བཙན་བྱོལ་བོད་མིའི་སྤྱི་ཚོགས་ནང་གི་རྩོམ་པ་པོ་གཉོམ་ཆུང་ཤོས་དང་། སྤྱི་ཚོགས་འདིའི་རྩ་བ་ལྟར་སྐྱེས་ཤིང་འཚར་བའི་མ་རྐང་གི་མི་རབས་ཐོག་མ་སྟེ། ད་ཆར་བཙན་བྱོལ་བོད་གཞུང་གི་མགྲིན་ཚབ་པའི་ཐུགས་འགན་བཞེས་མཁན་ཐུབ་བསྟན་བསམ་འཕེལ་ལགས་ཀྱི་བརྩམས་སྒྲུང་ཐོག་མ། འཛམ་གླིང་གི་ཡང་རྩེ་ནས་ཟེགས་པ། ཞེས་པ་དེ་ད་ཆར་དངོས་སུ་དཔར་སྐྲུན་གྱིས་འགྲེམ་འཚོང་གནང་མགོ་བཙུགས་ཡོད་འདུག
ཕྱི་ཚེས་ ༩ ཉིན་གྱི་ཕྱི་དྲོ་ཐུབ་བསྟན་བསམ་འཕེལ་ལགས་ཀྱིས་ཁོང་གི་ཡིག་ཚང་ནས་སྒྲུང་རྩོམ་འདིའི་སྐོར་ལ་གསུངས་དོན། ཐོག་མར་བརྩམས་སྒྲུང་འདིས་ཁ་བྱང་གིས་བསྟན་དོན་ལྟར། སྒྲུང་འདིའི་ནང་གི་བརྗོད་བྱ་གཙོ་བོ་ནི་བཙན་བྱོལ་བོད་མིའི་སྤྱི་ཚོགས་ནང་གི་མི་རབས་དང་པོ་སྟེ། ཕ་ཡུལ་བོད་ནས་སྐྱེས་མ་ཐག་གི་ཁ་མཚམས་དེར་གློ་བུར་དུ་ཁ་བྲལ་ཏེ་མིའི་ལུང་པར་འཐོར་མཁན་དག་གི་མི་ཚེའི་མྱོང་བ་དང་ཕུགས་བསམ་གྱི་སྐོར་ཡིན་ལ། འཛམ་གླིང་གི་ཡང་རྩེ་ནས་ཟེགས་པ་ཞེས་པའང་མི་རབས་འདི་དག་འཛམ་གླིང་གི་ཡང་རྩེར་སྐྱེས་མ་ཐག་མིའི་ལུང་པར་འཚར་ལོངས་བྱུང་དགོས་པའི་གནས་སྟངས་ཤར་ཞིང་། ཁོང་ཚོས་གནས་སྟངས་འདིའི་ཐད་རྩད་ཞིབ་བྱས་པའི་སྐོར་ཡིན་ཅེས་གསུངས་བྱུང་བས། སྒྲུང་འདིའི་ནང་དུ་བཙན་བྱོལ་བོད་མིའི་མི་རབས་དང་པོ་རྣམས་ཀྱིས་བོད་དོན་ཐད་འཁྱེར་བའི་རྣམ་འགྱུར་དང་། དཔྱད་ཞིབ། རྩོད་སྒྲུབ་བཅས་བྱས་པའི་སྐོར་བྲིས་ཡོད་འདུག
