ཨ་རི་དང་ཁེ་ན་ཊའི་བོད་རིགས་སྤྱི་མཐུན་ཚོགས་པ་ཁག་གི་ཐེངས་བཅུ་བའི་ཚོགས་ཆེན་འཚོགས་ཏེ། ད་ལོའི་ལོ་གསར་ལ་སྤྲོད་སྐྱིད་མེད་པ་དང༌། ཕྱི་སྡོད་རྒྱ་རིགས་ཚོ་དང་འབྲེལ་བ་དམ་ཟབ་དུ་གཏོང་རྒྱུ་བཅས་ཐག་གཅོད་བྱུང་ཡོད་འདུག
ཕྱི་ཚེས་ ༡༧ ནས་ ༡༨ བར་གྱི་ཉིན་གཉིས་རིང་ཨ་རིའི་དོན་གཅོད་ཀྱི་གོ་སྒྲིག་འོག བྱང་ཨ་རི་ཁུལ་གྱི་བོད་རིགས་སྤྱི་མཐུན་ཚོགས་པ་ཁག་གི་ལོ་གཉིས་རེ་མཚམས་ཀྱི་ཚོགས་ཆེན་ཐེངས་ ༡༠ དེ་ཁེ་ན་ཊའི་གྲོང་ཁྱེར་ཁྲོ་རན་ཁྲོ་བོད་ཀྱི་རིག་གཞུང་ལྟེ་གནས་ཁང་དུ་འཚོགས་ཡོད་པ་དང༌། ཚོགས་ཆེན་དེའི་སྟེང་ཨ་རི་དང་ཁེ་ན་ཊའི་ས་གནས་ཁག་ ༢༥ ནས། དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་དང་བོད་མི་དམངས་སྤྱི་འཐུས་བསྟན་འཛིན་ཆོས་ལྡན་གཙོ་བྱས་པའི་ཚོགས་བཅར་བ་མི་གྲངས་ ༣༤ ཙམ་ཚོགས་ཞུགས་གནང་ཡོད་འདུག ཚོགས་ཐོག་ནས་ད་ལོ་བོད་ནང་གི་དོན་རྐྱེན་ཁྲོད་འདས་གྲོངས་སུ་སོང་བའི་རྒྱལ་གཅེས་དཔའ་བོ་དཔའ་མོ་དག་དང༌། རྡུང་རྡེགས་མནར་གཅོད་འོག་དཀའ་སྡུག་མྱངས་དང་མྱོང་བཞིན་པའི་བྱེས་སྲུང་སྤུན་ཟླ་རྣམས་ཀྱི་ཆེད་དུ། ཨ་རི་དང་ཁེ་ན་ཊའི་བོད་རིགས་སྤྱི་མཐུན་ཚོགས་པ་ཡོངས་ཀྱིས་མྱ་ངན་གུས་འདུད་དང༌། བཀའ་དྲིན་རྗེས་དྲན་མཚོན་ཆེད་ད་ལོའི་ལོ་གསར་ལ་ཐུགས་སྤྲོ་དང་གླུ་གཞས་འཁྲབ་སྟོན་སོགས་མེད་པ་ཐག་གཅོད་བྱུང་ཡོད་འདུག་ལ། གཞན། བོད་མིའི་རང་དབང་དཔྱ་ཁྲལ་གཙང་འབུལ་ཡོང་ཐབས་དང་མ་འོངས་པར་བོད་དོན་ལས་འགུལ་སྤེལ་ཕྱོགས། ཕྱི་སྡོད་རྒྱ་རིགས་ཚོ་དང་འབྲེལ་བ་དམ་ཟབ་གཏོང་རྒྱུ་སོགས་ཀྱི་གནད་དོན་ཐད་གྲོས་འཆམ་བྱུང་ཡོད་འདུག
