རྒྱ་ནག་གིས་ད་ལྟའི་བོད་ནང་གི་གནས་སྟངས་ནི་ཞི་བདེ་ལྷིང་འཇགས་ཡིན་སྐོར་སྒྲོག་གིན་ཡོད་ནའང༌། དོ་དངོས་དེ་འདྲ་ཞིག་གཏན་ནས་མིན་པར་སྔར་བཞིན་དྲག་ཤུགས་ཁོ་ནས་ཉི་མ་འཁྱོལ་ཐབས་བྱེད་ཀྱིན་ཡོད་པ་དང༌། བོད་མི་སྤྱི་དང་ལྷག་པར་དགེ་འདུན་པ་རྣམས་ལ་མནར་གཅོད་གཏོང་ཚབས་ཆེ་རུ་འགྲོ་བཞིན་ཡོད་འདུག
ཕྱི་ཚེས་ ༢༦ ཉིན་བཞུགས་སྒར་ཀིརྟི་བྱེས་པ་གྲྭ་ཚང་ཛ་དྲག་འབྲེལ་མཐུད་ཚོགས་ཆུང་གིས་འདི་ག་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ཟླ་ ༩ པའི་ཚེས་ ༢༤ ཉིན་གྱི་ཕྱི་དྲོའི་ཆུ་ཚོད་ ༧ ཐོག་རྔ་པ་ཀིརྟི་དགོན་པའི་དགེ་འདུན་པ་བློ་བཟང་སྦྱིན་པ་ཀླད་ཆ་འབོད་པ་དེ་དགོན་པའི་ནུབ་ཕྱོགས་ཀྱི་གླིང་མཐར་ཆབ་ཆེན་འདོར་བར་ཕྱིན་སྐབས། དགོན་མཐའ་སྲུང་མཁན་གྱི་དམག་མི་ཚོས་ཁོང་ལ། ས་ཚིགས་འཛིན་བྱེད་ཀྱི་ཐིག་བརྒྱབས་ནས་ལྕགས་ལེབ་ཅིག་བསླངས་ཡོད་པ་ཚུར་ནང་ལ་བསྣུར་ནས་ཐིག་གསར་པ་བརྒྱབས་ཏེ་ཁྱོད་རང་ཡོང་མི་ཆོག་སར་ས་ཐིགས་བརྒལ་ནས་སླེབས་སོང་ཞེས་གཞི་མེད་བསྙོན་འཛུགས་ཀྱིས་ཉེས་རྡུང་བཏང་འདུག་ལ། དེ་རྗེས་ཁོང་དགོན་པའི་སྐོར་ལམ་དུ་ཡོད་པའི་གཞུང་གི་ཟ་ཁང་ནང་སོང་བར་དམག་མི་ཚོས་རྗེས་འདེད་བཏང་སྟེ་སྡོད་མ་བཅུག་སྟངས། གྲྭ་བསོད་ནམས་རྒྱ་མཚོ་དང༌། བློ་བཟང་ཐབས་མཁས་གཉིས་ཀྱིས་བར་འདུམ་བྱས་པར། དམག་མི་ཚོས་ཁྱེད་རང་གཉིས་ལ་མི་འདིའི་ཆེད་དུ་སྐད་ཆ་བཤད་རྒྱུའི་ཐོབ་ཐང་མེད། ཁྱེད་ཚོ་སོ་སོ་རེད་ཅེས་བཙན་གཏམ་བསྒྲགས་པ་མ་ཟད། ཁོང་གཉིས་ཀྱི་རྐང་པའི་གཡས་གཡོན་དང་གནམ་ལ་མེ་མདའ་འཕངས་ཏེ་འཇིགས་སྐུལ་བྱས་ཡོད་འདུག