ཐུབ་བསྟན་བསམ་འཕེལ་ལགས་ཀྱིས་གསུངས་དོན། བརྩམས་སྒྲུང་འདིའི་ནང་གི་མི་སྣ་གཙོ་བོ་ནི་ལྡི་ལི་མཐོ་སློབ་ནས་ཡིན་པའི་བཀྲ་ཤིས་ཞེས་པ་ཞིག་ཡིན་ལ། ཁོང་ནི་མཐོ་སློབ་དེར་བོད་ཀྱི་དམར་ཤོག་ཚོགས་པ་རྩ་འཇུགས་བྱེད་མཁན་གྲས་དང་ཚོགས་པ་དེའི་ཚོགས་གཙོ་ཡིན་ལ། ཁོང་ཚོས་བོད་འདི་དམར་པོའི་རིང་ལུགས་ཀྱིས་བཙན་བཟུང་བྱས་སྟབས། བོད་རྒྱ་ནག་གི་འོག་ནས་བཅིངས་འགྲོལ་གཏོང་དགོས་ནའང་དམར་ཤོག་གི་མཚོན་ཆ་དེ་རང་བེད་སྤྱོད་གཏོང་དགོས་པའི་ཡིད་ཆེས་དང་རྩོད་སྒྲུབ་བྱས་ཏེ་ཚོགས་པ་དེ་བཙུགས་པ་དང་། རྗེས་སུ་བཀྲ་ཤིས་ཁོང་གྲུབ་ཆེན་རིན་པོ་ཆེ་ཞུ་བ་ཞིག་གིས་བོད་ཀྱི་བླ་ཆེན་ཞིག་གི་ཡང་སྤྲུལ་དུ་ངོས་འཛིན་བྱས་སྟབས། བཀྲ་ཤིས་ཀྱིས་དམར་པོའི་རིང་ལུགས་དང་བོད་མིའི་སྲོལ་རྒྱུན་གྱི་ཕྱོགས་གང་ཞིག་འདེམ་པར་བསམ་བློའི་འགལ་འདུ་བྱུང་བའི་སྐོར་ཡང་བྲིས་ཡོད་འདུག
ཐུབ་བསྟན་བསམ་འཕེལ་ལགས་ཀྱི་བརྩམས་སྒྲུང་འདི་ནི་བཙན་བྱོལ་བོད་མིའི་མི་རབས་དང་པོའི་གྲས་ཀྱི་བརྩམས་སྒྲུང་ཐོག་མ་མིན་ན། བརྗོད་གཞི་ངེས་ཅན་གྱི་སྟེང་ནས་དེ་ལྟར་ཡིན་ཏེ། འདིའི་ཐད་ཁོང་གིས་གསུངས་དོན། ངའི་བརྩམས་སྒྲུང་འདི་ནི་བཙན་བྱོལ་བོད་མིའི་སྒྲིག་འཛུགས་དང་། གྲུབ་ཆའི་ཐད་ཞིབ་ཚགས་པོ་དང་། མི་རབས་འདི་དག་གི་ཉམས་མྱོང་སྐོར་ཞིབ་ཆའི་སྒོ་ནས་བྲིས་པའི་བརྩམས་སྒྲུང་ཐོག་མ་ཡིན་པ་འདྲ་ཞེས་གསུངས་བྱུང་།
གོང་དུ་གླེང་བ་བཞིན། ཐུབ་བསྟན་བསམ་འཕེལ་ལགས་ནི་བཙན་བྱོལ་སྤྱི་ཚོགས་ནང་འཚར་ལོངས་བྱུང་བའི་དབྱིན་ཡིག་གི་ཤེས་ཚད་མཐོ་ཤོས་ཀྱི་གྲས་ཡིན་པ་ཡོངས་གྲགས་ལྟར། ཁོང་ཉིད་ནི་མ་གཞི་ནས་སྤྱི་ཚོགས་འདིའི་ནང་གི་རྩོམ་པ་པོ་གཉོམ་ཆུང་ཞིག་ཡིན་ལ། ཁོང་གིས་དུས་ནས་དུས་སུ་ངྷ་སའི་ཉིན་ཐོ་དང་བོད་འབྲེལ་གྱི་ཆབ་སྲིད་དཔྱད་བརྗོད་སོགས་དབྱིན་ཡིག་ནང་བྲིས་ཏེ་ཕྱི་རྒྱལ་དང་བཙན་བྱོལ་བོད་མིའི་གསར་ལམ་ཁག་བཅས་སུ་འགྲེམ་སྤེལ་བྱས་དང་བྱེད་མུས་ཡིན་ལ། ཁོང་གི་བརྩམས་སྒྲུང་། འཛམ་གླིང་གི་ཡང་རྩེ་ནས་ཟེགས་པ། ཞེས་པའི་དཔེ་དེབ་དེ་ད་ཆར་ལྡི་ལིར་ཡོད་པའི་རུ་པ་དཔེ་སྐྲུན་ཁང་གིས་འགྲེམ་སྤེལ་བྱས་ཡོད་ལ། དེབ་དེར་ཤོག་ངོས་ ༣༡༨ དང་། རིན་གོང་ཧིན་སྒོར་ ༢༦༦ བྱས་ཏེ་བཙོང་གི་ཡོད་པ་རེད།
ཁ་བ་དཀར་པོ་རླུང་གིས་འདེད་དེ་གནམ་ལ་ཟེགས་ཀྱི་ཡོད་ན་མ་གཏོགས་ཆར་པའི་ཆུ་དང་ཐེགས་པ་ས་ལ་འཐོར་གྱི་འདུག་གོ།
ང་ཚོས་དྲ་ཐོག་ནས་དྲི་བ་དྲིས་ན། རྩོམ་པ་པོ་ཁོང་གིས་ལན་གནང་མདོག་ཁ་བོ་རེད་དམ། དེ་མིན་ན་གསརའགོད་པས་ཀློག་པ་པོ་རྣམས་ཀྱི་དྲི་བ་ཁྱེར་ནས་རྩོམ་པ་པོར་འདྲི་ཐུབ་གི་ཡོད་དམ།
ཟེགས་པ་ནི་མར་ལྷུང་བ་ལའང་གོ་ཆོག་པས་རྩོམ་སྒྲིག་པས་བྲིས་གནང་བ་འགྲིག་འདུག
བོད་ས་མཐོ་འཛམ་གླིང་གི་ཡང་རྩེ་ནས་བོད་མི་རིགས་འདི་བོད་ས་ལས་དམའ་བའི་ས་ཕྱོགས་གཞན་དུ་མར་ཟགས་སོང་བ་མ་རེད་དམ། བོད་ཀྱི་ཆུ་བོ་ཆེན་པོ་དག་བོད་ས་ནས་མར་བཞུར་བཞིན་པ་མ་རེད་དམ། མར་ལ་ཟགས་དང་ཡར་ལ་ཟེགས་འབྲི་དགོས་པ་མ་ཡིན་ནམ། བོད་པ་འདི་ཚོ་འཛམ་གླིང་ས་མཐོ་ནས་ད་དུང་དེ་ལས་མཐོ་སའི་གང་ཞིག་ཏུ་ཟེགས་སོང་བ་རེད། ས་མཐོའི་ཡུལ་ནས་མར་ས་ཕྱོགས་གང་སར་ཟགས་པ་འམ་འཐོར་བ་རེད། དབྱིན་སྐད་fallingནི་བྱེད་ཚིག་ཟགས་བཞིན་པ་ལ་གོ་དགོས་འདི་ལ་རྩོད་པ་ཅི་ཞིག་འདུག གསལ་བོར་བཤད་ན་ཟེགས་ནི་གྱེན་ལ་འཐོར་བ་དང་ཟགས་ནི་མར་ལ་འཐོར་བ་ལ་གོ་བས། བོད་པ་ཚོ་འཛམ་གླིང་གི་ཡང་སྟེང་ནས་གྱེན་ལ་འཐོར་བ་རེད་དམ་ཡང་ན་མར་ལ་འཐོར་བ་རེད།
