སུད་སི་དང་འཇར་མན། ཧྥ་རན་སི། ཨ་རིའི་བྷོ་སི་ཊོན་བོད་རིགས་ཚོགས་པ་བཅས་ཀྱིས་གཞིས་བཞུགས་བོད་མི་ཡོངས་ལ་གདུང་སེམས་མཉམ་བསྐྱེད་མཚོན་ཕྱིར་བོད་ས་གླང་ལོའི་ལོ་གསར་རོལ་རྒྱུ་མིན་པའི་ཐག་གཅོད་བྱས་ཡོད་པ་བཞིན། རྒྱ་བལ་འབྲུག་གསུམ་གྱི་བོད་མི་རྣམས་ཀྱིས་ཀྱང་དེ་མཚུངས་ཀྱི་གྲ་སྒྲིག་གནང་གིན་འདུག
རྒྱ་གར་དུ་གནས་སྡོད་བོད་མིའི་གཞིས་སྒར་ཁག་ཕལ་ཆེ་བས་ཀྱང་ད་ལོར་ལོ་གསར་མེད་ཚུལ་གླེང་གི་འདུག་ལ། མོན་གྷོ་འདོད་རྒུ་གླིང༌། ལྷོ་ཕྱོགས་སྦན་ཌ་ར་གཞིས་ཆགས། གྷོ་ལི་སྒལ། ཨོ་རི་ས་གཞིས་ཆགས་སོགས་ཀྱི་ནང་ས་གནས་གཞོན་ནུ་དང་བུད་མེད་སོགས་གཞུང་འབྲེལ་མ་ཡྀན་པའི་ཚོགས་པ་དང་དགོན་སྡེ་ཁག་གི་མི་སྣ་སོགས་ཀྱིས་མ་སྐུལ་དང་བླངས་གིས་ལོ་འདིའི་ལོ་གསར་དེ་མྱ་ངན་གྱི་ལོ་གསར་ལྟར་སྲུང་གཙི་བྱ་རྒྱུའི་ཐག་གཅོད་དང་དེ་དོན་འབོད་སྐུལ་ཞུ་བཞིན་ཡོད་འདུག བོད་གཞུང་ཟློས་གར་ཚོགས་པའི་ངོས་ནས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་མཚོན་ཕྱིར་གཞུང་འབྲེལ་དུས་ཆེན་ཁག་གི་རིག་རྩལ་འཁྲབ་སྟོན་དང་ལོ་རེའི་སྤྱི་ཟླ་གསུམ་པ་ནས་བཞི་བའི་བར་གྱི་ཟློས་གར་ཚོགས་པའི་གལ་ཆེན་གྱི་ཞོ་སྟོན་དུས་ཆེན་གྱི་ལྷ་མོ་འཁྲབ་སྟོན་དེ་ད་ལོ་མེད་སྐོར་ གསལ་བསྒྲགས་བྱས་འདུག
འདི་གའི་གསར་འགོད་པས་ཕྱི་ཚེས་ ༡༧ ཉིན་བཙན་བྱོལ་བོད་གཞུང་བཀའ་ཤག་གི་དྲུང་ཆེ་མི་འགྱུར་རྡོ་རྗེ་ལགས་སུ་ལོ་འདིའི་བོད་ལུགས་ལོ་གསར་ཐད་གཞུང་འབྲེལ་གྱི་འཆར་གཞི་དང་ཐག་གཅོད་འདྲ་ཡོད་མེད་བཀའ་འདྲི་ཞུས་པར་ཁོང་གིས། གཞུང་འབྲེལ་ཐོག་དམིགས་བསལ་གྱི་གསལ་བསྒྲགས་གང་ཡང་བྱས་མེད། ང་ཚོ་དམངས་གཙོའི་གཞུང་ཡིན་པས་མི་མང་རང་ངོས་ནས་གདུང་སེམས་མཉམ་སྐྱེད་མཚོན་པའི་ལས་འགུལ་སྤེལ་བ་ལས་གཞུང་ངོས་ནས་འདི་འདྲ་བྱ་དགོས་ཅེས་སྒྲག་གིན་ཡོད་པ་མ་རེད། གཞུང་ངོས་ནས་ ༢༠༠༨ ལོའི་སྤྱི་ཟླ་གསུམ་པ་ནས་གཞུང་འབྲེལ་གྱི་དུས་ཆེན་ཁག་ཏུ་བོད་རང་གི་རྒྱལ་གླུ་མ་གཏོགས་ཟློས་གར་དང་རྩེད་མོའི་རིགས་གཅིག་ཀྱང་འཁྲབ་ཡོད་པ་མ་རེད། ཅེས་གསུངས་བྱུང༌།
