་དང་གསར་པ་འདུག་མི་འདུག དེ་ཚོའི་ཐོག་ལ་ང་ཚོ་བགྲོ་གླེང་འགྲོ་བཞིན་པ་ཡིན་ཅེས་གསུངས་སོང་།
བཙན་བྱོལ་བོད་མིའི་སྤྱི་ཚོགས་ཁྲོད་ལོ་མཇུག་འདིར་བོད་ཀྱི་ཆབ་སྲིད་ཀྱི་ལངས་ཕྱོགས་ལ་འགྱུར་བ་ཤུགས་ཆེན་པོ་ཞིག་འགྲོ་སྲིད་པའི་ཚོད་དཔག་བྱེད་མཁན་ཡོད་པ་རེད། ད་ལྟའི་བཀའ་ཟུར་རྣམ་པའི་ཚོགས་ཐོག་ཏུ་བོད་ཀྱི་ཆབ་སྲིད་ཀྱི་ལངས་ཕྱོགས་ལ་འགྱུར་ཐེབས་དགོས་མིན་སྐོར་ལ་བཀའ་མོལ་དང་དགོངས་འཆར་འདྲ་ཡོང་གི་ཡོད་མེད་དྲིས་པར་ཁོང་གིས། ད་ལྟའི་ཆར་དེ་འདྲ་སླེབས་ཀྱི་མི་འདུག ད་ལྟའི་ཆར་བོད་རྒྱའི་འབྲེལ་བའི་ཐོག་སོ་སོའི་དགོངས་ཚུལ་བཤད་བཞིན་པའི་སྒང་རེད། མི་མང་པོ་ཡོད་སྟབས་བསམ་ཚུལ་མ་འདྲ་བ་ཡོད་པ་རེད། དེར་བརྟེན་ད་ལྟའི་ཆར་སྤྱི་པའི་བསམ་ཚུལ་འདྲ་བོ་ཞིག་ཐག་ཆོད་པ་འདྲ་བྱུང་མ་སོང་ཞེས་འགྲེལ་བརྗོད་གནང་བྱུང་།
ཐེངས་འདིའི་ཚོགས་འདུའི་སྟེང་བཀའ་ཟུར་རྣམ་པ་ ༡༣ ཕེབས་ཡོད་པ་དང་། ཚོད་དཔག་གི་དུས་ཚོད་ལྟར་ན་ཉིན་ ༥ རིང་འཚོགས་འཆར་ཡོད་ནའང་། བཀའ་མོལ་དང་གྲོས་བསྡུར་གྱི་རིང་ཐུང་ལ་དཔག་པའི་དུས་ཚོད་ལ་འགྱུར་བ་ཐེབས་སྲིད་པ་ཞིག་རེད་ཅེས་ཁོང་གིས་འདི་ག་གསར་ཁང་ལ་གསུངས་བྱུང་།
ཁ་སང་ངྷ་རམ་ཤྰ་ལའི་མི་རྒན་པ་ཁ་ཤས་སྐད་ཆ་བཤད་རྒྱུ་བྱུང་། ཁོང་ཚོས་གསུངས་པ་ལྟར་ན། གོང་ས་མཆོག་གིས་བོད་མི་ཚོར་བརྡ་ཞིག་བསྟན་ཡོད་པ་རེད་ལ། བརྡ་དེ་ནི་དབུ་མའི་ལམ་ཁོ་ནར་འགྱུར་བ་གཏོང་དགོས་མིན་ཙམ་མིན་པར་དེའི་ནང་དུ་དམིགས་བསལ་སྐུ་ཚབ་བརྗེ་བོ་རྒྱག་དགོས་མིན་ཡང་འདུས་ཡོད་ཟེར། ཡིན་ནའི། བོད་མི་ཚོ་ལྐུགས་དྲག་ནས་ཁོང་གི་དགོངས་པ་དངོས་ཤེས་ཀྱི་མེད་པ་འདྲ། དེ་བས། དབུ་མའི་ལམ་འགྲིག་གི་མེད་པ་རེད་དམ་དམིགས་བསལ་སྐུ་ཚབ་འཇོན་གྱི་མེད་རེད། འདིའི་ཐད་བོད་ནང་གི་བོད་མི་ཚོས་སྐུ་ཚབ་ཚོ་ག་དུས་ཡིན་ནའང་མགོ་བསྐོར་འོག་ཤོར་གྱི་འདུག་ཅེས་སྐུ་ཚབ་མ་འཇོན་པར་མཐོང་གི་ཡོད་ན།
ཕྱི་སྡོད་བོད་མི་ཚོས་གོང་ས་མཆོག་མ་འགྲིག་པར་མཐོང་གི་ཡོད་དམ་སྐུ་ཚབ་མ་འཇོན་པར་མཐོང་འདུག་གམ།
རྒྱབ་སྐྱོར་གནང་བར་ཐུགས་རྗེ་ཆེ། ང་ཚོས་མུ་མཐུད་དུ་ཆེད་ལས་གསར་འགོད་པ་དག་གི་ལམ་དུ་སྐྱོད་ཐབས་བྱེད།
གསར་འགྱུར་འདི་དང་ཇུས་འགོད་འདིས་ངའི་ཡིད་དྲངས་སོང་། བོད་ཡིག་ཐོག་ཚད་གཞིར་འཛིན་འོས་པའི་གསར་འགྱུར་འདི་འདྲ་སྤེལ་བ་ལ་ནི་སྙིང་ཐག་པ་ནས་དགའ་བསུ་ཞུའོ།།