ལན་ཐན་ཐུན་ཞིག་ལ་ལན་ཞིག་བྲིས་པ།

དྲ་གྲོགས་ལགས། དུས་ཚོད་ཐུང་ཐུང་ཞིག་གི་ནང་དུ་ང་རང་དྲ་ཐོག་འདིར་སླེབས་མ་ཐུབ་པ་དེ་ལ་དགོངས་དག་ཞུ། ཁྱེད་ཀྱིས་ང་རང་ལ་བྲིས་པའི་ལན་ཐུང་ཐུང་འདི་ལ་ངས་ཀྱང་བསམ་ཚུལ་ཞིག་འབྲི་ན་འདོད་བྱུང་། ང་རང་གིས་དུས་རྟག་དུ་བོད་ནང་གི་བོད་མི་དེ་དག་རང་གི་ཚེ་སྲོག་ཀྱང་བོད་དོན་དུ་གཏོང་བ་དེ་ནི་རྩ་བ་ནས་ཡག་པོ་མེད་པ་རེད་ཅེས་བསམ་མྱོང་མེད་ལ། དེ་ལ་གྲུབ་འབྲས་ཡོད་མེད་བཤད་པ་ལས་གཞན་དེ་དག་ལ་དམའ་འབེབས་བྱེད་འདོད་ཀྱི་བསམ་ཚུལ་དེ་འདྲ་ཡིད་དུ་ཡང་ཤར་མྱོང་མེད། ང་ཚོས་ལས་འགུལ་སྤེལ་ཕྱོགས་ལ་འགྱུར་བ་ཞིག་གཏོང་དགོས་ཀྱི་འདུག་ཟེར་ནས་ཤོད་བཞིན་པ་ལས། བོད་ནང་གི་རྒྱལ་གཅེས་དཔའ་བོ་དེ་དག་འདས་གྲོངས་དུ་བྱིན་པ་ལ་ཟུར་ཟ་བྱེད་ཀྱི་མེད། དེ་ནི་འགྱུར་བ་གང་འདྲ་ཞིག་གཏོང་དགོས་ཀྱི་འདུག་ཟེར་ན་བོད་མི་གཅིག་ཡིན་ཡང་རྒྱ་ནག་སྲིད་གཞུང་གི་དགོས་འདོད་ངན་པ་དེ་དག་འགྲུབ་ཆེད་དུ་ཚེ་སྲོག་རྒྱ་ནག་གི་མེ་མདའི་འོག་དུ་རྐྱེན་ལམ་དུ་སོང་བ་དེ་ལ་ང་རང་འཕོང་སེམས་སྐྱེ་བཞིན་འདུག་ཟེར་བཞིན་ཡོད། འོ་ན། ངེད་ཅག་གང་བྱེད་དགོས་སམ་ཟེར་ན་ལས་འགུལ་གང་ཞིག་སྤེལ་བ་ལ་ཡང་རང་གི་ཚེ་སྲོག་ལ་འགན་ལེན་བྱེད་ཐུབ་པས་སྒོ་ནས་དུས་ཡུན་སྙུག་བསྲིང་བྱས་དེ་ལས་འགུལ་སྤེལ་བ་ལས་རང་རང་གི་མི་ལུས་རིན་ཆེན་ཚེ་སྲོག་གི་འགྲོ་སོང་གཏོང་བ་དེ་ནི་ང་ཚོ་བོད་མི་ཚང་ལ་གྱོང་རྒུད་ཞིག་ལས་གང་ཡང་མི་འདུག་ཟེར་གྱི་ཡོད་པ་དེ་ཡིན་པ་མ་ཟད། ལས་འགུལ་སྤེལ་ཕྱོགས་མངོན་ལྐོག་གང་རུང་མང་བོ་ཞིག་འདུག་ཟེར་གྱི་ཡོད་ལ། དེ་དག་ལ་ཡང་མི་རིགས་འཚོ་གནས་བྱེད་ཐུབ་མིན་གྱི་གནད་དོན་ཡང་ཆེན་པོ་ཞིག་ཡོད་པ་དེ་བཤད་ཀྱི་ཡོད། བོད་ནང་གི་བོད་མི་དཔའ་ངར་ལྡན་ཞིང་བློ་དཀར་གཞུང་དྲང་གི་མི་དེ་དག་གཅིག་རྗེས་གཉིས་མཐུད་དུ་ཚེ་སྲོག་འཆི་ལམ་དུ་བསྐྱལ་བ་ཡིན་ན། དེ་ནི་བོད་པ་ཚང་གི་མ་འོངས་པའི་མི་རིགས་འཚོ་གནས་ལ་གྱོང་རྒུད་དང་རྒྱ་ནག་གི་དམིགས་འབྲས་ངན་པ་དེའི་གྲུབ་འབྲས་སུ་འགྲོ་བཞིན་པ་དེ་རེད་ཅེས་ཡང་དང་བསྐྱར་དུ་བཤད་ཀྱི་ཡོད། རྒྱ་ནག་སྲིད་གཞུང་གིས་བོད་མི་དབའ་ངར་ལྡན་ཞིང་གཞུང་དྲང་བོད་རིགས་ལ་ཤ་ཞེན་གཅིག་ཡིན་རུང་གསོད་གཏུབ་བྱེད་ཐུབ་མིན་ལ་བསམ་བློ་གཏོང་བ་དང་ཐབས་ཇུས་འདྲ་མིན་བྱེད་ཀྱི་ཡོད་པ་དེ་ནི་ངེད་ཅག་གི་བསམ་བློ་ཞིབ་མོ་ཞིག་བཏང་ན་ཤེས་གསལ་ཡིན་སྟབས། ང་རང་གི་ད་ལོ་བོད་ནང་མིན་བོད་ཕྱི་ཡིན་ཟེར་ནས་འབྲི་དགོས་དོན་ཡང་དེ་ལས་གཞན་གང་ཡང་མེད་པ་མཁྱེན་་པར་མཛོད། ད་དུང་དེའི་མ་འཐུས་ན་ཡང་བསྐྱར་ཕེབས་ཤོག་དང་གླེང་མོལ་མུ་མཐུད་དུ་བྱེད་ཆོག

