ནག་ཁུང་ནང་གི་ནག་འདེད།

བོད་ཀྱི་དུས་བབ་སྤྱིའི་འདོན་ཐེངས་ ༤༣༠ པའི་སྟེང་གི་རྩོམ་སྒྲིག་པའི་གཏམ།

བོད་པའི་སྐུ་ཚབ་རྣམ་པ་ཕྱིར་རྒྱ་གར་དུ་ལོག་ཕེབས་བྱུང༌། གྲོས་མོལ་གྱི་ནང་དོན་ད་དུང་སླེབས་མ་སོང༌། བཤད་རིན་མེད་ནའང་འདྲ་ལ། བཤད་སྲོལ་མེད་ནའང་ཆོག ཕྱི་གསལ་ནང་གསལ་བཟོ་དགོས་པ་དབུར་བཞུགས་ལྷན་རྒྱས་ཚོའི་ལས་འགན་ཡིན་ལ། ཛ་དྲག་གཉན་འཕྲང་གི་དུས་ཚོད་འདིའི་འོས་བབས་ཀྱང་ཡིན། བོད་ཕྱི་ནང་གཉིས་དང་ཕྱི་རྒྱལ་ཡུལ་གྲུ་ཁག་གི་བོད་རིགས་དང་བོད་དོན་རྒྱབ་སྐྱོར་བ། འགྲོ་བ་མིའི་ཐོབ་ཐང་ལྟ་རྟོག་ཚོགས་པ་སོགས་བོད་དོན་ལ་ཐུགས་འགན་བཞེས་མཁན་དང༌། ཐ་ན། མིའི་རིགས་ཀྱི་རང་དབང་དང་འདྲ་མཉམ། ཞི་བདེ་དང་ཀུན་སྤྱོད་ལ་དོ་ཁུར་བྱེད་མཁན་ཡོངས་ཀྱིས་མིག་ཧྲིག་ཧྲིག་གིས་བལྟ་ས་དང༌། ཨ་ཅོག་གྲུང་གྲུང་གིས་ཉན་ས་བོད་རྒྱའི་གྲོས་མོལ་ཐེངས་བརྒྱད་པའི་མཇུག་འབྲས་འདི་ཡིན།

   དེར་མ་ཟད། འཚོགས་ལ་ཉེ་བའི་བོད་དོན་དམིགས་བསལ་ཚོགས་ཆེན་གྱི་གྲོས་གཞིའི་ཐད། མི་དམངས་ཚོས་དགོངས་པ་བཞེས་སྟངས་དང༌། ཚོགས་འདུ་དངོས་གཞིའི་སྐབས་རྩ་དོན་ལ་གྲོས་བསྡུར་བྱེད་ཕྱོགས་ལའང་ཐེངས་འདིའི་འབྲེལ་མོལ་གྱི་ནང་དོན་དང་འབྲེལ་བ་དམ་ཟབ་ཡོད་མོད། ལེགས་ཉེས་ཅི་བྱུང་གི་འཕྲིན་གསར་རྒྱ་གར་ལྡི་ལི་ནས་བཀའ་བློན་ཁྲི་པས་འཕྲོག་སོང་བ་འདིས་ད་ལྟ་ཕྱོགས་མཐའ་ཁག་ན་བསྡུ་རུབ་བྱེད་བཞིན་པའི་མི་དམངས་ཀྱི་བསམ་ཚུལ་དེ་ཡང༌། སྐབས་བབས་ཀྱི་གནས་སྟངས་ལ་གཞིགས་པའི་མི་དམངས་ཀྱི་བསམ་ཚུལ་རྣལ་མ་ཞིག་གི་ཚབ་བྱེད་དཀའ་བའི་གནས་སུ་བསྐྱལ། འདི་ལྟར་ནག་ཁུང་ནང་ནས་མི་དམངས་ནག་འདེད་བྱས་ན། ཀླུད་ཤར་ན་ཡོད་ན། གཏོ་ནུབ་ཏུ་ཕངས་པའི་དཔེ་རུ་འགྱུར་མི་སྲིད་པའི་ངེས་པའང་མེད།