སྐབས་དེར་ཟ་ཁང་ཕྱི་ནང་གི་གྲྭ་པ་མང་པོ་དེར་འདུས་པ་དང༌། སྨན་པ་གྲྭ་ཚང་གི་དགེ་བསྐོས་བློ་བཟང་སྦྱིན་པ་དང༌། དགེ་བཤེས་འགྱུར་མེད་གཉིས་གཙོས་གྲྭ་མང་གིས་དམག་མི་ཚོར། ང་ཚོ་མི་རེད། ངེས་པར་དུ་ཁ་ལ་ཟ་བ་དང་ཆབ་ཆེན་འདོར་རྒྱུའི་ཐོབ་ཐང་ཡོད་དགོས་པ་རེད། འདི་ལྟར་བྱས་ན་ཡོངས་ཐབས་མི་འདུག་ཅེས་དང༌། ཁྱེད་རང་ཚོའི་འགོ་པར་ཁ་པར་ཐོངས་དང་ང་ཚོས་སྐད་ཆ་ཡག་པོ་བཤད་དགོས་ཞེས་བརྗོད་པས། དེར་ཡོད་ཀྱི་དམག་མི་ཞིག་གིས་ཁ་པར་བཏང་འདུག་ཀྱང་སུ་ལ་བཏང་ཡོད་མེད་ཤེས་མི་འདུག གང་ལྟར་སྐར་མ་ཁ་ཤས་ཀྱི་རྗེས་སུ་ལག་ཆ་འདྲ་མིན་བཟུང་མཁན་གྱི་དམག་མི་རླངས་འཁོར་གང་སླེབས་ཏེ། སྐད་ཆ་ཚིག་གཅིག་ཀྱང་བཤད་ལོང་མེད་པར་དགེ་འདུན་པ་ཚོར་ཉེས་རྡུང་བཏང་འདུག་ཀྱང་དགེ་འདུན་པ་རྣམས་ས་ལ་བསྡད་ནས་ཡ་ལན་གཅིག་ཀྱང་སློག་མི་འདུག་ལ་བླ་མ་བསོད་ཚེ་འབོད་པའི་རྒྱབ་ལ་ཚལ་གྲི་གཉིས་བརྒྱབ་ནས་རྨས་ལྕི་མོ་ཕོག་པས་ད་ལྟ་སྨན་ཁང་དུ་ཉལ་ཡོད་འདུག དེ་མིན་བློ་བཟང་རབ་རྒྱས་དང༌། གཙང་བ་ཆོས་འཛིན་གཉིས་ལ་ཚལ་གྲི་དང་མེ་མདའི་མཆུས་བརྒྱབས་ནས་རྨ་བཟོས་ཡོད་པ་དང་སྐབས་དེར་གནས་ཚུལ་ཚབས་ཆེ་རུ་སོང་སྟབས་དགོན་མཐའི་ཆུའི་ཕར་ཕྱོགས་ཀྱི་མི་མང་རྣམས་ཁང་པའི་ཕྱི་ལ་ཐོན་ཡོང་བར་དམག་མི་ཚོས་མེ་མདའི་ཁ་མི་མང་ལ་གཏད་དེ་ཁྱེད་རང་ཚོ་ནང་ལ་སོང་ཞེས་བཙན་གྱིས་འགྲོར་བཅུག་ཡོད་འདུག དགོན་པའི་ཆོས་ལུགས་དོ་དམ་ཁང་གི་ལས་བྱེད་བློ་དཔལ་དང༌། ལྷ་མཆོག་གཉིས་ཡོང་ནས་དམག་མི་ཚོར་དེ་ལྟར་མ་བྱེད་རོགས་ཞེས་ཞུ་བ་ཞུས་པར་ལྷ་མཆོག་གི་མགོ་ལ་མེ་མདའི་ལྕགས་ཀྱིས་གཞུས་ནས་རྨ་བཟོས་ཡོད་འདུག
དེ་རྗེས་དགོན་པའི་དགེ་བསྐོས་དང་རྒྱ་ནག་གི་ལས་བྱེད་ཁག་ཅིག་འབྱོར་ཏེ། དགེ་འདུན་པ་རྣམས་ལ་ཉེས་རྡུང་བྱེད་མཚམས་བཞག་ཡོད་ནའང༌། དགེ་འདུན་པ་ཚོས་དམག་མི་ཚོར་ལན་སློག་མེད་པ་དང་མཚོན་ཆ་གང་ཡང་མེད་པའི་བདེན་དཔང་བྱེད་ཆེད་གྱོན་ཆས་ཕུད་དེ་ར་སྤྲོད་གསལ་བོར་བྱས་འདུག
