ཚོགས་ཆེན་སྟེང་གཞོན་ལྷན་གྱི་ངོས་འཛིན་དང་རེ་སྐུལ།

བོད་མིའི་དམིགས་བསལ་ཚོགས་ཆེན་སྟེང་བོད་ཀྱི་གཞོན་ནུའི་ལྷན་ཚོགས་ཀྱིས། བར་ལམ་བོད་ནང་གི་ཛ་དྲག་བྱུང་རྐྱེན་ལ་ཕུགས་རྐྱེན་དང་འཕྲལ་རྐྱེན་གཉིས་ཡོད་པའི་ངོས་འཛིན་དང༌། བོད་རང་བཙན་སླར་གསོའི་ཐོག་ནུས་ཤུགས་གཅིག་ཏུ་སྤུངས་ཤིང༌། འཐབ་རྩོད་ཀྱི་གོམ་སྟབས་མདུན་དུ་བསྐྱོད་དགོས་པའི་དུས་ལ་སླེབས་ཡོད་ཚུལ་དང༌། ད་ཡོད་སྤྱི་འཐུས་ཀྱི་སྒྲོམ་གཞིའི་ཐོག་ཆོལ་ཁ་དང༌། ཆོས་ལུགས་རིས་མེད་ཀྱི་ས་གནས་སྤྱི་འཐུས་དྲག་འདེམས་ཡོང་ཐབས་སོགས་དོན་ཚན་ ༦ འཁོད་པ་ཞིག་ཕུལ་ཡོད་འདུག

བོད་ཀྱི་གཞོན་ནུའི་ལྷན་ཚོགས་ལྟར་ན། བར་ལམ་བོད་ནང་གི་ཛ་དྲག་བྱུང་རྐྱེན་ནི་གཙོ་བོ་ནི་རྒྱ་གཞུང་གིས་བོད་ཀྱི་ལོ་རྒྱུས་ལ་བཙན་གནོན་དང༌། བོད་མིའི་ཆོས་དད་རང་དབང་བཙན་འཕྲོག འཚོ་གནས་ལ་དོ་ཕོག་སོགས་མདོར་ན། བོད་མི་རིགས་ཀྱི་མངོན་འདོད་དང་དགོས་མཁོ་ལས་ཡོངས་སུ་ཟློག་པའི་ངན་ཇུས་ཇེ་མཐོ་ཇེ་བཙན་དུ་བཏང་བར་བརྟེན། དེ་ལྟའི་བཙན་འཛུལ་དང་བརྙས་བཅོས་མ་བཟོད་པར་བོད་མི་རིགས་ལ་འོས་བབ་ཀྱི་མདུན་ལམ་སླར་གསོའི་སླད། རྒྱ་ནག་གི་དྲག་མཚོན་གྱི་སོ་ཁ་ནས་རང་སྲོག་བློས་གཏོང་གིས་ཞི་རྒོལ་ཡར་ལངས་བྱས་པ་རེད་ཟེར་ལ། ད་ཆ་འདི་དང་འབྲེལ་བའི་ཛ་དྲག་ཆེ་ཤོས་ཀྱི་གནད་དོན་དང་ལས་འགན་ནི། ད་སྐབས་རྒྱ་ནག་གི་བཙོན་འོག་ཏུ་གནས་བཞིན་པ་དང༌། བཙོན་འོག་ནས་གློད་གྲོལ་ཐོབ་ཀྱང་རྒྱ་ནག་གི་ཉེས་རྡུང་འོག་ནས་དབང་པོ་སྐྱོན་ཅན་དུ་གྱུར་པ། བཙོན་ནས་གློད་གྲོལ་བཏང་ཡང་སོ་སོའི་ས་གནས་སུ་མ་བཏང་བར་ས་གནས་གཞན་དུ་བཀག་སྐྱེལ་ངང་གནས་པ། མ་ཉེས་ཁ་གཡོགས་ཀྱིས་ཁྲིམས་མཐུན་མིན་པར་ལོ་དུས་རྒྱས་བཅད་དང་ཚེ་བཙོན་གྱི་ཁྲིམས་ཐག་བཅད་དང་གཅོད་བཞིན་པ། དེ་བཞིན་གར་སོང་ཆ་མེད་དུ་གྱུར་པ་སོགས་ཀྱི་གནས་སྟངས་ནི་ཧ་ཅང་བློ་འཚབ་ཀྱི་གནས་སུ་ཡོད་པས། ང་ཚོ་བཙན་བྱོལ་བོད་གཞུང་དང་ཚོགས་སྡེ་བོད་མི་སྒེར་བཅས་ནས་སོ་སོའི་རང་ནུས་ཡོད་རྒུས་ཁོང་ཚོའི་ཛ་དྲག་གནས་སྟངས་གསལ་འདོན་དང་མྱུར་སྐྱོབ་སླད། རྒྱལ་སྤྱིའི་གཡོ་འགུལ་རང་བཞིན་གྱི་ལས་དོན་བརྩམ་རྒྱུ་ནི་བཟང་སྤྱོད་ཀྱི་འོས་འགན་ཡིན་པ་མ་ཟད། མ་