རྒྱ་ནག་གཞུང་གིས་ཚེས་ ༢༠ ཉིན་སྲིད་འཛིན་ཨོ་བྷ་མ་ལ་རྒྱ་ནག་དང་ཨ་རིའི་བར་གྱི་དམག་དོན་འབྲེལ་བ་ཡར་རྒྱས་གཏོང་རྒྱུར་མཉམ་་འབྲེལ་བྱ་དགོས་པའི་འབོད་སྐུལ་ཞུས་ཡོད་འདུག
རྒྱ་ནག་གིས་དམག་མིའི་ཐད་འགྲོ་སོང་ཤུགས་ཆེན་པོ་གཏོང་རྒྱུ་དང་དམག་དཔུང་རྒྱ་སྐྱེད་གཏོང་རྒྱུ། དེ་བཞིན་རྒྱལ་སྤྱིའི་སྒང་ལ་དམག་དོན་ཐད་ནུས་བ་ཆེ་ལ་གྲངས་ཀ་མང་བའི་ཨ་རི་དང་མཉམ་དུ་དམག་དོན་འབྲེལ་བ་ཡར་རྒྱས་གཏོང་རྒྱུའི་འཆར་གཞི་དང་རེ་འདོད་བྱེད་ཀྱིན་ཡོད་འདུག ཚེས་ ༢༠ ཉིན་རྒྱ་ནག་གིས་སྲིད་འཛིན་ཨོ་བྷ་མ་མཆོག་ལ་རྒྱ་ནག་གི་བདེ་སྲུང་ལྷན་ཁང་དང་ཨ་རིའི་བདེ་སྲུང་ལྷན་ཁང་བར་འབྲེལ་བ་ཡར་རྒྱས་གཏོང་རྒྱུའི་རེ་སྐུལ་ཞུས་ཡོད་པ་དང༌། འདིའི་ཐད་ལ་རྒྱ་ནག་བདེ་འཇགས་ལྷན་ཁང་གི་མགྲིན་ཚབ་པ་ཧུའུ་ཁྲང་མེན་གྱིས། རྒྱལ་སྤྱིའི་སྒང་ལ་དམག་དོན་ཡར་རྒྱས་མགྱོགས་པོར་འགྲོ་བཞིན་པའི་རྒྱ་ནག་གིས་དམག་དོན་ཐད་ཡར་རྒྱས་ཆེ་ལ་དམག་མིའི་གྲངས་ཀ་མང་བའི་ཨ་རི་དང་མཉམ་དུ་དམག་དོན་འབྲེལ་བ་ཡག་པོ་ཡོང་བར་རེ་བ་བྱེད་ཀྱིན་ཡོད། ཅེས་བརྗོད་ཡོད་འདུག ཁོས་ད་ལྟའི་ཆར་རྒྱ་ནག་དང་ཨ་རིའི་དམག་དོན་འབྲེལ་བར་དཀའ་ངལ་འཕྲད་ཡོད་པ་དང༌། ང་ཚོས་ཨ་རིའི་བདེ་འཇགས་ལྷན་ཁང་ལ་དཀའ་ངལ་འདི་འཕྲལ་དུ་སེལ་ཐབས་བྱ་རྒྱུ་དང༌། ཕྱོགས་གཉིས་ནས་རྒྱལ་ཁབ་གཉིས་ཀྱི་དམག་དོན་འབྲེལ་བ་ཞི་བདེ་ངང་ཡར་རྒྱས་གཏོང་བར་འབོད་སྐུལ་ཞུས་ཡོད་ཅེས་དམག་དོན་སྲིད་བྱུས་ཐད་ཀྱི་གསར་འགོད་ལྷན་ཚོགས་ཤིག་གི་སྐབས་བཤད་ཡོད་འདུག
དམག་དོན་སྲིད་བྱུས་དེའི་ནང་དུ་གསལ་བ་ལྟར་ན། རྒྱ་ནག་གིས་མུ་མཐུད་ནས་ཨ་རི་དང་ཐའེ་ཝན་བར་ལ་རྡུལ་ཕྲན་མཚོན་ཆའི་ཚོང་འབྲེལ་ཡོད་པར་ངོ་རྒོལ་བྱ་རྒྱུ་ཡིན་ཚུལ་འཁོད་ཡོད་འདུག རྒྱ་ནག་དང་ཨ་རི་གཉིས་ཀྱི་ལོ་ངོ་ ༣༠ ལྷག་གི་འབྲེལ་བའི་ཁྲོད་ནས་ཨ་རིའི་སྲིད་འཛིན་རེ་རེའི་སྐབས་སུ་ཐའེ་ཝན་ལ་དམག་ཆས་ཉོ་ཚོང་བྱེད་བཞིན་པ་དེ་ནི་རྒྱ་ནག་གིས་ཨ་རིར་ངོ་རྒོལ་བྱེད་གཞི་ཞིག་ལ་ཆགས་ཡོད་ལ། རྒྱ་ནག་གིས་དེ་ནི་ཐའེ་ཝན་དང་རྒྱ་ནག་གི་འབྲེལ་བ་སླར་གསོ་བྱེད་པར་བཀག་འགོག་ཞིག་ཏུ་ངོས་འཛིན་བྱེད་ཀྱིན་ཡོད་པ་རེད། རྒྱ་ནག་བདེ་འཇགས་ལྷན་ཁང་གི་བློན་ཆེན་གྱིས་ལོ་སྔོན་མར་ཐའེ་ཝན་གྱིས་ཨ་སྒོར་དུང་ཕྱུར་ ༦ དང་ཕྱེད་ཀས་དམག་ཆས་ཉོ་སྒྲུབ་བྱ་འཆར་དེ་བཀག་འགོག་བྱས་ཡོད་པ་དང༌། དམག་ཆས་ཚོང་ལས་དེ་དག་གི་ནང་དུ་མེ་ཤུགས་འཕུར་མདའ་དང༌། ཨབ་བྷེ་ཆི་རྟགས་ཅན་གྱི་ཐད་འཕུར་གནམ་གྲུ། ཨ་རི་དང་ཐའེ་ཝན་བར་གྱི་ཆེས་མཐོ་མི་སྣའི་འཚམས་འདྲི་དང་བསམ་བློ་བརྗེ་རེས་ཀྱི་བྱ་འགུལ་སོགས་འདུས་ཡོད་འདུག
ལོ་སྔོན་མར་མཱ་ཡུན་ཅིག་ཐའེ་ཝན་གྱི་སྲིད་འཛིན་ལ་བདམས་པ་ནས་ཐའེ་ཝན་དང་རྒྱ་ནག་བར་གྱི་འབྲེལ་བ་ཇེ་ལེགས་སུ་སོང་ཡོད་པ་དང༌། མཱ་ཡུན་ཅིག་གིས་ཚོང་ལས་དང་དམག་དོན་གང་གི་ཆ་ནས་ཀྱང་རྒྱ་ནག་གཞུང་དང་བསྟུན་ཐབས་བྱེད་ཀྱིན་ཡོད་འདུག ཧུའུ་ཁྲང་མེན་གྱིས་འདིའི་ཐད་ལ་ཐའེ་ཝན་དང་རྒྱ་ནག་གི་འབྲེལ་བ་སླར་གསོ་བྱས་ཡོད་པ་དང་འབྲེལ་བ་དེ་ཡང་ཡིད་ཆེས་རུང་བའི་སྒོ་ནས་ཡར་རྒྱས་སུ་འགྲོ་གིན་ཡོད་ཚུལ་བཤད་ཡོད་པ་རེད།
རྒྱ་ནག་གི་དམག་དོན་སྲིད་བྱུས་དེའི་ནང་དུ་ ༢༠༠༩ ལོར་རྒྱ་ནག་གི་དམག་མི་ས་ཡ་ ༢ དང་འབུམ་ ༣ གྱི་ཐོག་ལ་འགྲོ་སོང་ཅི་ཙམ་གཏོང་རྒྱུ་སོགས་ཀྱི་འཆར་ཟིན་བཀོད་མེད་ཀྱང༌། ༢༠༠༨ ལོར་དམག་དོན་ཐད་ཨ་སྒོར་དུང་ཕྱུར་ ༥༩ བཏང་ཡོད་པ་དང་དེ་ནི་ ༢༠༠༧ ལས་བརྒྱ་ཆ་ ༡༨ ཀྱིས་འཕར་ཡོད་སྐོར་གསལ་བསྒྲགས་བྱས་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
འདི་ནི་རྒྱ་ནག་གི་ཧམ་སེམས་དང་སྨྲེ་ངག་གཉིས་ཀ་རེད། ཨ་རིས་ཐེ་ཝན་ལ་ཨ་སྒོར་ཐེར་འབུམ་དྲུག་གི་མཚོན་ཆ་བཙོངས་བ་དང་རྒྱ་ནག་གིས་ཨེ་རན་ལ་རྡུལ་ཕྲན་མཚོན་ཆའི་རྒྱུ་ཆ་མཁོ་བསྒྲུབས་བྱས་བ་གཉིས་ཕྱི་གསལ་ནང་གསལ་གྱི་རྣམ་པའི་ཆ་ནས་མ་གཏོགས་ཕན་ཚུན་གཉིས་ཀར་་ཁྱི་སྐྱག་གི་གཙང་བཙོག་རྩོད་རྒྱུ་མེད་ཀྱང་། འདས་བའི་ལོ་ཤས་ནང་ཨ་རིའི་རྒྱལ་སྲིད་ཞིབ་དཔྱོད་ཉེན་རྟོག་FBIཔས་རྒྱ་ནག་གི་གསང་ཉུལ་བས་ཨ་རིའི་དམག་དོན་སྒྲིག་འཛུགས་ཀྱི་དྲ་ཚུགས་འགར་གསང་འཛུལ་དང་ཡིག་ཆ་འགའ་རྐུན་འཁྱེར་བྱེད་བཞིན་པའི་གནས་ཚུལ་ཤེས་རྟོགས་བྱུང་ཏེ་རྒྱ་རིགས་གཅིག་ལ་དུས་བཅད་ཀྱི་ཁྲིམས་ཐག་ཀྱང་བཅད་ཡོད་ལ། རྒྱ་ནག་གི་དམག་དོན་སྲིད་བྱུས་ཀྱི་འགྲོ་གྲོན་ལོ་རེ་བཞིན་འཕར་བཞིན་པར་སྲིད་འཛིན་བྷུ་ཤུས་མཆོག་གིས་ཨོ་རྩལ་འགྲན་འཚོགས་མ་འཚོགས་པའི་སྔ་རོལ་དུ་ཕོ་བྲང་དཀར་པོ་ནས་རྒྱ་ནག་གི་དམག་དོན་འགྲོ་གྲོན་འཕར་ལྕོག་བྱས་པའི་རྩིས་ཁྲ་དག་རྒྱ་ནག་གིས་ཕྱི་གསལ་ནང་གསལ་བཟོ་དགོས་ཞེས་ཉེན་བརྡ་བཏང་ཡོད། རྒྱལ་ཁབ་གཉིས་བར་གྱི་ཕན་ཚུན་ཧ་ཅང་དོན་ཟོན་གྱི་རྣམ་པ་འདིས་དམག་དོན་མཉམ་འབྲེལ་བྱེད་པའི་བར་ཐག་ད་དུང་རིང་ན་ཡང་། འདས་བའི་ལོ་རྒྱུས་ནང་རྒྱ་ནག་དང་ཨ་རིའི་བར་རིག་གནས་དང་དཔལ་འབྱོར་བརྗེས་རེ་བྱས་པའི་དུས་སྐབས་དག་ནི་ཨ་རིའི་དམངས་གཙོ་ཚོགས་པས་སྲིད་དབང་བཟུང་བའི་དུས་ཡུན་དག་ལ་བྱུང་ཡོད་སྟབས་རྒྱ་ནག་གི་རེ་བ་རྟ་རྔ་འདྲ་བ་ཡང་ཏེ་ཇེ་སྦོམ་གྱུར་ཡོད་མོད། སྲིད་འཛིན་ཨོ་བྷ་མ་ཡིས་སྲིད་འཛིན་མཛད་སྒོའི་གཏམ་བཤད་གནང་སྐབས་འཛམ་གླིང་འདིའི་ེསྟེང་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་དང་རྒྱལ་ཁབ་ཀྱི་སྲིད་དབང་སྒེར་གཅོད་བྱེད་མཁན། ལྐོག་ཟ་རུལ་སོང་གིས་འཚོས་བའི་དབང་འཛིན་པ་དག ཁྱོད་ཚོས་རང་ཉིད་ནོར་འཕྲུལ་དང་ནག་ཉེས་ཆེ་བའི་ལོ་རྒྱུས་ཀྱི་གྲུ་ཟུར་ཞིག་དུ་ལངས་ཡོད་པ་ཤེས་བར་གྱིས་ཞེས་གོ་རྒྱུ་ཡོད་པའི་སྐད་ཆ་ཞིག་གསལ་འདེབས་བྱས་ཡོད་པས། སྐད་ཆ་འདི་ལ་རྒྱ་ནག་གིས་ཉན་ཤེས་ན་རྣ་བའི་བདུད་རྩི་བྱེད་དགོས་བ་ལས་ཧམ་པ་བཤད་རྒྱུ་མེད། ལྷག་པར་སྲིད་འཛིན་གསར་བའི་ཕྱག་ལས་འགོ་འཛུགས་པའི་དུས་ཡུན་ཐུང་ཐུང་འདིའི་རིང་ད་དུང་གྷ་རྫ་ལུང་གཞུང་གི་དམག་འཁྲུག་གི་ཐལ་རྡུལ་གཙང་ཡལ་དུ་སོང་མེད་པས་ཨ་རིའི་སྲིད་དོན་པ་ཚོའི་མགོ་རྣ་གཉིས་ཀ་དཀྱིལ་ཤར་ཨེ་ཤ་ཡའི་ནང་ལ་གཏད་ཡོད་ཀྱང་། སྲིད་འཛིན་གསར་བའི་སྐྱོན་བརྗོད་ཀྱི་མཛུབ་མོ་གཉིས་བ་དེ་འཛུགས་ས་ཨེ་རན་དང་ཡང་ན་བྱང་ཀོ་རི་ཡའི་རྡུལ་ཕྲན་མཚོན་ཆའི་ལྟེ་གནས་དག་ཡིན་པའི་ཚོད་དཔག་བྱེད་བཞིན་པའི་སྐབས་འདིར། གཟའ་འཁོར་སྔོན་མའི་རེ་གཟའ་པ་སངས་ཉིན་རྒྱ་ནག་གི་རྒྱལ་སྤྱིའི་འབྲེལ་མཐུད་ལྷན་ཁང་གི་གཙོ་འཛིན་ཝང་ཅོ་རུའུ་གཙོས་བའི་འཐུས་མི་དྲུག་གིས་ཧོའུ་ཅིན་ཐོ་ཡི་འཚམས་འཕྲིན་འཁྱེར་ཏེ་བྱང་ཀོ་རི་ཡའི་སྲིད་བློན་ལ་མཇལ་ཕྲད་བྱས་བ་ཞིག་རྒྱ་ནག་གི་གསར་ལམ་ཁག་ཏུ་བསྒྲགས་ཡོད། འདས་བའི་ལོ་ཕྱེད་རིང་སྲིད་བློན་ཁེམ་ཇོན་ཁོ་རྒྱལ་སྤྱིའི་གསར་ལམ་ཁག་ནས་བོར་ཟིན་ལ། ཐ་ན་བྱང་ཀོ་རི་ཡའི་རྒྱལ་བཙུགས་དུས་ཆེན་གྱི་ཉིན་གྱི་གཞུང་འབྲེལ་མཛད་སྒོའི་སྟེང་དུ་ཡང་ཁོའི་གྲིབ་མ་ཙམ་མཐོང་རྒྱུ་མེད་སྟབས། སྲིད་བློན་ཁོང་ཚེ་འདི་ན་ཡོད་དང་ཕྱི་མར་ཡོད་ཆ་འཚལ་གྱི་མེད་པས་རྒྱལ་སྤྱིའི་གསར་ལམ་ཁག་ཏུ་དྲི་རྟགས་མང་པོ་ཞིག་སླེབས་ཡོད་མོད། ཝང་ཅོ་རུའུ་ཡིས་འདས་བའི་ཟླ་འགའི་རིང་ཁོ་བོ་བྱང་ཀོ་རི་ཡའི་སྲིད་བློན་དང་མཇད་ཕྲད་ཐེངས་འགར་བྱས་བ་ཡིན་ཞེས་བསྒྲགས་ཡོད་པས། རྒྱ་ནག་གི་ལྐོག་ལྐོག་སུལ་སུལ་གྱི་བྱ་སྤྱོད་འདི་ལ་ཨ་རིའི་གཞུང་གིས་དོགས་ཟོན་ཕར་
ཨ་རིས་ཐེ་ཝན་ལ་མཚོན་ཆ་བཙོང་བའི་སྲིད་བྱུས་འདི་ལ་གཟབ་གཟབ་མ་བྱས་ཚེ། ནམ་ཞིག་ཐེ་ཝན་དང་རྒྱ་ནག་གཉིས་གཅིག་སྒྲིལ་བྱས་པའི་ཉིན་མོར་རྒྱ་ནག་གིས་ཨ་རི་རང་གིས་བཙོངས་པའི་མཚོན་ཆ་འདི་དག་བེད་སྤྱོད་བཏང་སྟེ་ཨ་རིར་ཁ་གཏད་མི་འཇལ་བའི་ངེས་པ་ཡོད་པ་མ་རེད། སྲིད་དོན་གྱི་འགྱུར་བ་ཟེར་བ་འདི་ནི་ཡིད་ཆེས་བྱེད་ཐུབ་པ་ཞིག་གཏན་ནས་མ་རེད། རྒྱལ་ཁབ་གཉིས་ཀྱི་ཕྱི་སྲིད་འབྲེལ་བ་དེ་ལོ་ངོ་ལྔ་རེ་གཞིར་བཞག་གིས་ལས་དོན་སྒྲུབ་རྒྱུ་ལས། དེ་ལས་མང་བའི་རྩིས་གཞི་བཏིངས་ནས་ལས་དོན་སྤེལ་བ་ཡིན་ན་རྩིས་གཞི་འཁྲུགས་པའི་ཉེན་ཁ་ཡོད་པ་རེད།