ཧྥ་རན་སི་ནས་ལོ་སར་གི་མིན་ཟེར།

རིག་པའི་རྡོ་རྗེ་ལགས། ཁྱེད་ཀྱི་ལྷག་བསམ་ལ་དོགས་པ་མེད། ཡིན་ནའང་། ལས་འགུལ་དེ་ཡག་པོ་ཞིག་མཐོང་མ་སོང་། ལྷག་པར་དུ་ལོ་གསར་ཚེས་གཅིག་གི་ཞོགས་པ་ནས་རྒྱ་མིའི་གཞུང་ཚབ་ཁང་དུ་རྒྱུག་པ་འདི་ཐབས་ལམ་ལེགས་པོ་ཞིག་མ་རེད་འདོད། ངའི་ཐབས་ལམ་རྣམས་ངས་རིམ་པས་བཤད་ཆོག

ལོ་གསར་པ་ཞིག་ཚེས། དེ་ལ་རྟེན་འབྲེལ་བྱེད་པའི་ལུགས་སྲོལ་འདིའི་རྩ་བའི་དོན་སྙིང་ཤེས་དགོས་པ་རེད། འདི་རྟེན་འབྲེལ་ཁོ་ནའི་ཆེད་དུ་རེད་བག་མེད་དང་སྤྲོ་སྐྱིད་ཀྱི་ཆེད་དུ་མ་རེད། ཉི་མ་གསར་པ་ཞིག་ལ། བསམ་བློ་དང་རྣམ་འགྱུར་གསར་པ་ཞིག་ཁྱེར་ནས་ལས་ཀ་གསར་པའི་མགོ་རྩོམ་རྒྱུ་ནི་ང་ཚོའི་ལོ་གསར་ཞེས་པ་འདིའི་འདུ་ཤེས་ཀྱི་མ་གདན་རེད། མི་རྣམས་ཀྱིས་རྟེན་འབྲེལ་ལ་བརྟག་ཅིང་ཡིན་གཅིག་མིན་གཅིག་བསམ་པ་ཡག་ཕྱོགས་དང་ཡར་ཕྱོགས་ཤིག་ལ་བསམ་པ་དང་། གླུ་ལེན་གར་རྩེད་སོགས་སྤྲོ་སྐྱིད་ཀྱིས་བསུ་དགོས་པའི་དོན་ཡང་འདི་ལ་ཐུག་པ་རེད། ད་སྐབས་ལོ་སར་རྒྱུ་མིན་ཟེར་མཁན་ཚོའི་འདུ་ཤེས་ཀྱང་གཙོ་བོ་རྒྱུ་མཚན་འདི་ལས་བྱུང་བ་རེད་འདོད།

འོང་ཀྱང་། ལོ་གསར་ནི་ང་ཚོས་ངེས་པར་དུ་སྲུང་བརྩི་བྱེད་དགོས་པ་ཞིག་རེད། སྔར་ལོ་ཕམ་ཀྱང་ད་ལོ་ཡོད་པ་རེད། དམ་བཅའ་གསར་པ་དང་། ཐབས་ལམ་གསར་པ། མི་རབས་གསར་པ་བཅས་ཡོང་དགོས་པ་རེད། འདིའི་ཞོར་དུ་ཉམས་མྱོང་དང་བསམ་བློ་གསར་པ་ཡོད་པ་ནི་བཤད་མི་དགོས་པ་ཞིག་རེད། ཚང་མ་མཉམ་དུ་འཛོམས། རིག་པ་དང་སེམས་ཤུགས་མཉམ་དུ་སྤུངས་ནས་ལས་དོན་གསར་བར་འཇུག་དགོས་པ་རེད། འདི་ནི་ལོ་གསར་པ་འདི་བསུ་སྟངས་ཤིག་རེད།

སྡུག་བསྔལ་གྱི་ཆེད་དུ་སྡུག་བསྔལ་ཚོར་བར་བྱེད་པ་ནི་རྣམ་དཔྱོད་ཀྱི་མཐའ་མ་དེ་རེད།

ང་ཚོར་ལས་འགུལ་གྱི་རྣམ་གྲངས་ཉུང་དྲག་འདུག ངོ་རྒོལ་སྐད་འབོད་ལྟ་བུ་ནམ་རྒྱུན་རྒྱལ་ཁམས་ཀྱི་མཐོང་ས་ནས་ལས་འགུལ་སྤེལ་རྒྱུའི་རིགས་དང་། བོད་མིའི་ནང་ཁུལ་གྱི་དམ་ཚིག་ཇེ་དོམ་ལ་གཏོང་ཐབས་སུ་མཉམ་དུ་འདུ་བ། གཞན་ཡང་། རིག་རྩལ་གྱི་ལམ་ནས་ལྟ་རྒྱུ་ཉན་རྒྱུ། བསམ་རྒྱུ་སྒྲུབ་རྒྱུ་ཡོད་པའི་ལས་འགུལ་སྣ་ཚོགས་ལ་བསམ་བློ་གཏོང་ཐུབ་ན་ཧ་ཅང་ལེགས་པར་འདོད།