ངྷ་ས་བདེ་དོན་འགན་འཛིན་ཚེ་རིང་ཕུན་ཚོགས་ལགས་གྱིས་འདི་ག་གསར་ཁང་ལ། ལོ་སྔོན་མའི་སྤྱི་ཟླ་གསུམ་པ་ནས་གཞུང་འབྲེལ་གྱི་མཛད་སྒོ་ཁག་ཏུ་གཞས་སྣ་འཁྲབ་སྟོན་གང་ཡང་བྱས་མེད་པ་དེ་ཡོངས་ཁྱབ་རེད། ཉེ་ཆར་གཞུང་འབྲེལ་མ་ཡིན་པའི་ཚོགས་པ་ཁག་གིས། ངྷ་སར་ལོ་གསར་སྔོན་གྱི་ཁྲོམ་སྟོན་པ་སོགས་མེད་པར་བཟོ་དགོས་པའི་སྐོར་གྱི་གསལ་བསྒྲགས་བཀྲམས་འདུག གཞུང་ནས་ད་ལྟའི་བར་འདིའི་སྐོར་གྱི་དམིགས་བསལ་གནས་ཚུལ་གང་ཡང་སླེབས་མ་སོང༌། དེ་ལྟ་ནའང༌། ཆོས་ཕྱོགས་ཀྱི་མཛད་སྒོ་མཐའ་དག་སྔོན་མ་བཞིན་འགྲོ་གི་རེད་བསམ་ལ། ང་ཚོས་གཞུང་དང་བསྟུན་ནས་ལས་ཀ་བྱེད་དགོས་པས་ཚོགས་པ་དང་ས་གནས་གཞན་དང་འདྲ་གི་མ་རེད། འདིའི་སྐོར་ང་ཚོས་ནང་སྲིད་ལས་ཁུངས་ལ་ཡར་ཞུ་བྱས་རྗེས་ཡོངས་ཁྱབ་ཀྱི་གསལ་བསྒྲགས་བྱ་རྒྱུ་ཡིན། ཅེས་གསུངས་བྱུང༌།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ལོ་གསར་མེད་ན་ཆོ་ཡོད་མ་རེད།།
ལོ་གསར་ཡོད་ན་འགྱུར་བ་ཡོད་རེད།།
ལོ་གསར་དགའ་སྟོན་མེད་ན་གྲིག་པ་རེད།།
ལོ་གསར་ཤར་རྒྱུ་མེད་ན་ཚར་ཚར་རེད།།
ལོ་གསར་ཚེས་གཅིག་མྱ་ངན་བྱེད།།
ཆུ་ཕུད་ཇ་ཕུད་ཟས་ཕུད་སོགས།།
ཚེ་སྲོག་འབུམ་གྱི་རྣམ་ཤེས་ལ།།
མྱ་ངན་མཆོད་པའི་ཚུལ་དུ་འབུལ།།
ཕྱག་དང་མཆོད་པ་བསངས་གསོལ་རྣམས།།
འདས་ཟིན་དཔའ་བོ་དཔའ་མོ་ཡི།།
རྣམ་ཤེས་ཚུར་ལ་འགུག་བཞིན་དུ།།
དྲིན་བྱས་དྲིན་གཟོའི་སླད་དུ་འབུལ།།
ཕྱོགས་བཞི་མཚམས་བརྒྱད་བཞུགས་པ་ཡི།།
བོད་རིགས་མགོ་ནག་རྩམ་གཟན་རྣམས།།
ཡིད་གདུང་མཆི་མས་བརླན་བཞིན་དུ།།
ཉིས་སྟོང་དགུ་ཡི་ལོ་གསར་བསུ།།