ཡང་སྲིད་འཚོལ་མིན་ནི་བོད་མི་རིགས་ཁོ་ནར་ཡོད་པའི་ཐོབ་ཐང་ཡིན།

༧གོང་ས་མཆོག་གིས།  ཏཱ་ལའི་བླ་མ་ཞེས་པའི་ཡང་སྲིད་ངོས་འཛིན་བྱེད་པའི་རིག་གནས་འདིར་དུས་རབས་ཁ་ཤས་ཀྱི་ལོ་རྒྱུས་ལས་མེད། ཡང་སྲིད་མུ་མཐུད་ནས་འཚོལ་མིན་དེ་བོད་མི་རིགས་ཀྱིས་ཐག་གཅོད་གནང་དགོས་ལ། ཏཱ་ལའི་བླ་མའི་ཡང་སྲིད་མུ་མཐུད་དུ་དགོས་མིན་ཐག་གཅོད་གནང་རྒྱུ་བོད་མི་རིགས་ཁོ་ནར་ཡོད་པའི་ཐོབ་ཐང་ཡིན། ཞེས་གསུངས་ཡོད་འདུག

   ཚེས་ ༡༧ ཉིན་གོང་ས་མཆོག་ལྡི་ལིའི་ཛཱ་མི་ཡ་ཁ་ཆེ་རིག་གཞུང་གཙུག་ལག་སློབ་གཉེར་ཁང་དང༌། ཁེ་ན་ཌ་མཱེག་གེལ་ཆོས་ལུགས་རིག་པའི་གཙུག་ལག་སློབ་གྲྭ་ཆེན་མོ་གཉིས་ནས་གོ་སྒྲིག་བྱས་པ། དགུ་བའི་བཅུ་གཅིག་རྗེས་ཀྱི་འཛམ་གླིང་ཆོས་ལུགས་ཞེས་པའི་ཚོགས་ཆེན་གྱི་སྐུ་མགྲོན་གཙོ་བོར་ཆིབས་བསྒྱུར་བསྐྱངས་ཏེ་གསུང་བཤད་གནང་ཡོད་པ་དང༌། ཚོགས་ཆེན་འདིའི་ཐོག་༧གོང་ས་མཆོག་གིས་གསུངས་དོན། རྒྱལ་སྤྱིའི་སྟེང་གི་དཀའ་རྙོག་ མང་པོ་ཞིག་ཆོས་ལུགས་ཀྱིས་བཟོས་པ་ཡིན་པར་ངོས་འཛིན་བྱེད་ཀྱིན་ཡོད་ཀྱང༌། དོན་དངོས་ཐོག་གང་ཟག་སྒེར་གྱི་བསམ་བློ་འཁྱེར་སོ་ལས་དཀའ་རྙོག་དང་འཐབ་འཛིང་འབྱུང་གི་ཡོད་པ་ལས། ཆོས་ལུགས་ཀྱིས་དཀའ་རྙོག་བཟོས་པ་རེད་ཅེས་བཤད་ན་དངོས་ཡོད་དང་མཐུན་པ་ཞིག་མིན་ཅེས་གསུངས་ཡོད་ལ། ཁོང་གིས་མུ་མཐུད་ནས། དཀའ་རྙོག་ དང་འཐབ་འཛིང་གང་འདྲ་ཞིག་ཡིན་ཡང་ཕྱོགས་གཉིས་ཀྱི་མོས་མཐུན་བྱུང་རྗེས་གཞི་ནས་མཇུག་སྒྲིལ་ཐུབ་ངེས་ལ། ངོས་ཀྱིས་བོད་རྒྱའི་དཀའ་རྙོག་ཡང་ཕན་ཚུན་གཉིས་ཆར་མོས་མཐུན་ཡོད་པ་དང་ཕན་ཚུན་གཉིས་ཆར་རྒྱལ་ཁ་ཡོད་པ་ཞིག་གི་ཐོག་ནས་སེལ་ཐུབ་པར་རེ་བ་བྱེད་ཀྱིན་ཡོད། ཅེས་གསུངས་ཡོད་རེད། ཉིན་འདིར་༧གོང་ས་མཆོག་གིས་ཉིན་འདི་དག་རིང་གི་ ཨི་སི་རེལ་དང་པཱ་ལི་སི་ཐན་བར་གྱི་དམག་འཁྲུག་ཀྱང་མཚམས་འཇོག་བྱ་དགོས་པའི་འབོད་སྐུལ་ཞུས་ཡོད་འདུག 

