དབུས་ཤར་ཨེ་ཤ་ཡའི་གཡུལ་སའི་གནས་སྟངས།

གྷ་ཛ་གྲོང་ཁྱེར་དང་ཨི་སི་རེལ་བར་གྱི་དམག་འཐབ་དེ་མུ་མཐུད་ནས་གནས་ཡོད་པ་དང༌། ཉིན་ ༡༨ ཀྱི་དམག་འཐབ་འདིའི་རིང་ལ་གྷ་ཛ་གྲོང་ཁྱེར་རུ་པཱ་ལི་སི་ཐན་གྱི་མི་ ༩༧༠ ལྷག་བསད་ཡོད་པ་དང༌། དེའི་ཁྲོད་བྱིས་པ་ ༣༡༡ དང༌། སྨན་པ་ ༡༣ ། གསར་འགོད་པ་ ༤༠ བསད་ཡོད་འདུག

ཚེས་ ༡༣ ཉིན་ལི་པཱ་ནོ་ཡིས་སླར་ཡང་ཨི་སི་རེལ་གྱི་བྱང་ཕྱོགས་ས་ཁུལ་དུ་མེ་ཤུགས་འཕུར་མདའ་གསུམ་འཕངས་ཡོད་འདུག་ལ། འདི་ནི་ཉིན་ ༦ གི་རྗེས་ནས་སླར་ཡང་ལི་པཱ་ནོ་ནས་ཨི་སི་རེལ་གྱི་ས་ཁུལ་ལ་མེ་ཤུགས་འཕུར་མདའ་འཕེན་ཐེངས་གཉིས་པར་འཕངས་པ་དེ་ཡིན་ཡང་མི་སེར་ཤི་རྨས་གང་ཡང་བྱུང་མི་འདུག་ཅེས་ཨི་སི་རེལ་གྱི་ཉེན་རྟོག་པས་གསར་ལམ་ཁག་ལ་བརྗོད་ཡོད་འདུག ལི་པཱ་ནོ་ཡི་ཉེན་རྟོག་པས་བརྗོད་ན་མེ་ཤུགས་འཕུར་མདའ་དེ་དག་ནི་ལི་པཱ་ནོ་ཡི་གྲོང་ཁྱེར་ཧཱ་སི་བྷ་ཡ་ནས་བཏང་བ་རེད། ད་ལྟའི་ཆར་ལི་པཱ་ནོ་ནས་ཨི་སི་རེལ་ལ་འཕངས་པའི་མེ་ཤུགས་འཕུར་མདའི་ཐད་ལ་མཚམས་འཇོག་དགོས་པ་སོགས་ཀྱི་གླེང་སློང་ཡོང་གི་མེད་དེ། རྒྱལ་སྤྱིའི་དོ་སྣང་བྱེད་ཡུལ་ནི་ཨི་སི་རེལ་དང་གྷ་ཛ་གྲོང་ཁྱེར་བར་གྱི་བདུན་ཕྲག་གསུམ་ལྷག་གི་འཐབ་འཛིང་དེ་ཡིན་པས་རེད། ༢༠༠༦ ལོར་ལི་པཱ་ནོ་ཡི་ཁ་ཆེ་ཚོགས་པ་ཧཱེ་ཛི་བྷོལ་གྱིས་ཨི་སི་རེལ་ལ་གཏོར་རྒོལ་བྱས་ཏེ་ཕན་ཚུན་བར་དྲག་པོའི་དམག་འཐབ་ཟླ་གཅིག་ལྷག་ལ་བྱུང་ཡོད་པ་དང་དམག་འཐབ་དེའི་ཁྲོད་ནས་མི་མང་ ༡༠༠༠ ལྷག་གི་ཚེ་སྲོག་ཤོར་ཡོད་འདུག

