སེར་བྱེས་འབྲིང་རིམ་སློབ་གྲྭར་གསར་འགོད་དུ་བསྐྱོད་པ།

ྋགོང་ས་མཆོག་གིས་དགོན་སྡེ་ཁག་ཏུ་དེང་དུས་ཤེས་ཡོན་སྲིད་བྱུས་དང་མཐུན་པའི་སློབ་གཉེར་བྱ་རྒྱུར་ཡང་ནས་ཡང་དུ་བསྐུལ་ཞིང༌། ལྷག་པར་ཆབ་སྲིད་ཀྱི་ཕྱོགས་སུའང་ཤུགས་རྒྱག་དགོས་པའི་སྐོར་གསུང་གི་ཡོད་སྟབས། སེར་བྱེས་འབྲིང་རིམ་སློབ་གྲྭ་ལྟ་བུ་ནི་ཁོང་གི་ཐུགས་རེ་འགྲུབ་པའི་ཁོར་ཡུག་རེད་སྙམ།

  ཕྱི་ཚེས་ ༥ ཉིན་ངས་སྒྲ་སྡུད་འཕྲུལ་ཆས་དང་པར་ཆས། འབྲི་དེབ་སོགས་གསར་འགོད་པའི་ཡོ་བྱད་རྣམས་ཁྱེར་ཏེ་སེར་བྱེས་འབྲིང་རིམ་སློབ་གྲྭར་གསར་འགོད་དུ་བསྐྱོད། སེར་བྱེས་འབྲིང་རིམ་སློབ་གྲྭ་ནི་ཕྱི་ལོ་ ༡༩༧༥ ཙམ་ནས་དབུ་བརྙེས་ཏེ། ཚོགས་འདོན་བློ་སྐྱོར་ལས་སུམ་རྟག་དག་གསུམ་གྱི་རྨང་གཞི་མི་དགོས་ཤིང༌། རྟགས་གསལ་ལས་འབྲི་ཀློག་མི་སྦྱོང་བའི་སྔོན་ཆད་ཀྱི་དགོན་སྡེ་ཁག་གི་སྲོལ་རྒྱུན་གྱི་སློབ་གསོ་སྤྲོད་སྟངས་ལས། བླ་མ་མེད་པའི་མདུན་སྐྱོད་ཅིག་ཏུ་ཕྱོགས་པ་དང༌། སྐབས་དེ་ནས་བཟུང་གྲྭ་བ་བཟོ་འདོད་ཀྱང་དང་པོ་རིག་གནས་སྦྱོང་བ་དང༌། ཆོས་པ་བཅའ་འདོད་ཀྱང་དང་པོ་སློབ་གསོའི་ལམ་དུ་ཞུགས་ཐུབ་པའི་སྐལ་བ་དེ་མངོན་འགྱུར་བྱུང་ཞིང༌། བོད་ཀྱི་བརྡ་སྤྲོད་རིག་གནས་དང་ཡིག་གཟུགས། སྙན་ངག དབྱིན་ཡིག་བཅས་སློབ་མགོ་བརྩམས་འདུག་ལ། དེ་དུས་སེར་བྱེས་གྲྭ་ཚང་གི་སྟངས་འཛིན་འོག་ཡོད་ཀྱང༌། ༡༩༨༣ ལོ་ནས་བཟུང་སློབ་གྲྭའི་འཛིན་སྐྱོང་དང༌། ཤེས་ཡོན་སྲིད་བྱུས་ཀྱི་ཁ་ཕྱོགས། ཁོར་ཡུག་བཅས་ལ་འགྱུར་ལྡོག་ཆེན་པོ་ཞིང་བྱུང་བ་ནི། སྐབས་དེ་ནས་བཟུང་གྲྭ་ཚང་གིས་སློབ་གྲྭ་འདིའི་འཛིན་སྐྱོང་གི་འགན་ཡོད་ཚད་སློབ་གྲྭ་རང་ངོས་ནས་བྱ་རྒྱུར་བཀའ་འཁྲོལ་གནང་སྟེ། སློབ་གྲྭར་ཁང་པ་གསར་རྒྱག་དང་སློབ་ཚན་རྣམས་དེང་དུས་ཤེས་ཡོན་སྲིད་ཇུས་དང་མཐུན་པར་བཟོས་ཡོད་འདུག