ཁ་བ་དཀར་པོ་ལགས། ཟེགས་པ་ཞེས་འབྲི་མཁན་ང་རང་ཡིན། Falling ཞེས་པ་དང་མི་རབས་འདི་དག་སོ་སོའི་ལུང་པ་ནས་ཕྱི་རྒྱལ་ཁག་ཏུ་ཁ་འཐོར་དུ་ཕྱིན་པ་ཞིག་བཤད་འདུག་སྟབས། ཟེགས་ཞེས་བྲིས་ན་འགྲིག་པར་འདོད་ཡོད། འདི་རྩོམ་པ་པོ་གྱི་སྐྱོན་མིན། ཡིན་ཡང་། ཟེགས་ལས་ཟགས་འགྲིག་དོན་ཅི་ཡིན་ནམ།
ཟེགས་པ་ཟེར་ན་གོ་རྒྱུ་མེད། ཟགས་པ་ཡིན་རྒྱུ་རེད། དེབ་མིང་གཅིག་གི་དག་ཆ་ལ་ཡང་གཟབ་གཟབ་གནང་མི་ཐུབ་བམ།
བོད་པ་ཚང་གི་ཤེས་ཡོན་པ་ཉམ་ཆུང་འདི་ཚོས་བོད་རང་གི་ལོ་རྒྱུས་རང་རིགས་ཀྱི་སྐད་ཡིག་ཐོག་དུ་མི་འབྲི་བ་འདི་ནི་དངོས་ནས་ཡིད་སྐྱོ་བ་ཞིག་རེད། གཞན་ཡིག་སྤྱོད་པས་བོད་པ་ཉམ་ཆུང་འདི་ཚོས་བོད་ཡིག་ལ་རིན་ཐང་ཞིག་ཡོང་གི་མི་འཇུག་དོན་གང་ཡིན་ན། ཨ་ཤུ་རེ་གོ བོད་པ་ཚང་གི་ལོ་རྒྱུས་དང་འབྲེལ་བ་ཡོད་པ་རེ་དེབ་གཟུགས་སུ་བསྐྲུན་ན་ཡང་། བོད་པ་ཚང་གི་གོ་སྐལ་དུ་མི་འགྲོ་བ་འདི་གནད་དོན་ག་རེ་ཡིན་ནམ། དྲ་གྲོགས་ཚོ་ག་རེ་དགོངས་ཀྱི་འདུག
བཅོས་སྒྲུང་འདིའི་ནང་དུ་ཁོང་གིས་གཞུང་འབྲེལ་གྱི་གནད་དོན་མང་པོ་ཞིག་བཤད་མ་ཤེས་པར་བཅོས་སྒྲུང་གི་རྣམ་པར་སྤེལ་བ་དེ་འདྲ་ཡོད་མེད་ཤེས་སོང་ངམ། དེབ་འདི་བོད་ཡིག་གི་ནང་དུ་མེད་པ་དེས་ང་ཚོའི་ཁ་བཀག་འདུག དབྱིན་ཡིག་གི་ནང་ནས་བཀླགས་ཚར་པ་འདྲ་ཡོད་དམ།
འདི་ནི་སྟོང་ཆ་ཞིག་བསྐངས་པ་རེད། ལྷག་པར་དུ་དགའ་ལྡན་ཕོ་བྲང་ཚང་གི་མགྲིན་ཚབ་པས་བརྩམས་སྒྲུང་ཞིག་བྲིས་ཡོད་པ་དང་། དེ་ཡང་རྒྱལ་བ་རིན་པོ་ཆེའི་རྗེས་སྙེག་ནས་བྲོས་པའི་མི་རབས་དང་པོ་དེ་ཡིན་སྟབས། དེབ་འདི་ལ་རིན་ཐང་སྣ་ཚོགས་ཤིག་ཡོད་པ་འདྲ། ང་ཚོས་འདིའི་ཐོག་ལ་ལྟ་ཞིབ་ནན་ཏན་བྱེད་དགོས་ཀྱི་འདུག ཆེད་ལས་རྩོམ་རིག་ལ་ཉམས་ཞིབ་གནང་མཁན་དང་། སྤྱི་ཚོགས་ལ་ཉམས་ཞིབ་བྱེད་མཁན། ཆབ་སྲིད་ལ་ཉམས་ཞིབ་བྱེད་མཁན་བཅས་ཚང་མར་རྒྱུ་ཆ་ཞིག་ཁ་སྐོང་བྱས་འདུག