གཞན། ཉིན་དེའི་སྔ་དྲོའི་ཆུ་ཚོད་ ༡༠ ཙམ་ལ་དགོན་པའི་ནུབ་བྱང་ཕྱོགས་ཀྱི་ཆུ་ཁར་དགེ་འདུན་པ་ཁ་ཤས་ཀྱིས་གྱོན་ཆས་འཁྲུད་ཀྱིན་བསྡད་ཡཽད་པར་དེའི་ཕྱོགས་ཀྱི་དམག་མི་ཚོས་མེ་མདའ་གནམ་ལ་འཕངས་ནས་འཇིགས་སྐུལ་གྱིས་སྡོད་མ་བཅུག་པར་དགོན་པའི་ནང་བསྡུས་ཡོད་པ་དང༌། དགོན་པའི་གཡས་གཡོན་གྱི་གྲོང་པ་ཚོའི་ནང་ནང་མི་དང་ལྷན་དུ་བསྡད་ཡོད་པའི་གྲྭ་པ་ལོ་ཆུང་ཚོ་ཕར་ཚུར་འགྲོ་འོང་སྐབས་དམག་མི་ཚོས་མེ་མདའ་བཟུང་ནས་འཇིགས་སྐུལ་དང་རྩེད་སྤྱད་བྱེད་ཀྱིན་ཡོད་ཅིང༌། རྔ་པ་ཀིརྟི་དགོན་པ་ གཅིག་པུར་ད་ལྟའང་ས་ཚིགས་མི་འདྲ་བ་དགུ་ལ་དམག་མི་གཏན་སྡོད་བྱས་ནས་འགྲོ་འོང་བཀག་སྡོམ་ནན་མོ་བྱས་ཡོས་འདུག་པ་འདི་ནི་ད་ལྟའི་བོད་ནང་གི་གནས་སྟངས་དངོས་ལས་ཟུར་ཙམ་ཡིན་པ་དང༌། གཞན་ཡང་གནས་ཚུལ་མཁོ་སྤྲོད་པ་ཚོས་འདི་ལྟར་ཉི་མ་འཁྱོལ་དཀའ་བའི་བཅན་གནོན་འོག་ཡོད་པ་འདི་རྒྱལ་སྤྱིའི་ཐོག་ལ་བཤད་ས་དང་ཞུས་ས་གང་ཡོད་པ་དེར་གདུང་ཤུགས་དྲག་པོས་བཤད་རོགས་གནོངས་ཞེས་ཡང་ཡང་གསུངས་བཞིན་འདུག་ཅེས་བརྗོད་ཡོད།
ད་དུང་མང་པོ་ཞིག་གི་ཕ་མ་དང་བོད་ཀྱི་མི་ཆེན་དཔོན་ཆེན་བསད་པའི་སྡུག་བསྔལ་ཡང་ཡོད།
༡༩༥༨ ལོ་ནས་བརྩིས་ན་བོད་ནང་རིག་གནས་གསར་བརྗེ་སྤེལ་ནས་ ༢༠༠༨ ལོ་བར་ཁྱོན་ལོ་ ༥༠ ཐམ་པ་ཏག་ཏག་འཁོར་བ་རེད། བོད་ནང་ནས་ཡར་ལངས་བྱས་པ་ལ་ངོ་མ་ཁག་ཅི་ཡོད།
བོད་ནང་དུ་རིག་གནས་གསར་བརྗེ་ག་དུས་མཇུག་རྫོགས་གི་ཡོད་ན། ད་དུང་ལོ་མང་པོ་ཞིག་འགོར་རྒྱུ་ཡིན་པ་འདྲ།
ངོ་ནས་སེམས་པ་སྐྱོ་བོ་རེད། བོད་པ་ཚོ་འདིར་ད་དུང་ཡི་གེ་དང་། སྐད ཆོལ་ཁ་བཤད་པའི་དུས་མིན་པ་གསལ་བོ་མཐོང་གི་འདུག་གམ། འདི་དག་གི་བྱུང་རྐྱེན་ང་ཚོ་གདོར་དམར་ཡིན་པ་དང་ས་ཆ་ཆེ་བའི་སྐྱོན་རེད།