དེ་ལྟར་སེར་བྱེས་འབྲིང་རིམ་སློབ་གྲྭ་འདི་ཉིད་སྔར་མེད་པ་ནས་ཡོད་པ་དང༌། ཡོད་པ་ནས་མདུན་སྐྱོད་ཀྱི་ལམ་ཆེན་སྟེང་ཞུགས་ཏེ། འབྲེལ་ཡོད་སྡེ་ཁག་དང་ལས་བྱེད་མི་སྣ་རྣམས་ཀྱིས་དཀའ་སྤྱད་སྡུག་རུས་གང་མང་སྤྱད་མཐར། ༡༩༩༨ ལོར་རྒྱ་གར་གཞུང་གིས་ཁྲིམས་མཐུན་ངོས་ལེན་ཡོད་པའི་ཚད་ལྡན་སློབ་གྲྭ་ཞིག་ཏུ་གྱུར་བ་དང༌། སྔར་འཛིན་རིམ་བརྒྱད་པ་མ་གཏོགས་མེད་པ་ནས་འཛིན་རིམ་བཅུ་བ་བར་ཡོད་པར་བཟོས་ཤིང༌། འཛིན་གྲྭ་བཅུ་བའི་སློབ་མ་རྣམས་ལོ་རེའི་རྒྱ་གར་རྒྱལ་ཡོངས་ཀྱི་འཛིན་རིམ་བཅུ་བའི་ཡིག་རྒྱུགས་ཁྲོད་དུ་ཞུགས། ད་བར་ལོ་བཅུའི་རིང་སློབ་ཕྲུག་ཉིས་བརྒྱར་ཉེ་བས་འཛིན་རིམ་བཅུ་བའི་ཡིག་རྒྱུགས་བཏང་འདུག་ལ། ལོ་འདིར་སློབ་ཕྲུག་ཅིག་གི་སྤྱི་སྔོམ་གྱི་བརྒྱ་ཆ་རྒྱལ་ཡོངས་ཀྱི་རྒྱུགས་འབྲས་ཁྲོད་བརྒྱ་ཆ་ ༧༠ ལས་བརྒལ་ཏེ་དམིགས་བསལ་ཆེ་བསྟོད་ཀྱི་ལག་ཁྱེར་ཞིང་ཀྱང་བླངས་འདུག་པ་མ་ཟད། སློབ་ཕྲུག་རྣམས་འདི་ནས་འཛིན་རིམ་བཅུ་པ་ཐོན་རྗེས་གྲྭ་ཚང་གི་ཁོངས་སུ་འཛུལ་འདོད་མཁན་ལ་དེ་ལྟར་གྲྭ་ཚང་དུ་ཞུགས་ཆོག་པ་དང༌། མུ་མཐུད་འཛིན་རིམ་བཅུ་གཅིག་བཅུ་གཉིས། མཐོ་སློབ་ཏུ་བསྐྱོད་མཁན་ཚོར་བཙན་བྱོལ་བོད་གཞུང་གི་སློབ་མ་སྤྱི་མཚུངས་ལྟར་ཐོབ་ཐང་ཡོད་སྟབས་སློབ་ཕྲུག་རང་ཉིད་ཀྱིས་གདམ་ཀ་བྱེད་ཀྱིན་ཡོད་འདུག