འོངས་བོད་དོན་འཐབ་རྩོད་ཀྱི་ལས་རིམ་ཁྲོད་ཧ་ཅང་གནད་འགག་ཆེ་བས། རྒྱལ་སྤྱིའི་སྲིད་གཞུང་དང༌། གྲོས་ཚོགས། འགྲོ་བ་མིའི་ཐོབ་ཐང་ཚོགས་པ་སོགས་རྒྱལ་སྤྱིའི་སྡེ་ཁག་དང་བརྒྱུད་ལམ་ཁག་ལ་བོད་ནང་གི་དངོས་དོན་ཁུངས་སྐྱེལ་གྱི་ལམ་ནས་བདེན་རྒྱབ་སྲོག་སྐྱོབ་ཀྱི་རྒྱབ་གནོན་དོན་ཕན་རང་བཞིན་ཐོབ་པར་རང་ནུས་རྩལ་འདོན་གྱིས་ལས་འགུལ་སྣ་མང་རྩོམ་སྤེལ་དགོས་ཚུལ་བརྗོད་ཡོད་པ་རེད། གཞན་ཡང་ཕུགས་རྒྱང་རིང་པོའི་ཉེན་ཚབ་དང་གདོང་ལེན་ཕྱོགས་བཤད་དོན། བོད་དང་བོད་མི་རིགས་ཀྱི་ངོ་བོ་དང་བཅས་པ་རྩ་མེད་བཟོ་བའི་སྲིད་བྱུས་དང་ལག་ལེན་ཁག་ལ་ཐུག་ཡོད་པ་མ་ཟད། རྒྱལ་གཅེས་ཆོས་གཅེས་ཟེར་བའི་ལས་འགུལ་དང༌། ནུབ་བརྒྱུད་ཐོན་འབྱེད་ཆེན་མོ། མེ་འཁོར་ལྕགས་ལམ་བཟོ་སྐྲུན། མི་སེར་སྤེལ་བའི་སྲིད་བྱུས། ཡིག་ཆ་ཨང་ལྔ་པ་ཟེར་བ་འགྲེམས་སྤེལ། ལྷག་པར་བོད་རྒྱལ་ཁབ་དང་བོད་མིའི་བླ་ན་མེད་པའི་དབུ་ཁྲིད་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་བོད་ཀྱི་སྐུ་ཚབ་གནང་བའི་ཐོབ་ཐང་མེད་ཟེར་བ་དང༌། དེ་བཞིན་རྒྱ་ནག་གིས་འགྲེམས་སྤེལ་བྱེད་པའི་ཡིག་ཆ་དཀར་པོ་སོགས་བོད་ཀྱི་ལོ་རྒྱུས་ཀྱི་གནས་བབ་སྤྱི་དང་བྱེ་བྲག་ཐད་འཁྱོག་བརྗོད་དང་བཙན་གྱིས་བཟོ་བཅོས་བྱས་པ་བཅས་ནི། ཕུགས་རྒྱང་རིང་པོའི་ཆ་ནས་བོད་ཀྱི་ངོ་བོ་དང༌། ཐོན་ཁུངས། མི་རིགས། ལོ་རྒྱུས་དང་བཅས་པའི་ཐད་ཧ་ཅང་ཉེན་འཚབ་ཆེ་བའི་གནད་དོན་ཤ་སྟག་ཡིན་པ་དང༌། འདི་ལོར་ཞི་རྒོལ་ཡར་ལངས་ཀྱི་བྱུང་རྐྱེན་གཙོ་བོའི་གྲས་ཀྱང་དེ་དག་ཡིན་པས། ང་ཚོ་རང་དབང་ལུང་པར་གནས་པའི་གཞུང་དང༌། ཚོགས་སྡེ་ཁག བརྒྱུད་ལམ་ཁག རྩོམ་པ་པོ་བཅས་ནས་ངེས་པར་གནད་དོན་དེ་དག་ཐད་དབྱེ་ཞིབ་དཔང་འཕེར་རང་བཞིན་གྱིས་ལན་འདེབས་ཐེར་འདོན་དང་གདོང་ལེན་དུས་ཐོག་དགོས་པ་ནི། བོད་ཀྱི་ད་ལྟ་དང་མ་འོངས་པའི་མདུན་ལམ་ཡིན་པ་མ་ཟད། ལྷག་པར་བོད་གཅིག་གྱུར་གྱི་བཙན་པོའི་མངའ་ཐང་འགོ་བཙུགས་པ་ནས་ད་བར་བོད་རྒྱལ་ཁབ་དང་མི་རིགས་ཀྱི་ཆེད་དུ་ཡོད་རྒུ་ལེགས་སྐྱེས་སུ་ཕུལ་བའི་རྒྱལ་གཅེས་དཔའ་བོ་དཔའ་མོ་ཚོའི་ཞལ་འཆེམས་ཐུགས་རེ་དང༌། བོད་ཀྱི་མི་རིགས་དང་ལོ་རྒྱུས་ཀྱི་བདེན་དོན་སྲུང་སྐྱོབ་བྱེད་པའི་འོས་འགན་ད་ལྟའི་མི་རབས་ཚོར་ཡོད་པས། དེ་དག་ཐད་ང་ཚོ་ཕྱོགས་ཚང་མས་འཛེམས་ཟོན་མེད་པར་ལན་འདེབས་དང་གདོང་ལེན་འཐབ་རྩོད་ངེས་པར་དུ་གནང་དགོས་ཞེས་འཁོད་ཡོད་པ་རེད།