   སྤྱིར་ཐེངས་འདིའི་གྲོས་མོལ་གྱི་མཇུག་འབྲས་ཀྱང་དེ་འདྲའི་ལྐོག་གྱུར་ཞིག་མིན་པར། སྐུ་ཚབ་རྣམ་གཉིས་ཕྱིར་སླེབས་པ་མ་ཐོས་སྔོན་ལ། རྒྱ་ནག་གཞུང་ནས་རྒྱུན་འཁྱོངས་བྱ་དགོས་པ་གསུམ་གྱི་འགན་ཁུར་བཞག་ཡོད་པ་ཐོས་བྱུང༌། ད་དུང༌། ལག་བསྟར་བྱེད་བཞིན་པའི་མི་རིགས་ས་ཁོངས་རང་སྐྱོང་གི་ལམ་ལུགས་དེ། ཀྲུང་གོའི་རྩ་ཁྲིམས་ནང་གཏན་འབེབས་ཁ་གསལ་བྱས་ཡོད། དེ་ནི་བོད་ལྗོངས་ཀྱི་ཆེས་མཐོ་བའི་ཆབ་སྲིད་གནས་བབས་ཡིན་ཚུལ། བོད་རང་བཙན་མི་ཆོག་ལ་རང་བཙན་ཕྱེད་ཀྱང་མི་ཆོག རྣམ་པ་འགྱུར་བའི་རང་བཙན་མི་ཆོག ཐ་ན། རྒྱལ་ཕྲན་མཉམ་འབྲེལ་དང༌། རྒྱལ་ཁབ་གཅིག་ལ་ལམ་ལུགས་གཉིས་ཀྱང་མི་ཆོག གནས་བབས་འདི་ལ་དུས་ནམ་ཞིག་དང་གནས་ཚུལ་གང་ཞིག་གི་འོག་ནས་ཀྱང༌། འགྱུར་བ་དང་གཡོ་གཟིར་སྤུ་ཙམ་ཡང་མེད། ཅེས་ཚིག་ཐག་ཆོད་པོས་མཐའ་ཚིག་བསྒྲགས་ཡོད་པ་དང༌། ད་དུང༌། ཏཱ་ལའི་བླ་མའི་ཆབ་སྲིད་ཀྱི་སྲིད་བྱུས་ལ་རྩ་བ་ནས་འགྱུར་བ་གཏོང་དགོས་ཚུལ་ཧམ་བཤད་བྱས་ཡོད་པ་ཡང་ཐོས་བྱུང༌།

   འདི་ནི་བོད་རྒྱ་ཞི་མོལ་ཐེངས་བརྒྱད་པའི་མཇུག་འབྲས་ཤིག་ཏུ་ངོས་འཛིན་བྱེད་ཆོག་ལ། འདི་ནི་དམིགས་བསལ་ཚོགས་ཆེན་ཐོག་གི་གྲོས་གཞི་གལ་ཆེན་ཞིག་ཏུ་རྩིས་ཆོག འདི་ནི་འདས་པའི་ལོ་ངོ་ལྔ་བཅུའི་རིང་རྒྱ་གཞུང་གིས་རྙེད་རྟོགས་བྱུང་བའི་གདེང་སྤོབས་ཡིན་ལ། འདི་ནི་རྒྱལ་སྤྱིའི་གནས་བབ་འོག་ནས་བོད་དོན་བསྐྱར་དུ་བསྔོག་འདོན་དགོས་པའི་ཉེན་བརྡ་ཡིན། འདི་ནི་རྒྱ་ནག་གཞུང་གི་ཞེ་གཏིང་ན་ཉར་ཡོད་པའི་དམིགས་འབེན་ཡིན་སྲིད་ལ། འདི་ནི་༧གོང་ས་མཆོག་གིས་རྩ་དོན་བགྲོ་གླེང་བསྐྱར་དུ་བསྐུལ་པའི་དགོས་དམིགས་དེ་ཡིན་སྲིད། འདས་པའི་ ༡༩༩༦ ལོ་ནས་ ༢༠༠༨ བར་གྱི་ལོ་འཁོར་བཅུ་གཉིས་རིང་བོད་གཞུང་དམངས་གཉིས་ཀྱི་ཚོད་ལྟ་རིང་མོ་འདིའི་གོ་རིམ་ཁྲོད། ང་ཚོར་བསླབ་བྱ་ཞིག་ཐོབ་པ་ནི། རང་བཙན་བརྩད་ཀྱང་ཆོག་ལ། དབུ་མར་བརྩོན་ཡང་འཐུས། ཁ་ནས་འཆད་ཉན་བྱས་ནས་ལྷོད་པོར་སྡོད་རྒྱུའི་གཞུང་ལུགས་ཤིག་མིན་པར། དངོས་སུ་ལག་བསྟར་བྱས་ཏེ་གོམ་པ་རྒྱག་སའི་གཞུང་ལམ་ཞིག་ཡིན་པ་འདི་རེད།