སྤྱི་ལོ་ ༢༠༠༨ ལོའི་སྤྱི་ཟླ་ ༣ པ་ནས་སྤྱི་ལོ་ ༢༠༠༨ ལོའི་སྤྱི་ཟླ་ ༡༢ བར་བོད་མི་ ༡༢༠ ཙམ་བསད་ཅིང༌། ཉུང་མཐར་བོད་མི་ ༦༥༠༠ ཙམ་འཇུ་བཟུང་བྱས་ཡོད་པ་དང༌། དེའི་ནང་ནས་བོད་མི་ ༡༩༠ ཙམ་ལ་དྲང་བདེན་མིན་པའི་ཁྲིམས་ཐག་ལྗིད་མོ་བཅད་པ་ཡོད་ཅིང་། ཁྲིམས་ཆད་ཀྱི་ལོ་ཚད་ཟླ་དགུ་ནས་ཚེ་བཙོན་བར་བཅད་ཡོད་འདུག་ལ། ས་མཚམས་དང་ལམ་མདོ་ཁག་དམ་དྲག་བྱས་སྟབས་ ༢༠༠༨ ལོར་བོད་མི་ ༦༢༧ ལས་བཙན་བྱོལ་དུ་ཐར་མཁན་བོད་མི་ ༦༢༧ ལས་མེད།
ཚེས་ ༢༡ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ཕྱི་དྲིལ་ལྷག་པ་ཚེ་རིང་ཚོགས་ཁང་དུ་གསར་འགོད་གསལ་བསྒྲགས་ཤིག་བསྐྱངས་ཏེ། ༢༠༠༨ ལོའི་བོད་ནང་གི་འགྲོ་བ་མིའི་ཐོབ་ཐང་སྐོར་ཀྱི་ལས་སྡོམ་དང༌། ལོ་འཁོར་སྙན་ཐོ་དབྱིན་ཡིག་དེབ་གཉིས་དང་བོད་ཡིག་དེབ་གཅིག་བཅས་དཔར་དུ་བསྐྲུན་འདུག གསར་འགོད་གསལ་བསྒྲགས་ཐོག་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་གསུངས་དོན། ༢༠༠༨ ལོ་ནི་མཉམ་སྦྲེལ་རྒྱལ་ཚོགས་ཀྱིས་ཡོངས་ཁྱབ་འགྲོ་བ་མིའི་ཐོབ་ཐང་ཁྱབ་བསྒྲགས་བྱས་ཏེ་ལོ་ ༦༠ འཁོར་བའི་དུས་དྲན་གྱི་ལོ་ཡིན་པ་དང༌། རྒྱལ་སྤྱིའི་ཁྱོན་ཡོངས་ནས་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་འགན་ལེན་ཆེན་པོ་བྱེད་པའི་ལོ་དེར། རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་དམ་ཡིག་ནང་འཁོད་པའི་ཐོབ་ཐང་གཞིར་བཟུང་ཞི་བའི་གྱེན་ལངས་བྱེད་མཁན་གྱི་བོད་མི་ཚོར་དྲག་གནོན་བྱས་ཏེ། བསད་པ་དང་བཟུང་བ། བོར་བརླག་ཏུ་སོང་བ། མནར་གཅོད་འོད་འདས་པ། དྲང་བདེན་མིན་པའི་ཁྲིམས་ཆད་བཏང་བ་སོགས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ཡོད་ལ། བོད་མི་ཚོར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་གཅིག་མཚུངས་ཀྱི་ཆེ་མཐོང་དང་ཁེ་ཕན། ཚེ་སྲོག་བཅས་ལ་བརྩི་འཇོག་མ་བྱས་པ་མངོན་ཡོད། དེ་བཞིན་སྲིད་འཛིན་ཧུའུ་ཅིན་ཐའོ་ཡིས་འཆམ་མཐུན་སྤྱི་ཚོགས་འཛུགས་བསྐྲུན་དང༌། མི་གཙོ་བོར་འཛིན་པ་ཟེར་བའི་གཏམ་བཤད་ཀྱི་སྲིད་བྱུས་དེའི་རྒྱབ་ཏུ་དྲག་གནོན་ཁོ་ནའི་ལམ་ནས་དབང་བསྒྱུར་བྱ་ཐབས་བྱེད་པ་གསལ་བོར་མངོན་ཡོད། དྲག་གནོན་གྱི་ལམ་ནས་སྤྱི་ཚོགས་འཛུགས་བསྐྲུན་བྱེད་པ་ཡང་མཚོན་ཡོད་ཟེར།
ཁོང་གིས་མུ་མཐུད་གསུངས་དོན། ཞིབ་འཇུག་གི་ཐོག་ནས་གནས་ཚུལ་ཁུངས་ལྡན་རག་པ་ལྟར་ན། སྤྱི་ལོ་ ༢༠༠༨ ལོའི་སྤྱི་ཟླ་ ༣ པ་ནས་སྤྱི་ལོ་ ༢༠༠༨ ལོའི་སྤྱི་ཟླ་ ༡༢ བར་བོད་མི་ ༡༢༠ ཙམ་དྲག་གནོན་གྱི་འོག་ནས་བསད་ཡོད་ཅིང༌། བོད་མི་ ༦༥༠༠ ཙམ་འཇུ་བཟུང་བྱས་ཡོད། དེའི་ནང་ནས་བོད་མི་ ༡༩༠ ཙམ་ལ་དྲང་བདེན་མིན་པའི་ཁྲིམས་ཐག་ལྗིད་མོ་བཅད་པ་ཡོད་ལ། ཁྲིམས་ཆད་ཀྱི་ལོ་ཚད་ཟླ་དགུ་ནས་ཚེ་བཙོན་བར་བཅད་ཡོད། དེ་ནས་གར་སོང་ཆ་མེད་དུ་གྱུར་བའི་བོད་མི་དང་མནར་གཅོད་འོག་གཟུགས་གཞི་གཅོང་ནད་ཅན་བཟོས་པ་དང་རིག་འཚོ་མི་ཟིན་པ། ཤི་བ་སོགས་བྱུང་ཡོད། བོད་མི་འདི་དག་ལ་ཁྲིམས་རྩོད་པའི་སྲུང་སྐྱོབ་ཐོབ་ཐང་གང་ཡང་མེད་པར་རྡུང་རྡེག་ཚ་ནན་བཏང་སྟེ། དངོས་ཡོད་ཀྱི་གནས་ཚུལ་དང་རྒྱབ་འགལ་གྱིས་ཉེས་དོན་ཉེས་གསོག་གི་ཉེས་མིང་འོག་ཁྲིམས་ཐག་བཅད་ཡོདཅེས་གསུངས་བྱུང༌། བོད་མི་རྐྱེན་འདས་སུ་སོང་བ་དང༌། བཙོན་དུ་ཚུད་པའི་གྲངས་ཀ་དེ་དག་ནི་འགྲོ་བ་མིའི་ཐོབ་ཐང་ལྟེ་གནས་ཁང་ལ་གནས་ཚུལ་གོ་ཐོས་ཙམ་གཅིག་པུ་མ་ཡིན་པར་ར་འཕྲོད་པ་དང་གནས་ཚུལ་ཁུངས་ལྡན་རག་པ་གཞི་ལ་བཞག་པ་ཡིན་ཟེར།
གསར་འགོད་གསལ་བསྒྲགས་ཀྱི་ཡིག་ཆའི་ནང་དུ་འཁོད་པ་ལྟར་ན། ཕྱི་ལོ་ ༢༠༠༨ ལོར་རྒྱ་གཞུང་གིས་བོད་མིའི་འགྲོ་འོང་ཚོད་འཛིན་དང་བཀག་སྡོམ། ལམ་མདོ་དང་ས་མཚམས་ཁག་ལ་དམིགས་བསལ་དམ་དྲག་བྱས་པ། ཇོ་མོ་གླང་མའི་རི་འདབ་དུ་མཐའ་མཚམས་སྤྱི་བདེ་མངགས་གཏོང་ཁང་གསར་འཛུགས། ཕྱི་ཟླ་ ༧ པའི་ནང་བོད་མི་གུང་ཁྲན་ཏང་ཡོན་དང་ལས་བྱེད་པའི་བུ་ཕྲུག་བཙན་བྱོལ་ནང་སློབ་གཉེར་དུ་བསྐྱལ་མི་ཆོག་པའི་སྒྲིག་ཁྲིམས་གཏན་འབེབས་གསལ་བསྒྲགས་བྱས་པ་སོགས་ཀྱི་དབང་གིས། ༢༠༠༨ ལོར་བོད་ནས་བཙན་བྱོལ་དུ་བོད་མི་ ༦༢༧ ལས་འབྱོར་མེད་པ་དང༌། དེ་ནི་འདས་པའི་ལོ་ཤས་ནང་བོད་ནས་བཙན་བྱོལ་དུ་ཡོང་བའི་གྲངས་འབོར་ཉུང་ཤོས་ཆགས་ཡོད་འདུག
དུས་ཐོག་ལ་ལན་གནང་བར་ཐུགས་རྗེ་ཆེ།
དགོངས་དག འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ལས་རོགས་དང་ཉམས་ཞིབ་པ་འཇམ་དཔལ་སྨོན་ལམ་ལགས་རེད།
སྐུ་ཞབས་རིག་འབྱུང་དོན་གྲུབ་བཀྲ་ཤིས་ལགས་སུ།
ཁྱེད་ཉིད་ཀྱིས་བཏོན་པའི་དྲི་བ་འདིའི་སྒང་ལ་ངས་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟར་གནས་ཁང་གི་འགན་འཛིན་ལས་རོགས་དང་ཉམས་ཞིབ་པ་བྱམས་པ་སྨོན་ལམ་ལགས་སུ་བཀའ་འདྲི་ཞུས་པ་ཡིན། ཁོངགིས་གསུང་བ་ལྟར་ན། འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གིས་ད་ལོར་བོད་ནས་ཡོང་བའི་སྐྱབས་བཅོལ་བའི་ཁ་གྲངས་དེ་ཁུངས་ལྡན་གནས་ཚུལ་ཡིན་པ་དང་གཞི་གང་ལ་བཞག་ཡོད་མེད་དེ་གཞུང་འབྲེལ་གྱི་གནད་དོན་ཡིན་པས་བཤད་ཐུབ་པ་མི་འདུག་པར་གསུང་བྱུང་ལ། ལོ་ཤས་ཞེས་པ་དེ་འདས་པའི་ལོ་ ༢༠ ནང་དུ་ད་ལོ་ནི་ཆེས་ཉུང་བ་དེ་ཡིན་པར་གསུངས་བྱུང་
བོད་ཀྱི་མང་གཙོ་དང་འགྲོ་བ་མིའི་ཐོབ་ཐང་འཕེལ་རྒྱས་ལྟེ་གནས་ཁང་གིས་བཏོན་པའི་གྲངས་ཀ་འདི་དང་སྣེ་ལེན་ཁང་གི་འབྱོར་གྲངས་གཉིས་གཅིག་པ་ཡིན་ནམ་མིན།
གཞན་འདས་པའི་ལོ་ཤས་ནང་ཞེས་བ་དེ་འདས་ལོ་གང་ནས་བརྗོད་ཀྱི་ཡོད་དམ། ཁ་གསལ་ཡོད་ན་ཡག་པོ་འདུག