གནམ་འོག་འདི་འདྲ་མཉམ་ནམ་ཡང་ཡོང་མི་སྲིད་དོ།

མི་ཚང་མ་ཉལ་འདུག ད་ནི་མཚན་དཀྱིལ་གཡོལ་ནས་ཆུ་ཚོད་དང་བོ་རེད། མི་མང་བོ་ཞིག་རང་རང་གི་ཆུང་མའི་མཉམ་དུ་སྐྱིད་པོ་གཏོང་བཞིན་པའི་སྐབས་ཤིག་ཀྱང་རེད། མི་མང་བོ་ཞིག་རྨི་ལམ་གྱི་ཞིང་དུ་ཡོད། མི་མང་བོ་ཞིག་སྙིང་ཉེ་དང་མཛའ་མོ་མེད་པར་ཁེར་རྐྱང་གི་ཚོར་བ་ལ་འཐམ་ནས་འཇིག་རྟེན་འདིའི་སྟེང་གི་ཚོར་བ་ཆེས་སྐྱུར་ཤོས་དེ་ལ་རོལ་བཞིན་ཡོད། མི་མང་བོ་ཞིག་ཉེས་མེད་དུ་བཙོན་ཁང་དུ་འཁྱག་ལྟོགས་གཟེར་གསུམ་གྱི་སྡུག་བསྔལ་མྱོང་བཞིན་ཡོད། མི་མང་བོ་ཞིག་ར་བཟི་ནས་ཀུ་རིང་འདེབས་པ་དང་སྙིང་གཏམ་གླེང་བཞིན་ཡོད། མི་མང་བོ་ཞིག་སྐྱེ་བཞིན་ཡོད་ལ་འཆི་བཞིན་ཡོད། མི་མང་བོ་ཞིག་རྒུད་བཞིན་ཡོད་ལ་དར་བཞིན་ཡོད། མི་མང་བོ་ཞིག་གློག་ཀླད་ཀྱི་གྲོང་ཚོ་ན་འཁྱམ་བཞིན་ཡོད། མི་མང་བོ་ཞིག་གི་གློག་བརྙན་ལ་བལྟ་བཞིན་ལ་དེབ་ཀློག་བྱེད་བཞིན་ཡོད། མི་མང་བོ་ཞིག་གི་བཟའ་འཁོན་བྱེད་བཞིན་ཡོད་ལ་འཐོར་བཞིན་ཡོད། མི་མང་བོ་ཞིག་གི་མཚན་མོའི་ཞབས་བྲོ་རྒྱག་བཞིན་ཡོད་ལ་གླུ་དབྱངས་དང་ཞབས་བྲོ་འཁྲབ་བཞིན་ཡོད། མི་མང་བོ་ཞིག་གི་ནང་མི་དང་ཉེ་དུ་འབོར་བཞིན་ཡོད་ལ་ཟོས་གོས་གནས་མལ་མེད་པར་འཚོ་བཞིན་ཡོད། མི་མང་བོ་ཞིག་གི་རྐུན་ཇག་འཕྲོག་གསུམ་བྱེད་མཁན་ཡིན་ལ་མི་གཤིས་མེད་མཁན་ཡིན། མི་མང་བོ་ཞིག་ལ་ཟས་གོས་མོད་དྲགས་ནས་ཆུད་ཟོས་སུ་གཏོང་བཞིན་ཡོད་ལ་དངུལ་སྒོར་གྱི་གྲངས་ཀ་རང་གི་མི་ཤེས་པ་ཡོད་ཀྱང་མེད་མུག་འདོན་བཞིན་ཡོད། མི་མང་བོ་ཞིག་ལ་ལག་དངུལ་སྒོར་རྡོག་ཁ་ཤས་ལས་མེད་ཀྱང་སེམས་ནང་དུ་ཕྱུག་སྣང་གི་འཚོ་བཞིན་ཡོད། མི་མང་བོ་ཞིག་གིས་རྟག་དུ་མི་ལ་སྐྱོན་བརྗོད་ཁོ་ན་བྱེད་པར་གོམ་ཡོད་པ་ལས་རང་སྐྱོན་ལ་བརྟག་དཔྱད་བྱེད་རྒྱུའི་གོམ་གཤིས་མེད། མི་མང་བོ་ཞིག་གི་རང་ཉིད་ཀྱི་སྐྱོན་ཆ་དག་དེར་བྱེད་བཞིན་དུ་རང་གི་འགྲོ་འདུག་སྤྱོད་གསུམ་ཀུན་དང་མཐུན་པ་བྱེད་ཀྱི་ཡོད། མི་མང་བོ་ཞིག་ལ་ནམ་ཡང་ཆོག་ཤེས་མེད་ལ་ནམ་རྒྱུན་དུ་འཚེ་བ་བྱེད་རྒྱུར་བྱང་ཡོད། མི་མང་བོ་ཞིག་གི་རང་མ་གཏོགས་གཞན་ལ་བསམ་བློ་གཏོང་མི་ཤེས་ལ་བརྩི་བཀུར་དང་ཁྲེལ་གཞུང་མེད། མི་མང་བོ་ཞིག་ལ་བརྩེ་དུང་དང་བྱམས་བརྩེ་ལྡན་ལ་ཁྲེལ་གཞུང་དང་ཕྱི་ཐག་འདུག མི་མང་བོ་ཞིག་ལ་རང་ལས་གཞན་ལ་བརྩི་བཀུར་དང་འཛུམ་འདང་སྟོན་ལ་སེམས་ནང་དུ་རྒྱུ་ནོར་ལ་རིན་ཐང་མི་འཇོག མི་མང་བོ་ཞིག་གི་ཞི་བདེ་དང་དྲང་བདེན་ལ་དགའ་ཞིང་ཁ་ཡོད་ལག་ཡོད་ཡིན། མི་མང་བོ་ཞིག་སྙིང་རུས་དང་བརྩོན་སེམས་ཆེ་ལ་སྙན་ངག་འབྲི་ཞིང་རྩོམ་ཡིག་སྤེལ། མི་མང་བོ་ཞིག་ལེ་ལོ་ཆེ་ལ་ལོ་ཟླ་ཆུད་ཟོས་བྱེད་ཀྱི་ཡོད། མི་མང་བོ་ཞིག་ཀློག་པ་པོ་དང་ནམ་ཡང་ཁུ་སིམ་དང་ལྷིང་འཇག་ཡིན། མི་མང་བོ་ཞིག་སྨན་བཙོང་ཡིིན་ལ་སྒོར་མོ་ལས་བརྩེ་བ་འཚོལ་མཁན་ཡིན། མི་མང་བོ་སྨྱོན་པ་ཡིན་ལ་སྐད་ཆ་གང་ཡང་བཤད་སྲིད་པ་ཡིན། མི་མང་བོ་ཞིག་རྐང་ཐང་ཡིན་ལ་རླངས་འཁོར་གཏོང་མཁན་ཡང་ཡོད། མི་མང་བོ་ཞིག་གནམ་གྲུ་གཏོང་མཁན་ཡིན་ལ་ལས་བྱེད་ཀྱང་ཡིན། མི་མང་བོ་ཞིག་གསར་འགོད་པ་ཡིན་ལ་འཁྲབ་སྟོན་པ་ཡང་ཡིན། མི་མང་བོ་ཞིག་རང་ཤི་རྒྱག་མཁན་ཡིན་ལ་གཤེད་མ་ཡང་ཡིན། མི་མང་བོ་ཞིག་གཞན་བརྟེན་པ་ཡིན་ལ་རང་གི་རྐ་ལག་ལ་འགུལ་བསྐྱོད་མི་གཏོང་། མི་མང་བོ་ཞིག་གྲ་བ་དང་བཙུན་མ་ཡིན་ལ་ཆོས་ལུགས་ཁ་ལ་འཁྱེར་མཁན་ཡང་ཡིན། མི་མང་བོ་ཞིག་ཁྲིམས་དཔོན་ཡིན་ལ་ཁྲིམས་མེད་ལུགས་མེད་བྱེད་མཁན་ཡང་ཆགས་ཡོད། མི་མང་བོ་ཞིག་ཆོས་ལུགས་པ་ཡིན་ལ་ལྷ་འདྲེ་གདོན་འགག་ལ་ཡིད་ཆེས་ཆེན་པོ་ཡོད། མི་མང་བོ་ཞིག་བར་གསེང་དུ་ལུས་པའི་འགྲུལ་བ་ཡིན་ལ་རང་ཚུགས་དང་དམིགས་ཡུལ་མེད། མི་མང་བོ་ཞིག་གྱང་ཁའི་རྩ་དང་དབྱར་ཁའི་གནམ་སྔོ་ཡིན་ལ་གནས་ཚང་དང་འདུག་ས་མེད། མི་མང་བོ་ཞིག་ལ་རང་དབང་དང་ཐོབ་ཐང་མེད་ལ་ལྐུགས་པ་དང་གླེན་པ་ཡིན། མི་མང་བོ་ཞིག་ལ་ལོ་རྒྱུས་དང་སྒྲུང་གཏམ་སྣ་