ལི་པཱ་ནོ་ས་གནས་ནས་མེ་ཤུགས་འཕུར་མདའ་ཨི་སི་རེལ་གྱི་ས་ཁུལ་དུ་བཏང་བ་ནས་ལི་པཱ་ནོ་ཡི་ལྷོ་ཕྱོགས་ཁུལ་དུ་ཧཱེ་ཛི་བྷོལ་གྱིས་དམ་དྲག་ཤུགས་ཆེན་བྱེད་ཀྱིན་ཡོད་འདུག་ལ། ལི་པཱ་ནོ་ཡི་གཞུང་གིས་ཀྱང་ཧཱེ་ཛི་བྷོལ་གྱིས་བཙན་བཟུང་བྱས་ཡོད་པའི་ས་ཁུལ་ཁག་ལ་དམ་དྲག་ཤུགས་ཆེན་བྱེད་ཀྱིན་ཡོད་འདུག ལི་པཱ་ནོ་སྲིད་གཞུང་གི་ངོས་ནས་ཕར་རྒོལ་འདིར་ཁ་རྡུང་གཏོང་གི་ཡོད་འདུག་ལ། ད་དུང་ལི་པཱ་ནོ་སྲིད་གཞུང་གི་དམག་མི་བཏང་ནས་ལི་པཱ་ནོ་ནས་མེ་ཤུགས་འཕུར་མདའ་འཕངས་པའི་ཐད་རྟོག་ཞིབ་བྱེད་གིན་ཡོད་འདུག

ད་ལྟའི་ཆར་གྷ་ཛ་གྲོང་ཁྱེར་གྱི་པཱ་ལི་སི་ཐན་གྱི་མི་སེར་ཚོས་སྡོད་གནས་བོར་བ་དང་ཆགས་ས་རྟེན་ས་མེད་པར་འགྱུར་གྱིན་ཡོད་པ་དང༌། མི་གྲངས་ཁྲི་ ༢ དང་ ༨༠༠༠ ལྷག་མཉམ་འབྲེལ་རྒྱལ་ཚོགས་ཀྱི་སློབ་གྲྭ་ཁག་ ༣༦ ནང་དུ་གནས་ཚང་གཡར་ཡོད་འདུག ཁྱིམ་བདག་ཞིག་གིས་བཤད་དོན། བྱིས་པ་ཚོ་སྐྲག་སྣང་གིས་དོར་མ་སོགས་ཀྱི་ནང་དུ་གཅིན་སྐྱག་ཚོད་འཛིན་བྱེད་མ་ཐུབ་པར་ཤོར་གྱིན་པ་སོགས་སྐྲག་སྣང་གིས་བླ་ཁྱེར་བ་དང་སྨྱོན་པ་ལྟ་བུར་གྱུར་འདུག་པས་ང་ཚོར་དགོས་པ་སེམས་ཀྱི་སྨན་པ་ཡིན་པ་དང༌། གལ་ཏེ་སེམས་ཀྱི་སྨན་པར་མ་བརྟེན་ན་རྒྱུན་ལྡན་ལ་འགྱུར་ཐུབ་གི་མི་འདུག་ཅེས་བརྗོད་ཡོད་འདུག ཉིན་ཤས་སྔོན་ནས་ཨི་སི་རེལ་གྱིས་ཉིན་རེར་ཆུ་ཚོད་གསུམ་ལ་ཕར་རྒོལ་མཚམས་འཇོག་གི་ཡོད་པས། མི་རྣམས་ཀྱིས་གོ་སྐབས་འདི་ལ་བརྟེན་ནས་ཕྱི་རུ་བཟའ་བཅའ་སོགས་ཉོ་རུ་འགྲོ་གི་ཡོད་ཀྱང༌། བཟའ་བཅའ་ཉོ་ས་སོགས་སུ་མི་ཧ་ཅང་མང་པོ་གྲལ་སྒྲིག་ནས་དུས་ཚོད་རིང་པོ་འགོར་གྱིན་ཡོད་པས་མང་པོ་ཞིག་ལ་ཟ་མ་མ་རག་པར་ལག་སྟོང་ལ་ནང་དུ་ལོག་དགོས་ཀྱི་ཡོད་འདུག

ཚེས་ ༡༣ ཉིན་གྷ་ཛ་གྲོང་ཁྱེར་གྱི་བྱང་ཕྱོགས་ནས་འབར་རྫས་དང་མེ་ཤུགས་འཕུར་མདའ་ཨི་སི་རེལ་གྱི་ས་ཁུལ་ལ་འཕངས་པས་ཨི་སི་རེལ་གྱི་དམག་མི་ ༡ བསད་པ་དང༌ ༢ ལ་རྨས་ཕོག་ཡོད་པ་སོགས་ཁྱོན་བསྡོམས་ཉིན་ ༡༨ ཀྱི་དམག་འཐབ་འདིའི་ནང་དུ་ཨི་སི་རེལ་གྱི་དམག་མི་ ༡༠ ཚུད་པའི་མི་ ༡༣ བསད་ཡོད་འདུག ཨི་སི་རེལ་ཕྱོགས་ནས་གནས་ཚུལ་སྤེལ་བ་ལྟར་ན་ཚེས་ ༡༣ ཉིན་གཅིག་པུ་ལ་མེ་ཤུགས་འཕུར་མདའ་ ༡༨ འཕངས་ཡོད་ཀྱང་མི་ལ་གནོད་སྐྱོན་གང་ཡང་ཐེབས་མེད་པ་དང༌། གྷ་ཛ་གྲོང་ཁྱེར་རུ་ཡོད་པའི་ཧཱ་མཱ་སི་ལ་ཨི་སི་རེལ་གྱིས་ཚུར་རྒོལ་མཚམས་འཇོག་དགོས་པའི་འབོད་སྐུལ་ཞུ་གི་ཡོད་འདུག

བདུན་ཕྲག་སྔོན་མའི་ནང་དུ་མཉམ་འབྲེལ་རྒྱལ་ཚོགས་ཀྱིས་ཨི་སི་རེལ་དང་ཧཱ་མཱ་སི་ཕྱོགས་གཉིས་ནས་དམག་འཐབ་མཚམས་འཇོག་བྱེད་དགོས་པའི་འབོད་སྐུལ་དང་གྲོས་ཆོད་བཞག་ཀྱང་དམག་འཐབ་མུ་མཐུད་ནས་བྱེད་བཞིན་པ་དང༌། ཨི་སི་རེལ་གྱིས། ཧཱ་མཱ་སི་ཡིས་མེ་ཤུགས་འཕུར་མདའ་འཕེན་རྒྱུ་མཚམས་མ་བཞག་པའི་རྐྱེན་གྱིས་མི་སེར་མང་པོར་ཤི་རྨས་བྱུང་བ་དང་དཀའ་ངལ་འཕྲད་ཀྱིན་ཡོད་ཚུལ་རྗོད་ཡོད་འདུག

ཚེས་ ༡༤ ཉིན་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་དངོས་སུ་ཨེ་ཇེབ་ཀྱི་སྲིད་འཛིན་དང་ཨ་རབ་མནའ་འབྲེལ་རྒྱལ་ཁབ་ཀྱི་སྲིད་བློན་གཙོས་པའི་མགོ་ཁྲིད་ཚོར་མཇལ་འཕྲད་གནང་སྟེ་དམག་འཐབ་འདི་མགྱོགས་མྱུར་མཚམས་འཇོག་བྱེད་པར་གྲོས་མོལ་དང༌། ཨི་སི་རེལ་དང་པཱ་ལི་སི་ཐན་གྱི་མགོ་ཁྲིད་ཚོ་ཞི་བའི་གྲོས་མོལ་ལ་ཞུགས་པར་འབད་བརྩོན་གནང་གི་ཡོད་འདུག་ལ། དེ་བཞིན་ཧཱ་མཱ་སི་ཡང་གྲོས་མོལ་འདིའི་ནང་ཆ་ཤས་ལེན་པར་གདན་འདྲེན་ཞུས་ཡོད་ཀྱང༌། ཨེ་ཇབ་ཀྱིས་ཧཱ་མཱ་སི་དང་ཨི་སི་རེལ་བར་དུ་ལངས་ནས་སྐད་ཆ་བཤད་ཀྱིན་ཡོད་པ་ལས་ཧཱ་མཱ་སི་ཚོགས་པས་གྲོས་མོལ་འདིའི་ནང་ཆ་ཤས་ལེན་གི་ཡོད་མི་འདུག