ང་རང་སྨྱོས་སོང་། ཆགས་སྲེད་ཀྱི་འཕར་རྩ་ཁྲག་གི་ཟོས་དེ། ལུས་ཕྱི་ནང་གི་ཚང་མ་མེ་ལྟར་འབར། མེ་ལྟར་འབར་བའི་ཆགས་སྲེད་ཀྱིས་ངའི་མདུན་ལམ་ལ་མུན་མ་འཐིབ། བུད་མེད་མཐོང་ཚད་ཀྱི་ངའི་ལྟག་རྒྱབ་དུ་ངའི་སྲེད་ཆགས་ཀྱི་ཚོར་བ་ཧ་ཅང་མྱུར། མྱུར་སྟབས་ཀྱིས་ངའི་ཟུངས་ཁྲག་གི་དངས་མ་ཁུ་བ་བརྔུབ། ཁུ་ཁྲག་གི་ཟུངས་བཅུད་ཉམས་རྗེས་སུ། ང་རང་མི་གཞན་ཞིག་དུ་འགྱུར། འགྱུར་ལུགས་མི་འདྲ་བའི་རྣམ་གྲངས་རེ་རེའི་ངའི་སེམས་པ་གཞན་ཞིག་ལ་བསྒྱུར་ཞིང་མིག་ལམ་དུ་ཆུང་མ་ཞིག་ལ་དུངས་ཤ་བརླན་འདོད་ཀྱི་རྨི་ལམ་སྣ་ཚོགས་རྨིས། རྨིས་པའི་རྨི་ལམ་དགུང་གི་འཇའ་ལྟར་ཡལ་རྗེས། ང་སླར་ཡང་རང་གི་ཕྱི་ནང་གི་ཚེ་སྲོག་ནང་དུ་ག་ལེར་འབྱོར།
འདང་རྒྱག་གི་དྲ་རྒྱ་ཁ་ཕྱེ་ནས། མི་ཡུལ་བའི་འགྲོ་ལུགས་ལ་གུས་བཀུར་བྱེད་འདོད་ཀྱིས་དལ་བར་ལྡིང་བའི་སྙིང་ཁ་རུ་སླེབས། ལྷ་ལ་སྐྱབས་བཅོལ་བའི་རྣམ་ཤེས་ཁེར་རྐྱང་དུ་ལམ་ལ་འབུད། གདོན་གྱི་བཟུང་བའི་སྣང་བ་རྣམ་དོག་རང་སར་ཞི། འདི་ལྟར་རང་གི་ནག་ཉེས་ཡོད་ཚད་ཤིན་དུ་ལྐོག་གྱུར་གྱི་ཚད་དུ་སྙེགས། ལྐོག་གྱུར་གྱི་ཞིང་ཁམས་དེ་ནས་ང་ལ་ཁྲིམས་ཆད་གཏོང་མཁན་ཚོས་ལག་གཡུག་བྱེད། ངེད་ཀྱིས་དགའ་སྣང་དང་བཅས་འགྲོ་གྲབས་བྱེད་ཐེངས་རེར། ངས་ལྟག་རྒྱབ་དུ་བུ་མོ་ཆུང་ཆུང་ཞིག་ངུ་བཞིན་པ་ཐོས། ངུ་སྐད་དེ་ཐོས་ཐེངས་རེར། ངས་བུ་མོ་ཆུང་ཆུང་དེ་ངུ་བཞིན་པའི་ཕྱོགས་སུ་ཁ་ཕྱི་འཁོར། ཡང་སྙིང་། ངས་ལྟག་རྒྱབ་དུ་ངུ་བཞིན་པའི་བུ་མོ་ཆུང་ཆུང་དེ་སུ་ཡིན་ནམ།
བུ་མོ་ཆུང་ཆུང་ལགས། ཁྱེད་རང་མ་ངུ། ང་རང་ཁྱེད་ཀྱི་ཆེད་དུ་འཚོ་ཡོད་པས། མ་ངུ་དང་། འཚོ་བ་མ་གཞི་ནས་དགའ་སྐྱོ་ཟུང་དང་བདེ་སྡུག་མཉམ་བསྲེས་ཤིག་ཡིན། མཚམས་རེར་སྐྱིད་སྣང་ཡོད་ལ་སྐབས་རེར་སྡུག་སྣང་ཡོང་བ། སྲིད་པའི་གྲུབ་ལུགས་ཡིན་པས། རང་གཤིས་དེ་ང་ཚོ་དབུགས་ཐོག་སུས་ཀྱང་འགྱུར་བ་གཏོང་མི་ཐུབ་པ་ཞིག་ཡིན་པ་རེད།
བུ་མོ་ཆུང་ཆུང་ལགས། ངས་ཤེས་སོང་ཁྱེད་རང་བདག་གི་སྙིང་ནས་བརྩེ་བའི་ནུ་མོ་རེད། ནུ་མོ་ལགས། ཕུ་བོ་ང་རང་ཡང་དང་བསྐྱར་དུ་ཁྱེད་རང་ལ་ཐུག་འཕྲད་བྱེད་དུ་ཡོང་འདོད་མེད་པ་མ་ཡིན་པར། ནུ་མོ་ཁྱེད་ཀྱི་སློབ་སྤྱོང་ལ་འཐུས་ཤོར་འགྲོ་དོག་དང་ས་མཐའ་ནས་མ་དངུལ་མེད་པའི་འཚོ་བའི་ནང་དུ་ཚོང་ལས་བྱེད་དུས། ཕུ་བོ་ངའི་སེམས་ནང་ད་དུ་དཀའ་ངལ་ཅི་ཙམ་འཕྲད་ཀྱང་། དེ་ལ་ཕུ་བོ་ངས་བཟོད་བསྲན་བྱེད་ཐུབ་ཀྱི་འདུག་མོད། མ་འོངས་པའི་ཁྱེད་ཀྱི་མདུན་ལམ་ཆེད་དུ་མ་དངུལ་ཞིག་འཇོག་མ་ཐུབ་དུས། ཕུ་བོ་ང་རང་ཤི་ན་དབུགས་འགྲོ་ས་མ་རེད།
ནུ་མོ་ལགས། ཁྱེད་ཀྱིས་སློབ་གྲའི་སྐྱེད་ཚལ་དེ་ནས་ཤེས་རིག་གི་མེ་ཏོག་མང་བོ་མང་བོ་ཞིག་འཐུ་རོགས་གནོང་དང་། ནམ་ཞིག་ཁྱེད་ཀྱི་སློབ་འབྲས་ཐར་སོན་བྱུང་དུས། ངས་ཁྱེད་རང་ཕྱིར་ཕ་ཡུལ་དུ་འཁྲིད་ཆོག དེ་དུས་ཕ་མ་གཉིས་གཙོ་བའི་ནང་མི་ཚོས་ཁྱེད་རང་ལ་བསྟོད་བསྔགས་བྱེད་ངེས་ཡིན་ལ། སྐབས་དེར་ཕུ་བོ་ངས་འོས་འགན་ཡང་གང་ཙམ་འགྲུབ་སོང་བ་ཡིན་ནོ།
༡།༩།༠༦ཤིམ་ལུང་དུ་བྲིས།