གཅིག་ཀྱང་མེད། མི་མང་བོ་ཞིག་རྣམ་ཐར་དང་རྟོགས་བརྗོད་ཁྲི་སྟོང་གི་བདག་པོ་ཡིན། མི་མང་བོ་ཞིག་ལ་གནམ་འོག་དབང་ཚད་ཡོད་ཀྱང་མིའི་རིན་ཐང་མེད། མི་མང་བོ་ཞིག་ལ་གྲོགས་པོ་སྟོང་ཕྲག་ལས་བརྒལ་བ་ཡོད་ཀྱང་སེམས་ཐག་ཉེ་བའི་གྲོགས་པོ་གཅིག་ཀྱང་མེད། མི་མང་བོ་ཞིག་ལ་གྲོགས་པོ་ཁ་ཤས་ལས་མེད་ཀྱང་ཚང་མ་སེམས་ཐག་ཉེ་བ་རྐྱང་རྐྱང་ཡིན། མི་མང་བོ་ཞིག་ཕྱུག་པོ་ཡིན་ལ་མེད་པོ་ཡང་ཡིན། མི་མང་བོ་ཞིག་ཤ་ཁྲག་རུས་གསུམ་གྱི་གྲུབ་ཡོད། མི་མང་བོ་ཞིག་རྣོ་ལྕགས་ས་གསུམ་ཡིན། མི་མང་བོ་ཞིག་ལ་གཏམ་དང་མྱི་ཁའི་གཏོང་མྱོང་མེད། མི་མང་བོ་ཞིག་ཆང་འཐུང་དང་དུ་འཐེན་ཡིན་ཡང་ལྷག་བསམ་གྱི་ཕྱུག་པོ་ཡིན། མི་མང་བོ་ཞིག་མཁས་མིང་དང་སྙན་གྲགས་ཀྱི་བརྗིད་ཀྱང་འཇིག་རྟེན་ལ་ཞེན་ཆགས་ཆེ་ཞིང་ཤི་རྒྱུར་སྐྲག  མི་མང་བོ་ཞིག་འཇིག་རྟེན་ལ་ཞེན་པ་ལོག་ནས་འཆི་བ་རང་སྟེང་དུ་སླེབས་པར་དང་ལེན་བྱེད་མཁན་ཡིན། མི་མང་བོ་ཞིག་དབུགས་རིང་འཐེན་རྒྱུར་གོམ་ཡོད་ལ་སུན་སྣང་དང་སྡུག་ཡས་ཀྱི་བྲན་གཡོག་ཡིན། མི་མང་བོ་ཞིག་ནད་པ་ཡིན་ལ་དྲགས་བསྐྱེད་མེད། མི་མང་བོ་ཞིག་རང་གཞན་གཉིས་ཀ་ཡིན་ལྷ་འདྲེ་གཉིས་ཀྱང་ཡིན། མི་མང་བོ་ཞིག་རང་གཞན་གང་ཡང་མིན་ལ་དུད་འགྲོ་ལས་ཀྱང་སྡུག མི་མང་བོ་ཞིག་འཇིག་རྟེན་སྲུང་སྐྱོབས་བྱེད་མཁན་ཡིན་ལ་གཏོར་བཤིག་གཏོང་མཁན་ཡང་ཡིན། མདོར་ན་མི་མང་བོ་ཞིག་ཚར་རྒྱུ་ཡོད་པ་ནས་མེད་པ་དང་མེད་པ་ནས་ཡོད་པ། ཡོད་མེད་མེད་མིན། སྐྱེ་འཆི་དར་རྒུད། ཤར་ནུབ་ནག་འོད། གཞོན་རྒས་བཙོག་མཛེས། ལང་ཚོ་དབུལ་ཕྱུག ད་ཡོད་ད་མེད། སང་འོང་ནངས་འགྲོ  ཀློག་འདོན་ཉན་ཤེས།  གོ་མེད་ཚིགས་ནོར། ངུ་སྐྱེན་དགོད་སླ། འགྲོ་འདུག་ཟ་བཏུང་། ཉལ་གཉིད་བཀོག་ནུར། བཤད་གླེང་འབྲི་རྩོམ།  ཁ་བདེ་སྟོང་སྒྲོག བསམ་འཕོད་སྒྲུབ་བྱེད། ཤེས་རབ་འདྲི་དཔྱད།  རྟོགས་བཏགས་འཆར་སྣང་།  རྨོངས་ལུགས་ཨུ་ཚུགས། མི་མང་བོ་ཞིག་་་་་་་་་་་