    གོང་ཚེས་ཉིན་གྱི་ཕྱི་དྲོ་༧གོང་ས་མཆོག་མཱ་རྡའུ་བའོ་སེན་རྡི་ཡི་རྗེས་དྲན་ཚོགས་འདུའི་ཐོག་ཕེབས་ཤིང༌། དེར་རྒྱ་གར་གྱི་ཆབ་སྲིད་ཚོགས་པ་ཁག་གི་དབུ་ཁྲིད་དང༌། བཟོ་གྲྭ་ཁག་གི་མགོ་ཁྲིད་སོགས་གནད་ཡོད་མི་སྣ་མང་པོ་མཉམ་དུ་འཛོམས་ཡོད་པ་དང༌། ཚོགས་འདུ་འདིའི་བརྗོད་གཞི་འཚེ་བ་མེད་པ་ནི་འཐབ་ཇུས་ཀྱི་ལག་ཆ་ཡིན་ཞེས་པའི་ཐད་གསུངས་དོན།  འཇིགས་སྐུལ་རིང་ལུགས་པར་ ཞི་བའི་སྒོ་ནས་འཐབ་རྩོད་བྱས་ཚེ་དུས་ཡུན་ཐུང་ཐུང་ཞིག་གི་ནང་དུ་དཀའ་རྙོག་སེལ་ཐབས་མེད་པས། ད་ལྟ་ནས་མ་འོངས་པའི་མི་རབས་ཚོས་དྲག་སྤྱོད་དང་འཇིགས་སྐུལ་གྱི་བྱ་སྤྱོད་མི་སྤེལ་ཆེད།  བྱིས་པ་ཚོའི་རྒྱུད་ལ་འཚེ་བ་མེད་པ་དང་ཞི་བདེའི་ས་བོན་འདེབས་དགོས་པ་རེད། རྒྱ་གར་ནང་དུ་འཚེ་བ་མེད་པའི་གཞུང་ལུགས་ཀྱི་ལྟ་གྲུབ་སྔར་ནས་ཡོད་པ་དང༌། བདག་ཉིད་ཆེན་མོ་གྷན་དྷི་མཆོག་གིས་འཚེ་མེད་ཞི་བ་ལག་ལེན་ངང་རྒྱལ་ཁབ་འདིའི་རང་དབང་སླར་གསོ་ཐུབ་པ་བྱུང་ཡོད།  གྷན་དྷྀ་ཡི་མཛད་རྗེས་དེ་ལ་བརྟེན་ནས་ཨ་རིའི་སྤྱི་དམངས་ཐོབ་ཐང་འཐབ་རྩོད་པ་མཱ་དྷར་ལུའི་དྷར་ཁེན་དང་ལྷོ་ཨབ་རི་ཁའི་ནེལ་སན་མཱན་ཌ་ལ་ལྟ་བུའི་རླབས་ཆེན་གྱི་སྐྱེས་བུ་གང་མང་བྱུང་ཡོད་པས། རྒྱ་གར་མི་དམངས་ཀྱིས་འཚེ་བ་མེད་པའི་རིག་པའི་གཞུང་ལུགས་རྩ་ཆེན་འདི་རྒྱལ་སྤྱིའི་སྒང་ལ་ཁྱབ་སྤེལ་གཏོང་ཐུབ་པ་གནང་དགོས་ཅེས་བཀའ་སློབ་བསྩལ་ཡོད་འདུག 

   ཉིན་འདིར་གསར་འགོད་པ་ཚོས་༧གོང་ས་མཆོག་གི་ཡང་སྲིད་སྐོར་བཀའ་འདྲི་ཞུས་སྐབས།  ཁོང་གིས། ད་ལྟའི་ཆར་ངོས་ཀྱི་གཟུགས་གཞི་བདེ་ཐང་ཡིན་པས་ཡང་སྲིད་ཀྱི་ཐད་ལ་བྲེལ་བ་ལངས་དགོས་པ་མི་འདུག