ཧུའུ་ལ་ཕུལ་བའི་ཞུ་ཡིག

རྒྱལ་སྤྱིའི་རྩོམ་པ་པོ་དང་ཤེས་ཡོན་པ། ཞི་བདེའི་ལས་འགུལ་བ། འགྲོ་བ་མིའི་ཐོབ་ཐང་རྩོད་ལེན་པ་སོགས་མི་སྣ་སྐད་གྲགས་ཅན་སྐོར་ཞིག་གིས་ཉེ་སྔོན་བཙོན་འོག་ཏུ་ཚུད་པའི་རྒྱ་རིགས་རྩོམ་པ་པོ་སྐུ་ཞབས་ལུའུ་ཞོའོ་པོ་ལགས་ཆ་རྐྱེན་གང་ཡང་མེད་པའི་འོག མགྱོགས་མྱུར་གློད་དགོས་པའི་ཡི་གེ་ཞིག་སྲིད་འཛིན་ཧུའུ་ལ་ཕུལ་ཡོད་འདུག

ཕྱི་ཚེས་ ༢༣ ཉིནགོང་གསལ་མི་སྣ་དག་གིས་སྐུ་ཞབས་ལུའུ་མཆོག་ མགྱོགས་པོར་གློད་དགོས་པའི་ཡི་གེ་དེ་སྲིད་འཛིན་ཧུའུ་ཅིན་ཐའོ་ལ་ཕུལ་ཡོད་ཅིང༌། ཡི་གེ་དེའི་ནང་བཀོད་དོན། ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་སྲིད་འཛིན་ཡིན་པའི་ཆ་ནས། ཁྱེད་ཀྱིས་དུས་རྟག་ཏུ་རྒྱ་ནག་གི་ཁྲིམས་མཐུན་རྩ་འཛུགས་ནི་སྤྱི་ཚོགས་བདེ་འཇགས་ཀྱི་སྲུང་སྐྱོབ་དང་དངོས་ཡོད་རྩ་བར་བཟུང་ནས་ཁྲིམས་ལུགས་དར་སྤེལ་གཏོང་རྒྱུ་ཡིན་ཚུལ་སྒྲོག་བཞིན་པ་ལྟར། མི་མང་གི་གཞི་རྩའི་ཐོབ་ཐང་ལ་བརྩི་བཀུར་དང་་ཞི་བའི་སྒོ་ནས་བསམ་ཚུལ་སྤེལ་ མཁན་ལ་སྲུང་སྐྱོབ་བྱེད་པའི་འབོད་སྐུལ་ཞུ་རྒྱུ་ཡིན། ཞེས་དང༌། སྐུ་ཞབས་ལུའུ་ཡིས་རྒྱ་ནག་གི་རྩ་ཁྲིམས་དང་འགལ་བའི་ནག་ཉེས་ཅི་ཡང་བསགས་མེད་ཅེས་བཀོད་འདུག

སྐུ་ཞབས་ལུའུ་ནི་རྒྱ་ནག་ནང་འགྲོ་བ་མིའི་ཐོབ་ཐང་དངརང་དབང༌། དམངས་གཙོ་བཅས་གོང་སྤེལ་གཏོང་དགོས་པའི་ཐད་ཀྱི་ཡིག་ཆ་ རྩ་ཁྲིམས་ ༠༨ ཞེས་པར་ མིང་རྟགས་ཐོག་མར་འགོད་མཁན་གྱི་གྲས་ཡིན་པ་དང༌། ཁོང་ནི་རྩོམ་རིག་དཔྱད་བརྗོད་པ་དང་ཆེད་ལས་རྩོམ་རིག་གི་སློབ་དཔོན་ཟུར་བ་ཞིག་ཡིན་འདུག སྤྱི་ཟླ་ ༡༢ པའི་ཚེས་ ༨ ཉིན་སྐུ་ཞབས་ལུའུ་ཁོང་གི་སྡོད་གནས་ནས་ཉེན་རྟོག་པས་བཙན་ཁྲིད་བྱས་ཡོད། དེ་ནི་རྒྱ་ནག་གི་ཀེའུ་ཀྲུའུ་ཞིང་ཆེན་ནང་ཐོབ་ཐང་གི་ཆེད་དུ་ལས་འགུལ་གཉིས་སྤེལ་འཆར་ཡོད་པའི་ཉིན་གཉིས་ཀྱི་སྔོན་དུ་འཁེལ་ཡོད་འདུག

སྔོན་མ་སྐུ་ཞབས་ལུའུ་ལ་ལོ་གསུམ་གྱི་རིང་ངལ་རྩོལ་བསྒྱུར་བཀོལ་བྱས་སྐབས་ཏེ། སྤྱི་ལོ་ ༡༩༩༦ ལོའི་སྤྱི་ཟླ་ ༩ ཚེས་ ༣༠ ཉིན་ཁོང་གིས་རྒྱ་ནག་གི་སྐབས་དེའི་སྲིད་འཛིན་ཅང་ཙེ་མིན་གྱི་མིང་ཐོག་ལ་ཡི་གེ་ཞིག་ཕུལ་ཡོད་པ་དང༌། ཡི་གེ་དེའི་ནང་དུ་བོད་ཀྱི་གནད་དོན་འདི་རང་ཐག་རང་གཅོད་ཀྱི་ལམ་ལ་འགྲོ་བར་རྒྱབ་སྐྱོར་གནང་ཡོད་ལ། རྒྱ་ནག་གཞུང་གིས་༧གོང་ས་མཆོག་དང་ཞི་བའི་གྲོས་མོལ་གནང་རྒྱུར་འབོད་སྐུལ་ཞུས་ཡོད། སྐུ་ཞབས་ལུའུ་མཆོག་ནི་བོད་ཕྱོགས་ལ་ལངས་ནས་སྐད་ཆ་ཤོད་མཁན་གྱི་རྒྱ་རིགས་ཐོག་མ་དེ་ཡིན་འདུག 

ནེའུ་ཡོག་ཏུ་ཡོད་པའི་འགྲོ་བ་མིའི་ཐོབ་ཐང་ལྟ་རྟོག་ཚོགས་པས་གནས་ཚུལ་སྤེལ་བ་ལྟར་ན། སྐུ་ཞབས་ལུའུ་མཆོག་བཀག་ཉར་བྱས་པ་ནི་གཞི་མེད་དང་རྒྱ་ནག་གི་རྩ་ཁྲིམས་ལ་འགལ་ཡོད་པ་དང༌། ཁོང་བཟུང་རྗེས༌། རྩ་ཁྲིམས་ ༠༨ ལ་མིང་རྟགས་འགོད་མཁན་ ༣༠ ལྷག་ཉེན་རྟོག་པས་འདྲི་བརྩད་དང་ལྟ་རྟོག་གི་འོག་ཡོད་འདུག

ཨེ་ཤ་ཡ་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་ཚོགས་གཙོ་སྐུ་ཞབས་བྷུ་རེན་ཨཱེ་ཌམ་སི་ཡིས། སྐུ་ཞབས་ལུའུ་ནི་རྒྱ་ནག་གི་ལོ་བཅུའི་ནང་ཚུན་དུ་གཞུང་དང་ལྟ་བ་མི་མཐུན་པའི་ཚབ་མཚོན་མི་སྣ་ཞིག་ཆགས་ཡོད་པ་དང༌། ཁོང་བཟུང་བ་ནི་གཞུང་དང་ལྟ་བ་མི་མཐུན་མཁན་ མང་པོར་ཉེན་ཁ་ཡོད་པའི་བརྡ་རུ་གྱུར་ཡོད། ཅེས་བཤད་འདུག