ཨོ་རེད། དགོངས་དག་ཁྱེད་རང་གི་གོང་ནས་བླ་སྤྲུལ་མང་བོ་ཞིག་གིས་ཀྱང་ལས་འགུལ་སྤེལ་ཡོད་པ་རེད་ཟེར་བ་དེ་ལ་དྲ་གྲོགས་བཙན་སྲང་ཁྲག་འཐུང་ནས་སྐྱག་རྫུན་མ་བཤད་ཟེར་ནས་བྲིས་འདུག ངས་ཀྱང་ཁོ་རང་ལ་རྒྱབ་སྐྱོར་བྱས་པ་མིན་མོད། ང་ཚོས་བཙན་བྱོལ་ནང་གི་བླ་སྤྲུལ་མང་བོ་ཞིག་གི་སྣེ་འཁྲིད་དེ་ལས་འགུལ་་སྤེལ་བ་ནི་ང་རང་གི་མཐོང་མ་སོང་ལ། གལ་ཏེ་བླ་སྤྲུལ་མང་བོ་ཞིག་དུས་གཅིག་དུ་ལས་འགུལ་རླབས་ཆེན་ཞིག་དངོས་ནས་སྤེལ་ཐུབ་ཡོད་པ་ཡིན་ན། ༧གོང་ས་མཆོག་གིས་ཀྱང་དེ་དག་ལ་དམིགས་གསལ་གྱི་དོ་སྣང་བྱུང་ངེས་ཡིན་ལ། བཀའ་སློབ་རེ་ཡང་གསུང་ཡོད་ངེས་རེད། དེ་དག་གང་ཡང་བྱུང་མ་སོང་ཟེར་ནས་ངན་ཁག་དྲིས་པ་མིན་ཀྱང་། དངོས་ནས་བླ་སྤྲུལ་དག་གི་ལས་འགུལ་ཞིག་སྤེལ་ཐུབ་པ་ཡིན་ན་མི་མང་གིས་ཀྱང་ལྟ་ཚུལ་ཡག་དུ་འགྲོ་བ་མ་ཟད། བླ་སྤྲུལ་དེ་དག་ལ་ཡང་མ་འོངས་པ་ན་གོ་གནས་དང་སྐད་ཆ་གང་བཤད་པ་དེ་དག་ལ་ནུས་པ་ཡོད་པ་ཞིག་ཆགས་ངེས་རེད། བླ་སྤྲུལ་དག་གི་གལ་ཏེ་མ་འོངས་པར་ལས་འགུལ་རེ་སྤེལ་བ་ཡིན་ན་ནི། ཚོགས་པ་གང་རུང་ཞིག་གི་མངའ་ཁུངས་སུ་མི་འགྲོ་བར་རྡོག་རྩ་གཅིག་སྒྲུལ་གྱིས་འབོད་ཚིགས་གཅིག་ལ་བརྟེན་ནས་ལས་འགུལ་སྤེལ་ཐུབ་པ་ཡིན་ན་དངོས་ནས་ཁྱེད་རང་གི་བཤད་པ་ལྟར་འཛམ་གླིང་མི་མང་གི་མིག་ནང་དུ་ཡང་། ༧གོང་ས་མཆོག་གི་རྗེས་འབྲེང་བ་རབ་བྱུང་འདི་དག་གིས་ཀྱང་༧གོང་ས་མཆོག་གི་བཀའ་སྲུང་ཅི་སྒྲུབ་བྱེད་ཀྱི་འདུག་སྙམ་པ་ཞིག་ཡོང་ངེས་རེད། དེའི་ཐད་དུ་ཁྱེད་རང་གིས་ཀྱང་བླ་སྤྲུལ་དགེ་བཤེས་དག་ལ་སྐུལ་ལོངས་རེ་བྱེད་ཐུབ་པ་ཡིན་ན་ནི་དངོས་ནས་བོད་ཀྱི་ལས་དོན་རླབས་ཆེན་ཞིག་འགྲུབ་ས་རེད་སྙམ་སོང་། ཨོ་རེད་ལགས། འབོད་ཚིགས་གཅིག་དེ་ནི་འདི་འདྲ་རེད། ཆ་རྐྱེན་གང་ཡང་མེད་པས་སྒོ་ནས་༧གོང་ས་མཆོག་བོད་དུ་གདན་འདྲེན་ཞུ་དགོས་ཀྱི་ཡོད་ཟེར་ནས་ཉིན་གཅིག་དུས་གཅིག་ལ་བླ་སྤྲུལ་དགེ་བཤེས་ཡོངས་སུ་རྫོགས་པའི་དབུ་སྣ་དྲངས་དེ་བོད་ལ་ཁ་ཕྱོགས་ནས་འཚེ་མེད་ཞི་བ་རང་ནས་ལས་འགུལ་སྤེལ་རྒྱུ་དེ་རེད་ལགས། ངས་ནི་དེ་འདྲ་ཞིག་བསམ་ནས་ལོ་མང་འགོར་སོང་བས་སྐད་ཆ་ཞིག་དེ་རང་ཁྱེད་ལ་བཤད་པ་ཡིན། གལ་ཏེ་ནོར་བ་འདྲ་ཡོད་ན་སྣང་མེད་དུ་སྐྱུར་ན་འགྲིག་གི་རེད།