མི་ཁ་ཤས་ཀྱིས་ཏཱ་ལའི་བླ་མའི་ཡང་སྲིད་ངོས་འཛིན་བྱེད་པའི་རིག་གནས་འདི་བོད་མི་རིགས་ལ་ཧ་ཅང་གལ་ཆེན་པོ་ཞིག་རེད་བསམ་གྱིན་ཡོད་མོད། འོན་ཀྱང་དེ་བདེན་པ་མ་རེད། དུས་སྐབས་ཁ་ཤས་ལ་ཏཱ་ལའི་བླ་མ་ཞེས་པའི་སྐུ་ཕྲེང་རིམ་བྱོན་འདི་བོད་མི་རིགས་ཀྱི་རིག་གཞུང་དང་རྒྱལ་ཁབ་ཀྱི་མཚོན་རྟགས་ལྟ་བུར་ཆགས་ཡོད་ཀྱང༌།  གནའ་རྫས་རྟོག་ཞིབ་པས་འཚོལ་རྙེད་བྱུང་བ་ལྟར་ན། བོད་མི་རིགས་ལ་མ་མཐར་ཡང་ལོ་ངོ་སྟོང་ཕྲག་ ༡༠ ནས་ ༢༠ བར་གྱི་ལོ་རྒྱུས་ཡོད་པ་དང༌། ནང་བའི་ཆོས་ལ་ལོ་ངོ་ ༡༥༠༠ ལྷག་གི་ལོ་རྒྱུས་ཡོད། ཡིན་ན་ཡང་ཏཱ་ལའི་བླ་མ་ཞེས་པའི་སྐུ་ཕྲེང་ལ་དུས་རབས་ཁ་ཤས་ཀྱི་ལོ་རྒྱུས་ལས་མེད། ཡང་སྲིད་མུ་མཐུད་དུ་འཚོལ་མིན་དེ་བོད་མི་རིགས་ཀྱིས་ཐག་གཅོད་བྱེད་དགོས་ལ། ཏཱ་ལའི་བླ་མའི་ཡང་སྲིད་མུ་མཐུད་དུ་དགོས་མིན་ཐག་གཅོད་དེ་བོད་མི་རིགས་ཁོ་ནར་ཡོད་པའི་ཐོབ་ཐང་ཡིན། ཞེས་གསུངས་ཡོད་འདུག

༧གོང་ས་མཆོག་གིས་ཚེས་ ༡༤ བར་ཝ་རཱ་ནཱ་སི་རུ་ཆོས་ཞུ་བ་ཁྲི་ ༢ དང་ ༥༠༠༠ ལྷག་ལ་གསུངས་ཆོས་གནང་གྲུབ་རྗེས། ཚེས་ ༡༥ ཉིན་ཝརཱ་ནཱ་སིའི་བོད་ཀྱི་གཙུག་ལག་སློབ་གཉེར་ཁང་གི་གོ་སྒྲིག་འོག  ཆོས་དང་ཚན་རིག་བར་གྱི་རྒྱལ་སྤྱིའི་མཁས་པའི་བགྲོ་གླེང་ཚོགས་ཆེན་དབུ་འབྱེད་གནང་བ་དང༌། ཁོང་གིས་ཚོགས་ཐོག་ནས།  དེ་རིང་མཚན་ཉིད་རིག་པ་དང་མི་རིགས་སོགས་བྱེ་བྲག་པ་ཞིག་གི་སྐད་ཆ་བཤད་ཀྱིན་མེད་པར་མི་འབོར་དུང་ཕྱུར་ ༡༢ ཀྱི་གནད་དོན་ཐད་བགྲོ་གླེང་བྱེད་དགོས་ཀྱིན་ཡོད་པ་རེད། བགྲོ་གླེང་སྐབས་ཀྱི་གནད་དོན་མང་པོ་ཞིག་མི་འབོར་དུང་ཕྱུར་ ༡༢ ཀྱི་བྱུང་འཕེལ་དང་འབྱུར་འགྱུར་གྱི་འཚོ་གནས་ལ་ཕན་ཐོགས་གང་ཡོད་སོགས་ཀྱི་ཐད་ལ་བགྲོ་གླེང་བྱ་དགོས་ཀྱིན་ཡོད་ལ།  དུས་རབས་ཉེར་གཅིག་འདིའི་ནང་དུ་ང་ཚོས་འདས་ཟིན་པའི་དུས་རབས་ནང་གི་ཉམས་མྱོང་རྣམས་ཕྱོགས་བསྡོམས་ཀྱིས་འཚེ་བ་མེད་པ་དང་ཞི་བདེ་ཡོང་བའི་ཕྱོགས་ལ་འབད་བརྩོན་གནང་དགོས་པ་སོགས་ཀྱི་སྐོར་བཀའ་སློབ་བསྩལ་ཡོད་འདུག  