བོད་མི་གཉིས་འཇུས་པ།

དཀོན་མཆོག་སྒྲོལ་མ་དང་ངག་དབང་བསོད་ནམས་ཞུ་བ་གཉིས་སྔ་ཕྱི་ལྟར་དཀར་མཛེས་ས་ཁུལ་ནས་ཉེན་རྟོག་པས་འཇུས་ཡོད་འདུག

ཨེ་ཤ་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༥ ཉིན་དཀར་མཛེས་ས་ཁུལ་གྱི་བོད་མི་ངག་དབང་བསོད་ནམས་ཞུ་བ་ཞིག་གིས་དཀར་མཛེས་ཉེན་རྟོག་ལས་ཁུངས་ཀྱི་མདུན་ནས་ངོ་རྒོལ་བྱས་པར་བརྟེན་འཇུས་འདུག་ལ། དེ་བཞིན་ཟླ་སྔོན་མའི་ཚེས་ ༢༩ ཉིན་དཀོན་མཆོག་སྒྲོལ་མ་ཞེས་པའི་བུད་མེད་ཅིག་ཀྱང་གོང་གསལ་ཉེན་རྟོག་ལས་ཁུངས་ཀྱི་མདུན་ནས་ངོ་རྒོལ་བྱས་སྟབས་འཇུས་ཡོད་འདུག

མིང་འདོན་འདོད་མེད་མཁན་བུད་མེད་ཅིག་གིས་གོང་གསལ་གསར་ཁང་ལ་བརྗོད་དོན། ངག་དབང་བསོད་ནམས་ཀྱིས་ཕྱི་ཚེས་ ༥ ཉིན་དཀར་མཛེས་ཉེན་རྟོག་ལས་ཁུངས་ཀྱི་མདུན་ནས་བོད་རང་བཙན་ཡིན་ཅེས་སྐད་འབོད་དང་། ཤོག་བུ་མང་པོ་གཏོར་སོང་ལ། ཤོག་བུ་དེ་དག་གི་ཁྲོད་དུ་རླུང་རྟ་དང་ངོ་རྒོལ་ཡིག་ཆ་སོགས་ཡོད་ཚུལ་འདུག

ངག་དབང་བསོད་ནམས་ནི་རང་ལོ་ ༣༢ ཡིན་པ་དང་། དཀར་མཛེས་ཁུལ་དཀར་མཛེས་རྫོང་མཚོ་མགོ་ཞང་ཧོར་པོ་སྡེ་བ་ནས་ཡིན་འདུག

གནས་ཚུལ་མཁོ་སྤྲོད་པས་བཤད་པ་ལྟར་ན། ཉེན་རྟོག་པ་སྐོར་ཞིག་གིས་ཁོང་ལ་སྨན་རྫས་མེ་མདའ་འགའ་ཤས་བརྒྱབས་པ་དང་། ཉེས་རྡུང་བཏང་རྗེས་རླངས་འཁོར་ཞིག་ཏུ་བཞག་ནས་ཁྲིད་ཡོད་འདུག

གཞན་ཡང་ཕ་ཡུལ་དྲ་རྒྱས་གནས་ཚུལ་སྤེལ་བ་ལྟར་ན། རང་ལོ་ ༢༩ ཡིན་པའི་བུད་མེད་དཀོན་མཆོག་སྒྲོལ་མ་ཞུ་བ་ཞིག་གིས་ཀྱང་གོང་གསལ་ཉེན་རྟོག་ལས་ཁུངས་ཀྱི་མདུན་དུ། ༧རྒྱལ་བ་རིན་པོ་ཆེ་སྐུ་ཚེ་བརྟན་པ་དང་། བོད་རང་བཙན་ཡིན་ཅེས་སྐད་འབོད་བྱས་པར་བརྟེན་ཉེན་རྟོག་པས་འཇུས་ཡོད་འདུག

དཀོན་མཆོག་སྒྲོལ་མའི་ཕ་མིང་ལ་ཚེ་དབང་མགོན་པོ་དང་། མའི་མིང་ལ་ལྷ་མོ་གཡང་སྐྱིད་ཅེས་འབོད་པ་དང་། གནས་ཚུལ་ལྟར་ན། ཁོང་མོ་མ་འཇུས་སྔ་ཉིན་དེར་མོ་རང་གི་ཕུ་བོས་སྤྲད་པའི་རྒྱ་སྒོར་ ༢༠༠ ཡིན་པའི་སྟོད་གཡོག་ཅིག་ཉོས་ཡོད་འདུག

མོ་རང་མ་འཇུས་པའི་སྔོན་དེར་ཁ་བཏགས་དཀར་པོ་ཡུག་གཅིག་དང་། རྒྱ་སྒོར་ ༢༠༠ ས་གནས་དགོན་པར་ཕུལ་བ་དང་། དེ་ནས་ཉེན་རྟོག་པའི་ལས་ཁུངས་ཀྱི་མདུན་དུ་ཤར་སྐྱོད་ཀྱིས་སྐད་འབོད་སྐབས། རླུང་རྟའི་ཤོག་བུ་དང་བོད་རང་དབང་། ༧རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག ཅེས་བྲིས་པའི་ཡིག་ཆུང་སོགས་གཏོར་ཡོད་འདུག