ཁོང་ལ་གཉོམ་ཆུང་ཞེས་བོས་པ་དེ་གསར་འགོད་པ་ཞིག་གི་ངོས་ནས་བཤད་ན་ནོར་འཁྲུལ་གྱི་ཆ་ཡིན་ངེས། འོན་ཀྱང་། དངོས་ཡོད་ལ་བསྟུན་ན་ཁོང་ཉིད་ཀྱི་མི་གཤིས་དབང་གིས་གངས་སྐྱིད་ཀྱི་མི་སུས་ཀྱང་ཁོང་ལ་འདི་ལྟའི་ལྟ་སྟངས་དང་གདེང་འཇོག་ཅིག་བྱེད་གི་ཡོད་པས་དེ་ལྟར་བྲིས་པ་ལགས། དེ་མིན་གྱི་རྒྱུ་མཚན་གཞན་མེད།
བསམ་འཕེལ་ལགས་ཀྱིས་ཀྱང་ཁོང་གི་བརྩམས་སྒྲུང་འདི་བོད་ཡིག་ནང་སྒྱུར་རྒྱུར་རེ་བ་རྒྱག་གི་འདུག་ལ། དེ་བཞིན་དུ་རྒྱ་ཡིག་གི་ནང་དུའང་བསྒྱུར་ཐུབ་ན་བསམ་གི་འདུག་ཅེས་ཁོང་གིས་གསུངས་སོང་།
གནས་ཚུལ་བཀོད་མཁན་ལགས། ཁྱོད་ཀྱི་རྩོམ་པ་པོ་གཉོམ་ཆུང་ཤོས་ཞེས་བརྗོད་འདུག རྒྱུ་མཚན་གྱི་ཞིག་ལས་གཉོམ་ཆུང་ཞིག་ཡིན་པ་ངོས་འཛིན་བྱེད་ཀྱི་ཡོད?
བརྩམས་སྒྲུང་འདི་འདྲ་ཞིག་བྲིས་པས་དགའ་བསུ་ཡོད། འོན་ཀྱང་། རྩོམ་པ་ཁོང་གིས་བོད་ཡིག་ཤེས་ཀྱི་ཡོད་ན་བོད་ཡིག་སྟེང་དུ་བསྒྱུར་ན་དངོས་ནས་ཡག་པོ་འདུག དེ་མིན་བོད་ཀྱི་ཀྱོག་མཚམས་ཀྱི་ལོ་རྒྱུས་འདི་ཤེས་དགོས་མཁན་དེ་ནི་བོད་ཀྱི་མི་རབས་འདི་དག་ཡིན་པ་ལས། དབྱིན་ཇིའི་མགོ་སེར་དེ་དག་མིན། བོད་མིས་བོད་མིའི་སྐྱིད་སྡུག་ཤེས་ན་ད་གཟོད་རེ་བ་ནས་བརྩོན་པ་བྱེད་རྒྱུར་ཕན་དོག་ཡོད་ངེས་རེད། གལ་ཏེ། རྩོམ་པ་པོ་ཁོང་གིས་བོད་ཡིག་ལ་བསྒྱུར་ཐུབ་ཀྱི་མེད་ན། བསྒྱུར་བ་བོ་ཞིག་གིས་གང་མགྱོགས་བོད་ཡིག་དུ་བསྒྱུར་ན་ཡག་པོ་རེད། བོད་ཡིག་ཕྱུག་པོ་བཟོ་དགོས་པ་ལས། དབྱིན་ཡིག་ཕྱུག་རྒྱུ་མང་དྲགས་མེད་ན་དབུལ་དྲགས་མེད། བོད་ཡིག་ཧ་ཅང་དབུལ་བོ་ཡིན་སྟབས། ཚང་མས་བོད་བསྒྱུར་བྱེད་རྒྱུར་བརྩོན་པ་བརྟེན་དགོས།