རྒྱལ་སྤྱིའི་གནས་བབ་འོག་བོད་ཀྱི་རྩ་དོན་ཐད་བརྗོད་དོན། བོད་ཀྱི་རྩ་དོན་འཐབ་རྩོད་འདི་བཞིན་རྒྱུན་འཁྱོངས་ཡོང་བར་བཙན་བྱོལ་བོད་གཞུང་གིས་གཙོས་བཙན་བྱོལ་བོད་མིའི་སྒྲིག་འཛུགས་དང་སྤྱི་ཚོགས་སྲ་བརྟན་དགོས་རྒྱུ་ནི་ཧ་ཅང་གལ་ཆེན་ཡིན་པས། ད་ལྟའི་བོད་མི་མང་སྤྱི་འཐུས་ལྷན་ཚོགས་ཀྱི་སྒྲོམ་གཞིའི་ཐོག ཡོ་རོབ་དང་བྱང་ཨ་རིའི་སྤྱི་འཐུས་བཞིན་ས་གནས་གཞིས་སྒར་ཡོངས་ནས་ས་གནས་སོ་སོའི་མི་འབོར་ལ་གཞིགས་པའི་ཆོལ་ཁ་དང༌། ཆོས་ལུགས་རིས་མེད་ཀྱི་ས་གནས་སྤྱི་འཐུས་དྲག་འདེམས་ཡོང་བའི་ཐག་གཅོད་དང་འབད་རྩོན་ངེས་པར་དུ་གནང་དགོས། དེ་ལྟར་གནང་དགོས་པའི་རྒྱུ་མཚན་ནི། ད་ཆ་ས་གནས་ཁག་ཅིག་ཏུ་སྤྱི་འཐུས་གཏན་ནས་མེད་པ་དང་ས་གནས་ཁ་ཤས་ལ་སྤྱི་འཐུས་གསུམ་བཞི་ཡོད་པས། ས་གནས་ཁག་ཅིག་གི་གནས་ཚུལ་དང་དཀའ་ངལ་དངོས་དུས་ནས་དུས་སུ་དབུས་གྲོས་ཚོགས་དང་དབུས་འཛིན་སྐྱོང་ནང་སླེབས་དཀའ་བ་སོགས་ལ་བརྟེན། གོང་ཞུས་ས་གནས་ཀྱི་སྤྱི་འཐུས་ཡོང་ཐབས་དགོས་པ་ས་གནས་ཁག་གི་མི་མང་གི་རེ་འདུན་ཡིན་པ་དང༌། དེ་ལྟར་བྱུང་ཚེ་དབུས་གྲོས་ཚོགས་དང་འཛིན་སྐྱོང་ནང་ས་གནས་ཀྱི་གནས་སྟངས་སྤྱི་སྙོམ་གླེང་སློང་ཤེས་རྟོགས་ཀྱིས་མང་ཚོགས་ཀྱི་སེམས་འདུན་དང་ཡིད་ཆེས་གཞུང་དང་ཐག་ཉེ་རུ་འགྲོ་བ་དང་བཙན་བྱོལ་བོད་མིའི་སྒྲིག་འཛུགས་སྲ་བརྟན་ཡོང་བར་དགོས་ཕན་ཆེ་བས། ངེས་པར་འདིའི་ཐད་ཚང་མས་གུ་ཡངས་དཀྱེལ་ཆེས་འབད་རྩོན་གནང་དགོས་སྐོར་དང༌། གཞན་ཡང་ བཙན་བྱོལ་བོད་གཞུང་རྒྱལ་སྤྱིའི་སྲིད་གཞུང་ཁག་གིས་ངོས་ལེན་དང་ཁྲིམས་མཐུན་རང་བཞིན་དུ་གནས་ཐབས། ག༽ རྒྱལ་སྤྱིའི་གནས་བབ་འོག་བོད་ཀྱི་རྩ་དོན་བོད་རང་བཙན་ལ་ངོས་འཛིན་དང་རྒྱབ་སྐྱོར་གྱི་གནས་བབ། རྣམ་རིག་གྲུང་པོ་དང་བློ་སྟོབས་ཆེན་པོས་བོད་རང་བཙན་སླར་གསོའི་ཐོག་ནུས་ཤུགས་གཅིག་ཏུ་སྤུངས་ཤིང༌། འཐབ་རྩོད་ཀྱི་གོམ་སྟབས་མདུན་དུ་བསྐྱོད་དགོས་པའི་དུས་ལ་སླེབས་ཡོད་ཅེས་སོགས་བཀོད་ཡོད་པ་རེད།