བོང་སྟག་རི་ལུ། ༼མཚོ་ནུབ༽
༢༠༠༨ ལོ་ནི་རྒྱ་ནག་ནང་ཁུལ་ལ་མཚོན་ན་ཆེས་གལ་ཆེ་བའི་ལོ་ཞིག་ཡིན་པ་དང༌། ལྷག་པར་དུ། ཨོ་ལེན་ཕུག་ཁུ་ལུས་རྩལ་འགྲན་ཚོགས་དེ་རྒྱ་ནག་ནང་ཁུལ་དུ་འཚོགས་རྒྱུ་གཏན་ཁེལ་བྱས་པས་འཛམ་བུ་གླིང་གི་མི་ཚང་མས་མིག་གིས་ཀྲུང་གོར་བལྟས་པ་དང་རྣ་བས་ཀྲུང་གོར་ཉན་པ་རེད། ཡིན་ན་ཡང༌། རྒྱ་ནག་ནང་ཁུལ་དུ་ཆེས་མཐོང་མི་འདོད་པ་ཞིག་ནི་ཡུ་གུར་དང་བོད་པ་ཚང་གཙོ་བྱས་ཏེ་ཡར་ལངས་ཀྱི་ལས་འགུལ་སྤེལ་བ་དང༌། སི་ཁྲོན་དང་ཀོས་ཀྲིག་གཙོ་བྱས་ཏེ་ངོ་རྒོལ་གྱི་གཏམ་ཡན་སྤེལ་བ། ཐ་ན་ས་དང་ཆུ་ཡི་འཇིགས་པ་མང་པོ་ལ་བརྟེན་ནས་ ༢༠༠༨ ལོ་ནི་ཕྱི་ནང་གང་རུང་ནས་བལྟས་ཀྱང་འུར་འུར་ཟིང་ཟིང་ཞིག་ཏུ་བཏང་སོང༌།
ཡིན་ན་ཡང༌། གོང་གི་དོན་འདི་ཙམ་ལ་ཁ་གཡར་ཏེ་བོད་པ་དང་ཡུ་གུར་རིགས་ཞེས་ཀྲུང་གོའི་དཔལ་འབྱོར་གྱི་སྙིང་ལྟ་བུའི་མི་རིགས་གཉིས་རྒྱ་ནག་གི་མིག་གི་ཚེར་མར་གྱུར་བ་ནི་དེ་ལས་ཀྱང་ཆེས་ཡིད་སྐྱོ་བ་ཞིག་གོ
དེ་ཡང་ཉིན་འགའི་སྔོན་ལ་ང་རང་ཟི་ལིང་དུ་ཟབ་སྦྱོང་ལ་སླེབས་རྗེས་ཞིང་ཆེན་བྱིས་པའི་ཁ་གཏད་ཀྱི་མགྲོན་ཁང་ཞིག་ཏུ་བསྡད་པ་ཡིན་ལ། ཐེངས་ཤིག་ལ་ཕྱི་རོལ་དུ་ཟ་མ་ཟ་རུ་སོང་ནས་ཕྱིར་སླེབས་རྗེས་མགྲོན་ཁང་དེའི་ནང་དུ་དམག་མི་མང་པོ་ཞིག་འགྲོ་བཞིན་པ་མཐོང༌། དེ་ནས་མགྲོན་བདག་ལ་གནས་ཚུལ་ག་རེ་བྱུང་སོང་ཞེས་དྲིས་པ་ན། མགྲོན་བདག་གིས་བཤད་དོན་དམག་མི་དེ་ཚོ་ཐོབ་ཐང་ལག་ཁྱེར་ལ་བལྟ་བཞིན་འདུག་ལ། བོད་པ་དང་ཞིན་ཅང་གཉིས་ལ་ཐོབ་ཐང་ལག་ཁྱེར་ཡོད་ཀྱང་མགྲོན་ཁང་དུ་ཐོ་འགོད་བྱེད་མི་ཆོག་ཟེར། སྐབས་དེར། ངའི་སེམས་ལ་གནོན་ཤུགས་བྲལ་བའི་སྡུག་བསྔལ་ལྷག་མ་ཞིག་སྐྱེས་པ་དང་བཤད་དཀའ་བའི་ན་ཟུག་ཅིག་གིས་མཚན་ལམ་རིང་མོ་ཞིག་བསྐྱལ་དགོས་བྱུང༌།
དོན་ངོ་མར། རྒྱལ་ཁབ་ཀྱི་བཅའ་ཁྲིམས་དང་འབྲེལ་བའི་ཞིབ་འདང་ཞིག་བརྒྱབ་ན་ཡང༌། མི་སུ་ཞིག་དང་མི་རིགས་གང་ཞིག་ཡིན་ཡང་མགྲོན་ཁང་དུ་སྡོད་པ་ནི་རང་ དབང་གི་ཐོབ་ཐང་ཅིག་ཏུ་བརྩི་ཆོག་པ་ལས་མི་གན་དང་མི་རིགས་གན་མགྲོན་ཁང་དུ་སྡོད་མི་ཆོག་ཅེས་པའི་བཅའ་ཁྲིམས་ཤིག་ཁོ་བོས་དེ་སྔ་ནས་མཐོང་མ་མྱོང་ལ། དེ་ འདྲ་ཞིག་ཡོད་ཀྱང་མི་སྲིད་དོ།རྒྱུ་མཚན་ནི།ང་ཚོ་ནི་མི་རིགས་ང་དྲུག་གིས་གྲུབ་པའི་མེས་རྒྱལ་ཁྱིམ་ཆེན་འདིས་ནང་མི་ཏག་ཏག་ཡིན། ང་ཚོས་མིག་ཟུང་གིས་འཆམ་མཐུན་དང་འབྱོར་ཕྱུག་གིས་འཚོ་བའི་མ་ཡུམ་མེས་རྒྱལ་ལ་རེ་བས་བལྟས་ན་ཡང༌། མེས་རྒྱལ་གྱི་ཕྱོགས་ཞེན་ཆེ་བའི་མིག་ཟུང་གིས་ང་ཚོ་ཁྱིམ་གཅིག་གི་བུ་ཕྲུག་ལས་རྒྱང་འཕུད་བཏང་སྟེ་ཞག་གཅིག་གི་གནས་ཚང་ཡང་གཡར་བར་དཀའ་བས་ན། བོད་པ་དང་ཡུ་གུར་རིགས་ཀྱིས་རང་ཉིད་ལ་དབང་བའི་ཕ་ཁྱིམ་ཞིག་ལ་རེ་སྙེག་བྱེད་བཞིན་པ་ལ་འང་རྒྱུ་མཚན་མེད་པ་ཞིག་གཏན་ནས་མ་ཡིན་ནོ།།
༼བོད་འབྱོར་རྩོམ་ཡིག རྩོམ་པ་པོའི་རེ་འདོད་ལྟར་མིང་རང་འཇགས་བཞག་ཡོད།༽