  ཉིན་དེའི་ཞོགས་པའི་ཆུ་ཚོད་ ༡༠ ཙམ་ལ་ང་སློབ་གྲྭ་འདིར་འབྱོར་བ་དང༌། ཁ་ཐུག་ཏུ་སློབ་སྤྱིའི་གཞུང་ལས་ཁང་དུ་སོང་སྟེ་སློབ་སྤྱི་ཨ་ཙ་ར་རིན་ཆེན་ཚེ་རིང་ཁོང་ལ་རང་ཉིད་ངོ་སྤྲོད་སྟབས་བདེ་ཞིག་བྱས་རྗེས། ཁོང་གི་སར་ནས་ནན་ཏན་གྱིས་སློབ་གྲྭ་འདིའི་བྱུང་རིམ་དང་སྤྱི་ཡོངས་ཀྱི་གནས་སྟངས། ཤེས་ཡོན་སྲིད་བྱུས་ཀྱི་གནས་བབ་བཅས་ལ་ཉན་པ་ཡིན་ལ། དེ་བས་ཀྱང་ངས་སློབ་སྤྱི་ཁོང་ལ་ང་རང་འཛིན་གྲྭ་ཁག་ཅིག་ཏུ་སོང་ནས། སློབ་ཕྲུག་ཚོའི་གཞི་རྩའི་ཤེས་ཡོན་གནས་སྟངས་དང༌། ཁོང་ཚོའི་བསམ་ཚུལ་ལ་ཉན་འདོད་ཡོད་སྐོར་ཞུས་ཏེ། ངེད་གཉིས་འཛིན་གྲྭ་བཅུ་པའི་ནང་ཕྱིན་སྐབས་སློབ་ཚན་ཁྲིད་བཞིན་པའི་སྒང་ཡིན་ན་ཡང༌། ངས་ཁོང་ཚོའི་ཉིན་གཅིག་གི་སློབ་ཚན་ལ་བར་ཆད་མི་གཏོང་ཐབས་མེད་དུ་གྱུར། ངས་སློབ་ཕྲུག་རེ་འགའི་བོད་ཡིག་དང་དབྱིན་ཡིག ཚན་རིག་དང་ཨང་རྩིས་སོགས་ཀྱི་སློབ་དེབ་ལ་བལྟས། ཁོང་ཚོའི་བསམ་ཚུལ་ལ་ཉན། ངས་སློབ་ཕྲུག་འགར་བསམ་ཚུལ་བསྡུ་ལེན་བྱེད་སྐབས་སློབ་ཕྲུག་བསྟན་འཛིན་ནོར་བུ་དང་བྱམས་པ་ཐེག་གཅོད། བྱམས་པ་བློ་གྲོས་གསུམ་གྱིས་བསམ་ཚུལ་གཅིག་པ་ཞིག་བཏོན། ཁོང་ཚོས་བརྗོད་རྒྱུར། བཙན་བྱོལ་གཞུང་གི་སློབ་གྲྭ་ཁག་ཏུ་ནམ་རྒྱུན་བོད་ཡིག་ལ་དོ་སྣང་ཡོད་མཁན་ཞིག་གིས་དགེ་རྒན་གྱིས་གང་བསླབ་པ་དང༌། སློབ་དེབ་སྟེང་དུ་གང་ཡོད་པ་རྣམས་བློ་ལ་མ་བཟུང་བར་རྒྱུན་ལྡན་གྱི་འབྲི་ཀློག་དང་ཤེས་བྱ་ཅི་ཙམ་ཤེས་ཀྱང༌། ཡིག་རྒྱུགས་སྐབས་ཡིག་ཚད་འཕྲོད་རྒྱུར་རེ་བ་ཆེན་པོ་མི་འདུག ཡིག་རྒྱུགས་སྐབས་སློབ་དེབ་བློར་བཟུང་སྟེ་ཕབ་བཤུ་བྱེད་མཁན་རྣམས་ལ་བརྒྱ་ཆ་ཡག་པོ་རེག་གི་འདུག་ཅེས་བརྗོད་སོང་ལ། བསམ་ཚུལ་དེ་དག་བརྗོད་སྐབས་ངས་ྋགོང་ས་མཆོག་གིས་ཉེ་ཆར་ངྷ་སྟེང་བོད་ཁྱིམ་སློབ་གྲྭའི་ལོ་འཁོར་མཛད་སྒོའི་སྟེང་བསྩལ་བའི་བཀའ་སློབ་དེ་སེམས་སུ་དྲན་ཞིང༌། གནད་དོན་དེར་དྲི་རྟགས་སྣ་ཚོགས་དང་ལྷན་དུ་འཛིན་ཁང་སྒོར་བུད་དེ། སློབ་སྤྱི་མཉམ་དུ་མུ་མཐུད་འཛིན་གྲྭ་དགུ་པའི་ནང་སོང་སྟེ་སློབ་ཕྲུག་རེ་འགའི་འབྲི་དེབ་ལ་ལྟ་ཞིབ་དང་བསམ་ཚུལ་ལ་ཉན་རྗེས་སྒོར་བུད། འབྲི་དེབ་ལ་ལྟ་སྐབས་ངས་སློབ་ཕྲུག་འགར་རང་ཉིད་ཀྱི་ཉིན་ཐོའི་འབྲི་དེབ་དང་ཡང་ན་རང་ཉིད་ཀྱིས་རྣམ་དཔྱོད་བེད་སྤྱད་དེ་བྲིས་པའི་རྩོམ་ཡིག་ཅིག་སྟོན་རྒྱུར་རེ་བ་བརྒྱབ་ཀྱང༌། ཚང་མས་རྩོམ་ཡིག་དང་ཉིན་ཐོ་འབྲི་བཞིན་ཡོད་མོད་གྲྭ་ཤག་མ་གཏོགས་འཛིན་ཁང་དུ་ཁྱེར་ཡོང་གི་མེད་ཅེས་ལན་འདེབས་བྱས་སྟབས། ང་ལ་སློབ་ཕྲུག་དེ་ཚོའི་རྩོམ་རྩལ་ལ་ལྟ་རྒྱུར་སྐལ་བ་མ་བྱུང༌། དེ་རྗེས་ངས་སློབ་སྤྱི་ལ་དམའ་རིམ་གྱི་འཛིན་གྲྭ་ཞིག་ཏུ་ཁྲིད་རྒྱུར་རེ་འདུན་ཞུས། ཁོང་གིས་ང་ཁྲིད་དེ་ངེད་གཉིས་སྐེས་འཛགས་ལས་མར་འབབ་སྐབས་ངས་སློབ་ཕྲུག་ཚོར་གོང་གི་བསམ་ཚུལ་དེ་ལྟ་བུ་ཞིག་འདུག དེའི་སྐོར་གསུང་རོགས་ཞེས་ཞུས། ཁོང་གིས། དེང་སྐབས་དེ་ལ་འགྱུར་བ་འགྲོ་བཞིན་ཡོད། སྔོན་ཆད་བོད་གཞུང་ཤེས་རིག་ལས་ཁུངས་ཀྱིས་གནང་བའི་སློབ་དེབ་ཁག་གཞིར་བཞག་སྟེ། སློབ་ཚན་ཁྲིད་པ་དང་ཡིག་རྒྱུགས་ལེན་བཞིན་ཡོད། ཡིན་ནའང༌། དེང་སྐབས་སྤྱིར་བཏང་ནས་འབྲི་ཀློག་ལ་གོམས་པ་ཞིག་ཡིན་ཚེ་ཕལ་ཆེར་ཁོའི་ཡིག་རྒྱུགས་འཕྲོད་རྒྱུར་འགོག་རྐྱེན་གང་ཡང་མེད་ཅེས་གསུངས་ཤིང༌། ཁོང་གི་གསུངས་ལན་དེས་སློབ་ཕྲུག་དེ་དག་གི་བསམ་ཚུལ་དེ་སློབ་གྲྭ་འདི་གཅིག་པུ་ཙམ་མིན་པར་བཙན་བྱོལ་གྱི་སློབ་གྲྭ་གཞན་དག་ལའང་ཁྱབ་འདུག་སྙམ། ད་དུང་སློབ་ཕྲུག་བྱམས་པ་བློ་གྲོས་འབོད་པས་བཙན་བྱོལ་སྤྱི་ཚོགས་ཁྲོད་ཀྱི་ཚགས་ཤོག་རྣམས་ཁ་ཕྱོགས་གཅིག་གི་འོག་ཏུ་འགྲོ་བཞིན་འདུག་ལ། ཀློག་པ་བོར་མཁོ་སྒྲུབ་བྱས་པའི་གསར་འགྱུར་དང་གནས་ཚུལ་རྣམས་གཅིག་མཚུངས་སུ་བཀོད་ཀྱིན་འདུག་སྟབས། གཅིག་ནས་གསར་ཤོག་ཁག་གི་མདུན་ལམ་ལ་འགོག་རྐྱེན་དང༌། གཉིས་ནས་ཀློག་པ་བོར་ཡང་གསར་ཤོག་ཚང་མའི་ནང་བཀླག་རྒྱུ་གཅིག་པ་ཞིག་ལས་ཡོང་གི་མི་འདུག་ཅེས་སྤྱིར་བཏང་གི་བསམ་ཚུལ་ཞིག་ཀྱང་བརྗོད་བྱུང༌།

  དེ་བཞིན་སློབ་གྲྭ་འདིས་བདག་ལ་བཙན་བྱོལ་བོད་གཞུང་གི་དམིགས་འདུན་ལས་བརྒལ་བའི་འཚོལ་སྙེག་ཅིག་བྱེད་ཀྱིན་འདུག་ཨང་སྙམ་པའི་ཚོར་བ་ཞིག་སྤྲད་པ་ནི། རྒྱ་ཡིག་རྒྱ་སྐད་སློབ་ཁྲིད་བྱེད་ཀྱིན་པ་དེ་རེད། ངས་སློབ་སྤྱིར་འདིའི་སྐོར་དྲིས། ཁོང་གིས་བོད་མི་རིགས་ཀྱི་འཐབ་རྩོད་ཁྲོད་དུ་རྒྱ་སྐད་རྒྱ་ཡིག་ནི་ངེས་པར་དུ་ཤེས་དགོས་ཤིང༌། སློབ་གྲྭ་འདིའི་སྦྱིན་བདག་གི་ཆ་ནས་ཀྱང་སློབ་མ་རྣམས་ཀྱི་རྒྱ་སྐད་རྒྱ་ཡིག་མ་ཤེས་ན་རྗེས་ཕྱོགས་འཛིན་སྐྱོང་གི་ལས་ཀར་དཀའ་ངལ་འཕྲད་ཀྱིན་འདུག་ཅེས་གསུངས།

སློབ་གྲྭ་འདིར་སྤྱི་ཡོངས་ཀྱི་ཆ་ནས་བཙན་བྱོལ་བོད་གཞུང་གི་སློབ་གྲྭ་གཞན་ལྟར། བྱ་རྒོད་པོ་ཞིག་ལ་གང་ཚང་བ་བྱེའུ་དར་མ་ཞིག་ལ་དེ་ཚང་འདུག་སྟེ། བོད་རྒྱ་དབྱིན་གསུམ་དང་ཚན་རིག ཨང་རྩིས་སོགས་ཀྱི་སློབ་ཚན་དང༌། ཚན་རིག་འཛིན་གྲྭ་དང་གློག་ཀླད། དཔེ་མཛོད། སྨན་ཁང་སོགས་སློབ་ཕྲུག་རང་རང་གིས་རྣམ་དཔྱོད་ཀྱི་རྩལ་དང་འབད་འབོངས་ཀྱི་རྒྱུན་བསྲིང་ཐུབ་ཚེ་མཐུན་རྐྱེན་ནི་མ་ཚང་བ་མི་འདུག