ཚེས་ ༡༧ ཉིན་གསུང་ཆོས་གོ་སྒྲིག་ཚོགས་ཆུང་དང་བརྟན་བཞུགས་འབུལ་མཁན་རྣམས་ཀྱི་ཆིབས་སྐྱེལ་འོགཝ་རཱ་ནཱ་སིའི་གནམ་ཐང་བརྒྱུད་ལྡི་ལིར་ཆིབས་བསྒྱུར་བསྐྱངས་ཡོད་པ་དང༌།  གསུང་ཆོས་གོ་སྒྲིག་ཚོགས་ཆུང་གི་ཚོགས་གཙོ་བཀའ་ཟུར་ཨ་ལགས་འཇིགས་མེད་ལགས་ཀྱིས་ངོ་སྤྲོད་གནང་བ་ལྟར་ན། ཆོས་ཞུ་བ་གྲྭ་བཙུན་ཁྱོན་ ༨༠༠༠ ལྷག་ཡོད་པ་དང༌། གསུང་ཆོས་ཉིན་ ༧ རིང་ལ་གྲྭ་བཙུན་ཚོར་སྐུ་འགྱེད་སྒོར་ ༢༠༠༠ ཙམ་རེ་ཕུལ་ཡོད་འདུག་ལ། གསུང་ཆོས་དང་བརྟན་བཞུགས་གཉིས་ལ་ཞལ་འདེབས་ཁྱོན་རྒྱ་གར་དངུལ་འབུམ་ ༢༡༨ ལྷག་འབྱོར་ཡོད་པ་དང་དེའི་ནང་གི་དངུལ་འབུམ་ ༡༨༠ ལྷག་ཐེངས་འདིའི་གསུང་ཆོས་ཀྱི་འགྲོ་སོང་ལ་བཏང་བ།  ལྷག་ཡོད་པའི་དངུལ་འབུམ་ ༣༠ ཙམ་སྐུ་སྒེར་ཡིག་ཚང་ལ་འབུལ་གྱིན་ཡོད་འདུག་ལ།  གསུང་ཆོས་དང་བརྟན་བཞུགས་སྦྱིན་བདག་ཁོངས་ཀྱི་བྱང་རྩེ་བླ་སྦྲུལ་ལྷན་ཚོགས་ནས་སླར་ཡང་༧གོང་ས་མཆོག་ལ་གསུང་ཆོས་བསྩོལ་བའི་སྙན་ཞུ་ཞིག་ཕུལ་ཡོད་འདུག 

གསུང་ཆོས་གནང་རིང་ལ་༧གོང་ས་མཆོག་གིས་སྔ་དགོང་ཆུ་ཚོད་ནམ་ཡོད་ལ་ཆོས་ཞུ་བར་ཕེབས་པའི་སོག་པོ་དང༌། རྒྱ་རིགས། ཧི་མ་ལ་ཡའི་རི་རྒྱུད་ཀྱི་མི་དམངས།  ཕྱི་རྒྱལ་སོགས་ནས་ཕེབས་པའི་ཚོ་ཁག་མང་པོ་དང་མཉམ་དུ་མཇལ་འཕྲད་དང་སྐུ་པར་སྐྱོན་པ་སོགས་གནང་ཡོད་འདུག ༧གོང་ས་མཆོག་གིས་ཧི་མ་ལ་ཡའི་རི་རྒྱུད་ནས་ཕེབས་པའི་ཆོས་ཞུ་བ་ཚོར་དམིགས་བསལ་གྱིས་གསུངས་དོན། ཧི་མ་ལ་ཡའི་རི་རྒྱུད་ཀྱི་ནང་པའི་མི་རིགས་རྣམས་དང་བོད་མི་ཚོ་ནི་ལོ་ངོ་སྟོང་ཕྲག་མང་པོར་ཁྱིམ་མཚེས་དང་རིག་གཞུང་གཅིག་གྱུར་གྱི་འོག་ནས་མཛའ་འབྲེལ་ཟབ་མོ་ཡོད་པ་དང༌། རང་དབང་གི་ལུང་པར་ཡོད་པའི་ཧི་མ་ལ་ཡའི་རི་རྒྱུད་ཀྱི་ནང་པ་ཚོས་དུས་རབས་གོང་མ་དག་གི་ནང་ཆོས་ཀྱི་སྙིང་པོ་རྣམས་རྒྱུད་འཛིན་དང་གཅེས་འཛིན་གནང་དགོས་ལ། ཧི་མ་ལ་ཡའི་རྒྱུད་དང་བོད་ཡུལ་གཉིས་ཀྱི་ཁོར་ཡུག་སྲུང་སྐྱོབ་གནང་བར་ཧི་མ་ལ་ཡའི་རི་རྒྱུད་ཀྱི་མི་རིགས་རྣམས་ལ་དམིགས་བསལ་གྱི་འགན་འཁྲི་ཡོད་པར་གསུངས་ཡོད། རྒྱལ་སྤྱིའི་སྒང་གི་ཞི་བདེ་ལ་དགའ་མཁན་དང་རང་དབང་རྩོད་ལེན་པ་མང་པོས་བོད་དོན་ལ་རྒྱབ་སྐྱོར་དང་ཐུགས་སྣང་གནང་གི་ཡོད་པ་དང༌། སྤྱི་ལོ་ ༢༠༠༨ ལོའི་ཟླ་ ༣ པའི་ནས་བཟུང་བོད་དུ་ཞི་རྒོལ་བྱུང་བ་ནས་རྒྱ་རིགས་བློ་མཐུན་ཚོས་ཀྱང་བོད་དོན་ཐད་གོ་རྟོགས་དང་རྒྱུས་ལོན་བྱས་ཏེ་རྒྱབ་སྐྱོར་དང་ཐུགས་སྣང་གནང་མཁན་མང་དུ་ཕྱིན་ཡོད། ང་ཚོས་རྒྱུ་རྐྱེན་མང་པོའི་འོག་ནས་རང་གི་སེམས་ཤུགས་དང་སྙིང་སྟོབས་མ་ཉམ་པ་བྱེད་ཀྱིན་ཡོད་ལ། ལྷག་པར་དུ་ང་ཚོས་ཁྱེད་རང་ཆོས་གྲོགས་ཚོའི་རྒྱབ་སྐྱོར་རྙེད་བྱུང༌། མི་ལོ་ ༥༠ འདིའི་རིང་ལ་བཙན་བྱོལ་བོད་གཞུང་གིས་གང་ཅིའི་ཐད་ལ་ཧུར་བརྩོན་ཆེན་པོ་བྱས་ཡོད་ལ། ད་དུང་ཡང་མུ་མཐུད་ནས་འཐུས་ཤོར་སོང་བ་དེ་དག་ལ་བཅོས་བསྒྱུར་གྱིས་ཤུགས་རྒྱག་གི་ཡོད་ཅེས་ཧི་མ་ལ་ཡའི་རི་རྒྱུད་ནས་ཕེབས་པའི་མི་མང་རྣམས་ལ་གསུང་ས་ཡོད་འདུག 

ད་ལོར་གསུང་ཆོས་གོ་སྒྲིག་པ་ཚོས་བོད་ནས་འབྱོར་བའི་ཆོས་ཞུ་བ་ ༣༠༠ ལྷག་ལ་སྣེ་ལེན་ཁང་ཞིག་གོ་སྒྲིག་བྱས་ཡོད་པས་བོད་འབྱོར་ཆོས་ཞུ་བ་ཚོར་སྡོད་གནས་ལ་དཀའ་ངལ་མེད་པ་དང་འགྲོ་གྲོན་ཇེ་ཉུང་ལ་བཏང་བ་སོགས་ཕྱོགས་ཡོངས་ནས་སྟབས་བདེ་རུ་གྱུར་འདུག་ཡོད་འདུག ཚེས་ ༡༤ ཉིན་གསུང་ཆོས་གོ་སྒྲིག་ཞུ་མཁན་ཁག ༥ དང༌། སི་ལི་གུའུ་ཡི་སའ་ལུའུ་གྷ་ར་རུ་ཡོད་པའི་སྲད་རྒྱུད་གྲྭ་ཚང་གི་མ་དགོན་བཅས་ནས་བརྟན་བཞུགས་ཤིག་ཕུལ་ཡོད་པ་དང༌། འདིའི་ཐད་ལ་དབུས་གཞོན་ནུ་ཚོགས་གཞོན་དོན་གྲུབ་རྡོ་རྗེས་ལགས་ཀྱིས་འདི་གའི་གསར་ཁང་ལ་བརྗོད་དོན། ལོ་སྔོན་མའི་ཟླ་ ༧ པར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་མི་ནཱ་ལི་ནས་འཚོགས་སྐབས།  དེར་གཞོན་ནུའི་ས་གནས་ཚོགས་གཙོ་ཚོར་༧གོང་ས་མཆོག་ལ་གཞོན་ནུ་ལྷན་ཚོགས་ཀྱི་ངོས་ནས་བརྟན་བཞུགས་རྒྱས་པོ་ཞིག་འབུལ་རྒྱུའི་བསམ་ཚུལ་བྱུང་ལ།  སྐབས་དེར་༧གོང་ས་མཆོག་གི་སྐུ་ཁམས་བདེ་མིན་བྱུང་བ་སོགས་ཀྱིས་གཞོན་ནུ་ལྷན་ཚོགས་ཀྱི་༧གོང་ས་མཆོག་ལ་བརྟན་བཞུགས་འབུལ་རྒྱུའི་གྲོས་ཆོད་བཞག་ཡོད་པ་རེད།  དེ་རྗེས་སྒུ་སྐེར་ཡིག་ཚང་ལ་སྙན་ཞུ་ཕུལ་ཡོད་ཀྱང་ཐེངས་འདིར་སྒུ་སྐེར་ཡིག་ཚང་ནས་དགོན་པ་དང་ཚོགས་སྡེ་གཞན་པ་དང་མཉམ་དུ་གོ་སྒྲིག་བྱས་འདུག  ང་ཚོར་བརྟན་བཞུགས་རྒྱས་པོ་འབུལ་བར་གདམ་ག་དང་གོ་སྐབས་མ་བྱུང་བར་སྐུ་སྒེར་ཡིག་ཚང་གི་གོ་སྒྲིག་ལྟར་འབུལ་དགོས་བྱུང༌། ཞེས་གསུངས་བྱུང༌།  ཁོང་གིས་མུ་མཐུད་ནས།  ཐེངས་འདིར་ཁེ་ན་ཌའི་རྒྱལ་སའི་ས་གནས་གཞོན་ནུའི་རྒྱུན་ལས་དང༌།  ཨ་རིའི་རྒྱལ་སའི་ས་གནས་གཞོན་ནུའི་རྒྱུན་ལས། རྒྱ་བལ་འབྲུག་གསུམ་གྱི་ས་གནས་གཞོན་ནུའི་རྒྱུན་ལས་སོགས་ཁྱོན་བསྡོམས་ས་གནས་ཁག་གི་རྒྱུན་ལས་ ༡༨༠ ལྷག་ཕེབས་ཡོད།  ད་ཐེངས་ཀྱི་བརྟན་བཞུགས་འདི་ནི་༧གོང་ས་མཆོག་ལ་གཞོན་ལྷན་ངོས་ནས་བརྟན་བཞུགས་འབུལ་ཐེངས་ ༣  པ་ཡིན་ལ། གཞོན་ནུ་ལྷན་ཚོགས་ཀྱི་ངོས་ནས་བརྟན་བཞུགས་འབུལ་བ་ཙམ་ཁོ་ན་མ་ཡིན་པར་འབྱུང་འགྱུར་མུ་མཐུད་ནས་གཞོན་ནུ་ཚོགས་པའི་རྩ་བའི་ལངས་ཕྱོགས་ལ་འགན་བླངས་ནས་གཞོན་ནུ་ཚོགས་པའི་རྩ་བའི་དམིགས་ཡུལ་བཞིན་ལས་དོན་སྒྲུབ་པའི་དམ་བཅའ་ཕུལ་བ་ཡིན་ལ།  ༧གོང་ས་མཆོག་གི་སྐུ་ཚེ་བརྟན་རྒྱུ་དང་རང་གི་དབུ་ཁྲིད་དང་དད་པ་དམ་ཚིག་བརྟན་པོ་མཚོན་བྱེད་དུ་ཡིན། ཞེས་གསུངས་བྱུང༌།