ལྷག་པར་དུ་ངས་བློར་ཧ་ཅང་བབ་པ་ཞིག་ནི། ངས་སློབ་སྤྱི་ལ་དགེ་རྒན་བསྡུ་ལེན་བྱེད་སྟངས་སྐོར་དྲིས་སྐབས་ཁོང་གིས། བོད་ཡིག་གི་དགེ་རྒན་ལ་ལག་ཁྱེར་མེད་ཀྱང་ཤེས་ཡོན་གནས་ཚད་ལ་གཞིར་བཞག་བསྡུ་ལེན་བྱས་པ་ཡིན། དེ་ནི་གཙོ་བོ་གཞིས་ནས་འབྱོར་ཞིང་ལག་ཁྱེར་མེད་ནའང་བོད་ཡིག་ཤེས་ཚད་ཡག་པོ་ཡོད་མཁན་ལ་དམིགས་པས་ཡིན། ཡིན་ནའང༌། དེ་མིན་གྱི་སློབ་ཚན་ཚང་མར་ལག་ཁྱེར་དང་ཤེས་ཡོན་གཉིས་ཀར་གཞི་འཇོག་གི་ཡོད་ཅེས་གསུངས། མཇུག་མཐར་ངས་ཁོང་ལ་སློབ་གྲྭའི་ལོ་འཁོར་དུས་དེབ་དང་ཟླ་དེབ་ལྟ་བུ་སློབ་ཕྲུག་རང་ངོས་ནས་བྲིས་རྩོམ་ལ་ཚད་འཇམ་ཆེད་དེབ་འགའ་གནང་རྒྱུར་རེ་སྐུལ་ཞུས། ཁོང་གིས་ཀྱང་དེ་ལྟར་བོད་དབྱིན་གྱི་ལོ་དེབ་དང་ཟླ་དེབ་འགའ་གནང་སོང༌། དེ་ནི་ང་རང་བསྐྱོད་སའི་འཛིན་གྲྭ་དག་ལས་ངས་སློབ་ཕྲུག་ཚོའི་རྩོམ་རྩལ་འདི་རེད་ཅེས་པ་ཞིག་མ་མཐོང་བས་ཡིན། ཉིན་རྒྱབ་ཕྱིར་ལས་ཁུངས་སུ་ཡོང་སྟེ་ངས་ལོ་དེབ་དང་ཟླ་དེབ་དེ་དག་ལ་བམ་ཀློག་ཅིག་བྱས་རྗེས། སློབ་ཕྲུག་ཚོར་འཛིན་གྲྭ་ལྔ་བ་བར་སློབ་ཚན་ཡོངས་རྫོགས་བོད་ཡིག་ཐོག་འཁྲིད་ཀྱི་ཡོད་ནའང་བོད་དབྱིན་ལས་དབྱིན་ཡིག་གི་རྩོམ་ཡིག་འབྲི་མཁན་མང་ཞིང༌། འབྲི་རྩལ་ཡག་པོ་འདུག་པས་བོད་ཡིག་ལ་དབྱིན་ལས་དོ་སྣང་ཞན་པར་གསལ་སྟོན་བྱས་འདུག སྐབས་དེར་ངས་སློབ་སྤྱིས་དེང་སྐབས་ The Times Of India ཞེས་པའི་ཉིན་རེའི་གསར་ཤོག་དེ་སེ་ར་དགོན་པར་ཉིན་རེར་ཆིག་སྟོང་རེ་འགྲིམས་བཞིན་ཡོད་ཅིང༌། དེ་ནི་སེར་བྱེས་འབྲིང་རིམ་སློབ་གྲྭ་མཐར་ཕྱིན་པའི་སློབ་མ་རྣམས་ཀྱིས་ཉོ་བཞིན་ཡོད་ཅེས་གསུངས་པའི་ཚིག་དེ་ཡིད་ལ་དྲན་ཞིང༌། མང་ན་བཞི་བརྒྱ་ཙམ་ལས་མི་འགྲིམས་པའི་བོད་ཡིག་ཚགས་ཤོག་ཚོའི་ཉམ་ཆུང་བའི་གནས་སྟངས་དེ་ཡང་ཁག་མི་འདུག་སྙམ། 

འདི་གའི་གསར་འགོད་པ་ཨ་རིག་འགྱུར་མེད་ཀྱིས་རྒྱ་གར་ལྷོ་ཕྱོགས་ནས་བཏང་བའི་གནས་ཚུལ།